မာကု နိဒါန်း
နိဒါန်း
မာကု ရေးဟှားဟှူ ခရစ်တော်ရဲ့ ဒန်းကောန်းဟှာ ဓမ္မသစ်ကျမ်းထဲမာ ယေရှုခရစ်တော်ရဲ့ သတ်တော်စဉ်ဟှို ဖော်ပြဟှားဟှူကျမ်း လေးစောန်ထဲဟှ တစောန်ဖြစ်ဟှယ်။ အယ်ကျမ်းတစောန်စီဟှို “ဧဝံဂေလိ” ဆိုဘီး ခေါ်ဟှယ် “ဒန်းကောန်း” ဆိုဘီး ဓိပါယ်ရဟှယ်။ ယေရှု သေဟှားဘီးန အယ်ကျမ်းလေဟှို မဿဲ၊ မာကု၊ လုကာန ယောဟန်ဟှ ရေးဟှားဟှယ်။ မာကုရေးဟှားဟှူ ဧဝံဂေလိကျမ်းဟှာ ဧဝံဂေလိ လေးစောန်ထဲမာ တိုဆောင်းဖြစ်ဟှယ်။ ဧဝံဂေလိကျမ်း ဂူလောင်းရဲ့ ဦးဆောင်းဖြစ်ဟှူ အယ်ကျမ်းဟှာ ခရစ်တော် မွီးဘီးန ၆၅–၇၀ ခုနှစ်ကြားမာ ရေးဟှားဟှယ် ဆိုဘီး ယောင်ကြည်ဟှားဂေ့ဟှယ်။ အယ်ကျမ်းဟှာ ရောမ ခရစ်ယာန်လေဟှို အားပေးဟှို့ ရည်ရွယ်ချစ်န ရောမဗြို့မာ ရေးဟှားဟှယ် ဆိုဘီး ကျမ်းစာပညာရှင်လေဟှ ယောင်ကြည်ဂေ့ဟှယ်။
ယောဟန်မာကု ဆိုဘီးလည်း ထန်ပေါ်ဟှူ မာကုဟှာ တမန်တော် ပေါလုန ဗာနဗရဲ့ ပေါန်းဖော် တယော့‑က်ဖြစ်ဘေမဲ့ သူဟှာ သူးနို့ရဲ့ သာသနာခရီးစဉ်ဟှို စွန့်ပစ်လိုက်ဟှူ ခီမာ သူ့ရဲ့ ဂေါင်သိက္ခာဟှို ထိခိုက်လေဟှယ် (တ ၁၃.၁၃)။ နော့‑က်တခါ မာကုဟှာ ဗာနဗန ပ္လန်ဘီး ခရီးသွားလေဟှယ် (တ ၁၅.၃၇–၃၉)။ မာကုဟှာ ပေတရုရဲ့ ရရာတိုင်းခင်ဟှူ ငယ်ဂျင်းဖြစ်လည်း သိမှတ်ဂေ့ဟှယ် (၁ ပေ ၅.၁၃)။ မာကုဟှာ ယေရှုရဲ့ သတ်တော်စဉ်ဟှို မျစ်မြင်တယော့‑က် မှုဘေမဲ့လည်း ပေတရုရဲ့ သတ်သေလေ ဘောင်ဂီးဟှို မှတ်တမ်းတန်ဟှားဟှယ် ဆိုဘီး ကျမ်းစာပညာရှင်လေဟှာ ယောင်ကြည်ဂေ့ဘီး အယ်ဇာဟှာ မာကုရေးဟှားဟှူ ဧဝံဂေလိတွပ် ခြေခံဖြစ်ဟှယ်။ အယ်ကျမ်းထဲမာ မာကုဟှာ တဗဲ့တော်ဖြစ်ဇာန နော့‑က်ဆောင်းခီမာ ယေရှုရဲ့ သွန်သန်ဇာဟှို လေးပေးဘီး ဖော်ပြဟှယ်။
ကြောန်းရာ ကျဉ်းချောက်
၁။ မာကုဟှာ အယ်ကျမ်းဟှို နိဒါန်းပျိုးဟှယ် (၁.၁–၁၃)
၂။ မာကုဟှ ဂါလိလဲပြည်မာ ယေရှုရှိနေဒူး သူ့ရဲ့ သာသနာလောက်ငန်းဟှို ဖော်ပြဟှယ် (၁.၁၄—၈.၂၁)
၃။ နော့‑က်ဘီးဟှာ သူဟှ ယေရုရှလင်ဗြို့ဟှို ယေရှုရဲ့ ခရီးစဉ်န ပတ်သတ်ဘီး ပြောဟှယ် (၈.၂၂—၁၀.၅၂)
၄။ မာကုဟှ ယေရုရှလင်ဗြို့မာ ယေရှုရဲ့ သေရှင်းန ရှင်ပ္လန်ထမြော့‑က်ရှင်း ပါဝမ်ဟှူ သူ့ရဲ့ ခီကြောန်းဟှို ရေးသားချစ်န ဆောန်းသတ်ဟှားဟှယ် (၁၁.၁—၁၆.၈)
Currently Selected:
မာကု နိဒါန်း: NTDWB24
Highlight
Share
Copy
Want to have your highlights saved across all your devices? Sign up or sign in
© The Word for the World International, 2024.