Apostel isht Anumpa 22
22
1Hatak il itibapishi ʋhleha, micha an tikba puta ma! himak a̱ isht hʋchim il anumpohonli li ka, hʋsh haiyaklashke.
2Yʋmmʋt Heblu anumpa ho̱ isht im anumpuli na, okla haklo mʋt, isht i̱ shahlit lumʋt aiasha tok. Mihma yʋmmak ashot,
3Ʋno ʋt Chu hatak fehna sia, Tasʋs, Silisia yakni in tʋmaha ak o̱ ai ʋtta li tok nana kia, tʋmaha ilʋppa Kamiliel iyi itʋma̱ka yo̱ ahantʋt sa hofanti; micha hatak tikba ʋhleha i̱ nan ʋlhpisa ai apissali mʋt, ʋm ʋlbahanchi tok; mihmʋt Chihowa ya̱ pit achunanchi kʋt himak a nitak hʋsh moma kʋt, hʋchi yʋmohmi kak inli chiyuhmi li tok.
4Mihma ilʋppa yakohmi ka nakni, micha ohoyo aiena ka, illa he mak o̱, takchit aboha kʋllo pit apittʋt ilbʋshachi li tok.
5Yohmi ka na holitompa isht a̱sha pehlichi, micha hatak tikba ʋhleha hak kia momʋt ʋm ithaiyana hoke; micha yʋmmak o̱ il itibapishi ʋhleha pit i̱ holisso ka, im ai ishi li hosh, yʋmma a̱sha tuk ʋt talakchi ya̱ Cheluselem a̱ isht ʋla likma, na palʋmmi pisa chi̱ ho̱, Tamaskʋs a̱ ia li tok.
6Atuk o̱ yakohmi tok; nowʋt a̱ya li mʋt, hʋshi ʋt tʋbokoli foka ho̱, Tamaskʋs a̱ ona la̱ hosi ma, ashali̱ka nan tohwikeli chito ʋba minti kʋt ant tommit si afolupli tok.
7Mihma aka ont sa tula cha, anumpa hʋt, Sal, Sal, nanta katiohmi ho̱, is sa̱ palʋmmichi cho? ʋm ahanchi na, haiyaklo li tok.
8Mihmʋt afalaminchit, Kʋta chia hoh cho, Chitokaka ma? achi li ma, Ʋno ak osh Chisʋs Nasalit ai ʋtta mihi yo̱ ish i̱ palʋmmichi ka sia mak oke; ʋm ahanchi tok.
9Mihma si apehʋt a̱ya tuk ʋt tohwikeli hokʋno okla pi̱sa mʋhli cha, nukshopa tok; yohmi kia anumpa auet ʋm anumpuli hokʋno okla ik haklo ki tok.
10Mihma, Chitokaka ma! nanta ko̱ katiohmi la chi̱ ho? achi li tok. Mihma Chitokaka yash ot, Wakaya cha, Tamaskʋs a̱ ish onashke; mikma nana ish a kaniohma he a̱ chim ʋlhpisa tuk ʋt moyuma, yʋmmak o̱ a chim annoa hi oke; ʋm achi tok.
11Mihma tohwikeli yʋmma shohpakali tuk a̱ ak hopanayo hatuk o̱, si apehʋt a̱ya tuk ibbak ak osh sa halʋlli ho̱, a̱yʋt Tamaskʋs a̱ ona li tok.
12Mihma hatak achʋfa ʋbanumpuli nan ʋlhpisa ya̱ isht ai a̱hli, Ananaiʋs osh, Chu ʋhleha yʋmma ai asha ka moma ai im annoa achukma chatuk osh,
13A̱yʋt ʋm ʋla cha hikia mʋt, Itibapishi li Sal ma! ish hoponayashke, ʋm achi tok; mihma hʋshi kanʋlli makinli ho̱, ʋba chakalit ilap a̱ pisa li tok.
14Mihma, Hʋpin tikba ʋhleha in Chihowa yʋt, chishno ʋt ilap o̱ nan ahni ka ish ithaiyana he, mikmʋt A̱hli yʋmma ish pisa cha, yʋmma itakha ai anumpa ma ish hakla hi a̱ chi atokoli tuk oke.
15Chishno ʋt nana ho̱ ish pi̱sa tuk, micha ish ha̱klo tuk aiena kʋt, hatak moyuma ka im anoli chia ha chi̱ mak oka.
16Yohmi kʋt nanta katiohmi ho̱ himak a̱ ish ahchibali cho? wakaya cha, baptismot, Chitokaka ya̱ pit hochihi̱fot, nan chim ai ashʋchika puta kʋt kashofʋt chi̱ kʋniashke; achi tok.
