མར་ཀུ། 13

མཆོད་ཁང་མེད་ད་ལ་བཏང་གིན་སྐོར་ལ་མངོན་ཤེས།

(མད་ཐཱ། ༢༤:༡-༢༤; ལུ་ཀ། ༢༡:༥-༡༩)

1དེ་ནས་མཆོད་ཁང་ནང་ནས་ཡེ་ཤུ་ཕི་ལ་ཕེབས་བའི་གང་ལ་ཁོང་པ་ཡིས་ཉེ་གནས་གཅིག་གི་སྨྲས་བ་ལགས། སློབ་དཔོན་ལགས། གཟིགས་རོགས་གནང་། དུ་རུ་གིན་གྱི་ཆེ་རྡོ་གོང་ཀྱ་དང་ཁང་པ་མཛེས་བ་ཀྱ་འདུག

2ཡེ་ཤུ་ཡིས་གསུངས་བ་ལགས། ཁྱེད་ཀྱ་འདི་ཁང་པ་ཁག་ཆེ་ཀྱ་མཐོང་བའི། ཡིན་ནའང་དུ་རུ་རྡོ་གོང་གཅིག་གི་ཁར་ལ་གཞན་མ་གཅིག་འང་ལྷག་གི་མ་ལགས། རྡོ་གོང་གི་རི་སློག་སྟེ་གཡུག་གི་ལགས།

3ཡེ་ཤུ་མཆོད་ཁང་གི་གདོང་ལ་འོད་ཀྱིན་སྐྱུར་རུ་ཤིང་གི་རི་ལ་བཞུགས་འོད་ད་ལགས། དེ་ནས་པེ་ཏྲོ། ཡ་ཀོབ་དང་། ཡོ་ཧ་ནན་གྱི་ཁོང་པ་ལ་ཟུར་ལ་ཁ་པ་ཞུས་བ་ལགས། 4འེ་ཀྱ་ལ་གསུངས་རོགས་གནང་། དེ་གི་རི་ནམ་འབྱུང་གི་ལེ། དེ་ནས་ཁོང་པ་ཡིས་གསུངས་ཀྱིན་འདི་འགྲུབ་ཀྱི་ལགས་སྨྲས་རེ་འེ་ཀྱ་ལ་རྟགས་གོ་གི་འབྱུང་གི་ལེ།

5ཡེ་ཤུ་ཡིས་གསུངས་བ་ལགས། སྤྱང་ཛེ་བྱེད། མི་སུས་ཁྱེད་ཀྱ་ལ་མགོ་མ་སྐོར་ར་ཤོག 6གི་བྱས་རེ་སྨྲ་ན་ངའི་མིང་ནས་ང་མཱ་ཤི་ཀ་ཡིན་སྨྲས་རེ་དམི་ཅིག་གི་མང་ང་འོངས་ཀྱི་ལགས། དེ་ནས་ཁོང་ཀྱ་ཡིས་མི་དམི་ཅིག་གི་མང་ང་ལ་མགོ་བསྐོར་གྱི་ལགས། 7དེ་ནས་དམག་འཁྲུག་དང་དམག་གི་ལབ་ཀྱ་ཁྱེད་ཀྱ་ཡིས་གོ་གི་ལགས། ཡིན་ནའང་མ་འཇིགས། འདི་ལབ་ཀྱ་འབྱུང་དགོས་ཀྱི་ལགས། ཡིན་ནའང་འོ་དེ་མཐའ་འི་དུས་ཚོད་འགོ་མ་ལགས། 8གི་བྱས་རེ་སྨྲ་ན་མི་རིགས་མི་རིགས་ཀྱི་ནང་དུ། དེ་ནས་རྒྱལ་ཁབ་རྒྱལ་ཁྱབ་ཀྱི་ནང་དུ་དམག་འཁྲུག་གི་ལགས། ས་ཆ་དམི་ཅིག་གི་མང་ང་ལ་ས་ཡོམ་འོངས་ཀྱི་ལགས། དེ་ནས་མུ་གེ་ལ་ཤོར་གྱི་ལགས། འདི་ཀྱ་ནི་སྐྱེས་ཟུག་གི་འགོ་མ་གོ་ཅོག་རེ་ལགས།

