योहान्ना 14
14
येशुगी ङेनेक्याला सेम्सो ॱनाङवा
1येशुगी ङेनेक्याला सुवालाक, “खेक्या सेम फाम्बा माझ्यी। को़न्क्षोकला ॱलो को धेनी ङालाः ॱलो को। 2ङी यापगी नाङला धेजा माङा हो़तालाक। देरे मेन्ना, ङी एम्मा खीकी क्षीला धेजा डाढीक झ्यीरु डोउ ॱनेरी, खेक्याला ॱनागीले? 3धेनी ङा सोरी खीकी क्षीला धेजा डाढीक झ्येसारती, ङा धाब्ले हुङयेहीन। धेनी खेक्याला ङा हो़जारु ठीक्ती डोयेहीन। धेनी ङा घारु हो़जारु, खेक्याः हुङगीलाक। 4ङा डोजी लामगो खेक्याः स्येलालाक।”
येशुराङ लाम धाङ धेन्पा धाङ छेसोक
5थोमागी येशुला श्यी़वालाक, “चोवो, हेक्याई खेराङ घारु फेप्येगो ॱमेस्येहो़क। धा लामगो हीकी घाङगी झ्येरी स्येये?”
6येशुगी खोला सुवालाक, “ङा नी लाम धाङ धेन्पा धाङ छे हीन। ङाने माना यापगी डुङदु सुवाः डो ॱमीथुक्कीलाक। 7खेक्याई ङाला ङोस्ये हो़ना, ङी यापलाः ङो स्येयेहो़क। धा देने ॱहाला, खेक्याई खोङबाला ङो स्येलालाक धेनी खोङला ज्या हो़तालाक।”
8फीलीपगी खोङबाला श्यी़वालाक, “चोवो, खेराङगी हेक्याला याप ॱङो़न्दा जे धेनी हेला ढीक्येदुक।”
9येशुगी खोला सुवालाक, “फीलीप, ङा हुरे रीङा खीकीमुला धेतीया, ख्यी़ ङाला ङोमेस्येलाले? ङा थोङगीनगी़ यापलाः ज्या हो़तालाक। ‘हेक्याला याप ॱङो़न्दा जे।’ ॱनेरी खेक्या घाङगी झ्येरी ॱनाथुक्वाले? 10ङा याप नाङ हो़गीन धाङ याप ङी नाङ हो़गीनगो खेक्याई धेपा मीझ्यीदाले? ङी खेक्याला स्येगीन लाबक्या ङाराङगी वाङने स्येदामेन हीना ङी नाङ श्युक्कीन, यापगी राङगी क्षाक्लेक्या जेदालाक। 11ङा याप नाङ हो़गीन धाङ याप ङी नाङ हो़गीनला धेपा झ्यी। याङमेना ङी लेगाक्याला तेरी धेपा झ्यी।
12“ङा खेक्याला धेन्पा धेनक्याङ ॱनाहीन, ङाला धेपा झ्यीगीनगी़ ङी घी झ्यीगीन लेगाक्याः झ्यीगीलाक धेनी देले क्षे लेगाक्या खी़ झ्यीगीलाक। घीझ्येरी ॱनाना ङा यापगी डुङदु डी़हो़क। 13यापगी शीजे सेगी थोक्ने ॱङो़न्येला, खेक्याई ङी मीङला घी श्यी़, होदे ङी झ्यीयेहीन। 14ङी मीङगी थोक्ने खीकी ङाला घी श्यी़ना, ङा होदे झ्यीयेहीन।
धाम्पे थुक्ङीगी धाम्चा
15“खेक्याई ङाला चेवा झ्यीना, ङी काठीमक्या ॱरुङगीलाक। 16धेनी ङा यापला श्यी़येहीन, धेनी खीकीमुला ग्युने ग्युन्दु ॱनेयेला, खोङबागी खेक्याला रोवा जेगीन श्येम्मा च्यीक ॱनाङगीलाक। 17दे नी धेन्पा तो़न्गीन धाम्पे थुक्ङी लाक। जीक्तेनगी मीक्याई खोङबाला सी़ ॱमीथुक्कीलाक घीझ्येरी ॱनाना खुङक्याई खोङबाला ॱमेथोङालाक धेनी ङो ॱमेस्येलालाक। खोङबा खेक्यामुला ॱनेलालाक धेनी खीकी नाङ ॱनेगीलाक, होझ्येरी खेक्याई खोङला ङो स्येलालाक।
