Apostel isht Anumpa 19
19
1Atuk o̱, yakohmi tok, Apollos ʋt Kolinhla a̱ anta moma ma, Pal ʋt ibetʋp pilla ka a hlopulli mʋt, Efesʋs a̱ ʋla tok; micha nan ithʋna kaniohmi ka ant pisa mʋt,
2Hʋchi yimmi tok takla kʋto, Shilombish Holitopa ya̱ hʋsh eshi tok oh cho? im achi tok. Mihma Shilombish Holitopa yʋt a̱sha hokmá, nana kak kia, e haklo chatuk keyu hoke; okla im achi tok.
3Mihma, Yohmi kʋto, nanta ko̱ ai isht hʋchi baptismo hatok o̱? im achi tok. Mihma, Chan i̱ baptismo ak a tok; okla achi tok.
4Mihma, Chan ʋto ile kostininchit baptismo yo̱ isht baptismochi ho mʋhli cha, ilap iaka̱yʋt mihinti, Klaist Chisʋs mak o̱ yimma hi a̱, okla ha̱ im ahanchi tok; Pal ʋt achi tok.
5Mihma ilʋppa okla haklo mʋt, Chitokaka Chisʋs hohchifo ha̱ isht okla baptismo tok.
6Mihma Pal ʋt ibbak a̱ okla hash, isht umbitepa ma, Shilombish Holitopa yʋt ant onʋtoyula tok. Mihma anumpa ilaiyuka okla anumpuli mʋt, ʋbanumpa aiena isht anumpuli tok.
7Micha hatak ʋt moma kʋt auahtuklo foka hatok.
8Micha sinakak ont chukowʋt, nukwa̱ya iksho hosh, Chihowa apehlichika imma ya̱ isht anumpulit, anukfohkichit ahanta na hʋshi tuchina tok.
9Yohmi kia kaniohmi hokʋto chu̱kʋsh kʋllo taha cha, ik yimmo mʋt, hina yʋmmak ash na mihachit okla laua itikba ya̱ ai anumpohonli ma, yʋmmak ashot ai i̱ filʋmmi cha, nan ithʋna ʋhleha hash a filamolechit eshi cha, Tailanʋs osh nana ai ikhʋna i̱ hikia ho̱, nitak moma ai anumpohonli tok.
10Ilʋppa yakohmi kʋt imoma na afʋmmi tuklo tok; yohmi hatuk o̱, Chu, micha Klik okla aiena Asia ai asha tuk ʋt momʋt Chitokaka Chisʋs im anumpa ha̱ haklo tok.
11Mihma Chihowa yʋt nana kʋt isht ahullo fehna kaniohmi ka, Pal ibbak a̱ isht a yʋmihinchi tok.
12Yʋmohmi hatuk o̱, nantapʋski puta, keyukmʋt, tikba takohlichi kia, yʋmma haknip a̱ ai isht abeka puta ka isht im oho̱na; yohmi ma nan ililli puta kʋt ai i̱ filamoli, micha shilombish okpulo aiena kash ot akohoncha beka tok.
13Yʋmohmi ma Chu kaniohmi nan isht‐ahullo okpulo kohchi ilahobit itanowa yʋt, shilombish okpulo anukfo̱ka ʋhleha ha̱, Chitokaka Chisʋs hohchifo ha̱ isht ai o̱ hochifochit pisʋt, Chisʋs, Pal ʋt yʋmma isht ai anumpohonli ka pulla ho̱, anumpa kʋllo ai isht e chi onohonchishke; ahanchi tok.
14Yohmi ma Chu hatak Sifa hohchifo, na holitompa isht a̱sha pehlichi o̱ ushi untuklo hosh yʋmma yohmi tok.
15Mihma shilombish okpulo ash ot falaminchi mʋt, Chisʋs a̱ ithana li, mikmʋt Pal ano ithana li; amba hʋchishno ak osh kʋta hʋchia ho̱? achi tok.
