योहान्ना 6
6
येशुगी मी ॱङातोङला श्येलाक ॱनाङवा
(मेथा १४:१३-२१; मारकु ६:३०-४४; लुका ९:१०-१७)
1होदे स्याम्ला, येशु गालील छोगी ॱहाकीनला फेप्पालाक। (होदेला तीबेरीयास छोवा ॱनालाक।) 2खोङबागी नेपा माङाक्याला ढाक्सो जेगीन ताकक्या मीछोकक्याई थोथा झ्येरी, खुङक्या खोङबागी स्याबाला डावालाक। 3येशु रीला फेप्ती, होदुरु ङेनेक्यामुला श्युक्वा जेपालाक। 4धा याहुदापाक्याई धी़छेन पेसाकगो ङ्ये हो़तालाक।
5धेनी येशुगी मीछोक क्षे राङगी डुङदु हुङगीनगो शीक्ती, फीलीपला सुवालाक, “दे मीक्याला तेरयेला, शामा होराङ घाने ङ्योये?” 6खोङबाराङगी घी झ्यीये हीन्गीनगो, खोङबा खेन्दा जेदालाक हीना फीलीपला ताक्चा झ्यीयेला देरे सुवालाक।
7धेनी फीलीपगी खोङबाला लेन श्यी़वालाक, “ग्याङगा ङ्यो़री मी घीरीला च्यीमे-च्यीमे घोनाः, दीनारी#६:७ दीनारी लेजेपाक्याई ङीन च्यीकगी ॱला ङीग्यागी धाङये मेतालाक।”
8खोङबागी ङेनेक्याने सीमोन पेटोगी नो, आन्डीरीयागी श्यी़वालाक, 9“दुरु भीजा च्यीकला नेगी ग्याङगा ॱङा धाङ ङ्या ॱङी दुक, हीना होरे माङा मीला घी धाङये?”
10येशुगी मीमाङक्याला धेदु च्युक्येला सुवालाक। होदुरु साला चा माङा हो़तालाक धेनी केवे-फो ॱङातोङ चो़ धेपालाक। 11धेनी येशुगी ग्याङगा क्षाकला ॱनुमा जेदी, को़न्क्षोकला काटीन्क्षे श्यी़वालाक। धेनी होदुरु धेताक्याला घो़वालाक। होझ्येरीराङ ङ्यागो घो़री, खुङक्याई दो़गीन थुक्पे शेवालाक। 12धेनी खुङक्याई डागीन थुक्पे शेछारती, खोङबागी ङेनेक्याला सुवालाक, “ल्हाक्मा ल्हाक्ला दुबुक्या सेला ॱमेताङा धी़।” 13मीक्याई शेरी ल्हाक्ला नेगी ग्याङगा ॱङागी दुबुक्या, खुङक्याई धी़री बाक्ता च्युङङी कावालाक।
14मीक्याई खोङबागी जेजा ताकगो थोरी ॱनेवालाक, “जीक्तेनदु फेप्कुलाक ॱनागीन ॱङो़नस्येखेनगो, खोङबाराङ हीन्दाराक।” 15मीक्या होरी खोङबाला ग्यावु को़येला उजुक झ्येरी ठीक्ये झ्यीगीनगो, येशुगी खेन्दा जेदी खोङबा च्यीका री स्योकला फेया जेपालाक।
येशुगी छो खाला श्याप च्याक्पा
(मेथा १४:२२-२३; मारकु ६:४५-५२)