18“ङा खेक्याला दाठुकला मेभोर। ङा खेक्याचारु हुङयेहीन। 19धा धी़ तीते च्यीकने जीक्तेनगी ङाला ॱमेथोङगीलाक हीना खेक्याई ङाला थोङगीलाक। ङा सो़न्पो झ्येरी, खेक्याः सो़न्पो ॱनेगीलाक। 20होदे ङीमागोला, ङा याप नाङ हो़गीन धाङ खेक्या ङी नाङ हो़गीन धेनी ङा खेक्याई नाङ हो़गीनगो खेक्याई स्येगीलाक। 21ङी काठीमक्या खेलेन्दी ॱरुङगीनक्याई ङाला झाम्पा झ्यीदालाक। धेनी ङाला झाम्पा झ्यीगीनक्याला, ङी यापगी झाम्पा जेगीलाक। ङी खोला झाम्पा झ्यीयेहीन धेनी राङला खोचारु ॱङो़न्येहीन।”
22युदागी (युदा ईस्कारीयोतगो मालाक) श्यी़वालाक, “चोवो, खेराङ जीक्तेनगी मीक्याला मेन्दा, हेक्याला ॱङो़न्दा जेये? दे घाङगी झ्येरी झ्युङ थुक्कीले?”
23येशुगी खोला कालेन सुवालाक, “ङाला झाम्पा झ्यीगीनगी ङी का ॱरुङगीलाक धेनी ङी यापगी खोला झाम्पा जेगीलाक। धेनी ङा धाङ ङी याप खोचारु फेप्ती खी़मुला ॱनेयेहीन। 24धेनी ङाला झाम्पा मीझ्यीगीनगी ङी का ॱरुङगीमालाक। खेक्याई ङेन्गीन का दे ङाने मेन्दा ङाला ॱङाक्कीन यापने लाक।
25“ङा खेक्यामुला हो़धी़राङ, ङी दे लाबक्या खेक्याला स्येदाहीन। 26हीना ङी मीङ थोक्ने यापगी ॱनाङगीन रोवा जेगीन धाम्पे थुक्ङीगी़, खेक्याला लाब घीरी ॱलाबा जेगीलाक। धेनी ङी खेक्याला स्येगीन घीरी ढो़न्सो ॱनाङगीलाक। 27श्यीदे दे ङा खेक्याला भोराहीन, होदे ङी श्यीदेगो खेक्याला तेराहीन। जीक्तेनगी तेरकीन च्योक्रे, ङी खेक्याला तेरामेन। खेक्या राङगी सेम ठुक्तु ॱमाचुक धेनी देला जीक्नाङ केरु ॱमाचुक।
28“ङी खेक्याला ‘ङा लोक्ती डोयेहीन धेनी ङा खेक्याचारु हुङयेहीन’ ॱनागीन दे घोर हो़तालाक। खेक्याई ङाला चेवा हो़ना, ङा यापगी डुङदु डोवालाक ॱनेरी, खेक्या ङ्यामो घायेहो़क घीझ्येरी ॱनाना ङाले याप खाक्क्षे लाक। 29धा दे झ्युङी घाङला खीकी धेपा झ्यीयेला, ङी खेक्याला दे माझ्युङ एन्लाराङ दे स्येवी। 30धा ङा खेक्यामुला लाब युन्रीङा ॱमेताङ घीझ्येरी ॱनाना दे जीक्तेनगी वाङग्युर झ्यीगीनगो हुङी। ङी थोकला खोला वाङ मेतालाक। 31हीना ङा यापला चेवा झ्यीदाहीन ॱनेरी, जीक्तेनगी ॱहाघोरयेगी क्षीला, ङा यापगी का ॱनाङगीन च्योक्रे झ्यीदाहीन। धा लोङ, होराङ देने ॱहाला डोउ।”
Currently Selected:
योहान्ना 14: LOY
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
