Apostel isht Anumpa 21
21
1Mihma yakohmi tok, yʋmmak ash pit il oka topli cha, i̱ mokofʋt auet apissanlit mihintit, Koʋs a̱ e la tuk osh, nitak atu̱kla ma Lotis a̱ e la; atuk osh yʋmma a̱shwʋt Patela ya̱ e la tok.
2Micha peni ʋt Finishi ya̱ ia hosh a̱ya ka e pisa mʋt, ont e chukowa cha, e ma̱ya tok.
3Atuk osh Saipilʋs ʋt auet pi̱ haiaka mʋt, yʋmmak ash pim ʋlhfʋbeka imma yo̱ talaia na, ont il ia mʋt, Silia ya̱ il ona cha, Taia yak o̱ ont il ataya tok; peni na shali ka yʋmmak o̱ ont akohcha wiha chi̱ hatuk o̱.
4Micha yʋmma nan ithʋna ʋhleha ya̱ ont il ai ahayuchi mʋt, il a̱shwa na nitak untuklo tok; yʋmmak osh Pal a̱ Cheluselem ik aiyo ka hi a̱, Shilombish pulla hatuk mak o̱, im achi tok.
5Nitak yʋmmak ash ot ont pin taiyaha mʋt, pishno ash ot kohchʋt pi̱ hina fohkʋt il ia ma, momʋt tekchi ʋhleha, micha im ʋlla puta aienʋt pi apehʋt pisht a̱ya na, tʋmaha ha̱ ant e kohcha tok; mihma oka takchʋka ya̱ hʋchukbihlepʋt e hieli cha, ʋba pit il anumpuli tok.
6Atuk osh okla it aiokpʋchit pin taiyaha ma, peni pit il ʋlhto ma, yʋmmak ash ot falamʋt, in chuka ilhkoli tok.
7Atuk o̱ peni fohkʋt, Taia a̱sht e minti tuk ʋt ont pim ai ʋhli mʋt, Talimeis a̱ e la cha, il itibapishi ʋhleha ya̱ ant il aiokpachi cha, nitak achʋfa ho̱ takla il a̱shwa tok.
8Atuk osh ont onna ma, Pal a̱ apeha pia hatuk ʋto kohchʋt iʋt, Sesalia ya̱ e la tok; micha Filip ʋbanumpa isht ʋtta, yʋmmak osh untuklo kash aiena hatuk ash, in chuka ont e chukowa cha apehʋt e ma̱ya tok.
9Mihma hatak yʋmmʋt ushetik ohoyo himita ushta hosh im a̱shwa tuk osh, ʋbanumpa isht anumpuli tok.
10Micha yʋmma il a̱sha na nitak kanohmi ma, hopaii achʋfa Akebʋs hohchifo hosh Chutia mintit ʋla tok.
11Micha yʋmmak ashot a̱yʋt pim ʋla mʋt, Pal im ʋskofʋchi yash ishi cha, ilap ibbak micha iyi aiena ka isht takchi mʋt, Hatak ʋskofʋchi ilʋppʋt immi yatukma, Chu ʋhleha Cheluselem aiasha kʋt yakohmichit takchi cha, ishit okla nan ik ithano ibbak a̱ a fohka hi oke; Shilombish Holitopa yʋt achishke; ahanchi tok.
12Mihma ilʋppa okla e haklo mʋt, pishno ash ot yʋmmak inli a̱sha yatuk pit il aienʋt, Cheluselem a̱ ik aiyo ka hi a̱, okla il im ahni tok.
13Mihma Pal ʋt afalaminchi mʋt, Katiohmi ho̱ hʋsh ahni hosh ya̱iyʋt sa chu̱kʋsh a̱ hʋsh kobʋffi cho? Sa talakcha he ak o̱ illa keyu; amba Cheluselem a̱ Chitokaka Chisʋs hohchifo pulla ka, isht a si ai illa chi̱ aiena kʋt ʋm ʋlhtaha hoke, achi tok.
14Micha hakla he keyu ma, Chitokaka nan ahni yak osh ik yʋmohmí, il ahni mʋt, okla il issa tok.
15Mihmʋt nitak yakohmi kʋt ont taha ma, il il apoyua cha, Cheluselem a̱ pit il ilhkoli tok.
