लुका 14
14
येशु फारुसीपा च्यीकगी नाङदु
1ङासुगीन ङीमा च्यीकला, येशु फारुसीपाक्याई पो़न्पो च्यीकगी नाङदु डो़नला फेप्पालाक। धेनी फारुसीपाक्याई खोङबाला ॱमीच्यीकी श्यीप्ता झ्येरी, तेरी धेबालाक। 2होदुरु येशुगी डुङदु क्षु साक्ती, लाक्पा काङबा बो़बा मी च्यीक धे हो़तालाक। 3येशुगी क्षो़ठीमगी ॱलोपो़नक्या धाङ फारुसीपाक्याला ढीवा कुला जेपालाक, “ङासुगीन ङीमाला क्षो़ठीमला चो़गा झ्यीना, ढीयाले याङना मीढीयाले?” 4हीना खुङक्या खाबा धेबालाक। धेनी खोङबागी होदे मीला शीम्दी चो़गा जेपालाक धेनी खोरी नाङदु झावालाक।
5धेनी खोङबागी होदेक्याला ढीवा कुला जेपालाक, “ङासुगीन ङीमाला, खेक्याने मी च्यीकगी भीजा याङना भालाङ क्षुदोङ नाङदु ल्हीम्ना, खेक्याई लाम्साङ होदेला फीला तो़न्गी माले?” 6धेनी खुङक्याई होदे ढीवागी लेन ॱलोक ॱमाथुक्पालाक।
7धा श्युक्टाला होवा डो़न्बोक्याई श्युक्ठी खाक्क्षेक्या दाम्गीनगो थोरी, खोङबागी देक्याला पे च्यीक सुवालाक, 8“ख्यो़ला ॱनामा लेन्सा श्युक्टारु भो़ना, होदुरु ख्यो़ तो़योकगी डाला माधे। घीझ्येरी ॱनाना ख्यो़ने खाक्क्षे मीला होदुरु भो़ हो़टु। 9धेनी होदे खाक्क्षे मीगो फेई घाङला, होदे भो़गीन मीगी़, ‘खोङबाला श्युक्तु च्युक’ ॱनेरी, ख्यो़ला श्युक्ठीने ॱलाङ सीगीलाक। होदी घाङला ॱमेयोकगी डाला धेयेला, ख्यो़ला ङोजा झ्युङगीलाक। 10हीना ख्यो़ला डो़नला भो़ली घाङला, सोरी ॱमेयोकगी ढाला धो़क धेनी ख्यो़ला भो़गीन मीगो होरी, ख्यो़ला देरे ॱना सीगीलाक, ‘रोवाओ, याला फेप।’ होदी घाङला ख्यी़मुला श्युक्टाला धेगीनक्याई दोङदु, ख्यो़ला घुस्याप थोप्कीलाक। 11घीझ्येरी ॱनाना राङला थोरु ताङगीन घीरीला, ॱमावा जेगीलाक धेनी राङला ॱमारु ताङगीन घीरीला, थोवा जेगीलाक।”
12धेनी खोङबाला डो़नला भो़गीन फारुसीपागोला खोङबागी सुवालाक, “ख्यी़ ॱङारोक याङना घोमोगी डो़नला भो़ली घाङला, ख्यो़री रोवाक्या धाङ आज्यो-नोक्या धाङ पी़न्दाक्या याङना खीम्चे क्षुक्पुक्याला माभो़। देरे झ्यीना खुङक्यागीयाः ख्यो़ला डो़नला भो़री, ख्यो़री छापगो ॱलोक्कीलाक। 13हीना ख्यी़ डो़नला भो़ली घाङला, उटेक्या धाङ काङबा लाक्पा मेगीनक्या धाङ श्याक्योवाक्या धाङ श्याराक्याला भो़। 14धेनी ख्यो़ला झ्यीलाप थोप्कीलाक घीझ्येरी ॱनाना खुङक्याई ख्यी़ छापगो ॱलोक ॱमीथुक्कीलाक। हीना ढाङतेनक्या कुसो़न्पो जेयेगी धी़ला, ख्यो़ला होदेगी ढेबुगो थोप्कीलाक।”
श्युक्टा क्षे च्यीकगी पे
(मेथा २२:१-१०)
15धा येशुमुला श्यालाकला धेगीनक्याने मी च्यीकगी, दे लाबक्या घोरती खोङबाला श्यी़वालाक, “को़न्क्षोकगी ग्यासी नाङदु, शामा शाये हीन्गीन घीरी झ्यीलाप क्षे।”