17Atuk o̱ yakohmi tok, falamʋt Cheluselem ash ʋla lish, tempel anu̱kaka ya̱ ʋba pit ai anumpohonli li mʋt, sa holhpokuna chohmi tok.
18Mihma yʋmmak ash ot ʋno ya̱, Nana isht is si ai anoli ka, okla chim aiokpahancha he keyu hoka, tu̱shpa, micha Cheluselem a̱ chekosi ish akohchashke; ʋm ahanchi na pisa li tok.
19Micha ʋno ash ot, Chitokaka ma! chishno chi̱ yimmi ʋhleha hatuk a̱ aboha kʋllo pit apittʋt, sinakak puta ka, a faha̱mi li tuk a̱, okla ithaiyanʋshke.
20Micha Istefin atokowa chi anolit im issish hlatapa ka, ʋno ak kia itomasi ya̱ hiki̱a li tuk osh, yʋmmʋt illa chi̱ ka, ʋlhpesa ahni li mʋt, yʋmma ʋbit ma̱ya ka, im ilefohka ya̱ i̱shi li tok oke; achi li tok.
21Mihma, Hopaki pilla, okla nan ik ithano ʋhleha aiasha kak o̱ pit chi chʋffichi la chi̱ hoka, ish a̱yashke; ʋm achi hokʋno; achi tok.
22Mihma anumpa ilʋppa ʋhli kano okla i̱ haponaklo tok; atuk osh chitolit, Hatak yʋmma chohmi ka, yakni a̱ ai isht ho kanchi, yʋmmak okʋt okcha̱yʋt anta he ʋlhpesa keyu hoka, okla achi tok.
23Micha okla tahpʋlʋt i̱ na fohka puta kash shoelit kampilʋt, lukfi pushi aiena ka pehlit ʋba pilʋt ma̱ya ma,
24Kʋpitʋni chito yʋt yʋmmak ash o̱ holihta kʋllo ya̱ isht ona chi̱ ka, apesa mʋt, anonti yʋmmak ash fʋmmi hosh, nan i̱ ponaklo na, kaniohmi ho̱ okla hʋt isht anumpuli kʋt yohmi fehna hatukma, ilap ʋt akostinincha chi̱ kʋt, miha tok.
25Mihma wak hakshup aseta chuhla ka, okla ishit takchi ma, Pal ash osh kʋpitʋni hʋt bili̱kasi hikia tuk o̱, Lom hatak, micha nan ʋlhpisa yosh ai atokowa keyu ka, ish fʋmma he chim ai ʋlhpesa ho̱? im achi tok.
26Kʋpitʋni ʋt ilʋppa haklo mʋt iʋt, kʋpitʋni chito ya̱ ont im anolit, Nana ish kaniohmi kʋt, ahah! ish ahnashke, ilʋppʋt Lom hatak oka; ahanchi tok.
27Mihma KĘ‹pitĘ‹ni chito ash ot Ę‹la mĘ‹t, Chishno Ę‹t Lom hatak chia ho̱? Ę‹m anolĂ, im achi ma, yĘ‹mmak ash ot, Yau, achi tok.
28Mihma kʋpitʋni chito yash ot afalaminchi mʋt, Ilap inli nan ahni hosh a̱ya ilʋppa, ʋlhtoba chinto ho̱ isht ishi li tok, achi tok; mihma Pal ash ot, Amba ʋno ʋto si ai imoma yosh ʋtta li tok oke, achi tok.
29Yohmi ma yʋmma nan i̱ ponakla he tuk ash ot mih makinli ho̱, ai i̱ filamoli tok; mihma kʋpitʋni chito ash kia, yʋmmak okʋt Lom hatak atuk a̱ akostininchi, micha takchi tuk aiena hatuk osh nukshopa tok.
30Ont onna ma, kaniohmi ho̱ Chu ʋhleha yʋt anumpa ha̱ onochi hatukma atokowa ka akostininchi bʋnna hatuk osh, isht talakchi ya̱ i̱ hotuffi mʋt, na holitompa isht a̱sha pehlichi ʋhleha, micha i̱ nan apesa ʋhleha moyuma kʋt itʋnaha chi̱ ka, apesa tok. Micha Pal ash isht ona cha itikba ya̱ ont hilechi tok oke.
Pal ʋt isht il anumpuli, 1, 10 Pal ʋt atukla aboha kʋllo foka tok. 23 Pal ʋt nahullo mi̱ko Filiks a̱ im ia.
Currently Selected:
Apostel isht Anumpa 22: CHH
Highlight
Share
Copy
Want to have your highlights saved across all your devices? Sign up or sign in
Published by the American Bible Society 1848-1886, reprinted 1913
