लुका 13
13
धीक्पा पारी सेम ग्युरवा तोङ
1धा होदुरु हो़गीन मी रीङगागी येशुला, पीलातुगी गालीलपाक्याई ठाकगो ॱमारछो़गी ठाकमुला ॱरेगीनगी कोरला स्येपालाक। 2धेनी येशुगी खुङक्याला सुवालाक, “होदे गालीलपाक्याला देरे दुक्पु राक्रा झ्येरी, खुङक्या श्येम्मा गालीलपा घीरीने ल्हाक धीक्चेन लाक ॱनेरी साम्ये? 3देरे मालाक ॱनेरी ङा खेक्याला ॱनाहीन। हीना खेक्या धीक्पा पारी सेम मीग्युरना, खेक्याः घीरी होदेरेराङ झ्येरी स्यीगीलाक। 4याङना सीलोआमदु हो़गीन, खार धीप्ती मी चाबग्ये स्यीगीनगोक्या, येरुसालेमगी मी श्येम्माक्याने ल्हाक धीक्चेन लाक ॱनेरी खेक्या साम्ये? 5देरे मालाक ॱनेरी ङा खेक्याला ॱनाहीन। हीना खेक्या धीक्पा पारी सेम मीग्युरना, खेक्याः घीरी होदेरेराङ झ्येरी स्यीगीलाक।”
ढेबु ॱमेकेगीन दोङबो
6होदे स्याम्ने येशुगी पे दे सुवालाक, “मी च्यीकगी खोरी घुन्डुमगी दुम्रारु, सेयापगी दोङबो च्यीक चुक हो़तालाक। होदे दोङबोला ढेबु के हो़टु ॱनेरी, होदे मी तारु होवालाक हीना च्यीया माजोरपालाक। 7धेनी दुम्रा ॱरुङगीनगोला खी़ ॱनेवालाक, ‘धा ङा दे सेयापगी दोङबोला ढेबु चारु होरी, लो सुम झ्युसाजुङ हीना च्यीया ॱङेगी मीदुक। देला चेदी ॱयुक्ती जोङ। घीझ्येरी दी सा शीम्दु च्युक्ये?’ 8हीना दुम्रा ॱरुङगीनगी़ ॱनेवालाक, ‘ङी दाक्पो, देला धोराङा लो च्यीक श्याक्तु च्युक्रो ॱनाङ। ङा दी ॱये-ॱयो़नला ढी़री ली़ ग्याप्येहीन। 9धेनी लो स्याम्मागोला ढेबु केना घायेरे लाक। ॱमेकेना खेराङगी देला चेरो जे।’”
ङासुगीन ङीमाला घुच्चुमा च्यीक चो़गा जेपा
10धा ङासुगीन ङीमाला येशु छोक्खाङ च्यीकगी नाङदु क्षो़ सुङी हो़तालाक। 11होदुरु लो चाबग्ये थुक्पे, ॱनो़पागी घुच्चुमा शो़सा केमी च्यीक हो़तालाक। मी़ शु घु-घु हो़तालाक धेनी केरी लाङ ॱमीथुक्वालाक। 12येशुगी मोला शीया जेदी, मोला दोङला भो़री सुवालाक, “भोमो, ख्यो़ ख्यो़री नाजाने थारजुङ।” 13धेनी खोङबागी क्षाक मी़ खाला श्याक जेपालाक धेनी मो लाम्साङ केरी लाङ थुप्कीन झ्युवालाक। धेनी मी़ को़न्क्षोकगी तो़टा तावालाक।
14ङासुगीन ङीमाला येशुगी नाजा चो़गा जेदी, होदे छोक्खाङगी पो़न्पोगो ॱमीच्यीकी धुक्चा धी़वालाक। धेनी होदुरु हो़गीन मीक्याला ॱनेवालाक, “लेगा झ्यीयेगी क्षीदु श्याक्मो ढुक हो़तालाक। होझ्येरी ङासुगीन ङीमाला मेन्दा, होदे ङीमाक्याला होरी चो़गा झ्युङ।”
15हीना चोवोगी कालेन ॱनावालाक, “खे शोक्पोक्याओ, ङासुगीन ङीमाला खेक्या खेरी ॱलुङ याङना भुङगुक्याई थाक्पा टोरी, क्षु ॱली़दु ठीक्ती मेडोवाले? 16धा दे केमी आब्राहामगी भोमो दे सातानगी लागाला लो चाबग्ये थुक्पे स्योर हो़तालाक धेनी ङासुगीन ङीमाला, मोला होदेगी लागाने टो ॱमेक्षोक्वाले?” 17खोङबागी दे सुरी, खोङबागी डाक्या घीरीला ङोछारु च्युक्पालाक हीना मीमाङक्या, खोङबागी जेजा ॱहाङसागीन क्षाक्लेक्याला ङ्यामो घेबालाक।
छुकगी साङा धाङ क्युरचीगी पे
(मेथा १३:३१-३३; मारकु ४:३०-३२)
18धेनी येशुगी सुवालाक, “को़न्क्षोकगी ग्यासी घी च्योक्रे हो़ताले? ङा देला घीमुला दुरकुलाक से? 19होदे मी च्यीकगी राङगी दुम्रारु ताप्कीन, छुकगी साङा च्योक्रे लाक। होदे छारती दोङबो च्यीक झ्युवालाक धेनी ॱनामगी झ्याक्याई, होदेगी याकाक्या खाला छाङक्या शो़वालाक।”
20याङ खोङबागी सुवालाक, “को़न्क्षोकगी ग्यासीला ङा घीमुला दुरये? 21दे नी भोमो च्यीकगी भाक्पे कीलो ङीचेङा मुला, ॱरेगीन क्युरची च्योक्रे लाक। धेनी होदेगी भाक्पे घीरीला क्युर ॱलावालाक।”
घो दोक्वागो
(मेथा ७:१३-१४,२२-२३;८:११-१२)
22धेनी येशु ग्याजाक्या धाङ युक्याने झ्युरी, क्षो़ स्येया जेदी-जेदी येरुसालेम स्योकला फेप्पालाक। 23धेनी मी च्यीकगी खोङबाला श्यी़वालाक, “चोवो, थारपा थोप्ये हीन्गीनक्या ङ्युङा हुङगीले?”
