योहान्ना 5
5
ङासुगीन ङीमाला चो़गा जेपा
1होदे स्याम्ने, याहुदापाक्याई धी़छेन च्यीक ॱलेप्ती, येशु येरुसालेमदु फेप्पालाक। 2येरुसालेमगी लुक ॱनागीन घोगी डामदु, ॱयाक्कु ॱङा हो़गीन जीङु च्यीक हो़तालाक, ईब्रीपा केकला होदेला बेथेदा ॱनालाक। 3होदे ॱयाक्कुरु श्याराक्या धाङ श्याक्योवाक्या धाङ शा फोक्पा मी नेपा ॱना माङाक्या ङ्यारी धेतालाक। 4[खुङक्या होदे क्षु घुयेला घुक्ती धेतालाक। घीझ्येरी ॱनाना धी़-धी़ला को़न्क्षोकगी भाङछेन च्यीक होरी, होदे जीङुगी क्षु टुक्वालाक धेनी क्षुगो घुलुङ मेताला सु एन्ला होदे नाङदु जुली, होदे नाजा घारेगी तुम्दी धेहो़ना खो ढालाक।]#५:४ दे छीक्छे दे एम्मागी गीरीक धेपक्याला माढीक हो़तालाक।
5होदुरु लो सुमच्यु सोपग्ये थुक्पे नेरी धेता मी च्यीक हो़तालाक। 6येशुगी खोला होदुरु ङ्यारी धेतागो शीक्ती धेनी धीरीङने खो होदुरु हो़गीनगो खेन्दा जेदी खोला सुवालाक, “ख्यो़ दे नेपाने थारङी दो़दे?”
7होदे मी नेपागी खोङबाला श्यी़वालाक, “चोवो, क्षुगो घुली घाङला ङाला जीङु नाङदु च्युक्कीन सुवा मेक धेनी ङा डी़-डी़, ङाने एन्ला श्येम्मा क्षु नाङदु जुछारी।”
8येशुगी खोला सुवालाक, “लोङ, ख्यो़री ङ्याजे खुरती घोम्बा ग्योप।” 9लाम्साङ होदे मीगो ढाक्पालाक धेनी खोरी ङ्याजे खुरती सोवालाक। धा होदे ङीमागो ङासुगीन ङीमा लाक।
10होझ्येरी याहुदापा पो़न्पोक्याई होदे मीला ॱनेवालाक, “धीरीङ ङासुगीन ङीमा झ्येरी, ख्यो़ खेरी ङ्याठी खुरकीनगो ठीमला ॱमीथी़न्दालाक।”
11खी़ खुङक्याला लेन ग्याप्पालाक, “ङाला ढाक्सो ॱनाङगीन मीगी़ राङ, ङाला ‘ख्यो़री ङ्याजे खुरती घोम्बा ग्योप’ सुरी सुजुङ।”
12खुङक्याई खोला ढीवालाक, “ख्यो़ला ‘ख्यो़री ङ्याजे खुरती ग्युक’ ॱनागीन मीगो सुले?”
