Fúcihum 17

Atúuha nálowul gajow Aburam narogool Aburaham mara bapaalaayiil

1aNan Aburam abaj mee símit gafaŋ gubaagiir nꞌsímit guñen gaat nꞌsibaagiir (99), Acehériit mee nápurulool. Narogool : « 1bInjé emmee Atúuha ara sembe. 1cUlagenom nanoonan, ban uroŋ buroŋ babilaam ésuum. 2Injé be ekaan bapaalaayola mbuliŋ : búbajumi be emeeŋ máaamak. »

3Aburam nayah gújuul, nayah fúriiŋool nꞌetaam. Atúuha naroŋ nelob nu ho. 4aInjé, wan ibil mee ekaan mꞌbapaalaayola uwee : 4baw be ekaan pay giil gamemmeeŋ. 5aMaareer let gajai Aburam. Gajai Aburaham 5b(yo yommee : pay giil gamemmeeŋ) 5cmara ínje be ekaan nꞌaw pay giil gamemmeeŋ. 6Injé be ekaan búbajumi mbumeeeŋ jaram guyihen giil gamemmeeŋ, ban gúyiih be épurul nꞌaw. 7Bapaalaayom nꞌaw, ínje bu gasuten bo káŋ bu mꞌbúbajumi, nꞌgambacóogambac gaam bo néjool. Bapaalaay be bara ñáleb, mimbil ikaan Atúuhai nꞌhara búbajumi peepe babil mee éjool mꞌbúsoli. 8Taahe tan ucin maa maa, aw para ajawoora. Mof me mara Kanaan ínje be eseni mo peepe, aw mꞌbúbajumi. Mo be ekaan mooliil bu nanoonan, ban ínje be ekaan Atúuhaiil.

9Atúuha nabaañ arogool : « Min aw Aburaham, ujok bapaalaay baabu liŋ. Búbajumi, nꞌgambacóogambac, ngúkaanum may bapaalaay baabu. 10Fuyuhoum fan ibili mee esen aw mꞌbúbajumi ufee : amaañenóomaañen be esunnai. 11Gasunnauul, go guñum mee eliik fúfaasum fara bapaalaayolaal. 12Gambacóogambac guleeh gaagu gumaañen bu nak gusunnai, bugo babajer gunak futok nꞌgúfaajiir. Nukaan mo may emiigeeli peepe : gabaji to mee nꞌaw, nganaput mee nꞌfiili gan unoomulo mee tíyaŋ. 13Bajut han ubile ekat bo : emiigeel gabaji to mee síndoi son gan unoomulo mee, be esunnai. Ñeer érangamaasi yabil mee galako dó nꞌsiniinuul, ebil mee ekaan min bapaalaayom bulako mꞌbuguul bu nanóonan. 14Bare amaañen asunnauti mee, bu gápurenool dó mꞌbuganool, mara ajogut bapaalaayom. »

15Atúuha nabaañ arok Aburaham : « Mara akoñai : maareer let gajaool Saaray. Gajaool Saara. 16Injé be ésoonienool ban nu ho niñum mee eseni aleeh amaañen. Eem ínje be ésoonienool, ho be ekaan jaw giil gamemmeeŋ ban gúyiih be épurul nu ho. »

17Aburaham nabaañ ayah gújuul, nayah fúriiŋool nꞌetaam, naber. Narok dó mꞌbúyegehool : « Injé ibaje símit ceme (100), mee bu gabugoor ? Ban Saara abaje símit gafaŋ gubaagiir nꞌsímit guñen (90), mee ho be éjuh abaj aleeh ? » 18Aburaham narok ñeer Atúuha : « Upooyom Isumayeel déhooro ; sambil abaak ! »

19aAtúuha násuupool : « Haani let mo. 19bAkoñai Saara fannaool abili ebaj aleeh amaañen, nurogool Isaak (yo yommee : eber). Bu gasuten bapaalaay baabu nu ho káŋ bu mꞌbúbajumool, nkaan bapaalaay bara ñáleb. 20aMara Isumayeel, ijanjam báciineri. Injé bu gásoonienool, búbajumool be emeeŋ máaamak. 20bEséef goono guñen nꞌgúruba be ebaji dó, ban ho bu gáani pay afaan hara sísuk samemmeeŋ. 21Bare nꞌIsaak nibile gasuten bapaalaayom, aleeh han Saara abili mee ebaj toon timaa maa. » 22Atúuha nan afaak mee elob nꞌAburaham, nakahool to najaw.

23Ñeer Aburaham naŋar aleehool Isumayeel, nꞌemiigeelool gabaji to mee nu yaŋool mꞌbugaagu gan anoomulo mee bu gasunnaiil. Ñeer nasunna umaañen gan to mee nu yaŋool peepe fo funak naŋ min Atúuha alobool mee akaan. 24-25Aburaham abaje símit gafaŋ gubaagiir nꞌsímit guñen gaat nꞌsibaagiir (99), aleehool Isumayeel nabaj símit guñen nꞌsífaajiir (13) nan gusunnai mee. 26Funak fanur faafu ngusunnai, 27nu ganur nꞌumaañen gan to mee peepe nu yaŋ Aburaham nꞌemiigeel gabaji to mee, nꞌgan anoomulo mee tíyaŋ.

Currently Selected:

Fúcihum 17: gsl

Highlight

Copy