လုကာ 17
17
ပြစ်ကြောန်း
(မဿဲ ၁၈.၆,၇,၂၁,၂၂; မာကု ၉.၄၂)
1ယေရှုဟှာ တဗဲ့တော်လေဟှို “လူလေဟှို ပြစ်ထဲက္လအောန် လောက်ဟှို့ မှားယွင်းဇာလေ ရှိရမယ်။ အယ်ဘေမဲ့ ပြစ်ထဲက္လအောန် မှားယွင်းဇာလေ လောက်ဟှူသူဟှာ အမင်္ဂလာရှိဟှယ်။ 2အယ်လူဟှာ အယ်မျိုး သားဂန်းတယော့‑က်ဟှို မှားယွင်းစေရှင်းထတ် ကိုယ့်လည်ဗန်းမာ ကီးမားဟှူ က္လိဆောင်ဟှို ဆွဲဘီးဟှာ ပန်လယ်ထဲမာ ပစ်ခ္လခံရရှင်းဟှာ ပိုဘီးကောန်းအူးမယ်။ 3#မ ၁၈.၁၅အယ်ကြောန့် ဖြားဘဲ့လောက်လောက် ဒိထားဂေ့!
“နန့်ရဲ့ ညီအစ်ကိုဟှ နန့်ဟှို ပြစ်မှားမယ် ဆိုဟှာ သူ့ဟှို ဆောင်းမပါ။ သူဟှာ နောန်ဒရမယ် ဆိုဟှာ ခွမ့်လွှတ်လိုက်ပါ။ 4သူ့ဟှ နန့်ဟှို တရစ်မာ ခွန်နစ်ခါ ပြစ်မှားဘီးဟှာ ခွန်နစ်ခါလောင်းလောင်း နန့်နားဟှို လာဘီးဟှာ ‘ငါနောန်ဒရဘီ’ ဆိုဘီး လာပြောမယ် ဆိုဟှာ သူ့ဟှို ခွမ့်လွှတ်ရမယ်” ဆိုဘီး မိန့်တော်မူလေဟှယ်။
ယောင်ကြည်ရှင်းကြောန်း
5တမန်တော်လေဟှ သခင်ဘုရားဟှို “ကျွန်တော့်ဟှားလေရဲ့ ယောင်ကြည်ရှင်းဟှို တိုးလာအောန် လောက်ပေးတော်မူပါ!” ဆိုဘီး လျှော့‑က်ဂေ့ဟှယ်။
6သခင်ဘုရားဟှ “နန်းနို့မာ မုညင်းစေ့လော့‑က် ယောင်ကြည်ရှင်း ရှိမယ် ဆိုဟှာ အယ်ပိုးစားဗန်ဟှို ‘ပြစ်ဟှနေ က္လော့ဘီးဟှာ ပန်လယ်ထဲမာ စိုက်နေစေ!’ ဆိုဘီး နန်းနို့ဟှ ပြောမယ် ဆိုဟှာ နန်းနို့ပြောဟှူတိုင်း အယ်ပန်ဟှ နားထောန်လေ့မယ်။
စေခံတယော့‑က်ရဲ့ တာဝန်
7“နန်းနို့ထဲဟှ တယော့‑က်မာ လယ်ထွန်ဟှို့၊ သိုးထီးဟှို့ ခိုင်းဟှားဟှူ စေခံတယော့‑က်ရှိဟှယ်။ သူဟှာ လဲဗ္လန်ဟှ ပ္လန်လာဟှူ ခီမာ ဗြန်းဗြန်လာဘီး စားသော့‑က်ဂေ့ ဆိုဘီးဟှာ နန်းနို့ထဲမာ ဖယ်သူပြောမယ်နူး။ 8လောင်းဝပြောဟှို့ မှုဟှ! အယ်မျိုးပြောဟှို့စား ‘ငါ့တွပ်စားဇာပြင်ပါ။ ငါစားသော့‑က်နေဒူးမာ ခါးစဲဘီး ငါ့ဟှို စေခံပါ။ ငါစားဘီးမှ နန်စားရမယ်’ ဆိုဘီး ပြောလေ့မယ် မှုဟှလော။ 