16Mihma shilombish okpulo yʋt a fo̱ka hatak ash ot yʋmmak ash o̱ mʋlet, onʋtulʋt isht i̱ shahlichit imaiyachi tok; yʋmohmi na na fohka iksho micha ai okpulo kʋt taha aiena hosh, chuka yʋmmak ash akohchʋt yihlepa tok.
17Yohmi ma Chu okla hʋt moma, micha Klik puta aiena Efesʋs a̱sha tuk ʋt, ilʋppa okla akostininchi tok; mihma na nukshopa hʋt mominchit onʋtoyula ma. Chitokaka Chisʋs hohchifo hʋt holitopa tok.
18Mihma na yimmi tuk ʋt laua hosh ai ʋlʋt ant il anolit, nana akaniohmi chatuk puta kʋt anohonli tok.
19Micha isht ahullo imponna ʋhleha hatuk aiena kak kia, laua hosh i̱ holisso puta ka isht itahobi cha, hatak moma itikba ya̱ a hukmi tok. Micha ai ʋlhtoba ya̱ okla hotihna mʋt, tʋli hʋta boshulli tahlepa sipokni pokoli tahlapi tuk o̱, akostininchi tok.
20Chihowa im anumpa hʋt kʋllo kʋt i̱ shahlit ia fehna, yakohmi hosh imaiyachi tok.
21Nana kʋt a yakohmit ont ai issʋchi ma, Pal ʋt Masetonia, micha Akaia aiena ka hlopullikmʋt, Cheluselem a̱ ia hi ʋt chu̱kʋsh a̱ isht ai ahni mʋt, Yʋmma ont anta li tukmʋt, anonti Lom ma pisa li pulla akinlashke; ahanchi tok.
22Mihmʋt im ai itapela tuklo Timohliʋs, micha Elastʋs aiena ka Masetonia pit tihleli cha, amba ilapa ʋto Asia ya̱ anta na ahchiba tok.
23Mihma nitak yʋmma fehna ma, hina yʋmma okla hʋt nanumachi fehna tok.
24Hatak achʋfa Temetiʋs hohchifo, tʋli hʋta ikbi, yʋmmak osh Taiena ya̱ tʋli hʋta itombushi puta im ikbi yosh isht ʋlhtoba mʋt chʋbihasi keyu ho̱, hatak nan ikbi imponna ʋhleha ya̱ isht im ʋla cha;
25Yʋmmak ash, micha nan isht ʋtta ai itim achʋfa ʋhleha aiena ka hoyot itahobi mʋt, Hatak puta ma! nan isht ai ʋtta ilʋppa pulla ho̱, nan isht il ahayuchi ka hʋsh ithaiyanʋshke.
26Yʋmohmi ka Efesʋs ak o̱ bano keyu, amba Asia a̱ a mominchi chiyuhmit Pal ilʋppʋt, ibbak isht toba yokʋto chitokaka ʋhleha nana ho̱ keyu hoke, ahanchi cha, okla laua ka anukfokichit filamolihinchi ka hʋsh pi̱sa, micha hʋsh haklo aienʋshke.
27Yʋmohmi ka hʋpishno nan isht iloh ai ʋtta ilʋppak bano ho̱, ik ahobalo ka he fehna keyu; amba nan isht ahullo ohoyo chito Taiena in tempel ak kia aienʋt kalakshikma, anonti yʋmmak o̱ Asia moyuma, micha yakni puta kʋt aiokpahanchi yash isht aholitopa yʋt ont ai okpulot kʋnia hinla fehna hoke; achi tok.
28Mihma okla haklo mʋt, anukhobelʋt alota mʋt, tahpʋlʋt, Efesʋs okla in Taiena ʋt chinto hoke: ahanchi tok.
