မဿဲ 28
28
ရှင်ပ္လန်ထမြော့‑က်တော်မူဟှူကြောန်း
(မာကု ၁၆.၁–၁၀; လုကာ ၂၄.၁–၁၂; ယောဟန် ၂၀.၁–၁၀)
1ဒန်းနေ့လွန်ဘီးန နန်းနွေနေ့ မိုးလန်းခါနီးမာ မာဂဒလဗြို့သူ မာရိန တခြားမာရိလေဟှာ သန်းခ္လိုင်းဟှို သွားဘီး ကေ့ဂေ့လေဟှယ်။ 2ဘုရားသခင်ရဲ့ ကောန်းဂန်တမန်တပါးဟှာ ကောန်းဂန်ဘောင်ဟှနေ ဆင်းလာဟှူကြောန့် ရောက်တရစ် ရရာတိုင်း ကြမ်းဟှူ မ္လေဂီးလှောက်လာဟှယ်။ အယ်ဘီးန က္လော့‑က်တောင်းဟှို လှိဖယ်လိုက်ဘီး အယ်က္လော့‑က်တောင်းထတ်မာ ထိုင်နေလေဟှယ်။ 3သူ့ရဲ့ ရောန်ဆင်းဟှာ လျှပ်စစ်လတ်ဟှူမျိုးဖြစ်ဘီး သူ့ရဲ့ ဝတ်ဟှလည်း နှမ်းပွမ့်မျိုးဘဲ့ ဖ္လူလေဟှယ်။ 4စောန့်လေဟှာ ကောန်းဂန်တမန်ဟှို ရရာတိုင်း ကြော့‑က်လန့်ဂေ့ဘီး လူသေလေမျိုးဘဲ့ ဖြစ်ဟှားဂေ့လေဟှယ်။
5ကောန်းဂန်တမန်ဟှ အယ်မီးမလေဟှို “ကြော့‑က်ဂေ့န။ နန်းနို့လေဟှာ လတ်ဝါးကပ်တိုင်မာ သတ်ခံရဟှူ ယေရှုဟှို ရှာနေဂေ့ဟှယ် ဆိုဇာဟှို ငါသိဟှယ်။ 6ကိုယ်တော်ဟှာ အယ်နေရာမာမှေ့ဘီ။ မိန့်တော်မူဟှားဟှူတိုင်းဘဲ့ ထမြော့‑က်တော်မူဟှားဘီ။ ကိုယ်တော်လျောင်းတော်မူဟှားဟှူ နေရာဟှို လာဘီးကေ့ဂေ့ပါ။ 7တဗဲ့တော်လေနားဟှို ဗြန်းဗြန်သွားဘီး ‘ကိုယ်တော်ဟှာ သေရာဟှနေ ထမြော့‑က်တော်မူဟှားဘီ။ နန်းနို့လေထတ်စောဘီး ဂါလိလဲပြည်ဟှို ကြွတော်မူလေ့မယ်။ အယ်နေရာမာ နန်းနို့လေဟှာ ကိုယ်တော့်ဟှို တွိရဂေ့လေ့မယ်!’ ဆိုဘီး ပြောဂေ့ပါ။ ငါပြောလိုက်ဇာလေဟှို မေ့ဂေ့န။”
8အယ်ကြောန့် အယ်မီးမလေဟှာ ကြော့‑က်လန့်ဘေမဲ့လည်း အားရဝန်းသာန သန်းခ္လိုင်းဟှနေ ဗြန်းဗြန်ထွပ်ဟှားဘီး တဗဲ့တော်လေဟှို ပြောပြဟှို့တွပ် ပ္လေးဂေ့လေဟှယ်။
9ရောက်တရစ် ယေရှုဟှ သူးနို့နားဟှို ရော့‑က်လာဘီးဟှာ “နန်းနို့နတူးဒူ ငြီသတ်ရှင်းရှိပါစေ” ဆိုဘီး မိန့်တော်မူလေဟှယ်။ သူးနို့ဟှာ ကိုယ်တော်နားဟှို ချဉ်းကပ်ဘီးဟှာ ခေတော်ဟှို ဖတ်ဘီး ရှိခိုးဂေ့လေဟှယ်။ 10ယေရှုဟှ “ကြော့‑က်ဂေ့န။ သွားဘီးဟှာ ငါ့ရဲ့ ညီကိုလေဟှို ဂါလိလဲပြည်ဟှို သွားဟှို့တွပ် ပြောဂေ့။ သူးနို့လေဟှာ အယ်နေရာမာ ငါ့ဟှို ဗြင်ရဂေ့လေ့မယ်” ဆိုဘီး မိန့်တော်မူလေဟှယ်။
စောန့်လေရဲ့ စီရင်ခံစာကြောန်း