9စေခံဟှာ ခိုင်းဟှားဟှူတိုင်း လောက်ပေးဟှူကြောန့် သူ့ဟှို ကျေးဇူးတန်ရဟှို့လော။ 10အယ်မျိုးဘဲ့ နန်းနို့ဟှို ခိုင်းဟှားဟှူ လောက်လေ အားလောင်းဂူ လောက်ဘီးဟှားဟှူု ခီမာ ‘နို့လေဟှာ သာမန်စေခံလေ ဖြစ်ဘီး နို့လေရဲ့ တာဝန်ဟှို လောက်ဆောန်ဇာဘဲ့ ဖြစ်ဟှယ်’ ဆိုဘီး ပြောဂေ့ပါ” ဆိုဘီး မိန့်တော်မူလေဟှယ်။
ယေရှုဟှာ လူဆယ်ယော့‑က်ဟှို နာပျော့‑က်စေဟှူကြောန်း
11ယေရှုဟှာ ယေရုရှလင်ဗြို့ဟှို ကြွဟှားဟှူ ခီမာ ရှမာရိပြည်န ဂါလိလဲပြည် နယ်စပ်ဟှနေဘီး ကြွတော်မူလေဟှယ်။ 12ကိုယ်တော်ဟှာ ဝါတဝါထဲဟှို ဝမ်တော်မူဟှူ ခီမာ နူနာ ဆယ်ယော့‑က်ဟှာ ကိုယ်တော့်ဟှို လာတွိဂေ့ဟှယ်။ သူးနို့လေဟှာ ဝီးဝီးမာ ရပ်နေဘီး 13“သခင်ယေရှု! ကျွန်တော့်ဟှားလေဟှို သနားတော်မူပါ!” ဆိုဘီး အော်ပြောလေဟှယ်။
14ယေရှုဟှာ သူးနို့ဟှို ဗြင်တော်မူဟှူ ခီမာ “နန်းနို့ဟှာ ယဇ်ပုရောဟိတ်လေနားဟှို သွားဘီး မိမိကိုယ်ဟှို ပြဂေ့” ဆိုဘီး မိန့်တော်မူလေဟှယ်။
သူးနို့ဟှာ သွားနေဒူးမာဘဲ့ သန့်ရှင်းဟှားလေဟှယ်။#၁၇.၁၄သန့်ရှင်းဟှားလေဟှယ်၊ ရှု ၅.၁၂။ 15သူးနို့ထဲဟှ တယော့‑က်ဟှာ ရောဂါပျော့‑က်ဟှားဘီ ဆိုဇာဟှို ဗြင်ဟှူ ခီမာ ဘုရားသခင်ဟှို သံက္လယ်ဂီးန ချီးမွမ်းဘီး ပ္လန်လာလေဟှယ်။ 16ယေရှုရဲ့ ခေတော်ရင်းမာ ပျပ်ဝပ်ဘီးဟှာ ကိုယ်တော့်ဟှို ကျေးဇူးတန်လေဟှယ်။ အယ်လူဟှာ ရှမာရိလူ တယော့‑က်ဖြစ်ဟှယ်။ 17ယေရှုဟှ “လူဆယ်ယော့‑က်လောင်း သန့်ရှင်းဟှားဟှယ် မှုဟှလော။ ကျန်ဟှူ ကိုးယော့‑က်ဟှ ဖယ်မာနူး။ 18ဖြားဖြစ်ကြောန့် အယ်လူမျိုးခြား တယော့‑က်ဘဲ့ ပ္လန်လာဘီး ဘုရားသခင်ဟှို ချီးမွမ်းရနူး။” ဆိုဘီး မေးတော်မူလေဟှယ်။ 19အယ်ဘီးန ယေရှုဟှ သူ့ဟှို “ထဘီးသွားဝေါ့၊ နန့်ရဲ့ ယောင်ကြည်ရှင်းဟှ နန့်ဟှို ကျန်းမာစေဘီ” ဆိုဘီး မိန့်တော်မူလေဟှယ်။
နိုင်ငံတော် တည်ထောန်ဟှူကြောန်း
(မဿဲ ၂၄.၂၃–၂၈,၃၇–၄၁)
