ယောဟန် 14
14
ယေရှုဟှာ ဖနားဟှို သွားဟှူလမ်းဖြစ်ဟှူကြောန်း
1ယေရှုဟှာ သူးနို့ဟှို “နန်းနို့လေ စိပူဂေ့န။ ဘုရားသခင်ဟှို ယောင်ကြည်ဂေ့။#၁၄.၁ ယောင်ကြည်ဂေ့၊ အယ်မျိုးမှုဘဲနေဟှာ နန်းနို့ ယောင်ကြည်ဂေ့။ ငါ့ဟှိုလည်း ယောင်ကြည်ပါ။ 2ငါ့ဖရဲ့ အီတော်မာ ခန်းလေ ဘောင်ဂီးရှိဟှယ်။ နန်းနို့တွပ် နေရာဟှို ပြင်ဆင်ဟှို့တွပ် ငါသွားရမယ်။ ခန်းလေမှေ့ဟှ ဆိုဟှာ နန်းနို့ဟှို အယ်မျိုး ပြောဟှို့ မှုဟှ။#၁၄.၂ ငါ့ဖရဲ့ အီတော်မာ ခန်းလေ ဘောင်ဂီးရှိဟှယ်။ နန်းနို့တွပ် နေရာဟှို ပြင်ဆင်ဟှို့တွပ် ငါသွားရမယ်။ ခန်းလေမှေ့ဟှ ဆိုဟှာ နန်းနို့ဟှို အယ်မျိုး ပြောဟှို့ မှုဟှ၊ အယ်မျိုးမှုဘဲ့နေဟှာ ငါ့ဖရဲ့ အီတော်မာ ခန်းလေဘောင်ဂီးရှိဟှယ်၊ အယ်နေရာမာ ခန်းလေမှေ့ဟှ ဆိုဟှာ နန်းနို့တွပ် နေရာဟှို ပြင်ဆင်ဟှို့ ငါသွားရမယ် ဆိုဘီး ပြောနေရအူးလော။ 3နန်းနို့တွပ် နေရာဟှို သွားပြင်ဆင်ဘီးန ငါပ္လန်လာဘီး ငါရှိဟှူနေရာမာ နန်းနို့ရှိနေဟှို့တွပ် နန်းနို့ဟှို ငါနားဟှို ခေါ်ဆောန်မယ်။ 4ငါသွားမယ့်နေရာဟှို ရော့‑က်နိုင်ဟှူလမ်းဟှို နန်းနို့သိဂေ့ဟှယ်” ဆိုဘီး မိန့်တော်မူလေဟှယ်။
5သောမဟှာ ကိုယ်တော့်ဟှို “သခင်၊ ကိုယ်တော်ဟှာ ဖယ်နေရာဟှို သွားမယ် ဆိုဇာ ကျွန်တော့်ဟှားလေ သိဂေ့ဟှ။ အယ်ဆိုဟှာ ကျွန်တော့်ဟှားလေဟှ အယ်နေရာဟှို ရော့‑က်နိုင်မယ့်လမ်းဟှို ဖယ်မျိုး သိနိုင်ဟှို့နူး” ဆိုဘီး မေးလျှော့‑က်လေဟှယ်။
6ယေရှုဟှာ သူ့ဟှို “ငါဟှာ လမ်း၊ သမ္မာတရားန သတ်ဖြစ်ဟှယ်။ ငါ့အားဖြင့် မှုဟှ ဆိုဟှာ ဖယ်လူလည်း ဖနားဟှို သွားနိုင်ဂေ့ဟှ။ 7ခု နန်းနို့ဟှာ ငါ့ဟှို သိဟှားဘီ။ အယ်ဆိုဟှာ နန်းနို့လေဟှာ#၁၄.၇ ခု နန်းနို့ဟှာ ငါ့ဟှို သိဟှားဘီ၊ တချို့ မူရင်းလတ်ရေးမူလေမာ နန်းနို့ဟှာ ငါ့ဟှို သိဟှားဘီး ဆိုဟှာ ငါ့ဖဟှိုလည်း နန်းနို့သိရလေ့မယ်၊ ဆိုဘီး ပါရှိဟှယ်။ ငါ့ဖဟှိုလည်း သိဂေ့လေ့မယ်။ ခုဟှစဘီး နန်းနို့ဟှာ ဖဟှို သိဗြင်ဂေ့ဘီ” ဆိုဘီး မိန့်တော်မူလေဟှယ်။