16ॱरो रुक्ती खोङबागी ङेनेक्या छो डामदु सोवालाक। 17धेनी डु श्यो़न्दी छोगी ॱहाकीनला काफारनाहुमदु सोवालाक। होदे घाङला ॱरो रुक्तीया, येशु खुङक्याचारु ॱमाफेप हो़तालाक। 18धेनी ॱलुङछुप ग्याप्ती छोला भालाप लाङी हो़तालाक। 19धेनी डुगो पाक छे च्यीक-ॱङी चो़ ॱहाला ॱलेप्ती, येशु छो खाला श्याप च्याक्ती, खुङक्याई ङ्येरु फेप्कीनगो थोरी खुङक्या जीक्पालाक। 20हीना येशुगी खुङक्याला, “ङा हीन, माजीक।” सुरी सुवालाक। 21धेनी खुङक्या ङ्यामो घेरी येशुला डु नाङदु सी़वालाक। धेनी लाम्साङ डुगो खुङक्या डोजा सागोरु ॱलेप्पालाक।
22छोगी ॱहाकीनला धेगीन मीक्याई ॱङेटोगो, होदुरु डु च्यीक च्यीगा थोवालाक। धेनी डु नाङदु खोङबागी ङेनेक्या च्यीगा श्यो़न्गीन, हीना येशु खुङक्यामुला ॱमाफेप्कीनगो होदे मीक्याला स्येये हो़तालाक। 23धेनी चोवोगी थुक्जेक्षे श्यी़री, खुङक्याई ग्याङगा शागीन साजागी डामदु, तीबेरीयासने डु श्येम्माक्या होवालाक। 24धेनी येशु धाङ खोङबागी ङेनेक्या होदुरु मेगीनगो मीछोकक्याई थोरी, खुङक्याराङ डु नाङदु श्यो़न्दी येशुला चारु काफारनाहुमदु सोवालाक।
छेसोकगी ग्याङगा
25खुङक्याई येशुला छोगी ॱहाकीनला ज्यारी श्यी़वालाक, “राब्बी, खेराङ दुरु नाम फेप्पा?”
26येशुगी खुङक्याला कालेनदु सुवालाक, “ङा खेक्याला धेन्पा धेनक्याङ ॱनाहीन, खेक्याई ताकक्या थोरी मालाक हीना डागीन थुक्पे शेरी ङाला चालालाक। 27मेताला डोगीन शामागी क्षीला मेन्दा, हीना मी-भुगी ॱनाङगीन थामेपे छेसोक छोगीन शामागी क्षीला काल्ले ग्योप। घीझ्येरी ॱनाना खोङबागी खाला याप को़न्क्षोक राङगी ताक जे हो़तालाक।”
28खुङक्याई खोङबाला श्यी़वालाक, “को़न्क्षोकगी क्षाक्ले झ्यीयेगी क्षीला हीकी घी झ्यीघो़गुले?”
29येशुगी खुङक्याला सुङा जेपालाक, “को़न्क्षोकगी ॱङाक्कीनगोला धेपा झ्यीयेगो राङ, को़न्क्षोकगी क्षाक्ले लाक।”
30होझ्येरी खुङक्याई खोङबाला श्यी़वालाक, “हेक्याई थोङये धाङ धेपा झ्यीयेला, खेराङ ताक घी जेये? खेराङ घी जेदी हो़तो? 31‘खुङक्याला शायेला खोङबागी नाम्खे श्यीङखामने ग्याङगा ॱनाङा जेपालाक।’#नेहामीया ९:१५ दे ढीक्टा च्योक्रे हीकी धाङबी फामाक्याई रीतोङला ॱमान्ना शेवालाक।”
32येशुगी खुङक्याला सुवालाक, “ङा खेक्याला धेन्पा धेनक्याङ ॱनाहीन, नाम्खे श्यीङखामने ग्याङगा ॱनाङगीनगो मोशे मालाक हीना खेक्याला नाम्खे श्यीङखामने धेन्पे ग्याङगा ॱनाङगीनगो, ङी याप लाक। 33घीझ्येरी ॱनाना को़न्क्षोकगी ग्याङगागो, नाम्खे श्यीङखामने भाप्ती जीक्तेनला मीछे ॱनाङगीन दे लाक।”
34खुङक्याई खोङबाला श्यी़वालाक, “चोवो, दे ग्याङगा हेक्याला च्योई ॱनाङाजे।”