13हीना होदे ढाक्टा मीगी़ खोङबा सुले ॱनेरी ॱमास्येवालाक घीझ्येरी ॱनाना होदुरु मीछोक माङा झ्येरी, येशु होदेने खाबा फेप्पालाक।
14स्याम्ला येशुगी खोला क्षो़खाङदु थुक्ती खोला सुवालाक, “तो़दाङ, ख्यो़ ढाक्सालाक। होझ्येरी स्याम्ला देने ल्हाक दुक्ङेल क्षे मेयोङयेला, ख्यो़ याङदा धीक्पा माझ्यी।”
15धेनी होदे मीगो सोरी, खोराङला ढाक्सो ॱनाङगीनगो येशु लाक ॱनेरी, याहुदापा पो़न्पोक्याला स्येपालाक।
को़न्क्षोकगी सेने छे थोप्पा
16होझ्येरी येशुगी ङासुगीन ङीमाला देरे जेदी, याहुदापा पो़न्पोक्याई खोङबाला दुक्पु ताङयेला गो चुक्पालाक। 17हीना येशुगी खुङक्याला सुवालाक, “ङी यापगी धान्दा थुक्पे क्षाक्ले जेदालाक धेनी ङा झ्यीदाहीन।”
18येशुगी ङासुगीन ङीमा पाङये च्यीगा मेन्दा राङला को़न्क्षोकगी ढाडा जेदी, को़न्क्षोक नी राङगी याप लाक ॱनेरी सुङगीन झ्येरी, याहुदापा पो़न्पोक्याई येशुला देले ल्हाक सेयेगी थापस्यी चावालाक।
19येशुगी खुङक्याला सुवालाक, “ङा खेक्याला धेन्पाराङ ॱनाहीन, यापगी घी जेगीनगो, से गीया होदे च्योक्रे जेदालाक। धेनी यापगी जेगीनगो मीशीक्वा, से राङगी घीया जे ॱमीथुक्कीलाक। 20घीझ्येरी ॱनाना यापगी सेला झाम्पा जेदी, राङगी जेगीन घीरी सेला तो़न्दा जेदालाक। धेनी खेक्या ॱहाङसाङदु च्युक्येला, देने ल्हाक क्षाक्ले क्षे खोङबागी सेला तो़न्दा जेगीलाक। 21घीझ्येरी ॱनाना यापगी स्यीम्पोक्याला सो़न्पो जेदी छे ॱनाङगीन च्योक्रे, सेगीयाः राङगी ग्येवे मीक्याला छे ॱनाङगीलाक। 22-23यापगी सी़ च्यीकगीया ठीम्चो़ मेजेदालाक हीना घीरीगी यापला चीगीन च्योक्रे सेला चीलास्योक ॱनेरी, ठीम चेयेगी क्षाक्ले घीरी सेला ॱनाङ हो़तालाक। सेला ॱमीचीगीनक्याई खोङबाला ॱङाक्कीन यापलाः ॱमीचीगीलाक।
24“ङा खेक्याला धेन्पा धेनक्याङ ॱनाहीन, ङी का ङेन्गीन धाङ ङाला ॱङाक्कीनगोला धेपा झ्यीगीनला, थामेपे छेसोक थोप हो़तालाक। खोला ङेपा ॱमेफोक्कीलाक हीना छीवाने छेगी नाङदु थार हो़तालाक। 25ङा खेक्याला धेन्पा धेनक्याङ ॱनाहीन, स्यीम्बुक्याई को़न्क्षोकगी सेगी सुङकेक घोरकीन धी़गो ॱलेवी हो़तालाक धेनी धी़गो धान्दा लाक। धेनी ङेन्गीनक्या सो़न्पो ॱनेगीलाक। 26घीझ्येरी ॱनाना याप राङला छे हो़गीन च्योक्रे, खोङबागी सेलाः छे ॱनाङयेगी वाङ जेपालाक। 27धेनी यापगी खोङला ठीम चेयेगी आङजा ॱनाङ हो़तालाक घीझ्येरी ॱनाना खोङबा मी-भु लाक। 28देला ॱहाङसा माझ्यी घीझ्येरी ॱनाना धी़ च्यीक स्यारकीलाक, होदे घाङला धी़ठोला हो़गीनक्याई खोङबागी सुङकेक घोरकीलाक 29धेनी फीला थो़न्दी हुङगीलाक। ले शाङा झ्यीगीन घीरी छेसोक थोप्ये क्षीला, सो़न्पो लाङये धाङ ले ङेन्पा झ्यीगीन घीरी ङेपा फोक्येगी क्षीला सो़न्पो लाङगीलाक।”