20ဖာရိရှဲတချို့ဟှ ယေရှုဟှို ဘုရားသခင်ရဲ့ နိုင်ငံတော်ဟှာ ဖယ်ခီမာ တည်ထောန်မယ်နူး။ ဆိုဘီး မေးဂေ့ဟှယ်။ ကိုယ်တော်ဟှ “ဘုရားသခင်ရဲ့ နိုင်ငံတော်ဟှာ ဗြင်ရဟှူ နိုင်ငံမျိုး တည်ထောန်ဟှို့ မှုဟှ။ 21‘ကေ့ကေ့။ နိုင်ငံတော်ဟှ အယ်မာရှိဟှယ်! ဟောက်မာရှိဟှယ်!’ ဆိုဘီး ဖယ်သူလည်း ပြောနိုင်လေ့မယ် မှုဟှ။ ဖြားဖြစ်ကြောန့်နူးဆိုဟှာ နိုင်ငံတော်ဟှ နန်းနို့ထဲမာ#၁၇.၂၁ နန်းနို့ထဲမာ၊ အယ်မျိုးမှုဘဲ့ဟှာ နန်းနို့ကြားထဲမာ အယ်မျိုးမှုဘဲ့ဟှာ နန်းနို့ကြားထဲမာ ရောက်တရစ် ပေါ်လာလေ့မယ်။ ရှိနေကြောန့် ဖြစ်ဟှယ်” ဆိုဘီး မိန့်တော်မူလေဟှယ်။
22အယ်ဘီန ကိုယ်တော်ဟှာ တဗဲ့တော်လေဟှို “နန်းနို့ ဗြင်ရှင်နေဟှူ လူ့သားရဲ့ နေ့ရစ်တရစ် ရော့‑က်လာလေ့မယ်။ အယ်ဘေမဲ့ နန်းနို့ ဗြင်ရလေ့မယ် မှုဟှ။ 23လူလေဟှ ‘ကေ့ကေ့၊ လူ့ရဲ့သားဟှာ ဟောက်မာရှိဟှယ်! အယ်မာရှိဟှယ်!’ ဆိုဘီး နန်းနို့ဟှို ပြောလေ့မယ်။ အယ်ဘေမဲ့ လိုက်ရှာဂေ့န။ 24ဖြားဖြစ်ကြောန့်နူးဆိုဟှာ လျှပ်စစ်ဟှာ ဖျတ်ဟှူ ခီမာ ကောန်းဂန်တဖတ်ဟှနေ တခြားတဖတ်ထိ လန်းဟှားမျိုးဘဲ့ လူ့ရဲ့သားဟှာ ပ္လန်လာဟှူ နေ့ရစ်မာလည်း အယ်မျိုးဘဲ့ ဖြစ်လေ့မယ်။ 25အယ်ဘေမဲ့ သူဟှာ ရင်ဦးဆောင်း နာကျင်ရှင်းလေ ဘောင်ဂီး ခံရဘီး ခုခေတ် လူလေရဲ့ ငြင်းပယ်ရှင်းလေဟှို ခံရလေ့မယ်။ 26နောဧရဲ့ နေ့ရစ်လေမာ ဖြစ်ဟှားမျိုးဘဲ့ လူ့ရဲ့သား ပ္လန်လာဟှူ နေ့ရစ်လေမာလည်း ဖြစ်လေ့မယ်။ 27နောဧဟှာ သန်းဖောထဲဟှို ဝမ်ဟှူ နေ့ရစ်တိုင်အောန် လူလေဟှာ စားလိုက်၊ သော့‑က်လိုက်၊ လတ်ထပ်လိုက် လောက်နေဂေ့ဟှယ်။ အယ်ဘီးန ရေကီးလာဘီး သူးနို့လေ အားလောင်းဂူဟှို ဖျစ်ဆီးလေဟှယ်။ 28အယ်မျိုးဘဲ့ လောတရဲ့ နေ့ရစ်လေမာလည်း လူတိုင်းဟှာ စားလိုက်၊ သော့‑က်လိုက်၊ ရောန်းလိုက်၊ ဝယ်လိုက်၊ စိုက်ပျိုးလိုက်၊ တည်ဆောန်လိုက်န လောက်နေဂေ့ဟှယ်။ 29သောဒုံဗြို့ဟှနေ လောတ ထွပ်ဟှူနေ့မာ ကောန်းဂန်ဟှနေ ကန့်န မီးဝါခ္လလိုက်ဘီး သူးနို့လေ အားလောင်းဂူဟှို ဖျစ်စီးလေဟှယ်။ 30လူ့ရဲ့သား ပေါ်ထွန်းဟှူ နေ့ရစ်မာလည်း အယ်မျိုးဘဲ့ ဖြစ်လေ့မယ်။”