11အယ်မီးမလေဟှာ လမ်းမာ သွားနေဒူးမာ သန်းခ္လိုင်းဂူစောန့်နေဟှူ တပ်သားတချို့ဟှာ ဗြို့ထဲဟှို ဝမ်ဘီး ယဇ်ပုရောဟိတ်ဂီးလေဟှို ဖြစ်ပျစ်ဇာလေ အားလောင်းဂူဟှို ပြောပြဂေ့လေဟှယ်။ 12ယဇ်ပုရောဟိတ်ဂီးလေဟှာ သတ်ကီးဝါဂီးလေန တွိဆောင်ဂေ့ဘီး ဆွေးနွေးဘီးန သူးနို့ဟှာ စစ်သားလေဟှို ကပ်လေဘောင်ဂီးပေးဘီး၊ 13“နို့လေအိမွီနေဒူးမာ သူ့ရဲ့ တဗဲ့လေဟှာ ညဉ့်ခန်းဖတ်မာ လာဘီး လောန်းဟှို ခိုးဆောန်ဟှားဟှယ် ဆိုဘီး ပြောဂေ့။ 14ဗြို့ဝန်မန်းဟှာ အယ်မူဒန်းဟှို သိဟှားမယ် ဆိုဟှာ နို့လေဟှာ သူ့ဟှို စည်းရောင်းဘီး နန်းနို့မာ စိုးရိမ်ဇာမှေ့ဟှို့တွပ် လောက်ပေးမယ်” ဆိုဘီး ပြောဂေ့ဟှယ်။
15စောန့်လေဟှာ ကပ်ဟှို ယူဘီးဟှာ သူးနို့ဟှို ညွန်ကြားဟှားဟှူတိုင်း လောက်ဂေ့လေဟှယ်။ အယ်ကြောန့် အယ်ဒန်းဟှာ ယုဒလူမျိုးလေထဲမာ အယ်နေ့ထိ ပ္လံ့နှံ့နေလေဟှယ်။
တဗဲ့တော်လေဟှို ကိုယ်ထန်ရှားပြဟှူကြောန်း
(မာကု ၁၆.၁၄–၁၈; လုကာ ၂၄.၃၆–၄၉; ယောဟန် ၂၀.၁၉–၂၃; တမန်တော် ၁.၆–၈)
16 #
မ ၂၆.၃၂; မာ ၁၄.၂၈ တဗဲ့တော်ဆယ့်တယော့‑က်ဟှာ ဂါလိလဲပြည်ဟှို သွားဘီး ယေရှုမှာဟှားတိုင်း တောန်ထတ်ဟှို သွားဂေ့လေဟှယ်။ 17သူးနို့လေဟှာ ကိုယ်တော့်ဟှို တွိဗြင်ရဟှူ ခီမာ ရှိခိုးဂေ့လေဟှယ်။ အယ်ဘေမဲ့ သူးနို့ထဲဟှ တချို့ဟှာ သံသယဖြစ်ဂေ့ဟှယ်။ 18ယေရှုဟှာ တဗဲ့တော်လေနားဟှို ကြွလာဘီးဟှာ “ကောန်းဂန်န မ္လေဂီးထတ်မာ ရှိမျှဟှူ ခွမ့်အာဏာလေဟှို ငါ့ဟှို ပေးအပ်တော်မူဘီ။ 19#တ ၁.၈အယ်ကြောန့် နန်းနို့လေဟှာ သွားဘီး လူမျိုးပေါန်းဟှို ငါ့တဗဲ့ဖြစ်စေဘီးဟှာ ခမည်းတော်၊ သားတော်၊ သန့်ရှင်းဟှူဝိညာဉ်တော်ရဲ့ နာမတော်ထဲမာ ဗတ္တိဇံပေးဂေ့ဘီး 20နန်းနို့လေဟှို ငါပညတ်ဟှားဇာလေ အားလောင်းဟှို နာခံဟှို့တွပ် သွန်သန်ဂေ့ပါ။ ငါဟှာလည်း ကမ္ဘာကူဆောင်းဟှူ ခီထိ နန်းနို့လေနတူးဒူ မြဲဒမ်းရှိနေမယ်” ဆိုဘီး မိန့်တော်မူလေဟှယ်။
Currently Selected:
မဿဲ 28: NTDWB24
Highlight
Share
Copy
Want to have your highlights saved across all your devices? Sign up or sign in
The New Testament in Dawei Language © The Word for the World International and The Dawei Bible Translation Committee, 2024.