येशुला धेन्पाङ जेपा
30“ङा ङाराङगी घीया झ्यी ॱमीथुक्हो़क। ङी घी घोरी, ङा होदे च्योक्रेराङ ठीम चेदीहो़क धेनी ङी ठीम ढाङा हो़क। घीझ्येरी ॱनाना ङा ङाराङगी दो़पा चाला मेन्दा, ङाला ॱङाक्कीनगी थुकोङ चालीहो़क।
31“ङी ङाराङगी कोरला धेन्पाङ झ्यीना होदे धेन्पा मेयोङालाक। 32ङी कोरला धेन्पाङ झ्यीगीन मी श्येम्मा च्यीक हो़तालाक धेनी खोङगी ङाला पाङपो जेगीनगो, धेन्पा हीन ॱनेरी ङाला स्येयेहो़क।
33“खेक्याई योहान्नाचारु मी रीङगा ॱङाक्पालाक धेनी खोङगी धेन्पागी पाङपो जेपालाक। 34ङी क्षीला मीगी पाङपो घोये मेक हीना खेक्याला थारपा थोप्येगी क्षीला ङा देक्या ॱनाहीन। 35योहान्ना नी, बारकीन धाङ हो़ स्यारकीन मारमे च्योक्रे हो़तालाक धेनी खेक्या युन तुङा च्यीगा, खी़ हो़ला ङ्यामो घाये दो़पालाक।
36“हीना ङाला हो़गीन धेन्पाङगो योहान्नाला क्षे हो़क। घीझ्येरी ॱनाना यापगी डुप्तु च्युक्ये क्षाक्ले, ङाला ॱनाङगीनक्या ङा झ्यीदीहो़क धेनी देक्यागीराङ यापगी ङाला ॱङाक्पालाक ॱनेरी पाङपो झ्यीदालाक। 37धेनी ङाला ॱङाक्कीन यापगीराङ ङाला पाङपो जेदालाक। खेक्याई खोङबागी सुङकेक नामा माघोर हो़तालाक धेनी खोङबागी कुयीप नामा माज्या हो़तालाक। 38धेनी खोङबागी ॱङाक्कीनगोला खेक्याई धेपा माझ्येगीन झ्येरी, खोङबागी का खेक्याई नाङदु ॱमेनेलालाक। 39सुङरापगी नाङदु थामेपे छेसोक हो़टु साम्दी, खेक्या सुङराप नाङला चालालाक। ङी कोरला पाङपो झ्यीगीन होदे सुङरापराङ लाक 40हीना खेक्या थामेपे छेसोक थोप्येला ङीचारु हुङङी मेदो़दालाक।
41“ङी मीक्याने कुरती चाला मेन, 42हीना खेक्या नाङदु को़न्क्षोकगी झाम्पा मीदुक ॱनेरी ङाला स्येयेहो़क। 43ङा ङी यापगी छेनला तेन्दी होवाहीन हीना खेक्याई ङाला खेलेन्गीमीदुक। मी श्येम्मा च्यीक राङगी मीङला तेन्दी हो हो़ना, खेक्या खोला खेलेन्येहो़क। 44को़न्क्षोक च्यीक्पोने झ्युङगीन कुरतीगो ॱमेचाला, खेक्या पी़न्सुमगी नाङदु कुरती चागीन झ्येरी, खेक्या घाङगी झ्येरी धेपा झ्यी थुक्कीले?
45“ङी यापगी डुङदु खेक्याला क्यो़न काटु ॱनेरी ॱमासाम। क्यो़न कागीनगो खेक्यागी ॱलोकाका मोशेगो लाक। 46खेक्याई मोशेला यीच्चे झ्येहो़ना, खोङगी ङी कोरला ढीक्टा झ्येरी ङाला खेक्याई धेपा झ्यीयेहो़क। 47हीना खेक्या खोङगी ढीक्टाक्याला यी ॱमेछेना, ङी तामक्याला घाङगी झ्येरी यीच्चे झ्यीये?”
Currently Selected:
योहान्ना 5: LOY
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