16Mihma nan ithʋna ʋhleha kaniohmi kʋt Sesalia ya̱ a̱sht pi apehʋt ia akinli tok; micha Nesʋn Saipilʋs ʋtta nan ithʋna sipokni ka yo̱, yʋmmak o̱ il ibai a̱shwa chi̱ ka, okla pisht ona tok.
17Atuk o̱ Cheluselem ash il ai ona ma, il itibapishi ʋhleha yʋt na yukpa hosh pi aiokpʋchi tok.
18Atuk o̱ onna ma, Pal ʋt pi awant Chemis a̱ im ona; mihma hatak tikba ʋhleha yʋt momʋt chieya tok.
19Mihma yʋmmak ash aiokpʋchit tahli mʋt, ilap ʋt nana isht ahanta ho̱, Chihowa yʋt okla nan ik ithano ʋhleha itin takla ya̱, nana ai atahanli tuk puta kash o̱ atokowa fehna kak o̱ anohonli tok.
20Mihma okla haklo mʋt, Chitokaka ya̱ okla aiokpahanchi mʋt; yʋmmak ash o̱, Chu ʋhleha na yimmi kʋt tahlepa sipokni kaniohmi hosh ai asha kʋt, yʋmmak okʋt moyumʋt nan‐ʋlhpisa holitobli fehna ka, ish pihi̱sʋshke, il itibapishi ma!
21Micha chishno ʋt Chu ʋhleha hosh oklushi nan ik ithano takla a̱sha ka, mominchit Moses a̱ okla issa chi̱ ka, im abʋchit im ʋlla puta ka hakshup tʋpla he tuk keyu, mikmʋt ilap nana a kaniohmi ʋlhpisa puta aiena ka, okla iakaiya he tuk keyu ka, ish i̱ mihi̱ha ho̱, okla im annoa tok.
22Yohmi ka nanta mak oh cho? Ish la tuk a̱, okla hakla chi̱ hokʋt, okla laua yʋt itʋnaha pulla chi̱ hoke.
23Yʋmohmi hoka pishno yʋt nana e chi̱ miha, ilʋppak o̱ ik chi yʋmohmí; hatak anumpa holitopa ile onochi tuk ushta hosh pim a̱shwʋshke.
24Yʋmmak o̱ pehliechi cha, takla nan iba hullochit, micha chishno ak osh ʋlhtoba hʋt ibafohkʋt chi̱ kʋnia pulla na, okla noshkobo sha̱fashke; mina momʋt chishno a̱ nana a chi haiyaklo tuk ʋt peh pilla hatuk; amba chishno ak kia ai ʋlhpiesʋt ish a̱ya cha, nan ʋlhpisa ya̱ ish holitobli ka ithaiyanashke.
25Amba okla nan ik ithano na yimmi ʋhleha imma kamo, nana yʋmma chohmi ka ik holitoblo ka chi̱, amba nana ka na holba toba pit im issa tuk puta, micha issish mikmʋt nana kʋt nuksitʋt illi puta, micha ohoyo himita itin luma̱ka aiena kak o̱, okla ik ahalaio ka he yak o̱, okla pim anukfilʋt pit il i̱ holissochi tok; im achi tok.
26Mihma Pal ʋt hatak ash pehlichi cha, onna ma, nan iba hullochi mʋt, ʋba nan isht pit aiokpʋchi ya̱ achʋfa aiyuka pit im isht aiokpachi ha ya chi̱ ho̱, nahullochi nitak ʋt ont taha ka, anola chi̱ hosh tempel a̱ chukowa tok.
27Atuk o̱ nitak untuklo kash ot ont taha a̱hosi ma, Chu ʋhleha Asia minti tuk ʋt, yʋmmʋt tempel anu̱kaka ya̱ a̱sha na, okla pisa mʋt, okla mominchit atu̱shpʋlihinchit yʋmmak ash ibbak isht ishi mʋt;
28Islael hatak puta ma! pi apelá; hatak ilʋppak osh yakni ilʋppa, okla, micha nan‐ʋlhpisa aiena ka i̱ sʋnalit, hatak moyuma ka kanima mominchit ai imabʋchi mak oke; micha achakalechi mʋt, Klik ʋhleha ma pehlichit tempel a̱ ant isht chukowa cha, aholitopaka ilʋppak ash aiokpʋnishke; achit tahpahanla ha tok.
