လုကာ 19

ယေရှုန ဇက္ခဲကြောန်း

1ယေရှုဟှာ ယေရိခေါဗြို့ထဲဟှို ဝမ်ဟှားဘီးဟှာ အယ်ဗြို့ဟှို ဖြတ်ဟှားတော်မူဟှယ်။ 2အယ်နေရာမာ ဇက္ခဲနာမယ်ရှိဟှူ လူတယော့‑က်ရှိဟှယ်။ သူဟှာ ခွန်ခေါန်းဖြစ်ဘီး ဌေးသားလည်း ဖြစ်ဟှယ်။ 3သူဟှာ ယေရှုဟှို ဖယ်သူဖြစ်ဟှယ် ဆိုဇာဟှို ဗြင်ရှင်ဘေမဲ့လည်း ရပ်ပုဟှူသူ တယော့‑က်ဖြစ်ဟှူကြောန့် လူအောက်ဂီးဟှို ကျော်ဘီး ယေရှုဟှို ဗြင်နိုင်ဘဲဖြစ်နေဟှယ်။ 4အယ်ကြောန့် သူဟှာ လူအောက်ဂီးရှေ့ဟှနေ ပ္လေးဟှားဘီး ယေရှုဟှို ဗြင်ဟှို့တွပ် သဖန်းဗန်ထတ်ဟှို တတ်လေဟှယ်။ ဖြားဖြစ်ကြောန့်နူးဆိုဟှာ ကိုယ်တော်ဟှ အယ်လမ်းတိုင်း လာနေဟှူကြောန့် ဖြစ်လေဟှယ်။ 5ယေရှုဟှာ အယ်နေရာဟှို ရော့‑က်လာဟှူ ခီမာ မော်ကေ့လိုက်ဘီးန “ဇက္ခဲ၊ ဗြန်းဗြန်ဆင်းလာ။ အယ်နေ့ နန့်အီမာ ငါတည်းမယ်” ဆိုဘီး မိန့်တော်မူလေဟှယ်။

6ဇက္ခဲဟှာ ဗြန်းဗြန်ဆင်းလာဘီး ကိုယ်တော့်ဟှို ရရာတိုင်း ဝန်းသာဟှူစိန ကြိုဆိုလေဟှယ်။ 7အယ်မူဇာဟှို ဗြင်လိုက်ဟှူ လူလေ အားလောင်းဂူဟှ “အယ်လူဟှာ ပြစ်သားတယော့‑က်ရဲ့ အီမာတည်းဟှို့ လိုက်ဟှားဘီ!” ဆိုဘီး ကဲ့ရဲ့ပြစ်တန်ဂေ့ဟှယ်။

8ဇက္ခဲဟှာ ထရပ်ဘီးဟှာ “သခင်! ကျွန်တော်ရဲ့ အောက်စာပစ်စီး တဝပ်ဟှို ဆင်းရဲသားလေဟှို ပေးပါမယ်။ အယ်ဘီးဟှာ ကျွန်တော်ဟှာ တယော့‑က်ယော‑က်နားဟှ တရားဘဲန ယူဟှားဇာလေ ရှိမယ် ဆိုဟှာ ကျွန်တော်ဟှာ လေးဆ ပ္လန်ပေးပါမယ်” ဆိုဘီး သခင်ဘုရားဟှို လျှော့‑က်လေဟှယ်။

9ယေရှုဟှ “အယ်နေ့ဘဲ့ ကယ်တန်ရှင်းဟှာ အယ်အီထတ်ဟှို ရော့‑က်လေဘီ။ ဖြားဖြစ်ကြောန့်နူးဆိုဟှာ အယ်သူဟှာလည်း အာဗြဟံရဲ့ မ္လေးမ္လစ် တယော့‑က် ဖြစ်ဟှူကြောန့် ဖြစ်လေဟှယ်။ 10#မ ၁၈.၁၁လူသားဟှာ ပျော့‑က်နေဟှူ သူလေဟှို ရှာဟှို့န ကယ်တန်ဟှို့တွပ် ကြွလာဟှယ်” ဆိုဘီး သူ့ဟှို မိန့်တော်မူလေဟှယ်။

ရွှေဒန်းဂါး ပေါင်ဥပမာကြောန်း

(မဿဲ ၂၅.၁၄–၃၀)