35येशुगी खुङक्याला सुङा जेपालाक, “ङा नी छेगी ग्याङगा हीन। ङीचारु हुङगीन ॱमेतोक्कीलाक धेनी ङाला धेपा झ्यीगीनगो नामा ॱमेकोम्गीलाक। 36हीना ङी खेक्याला ॱनेसाहो़क, खेक्याई ङाला थोरीया धेपा मीझ्यीदालाक। 37यापगी ङाला ॱनाङगीन घीरी ङीचारु हुङगीलाक धेनी ङीचारु हुङगीन सुलाः ङा ॱलोक्येमेन। 38घीझ्येरी ॱनाना ङा नाम्खे श्यीङखामने ङाराङगी दो़पा डुप्तु मेन्दा, ङाला ॱङाक्कीनगी थुकोङ डुप्येगी क्षीला होवाहीन। 39धेनी ङाला ॱङाक्कीनगी थुकोङगो, खोङबागी ङाला ॱनाङा जेजा सुवाः ॱमेतोरा, थामे ङीमागोला सो़न्पो ॱलाङये लाक। 40घीझ्येरी ॱनाना ङी यापगी थुकोङ नी, सेला ज्यारी धेपा झ्यीगीनला थामेपे छेसोक थोप्घोगुलाक धेनी थामे ङीमागोला ङा खोला सो़न्पो ॱलाङयेहीन।”
41येशुगी, “नाम्खे श्यीङखामने भाप्पा ग्याङगागो ङा हीन।” सुरी सुङगीनगोला, याहुदापा पो़न्पोक्याई खोङबागी कोरला फाक्तुङ दुवालाक। 42खुङक्याई ॱनेवालाक, “दे योसेफगी भीजा येशु माले? खी़ फामा होराङ ङोस्येला माले? धा धान्दा खो ‘ङा नाम्खे श्यीङखामने भाप्पा हीन’ ॱनेरी, घाङगी झ्येरी ॱनाथुक्वाले?”
43येशुगी खुङक्याला सुवालाक, “खेराङगी नाङदु फाक्तुङ मादुङ। 44ङाला ॱङाक्कीन यापगी, ङीचारु मीक्या ठीक्ती हुङा मेजेनाः, ङी डुङदु सुवा हुङ ॱमीथुक्कीलाक। धेनी थामे ङीमाला ङा खुङक्याला सो़न्पो ॱलाङयेहीन। 45‘खुङक्या घीरीला को़न्क्षोकगी ॱलावा जेगीलाक’ ॱनेरी, ॱङो़नस्येखेनक्याई ढीक हो़तालाक। यापगी का ङेन्गीन धाङ ज्याङगीन घीरी ङी डुङदु हुङालाक। 46को़न्क्षोकने झ्युङगीन खोङबा च्यीगागी यापला ज्या हो़तालाक धेनी श्येम्मा सी़या यापला माज्या हो़तालाक।
47“ङा खेक्याला धेन्पा धेनक्याङ ॱनाहीन, धेपा झ्यीगीनगोला थामेपे छेसोक हो़तालाक। 48ङा नी छेगी ग्याङगा हीन। 49खीकी धाङबी फामाक्याई ॱमान्ना शेरीया खुङक्या स्यीवालाक। 50हीना शेरीया ॱमीस्यीगीन ग्याङगो नी, नाम्खे श्यीङखामने भाप्पा ग्याङगागो लाक। 51ङा नी नाम्खे श्यीङखामने भाप्पा छेगी ग्याङगा हीन। धेनी ग्याङगा देने शागीनगो धी़ तेन्दु सो़न्पो ॱनेगीलाक। धेनी जीक्तेनगी छेगी क्षीला ङी तेरये झ्यीगीन ग्याङगागो, ङी ली़गी स्या हीन।”
52धा याहुदापाक्याई खोराङक्या नाङदु चो़लीङ झ्येरी ॱनेवालाक, “मी दे घाङगी झ्येरी राङगी स्या होराङला शायेला तेर थुक्कीले?”