खोङबागी होदेक्याला सुवालाक, 24“घो दोक्वाने जुयेला घी थुप-थुप थापस्यी झ्यी, घीझ्येरी ॱनाना ङा खेक्याला ॱनाहीन, मी माङक्षेगी होदेने जुयेगी थापस्यी झ्यीगीलाक हीना ॱमीथुप्कीलाक। 25खाङबी दाक्पोगो लासारती, घो ग्याप्कीलाक धेनी खेक्या फीला देरे ॱनेरी घो दुङगीलाक, ‘चोवो, हेला घो पेरो ॱनाङ।’ धेनी खी़ खेक्याला ‘खेक्या सु हीन्गीन धाङ घाने हुङगीनगो ङाला स्येयेमेक।’ ॱनेरी लेन ॱलोक्कीलाक। 26धेनी खेक्याई ॱनागीलाक, ‘हेक्या खेराङ मुलाराङ शा-थुङ झ्येवी धेनी हीकी ॱराङगाकक्याला, खेराङगी क्षो़ तो़न जेपालाक।’ 27धेनी खोङबागी ॱनागीलाक, ‘ङा खेक्याला ॱनाहीन, खेक्या सु हीन्गीन धाङ खेक्या घाने हुङगीनगो ङाला स्येयेमेक। ङेन्पा लेगा झ्यीगीन खे घीरी ङाने ॱहाला सोङ।’ 28खेक्याई को़न्क्षोकगी ग्यासीदु आब्राहाम धाङ ईसाक धाङ याकोब धाङ ॱङो़नस्येखेन घीरीला ज्यागीलाक हीना खेराङक्यागो फीला ॱयुक्कीनगो थोङी घाङला, होदे साजारु खेक्या ङी़री सो ढीक्ती धेगीलाक। 29मीक्या स्यार धाङ नुप धाङ झ्याङ धाङ ल्हो स्योकने होरी, को़न्क्षोकगी ग्यासीगी श्युक्टाला धेगीलाक।
30“तो़दाङ, एम्मा हीन्गीन रीङगा स्याम्मा झ्युङगीलाक धेनी स्याम्मा हीन्गीन रीङगा एम्मा झ्युङगीलाक।”
येरुसालेमगी क्षीला येशुगी थुक्खुर जेपा
(मेथा २३:३७-३९)
31होदे घाङला फारुसीपा रीङगाक्या होरी येशुला श्यी़वालाक, “खेराङ देने थो़न्दी फेप्रोनाङ घीझ्येरी ॱनाना हेरोदेगी खेराङला सेये दो़पा झ्यीदी।”
32खोङबागी खुङक्याला सुवालाक, “सोरी होदे स्याल्लाला ॱनो़, ‘धीरीङ धाङ ॱङेटो ङा डेक्या तो़न्येहीन धेनी चो़गा झ्यीये लेगा झ्यीयेहीन धेनी श्याक्मु सुम्बागोला ङी लेगा जोक्कीलाक। 33हीना धीरीङ ॱङेटो धाङ ॱनाः, ङा ङारी लामला डो घोगीलाक घीझ्येरी ॱनाना ॱङोन्नेराङ ॱङो़नस्येखेन च्यीक येरुसालेमने फीला ढोङ ॱमीथुक्कीलाक।’
34“येरुसालेम, येरुसालेम, ॱङो़नस्येखेनक्या सेगीन धाङ ख्यी़चारु झाजाक्याला धोगोङ श्युरकीन ख्यो़! झ्यामोगी राङगी टुवाक्याला स्योक्पा होकदु धुगीन च्योक्रे, ङी थेङ माङपो ख्यी़ टुवाक्याला दुयेगी दो़पा झ्येवी, हीना ख्यी़ दो़पा झ्यीगी मीदुक। 35तो़, खीकी खाङबा तोङबा जेदुक। ङा खेक्याला ॱनाहीन, ‘चोवोगी छेनने फेप्कीनगो झ्यीलाप क्षे लाक।’ ॱनेरी, खेक्याई ॱमेनागीन थुक्पे खेक्याई ङाला याङ थोङगीमालाक।”
Currently Selected:
लुका 13: LOY
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