11 # မ ၂၅.၁၄–၃၀ ယေရှုဟှ အယ်ကြောန်းရာလေဟှို နားထောန်နေဟှူ သူလေဟှို ပေါင်ဥပမာ တခုန ထပ်ဘီး မိန့်တော်မူလေဟှယ်။ ကိုယ်တော်ဟှာ ယေရုရှလင်ဗြို့နားမာ ရှိနေဟှူကြောန့် ဘုရားသခင်ရဲ့ နိုင်ငံတော်ဟှာ ရှစ်ရှင်းပေါ်လာမယ် ဆိုဘီး သူးနို့လေဟှ ထန်နေဂေ့ဟှူကြောန့် ဖြစ်ဟှယ်။ 12အယ်ကြောန့် ကိုယ်တော်ဟှ “မြင့်မြတ်ဟှူသူ တယော့က်ဟှာ မန်းဂီးဖြစ် ခံယူဘီးမှ ပ္လန်လာမယ် ဆိုဘီး ဝီးဂီးမာရှိဟှူ နိုင်ငံဟှို သွားလေဟှယ်။ 13ခရီးသွားခန်မာ သူဟှာ စေခံဆယ်ယော့‑က်ဟှို ခေါ်ဘီးန ရွှေဒန်းဂါး တပ္လားစီ ပေးဘီးဟှာ ‘ငါခရီး ထွပ်နေဒူးမာ အယ်ဒန်းဂါးလေန စီးပွားရှာဂေ့’ ဆိုဘီး သူးနို့ဟှို မှာဟှားရစ်လေဟှယ်။ 14အယ်ဘေမဲ့ သူ့ရဲ့ တိုင်းသူပြည်သားလေဟှာ သူ့ဟှို မူးဂေ့ဟှယ်။ အယ်ကြောန့် သူ့နော့‑က်ဟှနေ တမန်လေဟှို စေလွှတ်ဘီး ‘နို့လေဟှာ အယ်သူဟှို နို့လေရဲ့ မန်းဂီးဖြစ် လိုရှင်ဂေ့ဟှ’ ” ဆိုဘီး လျှော့‑က်ခိုင်းလေဟှယ်။

