Fúcihum 16

Buu Isumayeel abaji

1Saaray, akoña Aburam, abajutool aleeh. Nabajeen amiigeel hápurulo Esípt, gajaool Agaar. 2Saaray narok ñeer Aburam : « Uñoñow Acehériit mee áfiranfir aleeh. Ubonket ujow njinap nꞌamiigeelom nicee nibaj nu ho aleeh. » Aburam najam furim akoñaool Saaray. 3Tooge min gubaje símit guñen dó mꞌmof mara Kanaan. Ñeer Saaray naŋar amiigeelool Agaar asen Aburam abaj akoña. 4Aburam ngunap nꞌAgaar. Agaar naŋar far. Bare nan Agaar ámir mee mara naŋaŋar búteb, nalako nak áfookul Saaray. 5Ñeer Saaray narok Aburam : « Agaar umu nejelom. Ucookoor elob ye, aw fannai. Injé iseni amiigeelom. Bare nan ámir mee aŋaŋar far, no unu najogutaam mee an. Acehériit mee abilola ecaf ! » 6Aburam násuup Saaray : « Bare amiigeeli, újuhe ukaanool wásuumi. »

Ñeer Saaray nakaan Agaar gúnuur jaram atey alako nꞌerampaasa. 7Amalayika hara Acehériit mee natoogool nalakoe cik gafuy gammee mꞌbulago bara Súur, bo nꞌerampaasa yaayu. 8Nasonkenool arogool : « Agaar, amiigeel Saaray, béy núpurulo ? Béy noom nejow ? » Násuupool : « Etey anafaanom Saaray. » 9Amalayika aahu narogool : « Ubaañ bu bo nꞌSaaray, haakeni mee, nusoŋool. » 10Nabaañ arogool : « Be ekaan búbajumi mbumeeeŋ jaram an mat ájuh apin bo. » 11Nabenen arogool : « Umímir urok far nooge, aw be ebaj aleeh amaañen nurogool Isumayeel (yo yommee : Atúuha ajanjam), mara Acehériit mee ajanjam bahueri. 12Aleehi be enogoor naŋ efalo yásuumut maha ; ho be ebaj galat nꞌdúniya búroom yo ; dúniya búroom yo be elahool. Ho be ecin akuhi gutiool. »

13Agaar búyegehool mbuceeŋoor. Narok : « Mee pére maregen iñoñow wári hañowaam mee ? » Ñeer nawook Acehériit mee halob mee nu ho : « Atúuha añowaam mee. » 14Yo ecil mee ngurok gafuy gaagu Beer-Laahay-Rooy (yo yommee : ekoloŋ yara haroŋ mee, hañowom mee.) Uyu netuhoor sísuk sara Kades son Bered.

15Agaar nan ñeer ataaso mee, nábajul Aburam aleeh amaañen. Aburam nakaanool gajaw arogool Isumayeel. 16Aburam abaje símit gafaŋ gubaagiir nꞌsímit futok nu yanur (86) nan Agaar abajool mee Isumayeel.

Currently Selected:

Fúcihum 16: gsl

Highlight

Copy