लुका 15
15
लुक तोरता च्यीकगी पे
(मेथा १८:१२-१४)
1धा ठा धुगीनक्या धाङ धीक्चेनक्या घीरी, येशुगी काला ङेन्येला खोङबागी डुङदु होवालाक। 2धेनी फारुसीपाक्या धाङ क्षो़ठीमगी ॱलोपो़नक्या फाक्तुङ दुरी ॱनेवालाक, “दे मी दे धीक्चेनक्याला सी़री खुङक्यामुला शामा शी।”
3होझ्येरी खोङबागी खुङक्याला पे दे सुवालाक, 4“खेक्याने मी च्यीकगी लुक ग्याने च्यीक तोरना, होदे लुक घुपच्यु घोरगुगोला पाङगारु भोरती, होदे लुक तोरतागो ॱमाङेगीन थुक्पे खो होदेला चारु डुगु मालाक से? 5धेनी होदेगो ॱङेदी, स्याम्ला खो ङ्यामो घेरी होदेला खोरी ठाक्पा खाला खुरकीलाक। 6धेनी नाङला होरी, खी़ खोरी रोवाक्या धाङ खीम्चेक्याला भो़री खुङक्याला ॱनागीलाक, ‘ङीमुला घाटो झ्यी घीझ्येरी ॱनाना ङी लुक तोरतागो ॱङेजुङ।’ 7ङा खेक्याला ॱनाहीन देरे झ्येरीराङ धीक्पा पारी सेमग्युर मेघोगीन, मी ढाङपो घुपच्यु घोरगुक्याने ल्हाक, धीक्पा पारी सेम ग्युरकीन मी धीक्चेन च्यीकगी क्षीला, नाम्खे श्यीङखामदु माङा ङ्यामो घा झ्युङगीलाक।”
तोरता टाङगा च्यीकगी पे
8“याङना केमी च्यीकला ॱङुगी टाङगा च्यु हो़तालाक। धेनी च्यीक तोरना, मी़ क्युङ पारती होदे ॱमाङेगीन थुक्पे, खीम क्षाक्यी-क्षाक्यी काल्ले ग्याप्ती ॱयाङगी मालाक से? 9होदे ॱङेना मी़ मोरी आदाक्या धाङ खीम्चेक्याला भो़री ॱनागीलाक, ‘ङीमुला घाटो झ्यी घीझ्येरी ॱनाना ङी टाङगा तोरतागो ङाला ॱङेजुङ।’ 10ङा खेक्याला ॱनाहीन, देरे झ्येरीराङ धीक्पा पारी, सेम ग्युरकीन धीक्चेन च्यीकगी क्षीला, को़न्क्षोकगी भाङछेनक्याई डुङदु घाटो झ्युङगीलाक।”
भीजा तोरता च्यीकगी पे
11येशुगी सुवालाक, “मी च्यीकला भीजा ॱङी हो़तालाक। 12भीजा च्युङागी़ आकीला ॱनेवालाक, ‘आके, ङाला थोप्ये हीन्गीन ग्युनोरगी कादागो ङाला तेरोझ्यी।’ धेनी आकीगी़ खोरी ग्युनोर भीजा ॱङीउला घो़वालाक। 13धेनी श्याक्मो तीते स्याम्नेराङ, भीजा च्युङागो ग्युनोर घीरी खेरती, थाकरीङागी यु च्यीकला सोवालाक। धेनी होदुरु खोरी ग्यु घीरी ङ्याम तारी ॱयावालाक। 14धा खी़ आले घीरी ॱयासारी घाङला, होदे युगो मुगेला स्योरपालाक। धेनी खोला ॱमेक्षाङगीन झ्युवालाक। 15होझ्येरी खो सोरी होदे युगी मी च्यीक चारु लेगा चावालाक। होदे मीगी़ खोला फाकक्या छोरु श्यीङला झावालाक। 16धेनी खो फाकगी सो़ शेरी, खोरी फोवा काङी दो़पालाक हीना सी़या खोला घीया ॱमातेरपालाक।