15“အယ်လူဟှာ နိုင်ငံအောက်ချောက်ခွမ့်ဟှို ခံယူဘီး ပ္လန်လာဟှယ်။ ရှစ်ရှင်းဘဲ့ သူဟှာ ရွှေဒန်းဂါးလေပေးဟှားဟှူ စေခံလေဟှို ဖယ်မျှလော့‑က် မ္လတ်ရဟှားဟှယ် ဆိုဇာဟှို သိရှင်ဟှူကြောန့် သူးနို့ဟှို ခေါ်ခိုင်းလိုက်ဟှယ်။ 16ပထမ စေခံဟှာ ရော့‑က်လာဘီး ‘သခင်၊ သခင်ပေးဟှားဟှူ ရွှေဒန်းဂါးတပ္လားအားဖြင့် မ္လတ်ဆယ်ပ္လားရဟှယ်’ ဆိုဘီး လျှော့က်လေဟှယ်။ 17သခင်ဟှ ‘ကောန်းလေဟှယ်။ နန်ဟှာ စေခံကောန်း တယော့‑က် ဖြစ်လေဟှယ်! နန်ဟှာ ငယ်ဟှူမှုမာ သစ်စာရှိဟှူကြောန့် ဗြို့ဂီးဆယ်ဗြို့ဟှို အောက်စိုးပါ’ ဆိုဘီး မိန့်တော်မူလေဟှယ်။ 18ဒုတိယ စေခံဟှာ ရော့‑က်လာဘီး ‘သခင်၊ သခင်ပေးဟှားဟှူ ရွှေဒန်းဂါးတပ္လားအားဖြင့် မ္လတ်ငါးပ္လားရဟှယ်’ ဆိုဘီး လျှော့‑က်လေဟှယ်။ 19အယ်လူဟှို ‘နန်ဟှာ ဗြို့ဂီးငါးဗြို့ဟှို အောက်ချောက်ပါ’ ဆိုဘီး မိန့်တော်မူလေဟှယ်။ 20နော့‑က်ထပ်စေခံ ရော့‑က်လာဘီး ‘သခင်၊ အယ်မာ သခင်ရဲ့ ရွှေဒန်းဂါးတပ္လားရှိဟှယ်။ ကျွန်တော်ဟှာ အယ်ဒန်းဂါးဟှို လတ်ကိုင်ပဝါန ထောက်ဘီးဟှာ သီးဟှားဟှယ်။ 21သခင်ဟှာ စိဆတ်ဟှူသူ ဖြစ်ဟှူကြောန့် သခင်ဟှို ကျွန်တော်ကြော့‑က်ဟှယ်။ သခင်ဟှာ ဖြားလည်းသွမ်းဟှားဘဲဇာဟှို ထောက်ယူဘီး ဖြားလည်းစိုက်ဘဲဇာဟှို ရိသီးဟှယ်’ ဆိုဘီး လျှော့‑က်လေဟှယ်။ 22သခင်ဟှ ‘ဆိုးညစ်ဟှူစေခံ! နန့်စကားတိုင်း နန့်ဟှို ငါစီရင်မယ်! ငါဟှာ စိဆတ်ဟှူသူ၊ ငါဟှာ ဖြားလည်းသွမ်းဘဲဇာဟှို ထောက်ယူဘီးဟှာ ဖြားလည်းစိုက်ဘဲဇာဟှို ရိသီးဟှယ် ဆိုဇာဟှိုလည်း နန်သိဟှယ်။ 23အယ်မျိုးဆိုဟှာ ဖြားဖြစ်ကြောန့် ငါ့ကပ်လေဟှို ဘဏ်မာအပ်ဘဲနနေနူး။ အပ်ဟှားမယ် ဆိုဟှာ ငါပ္လန်ရော့‑က်ဟှူ ခီမာ တိုးလေနတူးဒူ ငါ့ကပ်လေဟှို ပ္လန်ရမယ်’ ဆိုဘီး သူ့ဟှို ပြောလေဟှယ်။ 24အယ်ဘီးန နီးနားမာ ရပ်နေဟှူသူလေဟှို ‘သူ့ရဲ့ ရွှေဒန်းဂါးတပ္လားယူဘီး ရွှေဒန်းဂါး ဆယ်ပ္လားရှိဟှူ စေခံဟှို ပေးလိုက်’ ဆိုဘီး ပြောလေဟှယ်။ 25အယ်ဘေမဲ့ သူးနို့လေဟှ ‘သခင်၊ အယ်သူမာ ရွှေဒန်းဂါး ဆယ်ပ္လား ရှိနေဘီးသား ဖြစ်ဟှယ်!’ ဆိုဘီး လျှော့‑က်ဂေ့ဟှယ်။ 26#မ ၁၃.၁၂; မာ ၄.၂၅; လု ၈.၁၈‘နန်းနို့ဟှို ငါပြောမယ်။ ရှိဟှူလူဟှို ထပ်ပေးဘီး သူ့ဟှို ကြွယ်ဝစေလေ့မယ်။ မှေ့ဘဲဟှူ လူလေနားဟှ ရှိဟှူမျှဟှို နှုလေ့မယ်။ 27ငါ့ဟှို သူးနို့လေရဲ့ မန်းဂီးဖြစ်န လိုရှင်ဘဲဟှူ ငါ့ရဲ့ ရန်သူလေဟှို အယ်နေရာဟှို ခေါ်လာဂေ့။ ငါ့ရှေ့တော်မာ သတ်ဂေ့!’ ဆိုဘီး စီရင်တော်မူလေဟှယ်” ဆိုဘီး မိန့်တော်မူလေဟှယ်။

အောန်ဗွဲခံဘီး ယေရုရှလင်ဗြို့ထဲ ဝမ်တော်မူဟှူကြောန်း

(မဿဲ ၂၁.၁–၁၁; မာကု ၁၁.၁–၁၁; ယောဟန် ၁၂.၁၂–၁၉)