16हीना खोङबागी खोला सुवालाक, “मी च्यीकगी श्युक्टा क्षे च्यीक डाढीक झ्येरी, डो़न्बो माङाला भो़वालाक। 17धेनी डो़नगी धी़चो़ला खी़ खोरी ॱयोक्पोला डो़नला भो़पा घीरीला, देरे ॱनारु झावालाक, ‘धा घीरी डाढीक दुक। फेप्रोनाङ।’ 18हीना खुङ घीरीगी लाब शो़री घोङपा श्यी़वालाक। मी धाङपोगी़ ॱनेवालाक, ‘ङी श्यीङ च्यीक ङ्यो़ हो़क। ङा होदे तारु डो घोयेहो़क। हो़च्चो़ ॱनाहीन ङाला घोङपा ॱनाङरोनाङ।’ 19धेनी श्येम्मागी़ ॱनेवालाक, ‘ङी धान्दाका ॱलुङ क्षा ॱङा ङ्यो़ हो़क। ङा होदेक्याई लेगा घारे झ्यीदी ॱनेरी, तारु डोवाहीन। हो़च्चो़ ॱनाहीन ङाला घोङपा ॱनाङरोनाङ।’ 20याङ श्येम्मागी़ ॱनेवालाक, ‘ङी धान्दाका ॱनामा लेन्बी। होझ्येरी ङा हुङ थुक्ये मीदुक।’ 21धेनी ॱयोक्पोगो होरी खोरी दाक्पोला दे लाब घीरी स्येपालाक। धेनी खाङबी दाक्पोगो श्येताङ लारी, खोरी ॱयोक्पोला ॱनेवालाक, ‘ग्याजागी लाम्गाक्या धाङ ॱराङगाकक्याला ग्योक्जे सोङ, धेनी उटेक्या धाङ लाक्पा काङबा मेगीनक्या धाङ श्याराक्या धाङ श्याक्योवाक्याला दुरु नाङदु ठीक्ती स्योक।’ 22धेनी ॱयोक्पोगी़ ॱनेवालाक, ‘खेराङगी का ॱनाङगीन च्योक्रे झ्युजुङ हीना धोराङा साज्या माङा स्योङये दुक।’ 23दाक्पोगी़ ॱयोक्पोला ॱनेवालाक, ‘ङी खाङबा खाङयेगी क्षीला, युक्याई ग्यालाम धाङ ॱराङगाकक्याला सोरी मीक्याला ङी नाङदु स्योक ॱनेरी उजुक झ्यी। 24घीझ्येरी ॱनाना ङा ख्यो़ला ॱनाहीन, डो़नला भो़पा मीक्याने सी़याः ङी श्युक्टागी ढोवा लेन्ये राक्कुमालाक।’”
येशुगी ङेने झ्युङये
(मेथा १०:३७-३८)
25धा मीछोक क्षे च्यीक येशुगी मुला सोवालाक धेनी खोङबागी खुङक्या स्योकला शीक्ती सुवालाक, 26“ङी स्याम्ला डागीन हीना राङगी आकी-आमा धाङ केमी धाङ टुवा धाङ आज्यो-नो याङना ईजी-नुमो धाङ राङगी ॱरोकलाः दाङा मीझ्यीना, खो ङी ङेने झ्युङ थुक्कीमालाक। 27धेनी राङगी दुक्पुगी ग्याङस्यीङ ॱमीखुरकीन हीना ङी स्याम्ला डागीनक्या, ङी ङेने झ्युङ थुक्कीमालाक।
28“पेला ॱनाना, खेक्याने च्यीकगी खार च्यीक शोङी दो़ना, होदे शोयेला एन्ला, ख्यो़ धेती होदे शोयेला छाङयेगी डोसोङ दुई मीदुई ॱनेरी ची ग्याप्की माले? 29घीझ्येरी ॱनाना ख्यी़ खाङबी डामगो ती सारती खाङबागो डुप ॱमाथुप्ना, थोङगीन घीरीगी ख्यो़ला देरे ॱमेज्यु ताङगीलाक, 30‘दे मी दी खाङबा चीक्ये गोचुक्जुङ हीना डुप ॱमाथुक्जुङ।’
31“याङ ग्यावु च्यीक ग्यावु श्येम्मामुला ॱमाक टाप्तु डोये हीन्ना, एन्ला खो धेती खी़ ॱमाक्मी ठी च्यीकगो खी़ डागी ॱमाक्मी ठी ॱङीमुला, टाप थुक्ये दुई मीदुई ॱनेरी ढो़ झ्यीगीमाले? 32धेनी खी़ थुक्ये मेना श्येम्मा ग्यावुगो थाक्रीङाला हो़ती घाङलाराङ, खोरी भाङछेनक्या झारी, श्यीदे झ्यीयेगी लाब ताङदु झाङगीलाक। 33देरेराङ झ्येरी राङला हो़गीन घीरी ॱमेपाङना, ख्यो़याः ङी ङेने झ्युङ थुक्कीमालाक।
34“छा घा लाक हीना छागी ढोवागो येना, होदेला याङ घाङगी झ्येरी छाढोवा शो थुक्कीले? 35होदे साला फेन ॱमेथोक्वालाक धेनी शुला फेन ॱमेथोक्वालाक। होदे ॱयुक्ती शाङालाक। आमच्योक हो़गीनक्याई ङेन्दी ॱहाघोरास्योक।”
Currently Selected:
लुका 14: LOY
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