53होझ्येरी येशुगी खुङक्याला सुवालाक, “ङा खेक्याला धेन्पा धेनक्याङ ॱनाहीन, खेक्याई मी-भुगी ली़ मेशागीन धाङ खोङबागी ठाक ॱमीथुङगीन थुक्पे, ख्यो़ला छे मेयोङगीलाक। 54ङी ली़ शागीन धाङ ङी ठाक थुङगीनला थामेपे छेसोक हो़तालाक धेनी थामे ङीमागोला ङा खोला सो़न्पो ॱलाङयेहीन। 55घीझ्येरी ॱनाना शामा ॱङोन्नेगो, ङी ली़गी स्या धाङ थुङये ॱङोन्नेगो ङी ठाक लाक। 56ङी स्या शागीन धाङ ङी ठाक थुङगीनगो, ङी नाङ ॱनेलालाक धेनी ङा होदेगी नाङ ॱनेलाहीन। 57सो़न्पो यापगी ङाला ॱङाक्ती, ङा यापला तेन्दी सो़न्पो ॱनेलाहीन। दे च्योक्रे ङाला शागीनगोवा ङाला तेन्दी सो़न्पो ॱनेगीलाक। 58नाम्खे श्यीङखामने भाप्पा ग्याङगा दे, खीकी धाङबी फामाक्याई शेरीया स्यीरी डुगीनगो च्योक्रे मालाक। दे ग्याङगा शागीनगो तेन्दु सो़न्पो ॱनेगीलाक।”
59येशुगी दे कामो़नक्या काफारनाहुमगी छोक्खाङदु क्षो़ सुङी घाङला सुङा जेपालाक।
स्याबाला डागीन माङक्षेगी येशुला पाङवा
60धेनी दे घोरती, येशुगी स्याबाला डागीन मीमाङगी ॱनेवालाक, “सुङ दे ॱमीच्यीकी घाक्वा दुक, देला सी़ ङेन थुक्कीले?”
61हीना खुङक्याई दी कोरला फाक्तुङ दुङगीनगो, येशुगी खेन्दा जेदी खुङक्याला सुवालाक, “दे ताम दी खेक्याला घाक्वा झ्युङये? 62देरे हीन्ना खेक्याई मी-भु एम्मा खोराङ श्युक्जारु, फेया जेगीनगो थोङना घी झ्यीये? 63छे ॱनाङगीनगो थुक्ङी लाक, ली़ने फेन्थोक घीया मेतालाक। ङी ॱनागीन कागो थुक्ङी धाङ छे हीन। 64हीना खेक्याने रीङगागी धेपा मीझ्यीदालाक।” धेपा मीझ्यीगीनक्या धाङ खोङबाला ङोलोक झ्यीगीन सु हीन्गीनगो, येशुगी थोक्माने खेन्दा जेदालाक। 65धेनी खोङबागी सुवालाक, “होझ्येरी ‘यापगी ॱमानाङ हो़ना, ङीचारु सुवा हुङ ॱमीथुक्कीलाक’ ॱनेरी ङी खेक्याला ॱनेवाहीन।” 66होदे स्याम्ने, खोङबागी स्याम्ला डागीन मी माङागी खोङबाला पारी, खोङबागी स्याम्ला डाये भोरपालाक।
67होझ्येरी येशुगी ङेने च्युङङीला सुवालाक, “खेक्याः ङाला पारी डोये हीने?”
68सीमोन पेटोगी खोङबाला श्यी़वालाक, “चोवो, खेराङला थामेपे छेसोकगी कागो हो़तालाक, हेक्या सी़ डुङदु डोये? 69धेनी खेराङ को़न्क्षोकगी धाम्पागो लाक ॱनेरी, हेक्या धेपा झ्यीदीहो़क धेनी दे हेक्याला स्येयेहो़क।”
70येशुगी खुङक्याला कालेनदु सुवालाक, “खे च्युङङी घीरीला ङी दाम्बा माले? हीना खेक्याने च्यीक धी़क लाक।” 71खोङबागी सीमोन ईस्कारीयोतगी भीजा युदाला ॱमीक्ती सुवालाक। घीझ्येरी ॱनाना खो ङेने च्युङङीगोने च्यीक झ्येरीया, खोङबाला ङोलोक झ्यीगीलाक।
Currently Selected:
योहान्ना 6: LOY
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