28ယေရှုဟှာ အယ်မျိုးမိန့်တော်မူဘီးန သူးနို့လေရဲ့ ရှေ့ဟှနေဘီး ယေရုရှလင်ဗြို့ဟှို ကြွဟှားတော်မူဟှယ်။ 29သံလွင်တောန်နားမာရှိဟှူ ဗက်ဖာဂေဝါန ဗေသနိဝါနားဟှို ရော့‑က်လာဟှူ ခီမာ တဗဲ့တော် နှေ့ပါးဟှို ရှေ့ဟှနေစေလွှတ်ဘီး 30“နန်းနို့ရှေ့မာရှိဟှူ ဝါဟှို သွားဂေ့။ ဝါထဲဟှို ရော့‑က်ဟှူ ခီမာ ဖယ်သူလည်း စီးဖူးသေးဘဲဟှူ မြည်းသားဂန်းဟှားဟှို ခယ်ဟှားဇာဟှို နန်းနို့ဟှာ တွိလေ့မယ်။ အယ်မြည်းသားဂန်းဟှားဟှို ကြိုးဖြေဘီး ငါ့နားဟှို ခေါ်လာဂေ့။ 31ယော့‑က်ယော့‑က်ဟှ ဖြားဖြစ်ကြောန့် မြည်းကြိုးဟှို ဖြေဂေ့နေနူး။ ဆိုဘီး နန်းနို့ဟှို မေးမယ် ဆိုဟှာ အယ်မြည်းဟှို သခင်#၁၉.၃၁ သခင်၊ အယ်မျိုးမှုဘဲ့နေဟှာ မြည်းဇရှင်။လိုရှိဟှယ် ဆိုဘီး သူးနို့ဟှို ပြောဂေ့” ဆိုဘီး မိန့်တော်မူလေဟှယ်။

32စေလွှတ်လိုက်ဟှူသူလေဟှာ ထွပ်ဟှားဘီးန ယေရှုမိန့်တော်မူမျိုးဘဲ့ အားလောင်းဂူဟှို တွိရဟှယ်။ 33သူးနို့လေဟှာ မြည်းဟှို ကြိုးဖြေပေးနေဟှူ ခီမာ မြည်းဇရှင်ဟှ “ဖြားဖြစ်ကြောန့် မြည်းဟှို ကြိုးဖြေပေးနေရနူး။” ဆိုဘီး သူးနို့ဟှို မေးလေဟှယ်။

34သူးနို့ဟှ “အယ်မြည်ဟှို သခင် လိုရှိဟှယ်” ဆိုဘီး ဖြေဂေ့ဟှယ်။ 35အယ်ဘီးန သူးနို့ဟှ မြည်းသားဂန်းဟှားဟှို ယေရှုနားဟှို ယူဆောန်ဟှားလေဟှယ်။ အယ်မြည်းထတ်မာ သူးနို့ရဲ့ ဝတ်ရောင်လေဟှို ခန်းဘီးန ယေရှုဟှို စီးစေဂေ့ဟှယ်။ 36ကိုယ်တော်ဟှာ စီးဘီးလာဟှူ ခီမာ လူလေဟှ သူးနို့ရဲ့ ဝတ်ရောင်လေဟှို လမ်းထတ်မာ ခန်းပေးဂေ့ဟှယ်။

37ကိုယ်တော်ဟှာ ယေရုရှလင်ဗြို့နီး သံလွင်တောန် ဆင်းလမ်းဟှို ရော့‑က်လာဟှူ ခီမာ တဗဲ့တော်အောက်ဂီးဟှာ သူးနို့ဗြင်ရဟှူ နိမိတ်လတ်ခဏာ အားလောင်းတွပ် ဝန်းသာဟှူစိန ဘုရားသခင်ရဲ့ ဂေါင်တော်ဟှို 38“ဘုရားသခင်ရဲ့ နာမန ကြွလာဟှူ မန်းဂီးဟှာ မင်္ဂလာရှိပါစေ! ကောန်းဂန်ဘောင်မာ ငြီသတ်ရှင်းရှိပါစေ။ ဗြင့်ဆောင်းဟှူနေရာမာ ဖောင်းကီးတော်မူပါစေ!” ဆိုဘီး သံက္လယ်ဂီးန ချီးမွမ်းဂေ့ဟှယ်။

39အယ်ခီမာ လူအောက်ဂီးထဲဟှ ဖာရိရှဲတချို့ဟှ “ဆရာ၊ ကိုယ်တော်ရဲ့ တဗဲ့တော်လေဟှို တိတိဟှားနေဟှို့ ဆောင်းမပေးတော်မူပါ!” ဆိုဘီး ယေရှုဟှို လျှော့‑က်လေဟှယ်။