29Tikba ka Tafimʋs, Efesʋs hatak ʋt yʋmma awant tʋmaha anta ho̱, okla pi̱sa tuk osh, yʋmma Pal ʋt ilauint tempel a̱ chukowa tuk a̱, okla im ahoba tok.
30Mihma tʋmaha hash ot momʋt wakaya ma, oklat yihlepʋt itahoba tok; micha Pal ash okla ishit tempel a̱ a kohchi ma; chekosi makinli ho̱ okhissa puta kash ot ʋlhkʋma tok.
31Micha okla ʋbi bʋnna hosh ma̱ya ma, tʋshka chipota a̱ya‐chʋfa i̱ kʋpitʋni chito ya̱, Cheluselem ʋt momʋt nan ik ai ʋlhpeso bano ka annoa kʋt a̱yʋt im ʋla cha;
32Yʋmmak ash ot ashali̱ka tʋshka chipota ʋhleha, micha kʋpitʋni puta ka pehlichi cha, chʋfʋt iʋt im ona tok; mihma kʋpitʋni chito, micha tʋshka chipota ʋhleha aiena ka okla pisa mʋt, Pal a̱ boli mʋt issa tok.
33Mihma kʋpitʋni chito ash ot iʋt ituma ona cha, yʋmmak ash ishi mʋt, tʋli itatakʋli tuklo hosh ishit talakcha chi̱ ka miha tok; mihmʋt, yʋmmʋt kʋna hatuk, micha nana ho̱ kaniohmi aiena tuk a̱, asilhhʋchi tok.
34Mihma okla laua a̱sha tuk ʋt tahpʋlʋt, kanimi kʋt kanimihchit miha ma, anonti kanimi kʋt inlʋchi tok; mihma yʋmmak ashot yahapa hatuk o̱, ai atokowa ma ik ai akostinincho mʋt, yʋmmak ash isht holihta kʋllo ont fohka chi̱ ka, miha tok.
35Atuk o̱ yakohmi tok, okla hak osh okpulo ka fehna o̱, yʋmmak ashot pit atuyʋt ia ya̱ ona ma, tʋshka chipota ʋhleha yosh sholit ishtia tok.
36Okla laua yak osh, Yʋmma kanima isht oh ia cha, aha̱yʋt iakaiya hatuk o̱,
37Atuk o̱ Pal ash o̱ holihta kʋllo ya̱, ont isht chukowa chi̱ foka ma, yʋmmak ash ot kʋpitʋni chito yash, Chim anumpuli la hinla cho? im achi ma, yʋmmak ash ot, Klik anumpa ya̱ ish anumpula hinla ho?
38Chishno ak osh Echip hatak chia hosh, nitak tikba kash nan isht ish ataklaiyama cha, hatak bi̱ka ʋbi ya̱ tahlepa sipokni ushtat pehlichit yakni haiaka ya̱, pit isht ish chukowa tok keyu̱? achi tok.
39Mihma Pal ʋt, Ʋno ʋt Chu hatak Tasʋs, Silisia yakni tʋmaha ai ʋtta, tʋmaha ik ahobo nana ho̱ ai ʋtta sia keyu hoke: mi hosh okla ha̱ im anumpuli la hi a̱ ʋm ahnikbano, chim ahni lishke; achi tok.
40Mihma yʋmmak ash ot ʋlhpesa im ahni ma, Pal ashot pit atuyʋt ia ya̱ o̱ hikia cha, okla ha̱ ibbak a̱ pit i̱ fahʋm mi tok; micha luma biekʋt okla aiasha ma, Heblu anumpa ho̱ im anumpulit yak ahanchi mʋt.
Pal ʋt kaniohmit ʋbanumpa nukfoka tok ʋt anoli, 1, 25 Pal ʋt fʋma he tuk kia, Lom hatak atuk osh hlakofi.
Currently Selected:
Apostel isht Anumpa 21: CHH
Highlight
Share
Copy
Want to have your highlights saved across all your devices? Sign up or sign in
Published by the American Bible Society 1848-1886, reprinted 1913