8ဖိလိပ္ပုဟှ ကိုယ်တော့်ဟှို “သခင်၊ ဖဟှို ကျွန်တော့်ဟှားလေဟှို ပြတော်မူပါ။ အယ်မူဇာဟှို ကျွန်တော့်ဟှားလေ အားလောင်း လိုရှင်ဂေ့ဟှယ်” ဆိုဘီး လျှော့‑က်လေဟှယ်။
9ယေရှုဟှ “ဖိလိပ္ပု၊ ငါဟှာ နန်းနို့အားလောင်းနတူးဒူ ခီကြာဂီး ရှိနေဟှိုဟှိုမှ ငါ့ဟှို သိဂေ့သေးဟှလော။ ငါ့ဟှို ဗြင်ဟှူလူဟှာ ငါ့ဖဟှို ဗြင်ရဟှယ်။ အယ်ဆိုဟှာ ‘ဖဟှို ကျွန်တော့်ဟှားလေဟှို ပြပါ’ ဆိုဘီး ဖြားဖြစ်ကြောန့် နန်းနို့ ပြောနေရနူး။ 10ဖိလိပ္ပု၊ ငါဟှာ ဖထဲမာရှိဘီး ဖဟှလည်း ငါထဲမာရှိဟှယ် ဆိုဇာဟှို နန်ယောင်ကြည်ဟှလော။ နန်းနို့ဟှို ငါပြောနေဟှူ စကားလေဟှာ ငါထဲဟှနေ ထွပ်လာဇာ မှုဟှ။ ငါ့ထဲမာရှိနေဟှူ ဖကိုယ်တိုင်ဟှ သူ့ရဲ့ မှုဟှို ပြုတော်မူဟှယ်။ 11ငါဟှာ ဖထဲမာ ရှိနေဘီး ဖဟှလည်း ငါ့ထဲမာ ရှိနေဟှယ် ဆိုဘီး ပြောနေဟှူ ခီမာ ငါ့ဟှို ယောင်ကြည်ဂေ့။ ယောင်ကြည်ဘဲဟှ ဆိုဟှာ ငါလောက်နေဇာလေဟှို ယောင်ကြည်ဂေ့။ 12နန်းနို့ဟှို ငါ မှန်တိုင်းပြောမယ်၊ ငါ့ဟှို ယောင်ကြည်ဟှူ လူဟှာ ငါလောက်ဇာလေဟှို လောက်လေ့မယ်။ အယ်ထတ်ကီးဟှူ ဇာလေဟှိုလည်း လောက်လေ့မယ်။ ဖြားဖြစ်ကြောန့်နူးဆိုဟှာ ငါဟှာ ဖနားဟှို သွားရဟှို့တွပ် ဖြစ်ဟှယ်။ 13ဖရဲ့ ဖောင်းသရေတော်ဟှာ သားတော်အားဖြင့် ထန်ရှားဟှို့တွပ် ငါ့နာမန နန်းနို့တောန်းဇာမှန်မျှ ငါလောက်မယ်။ 14နန်းနို့ဟှာ ငါ့နာမန တခုခုဟှို ငါ့နားမာ#၁၄.၁၄ တချို့ မူရင်းလတ်ရေးမူလေမာ ငါ့နားမာ၊ ဆိုဇာဟှာ မှေ့ဟှ။ တောန်းမယ် ဆိုဟှာ အယ်တိုင်း ငါပြုမယ်။
သန့်ရှင်းဟှူဝိညာဉ်တော်ဟှို ပေးဟှို့တွပ် ဂဒိတော်ကြောန်း