29Mihma tʋmaha ha̱ yahapa kʋt alotʋt kʋnia tok. Micha Masetonia hatak, Pal apehʋt nowʋt a̱ya Kaiʋs, micha Alistakʋs ita tuklo ka hoklit okla ishi mʋt, im anukfila ai achʋfa chiyuhmit yihlepʋt, okla ai itahoba chatuk a̱ pit abeha tok.
30Mihma Pal ʋt okla ha̱ pit iba chukowa bʋnna tuk ak o̱ nan ithʋna ʋhleha yʋt ʋlhpesa, okla ik im ahno ki tok.
31Mihma Asia hatak pehlichi ʋhleha kaniohmi, yʋmma i̱ kana yatuk ʋt, okla ai itahoba ya̱ pit chukowa bʋnnʋt ik peso ka hi a̱, ahnit pit im anoli tok.
32Yʋmohmi ma kanimi kʋt nana ho̱ mihakma, anonti inla mʋt inla ho̱ miha tok; itʋnaha hak osh ai ʋlhpesa keyu hatuk o̱, micha moma chohmi kʋt nana kaniohmi ho̱ itʋnaha hatuk ʋt ik ahostinincho ki tok.
33Mihma Aleksanta ya̱ okla laua akohchi ma, Chu okla hʋt tikba pit hilechi tok; mihma Aleksanta yʋt ibbak pit fahʋmmi mʋt, okla ha̱ im isht il anumpuli bʋnna tok.
34Yohmi kia yʋmmak okʋt Chu atuk o̱, okla akostininchi mʋt, momʋt anumpa achʋfa, Efesʋs okla in Taiena yʋt chinto hoke, tahpʋlʋt ahanchi na hʋshi kanʋlli tuklo foka tok.
35Mihma tʋmaha i̱ holissochi yokʋt okla ha̱ yokopli mʋt, Efesʋs hatak hʋchia ma! Efesʋs tʋmaha hʋt nan isht ahullo ohoyo chito Taiena, micha na holba toba Chupita a mintit akatula tok aiena ka aiokpʋchi a̱, hatak nanta hosh ik akostinincho kʋt ahanta cho?
36Yohmi ka ilʋppa nana ho̱ isht ai acha hi o̱ keyu hoka, hʋchishno yʋt nukchintot hʋsh ma̱ya cha, tu̱shpʋt nana hʋchik kaniohmo ka he tuk oke.
37Hatak yakohmi kʋt tempel puta wehpuli keyu mʋt, anonti hʋchi̱ nanisht ahullo ohoyo ma ik ahobalot na mihachi o̱ keyu hokak o̱, ilʋppa isht hʋsh la tuk oka.
38Yʋmohmi hoka Temetiʋs ʋt, micha hatak nan ikbi ʋhleha yʋmma apeha kʋt, hatak nana kia nana im a kaniohmi tuk in takanli hokma, nan ʋlhpisa nitak ʋt a̱sha, micha nan apesa ʋhleha mʋt ma̱yʋshke; nan ʋlhpisa iti onochit ik a̱shá.
39Amba nana inla imma yo̱ hʋsh ai asilhhʋchi hokma, yʋmmak okʋto itʋnaha ai a̱hli ho̱ ai ʋlhpisa hi oke.
40Itʋnaha ilʋppak atuk a̱ nana ho̱ isht il ai anola he mʋt iksho; yohmi hokʋt himak nitak nana ai ʋlhpiesa mʋt iksho ka, nan ʋlhpisa yʋt hʋpi onʋtula he fehna hoka; achi tok.
41Micha yakmichit anumpulit issa mʋt, itʋnaha yash tishelichi tok oke.
Pal ʋt Masetonia ona, 1, 7 Pal ʋt Chitokaka im opiaka impa holitoblit antʋt, ʋba isht anumpuli. 28 Pal ʋt iksa in tikba ʋhleha ha̱ atohnochi.
Currently Selected:
Apostel isht Anumpa 19: CHH
Highlight
Share
Copy
Want to have your highlights saved across all your devices? Sign up or sign in
Published by the American Bible Society 1848-1886, reprinted 1913