31 #
မ ၂၄.၁၇,၁၈; မာ ၁၃.၁၅,၁၆ “အယ်မျိုးနေ့မာ အီးခေါန်မိုးထတ်မာရှိဟှူ လူဟှို အီထဲမာရှိဟှူ ပစ်စီးလေဟှို ယူဟှို့တွပ် အော့‑က်ဟှို ဆင်းစေန။ အယ်မျိုးဘဲ လဲဗ္လန်ထဲမာရှိနေဟှူ လူလည်း အီဟှို ပ္လန်စေန။ 32လောတရဲ့ မယားဟှို အော့‑က်မေ့ဂေ့။ 33#မ ၁၀.၃၉; ၁၆.၂၅; မာ ၈.၃၅; လု ၉.၂၄; ယော ၁၂.၂၅ကိုယ့်သတ်ဟှို ကယ်ရှင်ဟှူ လူဟှာ သတ်ရှောင်းလေ့မယ်။ ကိုယ့်သတ်ဟှို ရှောင်းစေဟှူသူဟှာ သတ်ဟှို ကယ်တန်လေ့မယ်။ 34နန်းနို့ဟှို ငါပြောမယ်၊ အယ်ညဉ့်မာဘဲ့ အိရာတခုဒဲမာ တူးဒူအိနေဟှူ လူနှေ့ယော့‑က်ထဲဟှ တယော့‑က်ဟှို သီးယူဟှားဘီးဟှာ တယော့‑က်ဟှ ကျန်ရစ်လေ့မယ်။ 35တူးဒူက္လိဆောင်က္လိနေဟှူ မီးမနှေ့ယော့‑က်ထဲဟှ တယော့‑က်ဟှို သီးယူဟှားဘီးဟှာ တယော့‑က်ဟှ ကျန်ရစ်လေ့မယ်” ဆိုဘီး မိန့်တော်မူလေဟှယ်။ 36#၁၇.၃၆ တချို့ မူရင်းလတ်ရေးမှုလေမာ လဲဗ္လန်မာ လောက်လောက်နေဟှူ ယော‑က်ကျားနှေ့ယော့‑က်ထဲဟှ တယော့‑က်ဟှို သီးဟှားဘီးဟှာ တယော့‑က်ဟှ ကျန်ရစ်လေ့မယ်၊ ဆိုဘီး ခန်းငယ် ၃၆ ဟှို ထပ်ပေါန်းထဲ့ဟှားဟှယ် (ရှု မ ၂၄.၄၀)။
37တဗဲ့တော်လေဟှာ ကိုယ်တော့်ဟှို “သခင်၊ အယ်မူဇာလေဟှ ဖယ်နားမာ ဖြစ်ဟှို့နူး” ဆိုဘီး မေးဂေ့ဟှယ်။
ယေရှုဟှ “သေကောန်ရှိဟှူ နေရာမာ လင်းတငှတ်လေ စုနေဂေ့လေ့မယ်” ဆိုဘီး မိန့်တော်မူလေဟှယ်။
Currently Selected:
လုကာ 17: NTDWB24
Highlight
Share
Copy
Want to have your highlights saved across all your devices? Sign up or sign in
The New Testament in Dawei Language © The Word for the World International and The Dawei Bible Translation Committee, 2024.