15“နန်းနို့ဟှာ ငါ့ဟှို ရှစ်ဟှယ် ဆိုဟှာ ငါ့ပညတ်တော်လေဟှို လိုက်နာဂေ့လေ့မယ်။ 16ငါဟှာ ဖဟှို တောန်းလျှော့‑က် လိုက်ဟှူကြောန့် နန်းနို့နတူးဒူ ထာဝရနေထိုင်ဟှူ ကူညီမဇသူ တပါးဟှို ပေးတော်မူလေ့မယ်။ 17သူဟှာ ဘုရားသခင်နဆိုင်ဟှူ သမ္မာတရားဟှို ဖွမ့်ပြပေးဟှူ ဝိညာဉ်တော်ဖြစ်ဟှယ်။ အယ်လောကဟှာ အယ်ဝိညာဉ်တော်ဟှို ဗြင်ဂေ့ဟှ။ သိဂေ့ဘဲဟှူကြောန့် အယ်ဝိညာဉ်တော်ဟှို လတ်ခံဂေ့ဟှ။ အယ်ဘေမဲ့ နန်းနို့ဟှာ အယ်ဝိညာဉ်တော်ဟှို သိဂေ့ဟှယ်။ ဖြားဖြစ်ကြောန့်နူးဆိုဟှာ သူဟှာ နန်းနို့နတူးဒူး နေတော်မူနေဘီး နန်းနို့ထဲမာ ရှိနေတော်မူဟှယ်။#၁၄.၁၇ ရှိနေတော်မူဟှယ်၊ တချို့ မူရင်းလတ်ရေးမူလေမာ ရှိလေ့မယ်၊ ဆိုဘီး ပါရှိဟှယ်။
18“ငါဟှာ နန်းနို့အားလောင်းဟှို ခိုကိုးရာမဲ့ ထားရစ်ဇာ မှုဟှ။ ငါဟှာ နန်းနို့နားဟှို ပ္လန်လာရအူးမယ်။ 19ရှစ်ဟှားကြာဘီးဟှာ အယ်လောကဟှာ ငါ့ဟှို နော့‑က်တခါ ဗြင်ရလေ့ဟှို့မှုဘီ။ အယ်ဘေမဲ့ နန်းနို့ဟှာ ငါ့ဟှို ဗြင်ရလေ့မယ်။ ငါသတ်ရှင်ဟှူကြောန့် နန်းနို့လည်း သတ်ရှင်ရလေ့မယ်။ 20အယ်နေ့ရစ် ရော့‑က်လာဟှူ ခီမာ ငါဟှာ ဖထဲမာ ရှိနေဟှယ် ဆိုဇာဟှိုရော၊ နန်းနို့ဟှာ ငါ့ထဲမာ ရှိနေဟှယ် ဆိုဇာဟှိုရော၊ ငါဟှာ နန်းနို့ထဲမာ ရှိနေဟှယ် ဆိုဇာဟှိုရော နန်းနို့သိရလေ့မယ်။
21“ငါ့ပညတ်တော်လေဟှို လတ်ခံဘီး လိုက်နာဟှူလူလေဟှာ ငါ့ဟှို ရှစ်ဟှူလူလေ ဖြစ်ဟှယ်။ ငါ့ဟှို ရှစ်ဟှူလူလေဟှို ငါ့ဖဟှလည်း ရှစ်တော်မူဟှယ်။ ငါဟှလည်း သူးနို့ဟှို ရှစ်ဟှူကြောန့် ငါကိုယ်တိုင် သူးနို့ဟှို ဖွမ့်ပြမယ်” ဆိုဘီး ဖြေတော်မူဟှယ်။
22ယုဒရှကာရုတ်မှုဘဲဟှူ ယုဒဟှ “သခင်၊ ကျွန်တော့်ဟှားလေဟှို ကိုယ်တော်ကိုယ်တိုင် ထန်ရှားတော်မူဘီးဟှာ လောကသားလေဟှို ထန်ရှားပြဘဲဇာဟှ ဖယ်မျိုးနူး” ဆိုဘီး မေးလျှော့‑က်လေဟှယ်။
23ယေရှုဟှာ “ငါ့ဟှို ရှစ်ဟှူလူလေဟှာ ငါ့သွန်သန်ဇာလေဟှို လိုက်နာလေ့မယ်။ ငါ့ဖဟှလည်း သူးနို့ဟှို ရှစ်လေ့မယ်။ ငါ့ဖန ငါဟှာ သူးနို့နားဟှို ကြွလာဘီး သူးနို့နတူးဒူ နေတော်မူမယ်။ 24ငါ့ဟှို ရှစ်ဘဲဟှူ လူလေဟှာ ငါ့သွန်သန်ဇာလေဟှို လိုက်နာဂေ့ မှုဟှ။ နန်းနို့ကြားရဟှူ သွန်သန်ဇာလေဟှာ ငါ့သွန်သန်ဇာလေ မှုဟှ။ အယ်ဘေမဲ့ ငါ့ဟှို စေလွှတ်တော်မူဟှူ ဖရဲ့ သွန်သန်ဇာလေဘဲ့ ဖြစ်ဟှယ်။”