40ယေရှုဟှ “နန်းနို့ဟှို ငါပြောမယ်၊ သူးနို့ဟှို တိတိဟှားနေစေမယ် ဆိုဟှာ က္လော့ခဲလေဟှ အော်ဟစ်ဂေ့လေ့မယ်” ဆိုဘီး မိန့်တော်မူလေဟှယ်။

ယေရုရှလင်ဗြို့တွပ် ငိုတော်မူဟှူကြောန်း

41ကိုယ်တော်ဟှာ ယေရုရှလင်ဗြို့နားဟှို ရော့‑က်လာဘီး အယ်ဗြို့ဟှို ဗြင်တော်မူဟှူ ခီမာ ငိုတော်မူဘီး၊ 42“နန်ဟှာ ငြီသတ်ရှင်းတွပ် လိုအပ်ဟှူဇာလေဟှို အယ်နေ့မာဘဲ့ သိရမယ် ဆိုဟှာ မင်္ဂလာရှိဟှယ်! အယ်ဘေမဲ့ အယ်မူဇာလေဟှာ ခုနန့်ရဲ့ မျစ်စိရှေ့မာ ဖောင်းကွယ်ဟှားရှင်းခံရဟှယ်! 43နန့်ရဲ့ ရန်သူလေဟှာ ဖတ်ဖတ်ဟှနေဘီး တားဆီးလေန ဝန်းရံဘီး ပိဟှားမယ့်နေ့ ရော့‑က်လာလေ့မယ်။ 44သူးနို့လေဟှ နန့်ဟှိုရော၊ နန့်ရဲ့ ဗြို့ရိုးထဲဟှ သူလေဟှိုရော တယော့‑က်လည်းကျန်ဘဲအောန် ဖျစ်ဆီးဂေ့လေ့မယ်။ အယ်နေရာမာ က္လော့တောင်းတလောင်းလည်း ကျန်ရစ်ဟှို့မုဟှ။ ဖြားဖြစ်ကြောန့်နူးဆိုဟှာ နန့်ဟှို ကယ်တန်ဟှို့ ဘုရားသခင် ရော့‑က်လာမယ့် ခီဟှို သိဘဲကြောန့် ဖြစ်ဟှယ်!” ဆိုဘီး မိန့်တော်မူလေဟှယ်။

ဗိမာန်တော်ဟှို ကြွဟှားဟှူကြောန်း

(မဿဲ ၂၁.၁၂–၁၇; မာကု ၁၁.၁၅–၁၉; ယောဟန် ၂.၁၃–၂၂)

45ယေရှုဟှာ ဗိမာန်တော်ထဲဟှို ဝမ်တော်မူဘီးန ရောန်းဝယ်နေဟှူ လူလေဟှို နှန်ထုတော်မူဘီး 46သူးနို့လေဟှို “ကျမ်းစာထဲမာ ဘုရားသခင်ဟှ ‘ငါ့ဗိမာန်တော်ဟှာ ဆုတောန်းဟှူ အီတော် ဖြစ်ရလေ့မယ်’ ဆိုဘီး မိန့်တော်မူဟှားဟှယ်။ အယ်ဘေမဲ့ နန်းနို့ဟှ အယ်အီတော်ဟှို သူခိုးလေတွပ် ပူးအောန်းဟှူနေရာ ဖြစ်စေဂေ့ဘီ!” ဆိုဘီး မိန့်တော်မူလေဟှယ်။

47 # လု ၂၁.၃၇ ယေရှုဟှာ နေ့တိုင်း ဗိမာန်တော်မာ သွန်သန်ပေးတော်မူဟှယ်။ ယဇ်ပုရောဟိတ်ဂီးလေ၊ ကျမ်းတတ်ဆရာလေန လူထုခေါန်းဆောန်လေဟှာ ကိုယ်တော့်ဟှို သတ်ဟှို့တွပ် ရှာကြံဂေ့ဟှယ်။ 48အယ်ဘေမဲ့ လူလေ အားလောင်းဂူဟှာ ကိုယ်တော်ရဲ့ စကားတော်ဟှို အာရုံစိုက်ဘီး နားထောန်နေဂေ့ဟှူကြောန့် ကိုယ်တော့်ဟှို သတ်ဟှို့တွပ် နည်းလမ်းရှာဟှို့ တွိဘဲဖြစ်နေဟှယ်။

Currently Selected:

လုကာ 19: NTDWB24

Highlight

Copy