17“धेनी खी़ ॱमीच्यीकी साम्लो तारी ॱनेवालाक, ‘ङी आकीचारु ॱयोक्पोक्या फोवा घाङ शेरी, धोराङा ल्हाक्मा ल्हालाक हीना ङा दुरु तोक्ती स्यीगु झ्यीदीक। 18धा ङा लारी आकीचारु डोयेहीन धेनी खोङला ॱनायेहीन, “आके, ङी नाम्खे श्यीङखाम धाङ खेराङगी ॱमीक्वादु धीक्पा झ्येवी। 19धा ङा खेराङगी भीजा ॱनारीन खाये मेक। ङाला खेराङगी ॱलाला श्याक्कीन, ॱयोक्पोक्याने च्यीक च्योक्रे सुरो झ्यी।”’ 20धेनी खो लारी खोरी आकीचारु सोवालाक। हीना खो ॱमीच्यीकी थाक्रीङाने हुई घाङलाराङ, आकीगी़ खोला थोवालाक धेनी आकीगो ॱङीङजेगी खारी, भाङ तारी सोरी खोला थाम्दी ओ झ्येवालाक।
21“भीजागी़ खोला ॱनेवालाक, ‘आके, ङी नाम्खे श्यीङखाम धाङ खेराङगी ॱमीक्वादु धीक्पा झ्येवी। ङा याङदा खेराङगी भीजा ॱनारीन खाये मेक।’ 22हीना आकीगी़ खोरी ॱयोक्पोक्याला ॱनेवालाक, ‘ग्योक्जे घो़ खाक्क्षेगो खेरती खोला को़न। धेनी खी़ जुला सोप्तोक धाङ काङबाला शो़म्बा को़न। 23धेनी ओत्तो ग्यायोकगो खेरती होरी सो़क, धेनी होराङ होदे शेरी कीपो ताङु। 24घीझ्येरी ॱनाना ङी भीजा दे स्यीवालाक धेनी याङ सो़न्दी होजुङ। धेनी तोरपालाक धेनी ॱङेजुङ।’ धेनी खुङक्याई कीपो ताङये गो चुक्पालाक।
25“होदे घाङला खी़ भीजा क्षेगो श्यीङला हो़तालाक। धेनी खो खाङबी भोलोक्तु ॱलेप्यी घाङला, ॱलु लेन्गीन धाङ श्यापरु ग्याप्कीनगो घोरपालाक। 26होझ्येरी खी़ खोरी ॱयोक्पोक्याने च्यीकला केक तारी, होदुरु घी झ्यीदाले ॱनेरी ढीवालाक? 27ॱयोक्पोगी़ खोला ॱनेवालाक, ‘खेरी नो लोक्ती होजुङ। खो घायेरे धाङ थाङयेरे हो़गीनगो थुक्ती, खेराङगी आकीगी ओत्तो ग्यायोकगो सेजुङ।’ 28धेनी भीजा क्षेगो छीक्पा शेरी खाङबा नाङदु ॱमासोवालाक। होझ्येरी खी़ आकी फीला होरी, खोला श्योवा ग्याप्पालाक।
29“हीना खी़ आकीला ॱनेवालाक, ‘तो़दाङ, लो देचो़ थुक्पे, ङी खेराङगी श्याप्तोक पुवी धेनी खेराङगी खाला ङेन्दी धेबी। हीना ङी रोवाक्यामुला कीपो ताङयेला, खेराङगी ङाला रीप्चाक च्यीया नामा तेरकी मीदुक। 30हीना खेराङगी ग्यु घीरी श्याङचोङमाक्यामुला ॱयागीन, भीजा दे लोक्ती हुङी घाङला, खेराङगी सो़री श्याकश्या ओत्तो ग्यायोकगो खी़ क्षीला सेजुङ।’
31“धेनी आकीगी खोला ॱनेवालाक, ‘भीजो, ख्यो़ ङीमुला च्योई धेदालाक धेनी ङाला हो़गीन घीरी ख्यी़ लाक। 32हीना कीपो तारी ङ्यामो घा घोये हो़तालाक घीझ्येरी ॱनाना ख्यी़ नो, दे स्यीवालाक याङ सो़न्दी होजुङ। तोरपालाक धेनी ॱङेजुङ।’”
Currently Selected:
लुका 15: LOY
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