25“နန်းနို့နတူးဒူ ရှိနေဒူးမာ အယ်မူဇာဟှို ငါပြောဟှားဟှယ်။ 26ဖဟှာ ငါ့နာမကြောန့် စေလွှတ်ပေးမယ့် ကူညီမဇသူဖြစ်ဟှူ သန့်ရှင်းဟှူဝိညာဉ်တော်ဟှာ နန်းနို့ဟှို အားလောင်းဂူဟှို သွန်သန်ပေးဘီးဟှာ ငါပြောဟှားဇာလေ အားလောင်းဟှို မှတ်မိလာအောန် လောက်ပေးလေ့မယ်။”
27“ငြီသတ်မှုဟှို နန်းနို့နတူးဒူ ငါထားခဲ့ဘီ။ ငါ့ငြီသတ်မှုဟှိုလည်း နန်းနို့ဟှို ငါပေးဟှားဟှယ်။ လောကသားလေဟှို ပေးဟှားမျိုး ငါပေးဟှားဇာ မှုဟှ။ နန်းနို့လေ စိုးရိမ်ပူဘန်ဂေ့န။ ကြော့‑က်ဂေ့န။ 28‘ငါ သွားလိုက်ဘေမဲ့ နန်းနို့နားဟှို ပ္လန်လာအူးမယ်’ ဆိုဘီး ငါပြောဟှားဇာဟှို နန်းနို့ကြားဟှားပီးဘီ။ နန်းနို့ဟှာ ငါ့ဟှို ရှစ်ဟှယ် ဆိုဟှာ ဖနားဟှို ငါသွားဟှူကြောန့် နန်းနို့ဝန်းသာရလေ့မယ်။ ဖြားဖြစ်ကြောန်ဆိုဟှာ ဖဟှာ ငါ့ထတ် ကီးမြတ်တော်မူဟှယ်။ 29အယ်မူဇာလေဖြစ်လာဟှူ ခီမာ နန်းနို့ ယောင်ကြည်ဂေ့ဟှို့တွပ် အယ်မူဇာလေအားလောင်း ဖြစ်ခန်ဂဒဲဟှ နန်းနို့ဟှို ခု ငါပြောဟှားဟှယ်။ 30ငါဟှာ နန်းနို့ဟှို ဘောင်ဂီးပြောနိုင်ဟှို့မှုဘီ။ ဖြားဖြစ်ကြောန့်နူးဆိုဟှာ အယ်လောကဟှို အောက်ချောက်မားဟှာ လာနေဘီ။ သူဟှာ ငါထတ်မာ ဖြားခွမ့်အာဏာလည်းမှေ့ဟှ။ 31အယ်ဘေမဲ့ ငါဟှာ ဖဟှို ရှစ်ဟှယ် ဆိုဇာဟှို အယ်လောကဟှို သိစေဟှို့တွပ် ဖပညတ်ဟှားတိုင်း ငါလောက်ဟှယ်။”
“လာဂေ့။ အယ်နေရာဟှနေ နို့လေသွားဂေ့ဇို့” ဆိုဘီး သူ့ဟှို မိန့်တော်မူလေဟှယ်။
Currently Selected:
ယောဟန် 14: NTDWB24
Highlight
Share
Copy
Want to have your highlights saved across all your devices? Sign up or sign in
The New Testament in Dawei Language © The Word for the World International and The Dawei Bible Translation Committee, 2024.