9ཁྱེད་ཀྱ་སྤྱང་ཛེ་བྱས་རེ་སྡོད། གི་བྱས་རེ་སྨྲ་ན་མི་ཀྱ་ཡིས་ཁྱེད་ཀྱ་ལ་ཟིམ་ཏེ་ཁྲིམས་ཁང་ཀྱ་ལ་འཁྲིད་ཀྱི་ལགས། དེ་ནས་ཚོགས་ཁང་ཀྱ་ལ་འཁྲིད་དེ་བརྡུང་གི་ལགས། དེ་ནས་ངའི་ཕྱིར་ལ་ཁོང་ཀྱ་ལ་དཔང་པོ་སྟོན་ཡས་ལ་ཁྱེད་ཀྱ་དཔོན་པོ་ཀྱ་དང་རྒྱལ་བོ་ཀྱ་གདོང་དུ་ལངས་དགོས་ཀྱི་ལགས། 10དེ་ནས་མཐའ་འི་དུས་ཚོད་འོངས་ཡས་ཨེན་ལ་གཏམ་བཟང་འདི་མི་རིགས་གི་རི་ལ་བཤད་དགོས་ཀྱི་ལགས། 11མི་ཀྱ་ཡིས་ཁྱེད་ཀྱ་ལ་ཟིམ་ཏེ་ཁྲིམས་བཅད་ས་རུ་འཁྲིད་དེ་ཁྲིམས་ཞུ་ན། འོ་དེ་གང་ལ་གི་སྨྲ་ཡས་སྨྲས་རེ་ཨེན་དུ་རུ་སྡུག་ང་མ་བྱེད། ཡིན་ནའང་འོ་དེ་དུས་ཚོད་ལ་གི་སྨྲ་ཡས་ལ་བལྟས་རེ། འོ་དེ་སྨྲོས། གི་བྱས་རེ་སྨྲ་ན་འོ་དེ་སྨྲ་གིན་གོ་ཁྱོད་མ་ལགས། ཡིན་ནའང་དམ་པའི་ཐུགས་ཉིད་ལགས།

12འོ་དེ་གང་ལ་ཨ་ཇོ་ཡིས་ནུ་བོ་ལ་བསད་དུ་བཅུག་གི་ལགས། དེ་ནས་ཨ་རྒས་ཀྱིས་ཁོ་རི་བི་ཛ་ལ་བསད་དུ་བཅུག་གི་ལགས། དེ་ནས་ཕྲུ་བ་ཀྱ་རང་ཕ་མ་ཡི་དགྲ་ལ་ལངས་ཀྱི་ལགས། དེ་ནས་ཕ་མ་ལ་ཤི་རུ་བཅུག་གི་ལགས། 13དེ་ནས་ངའི་མིང་གི་ཕྱིར་ལ་ཁྱེད་ཀྱ་ལ་མི་གི་རི་ཡིས་འཐད་ད་མི་བྱེད་ཀྱི་ལགས། ཡིན་ནའང་མཐའ་ཡི་དུས་ཚོད་ཐུག་པའི་བཟོད་པ་བྱས་རེ་བསྡད་མཁན་ཀྱ་སྐྱོབ་ཀྱི་ལགས།

སྡུག་བསྔལ་ཆེ་འོང་གིན་དུས་ཚོད།

(མད་ཐཱ། ༢༤:༡༥-༢༨; ལུ་ཀ། ༢༡:༢༠-༢༤)

14འོང་ཡས་རང་མེད་ཀྱིན་ས་ཆ་ལ་ཁྱེད་ཀྱ་ཡིས་དམི་ཅིག་གི་ཨམ་ལོག་བ་སྐྱོན་བཏང་གིན་མེད་གཙང་ང་གཅིག་ལངས་རེ་བསྡད་ད་མཐོང་གི་ལགས། (འདི་དོན་སྒྲོག་མཁན་ཀྱ་ཡིས་ཧ་གོ་ར་ཤོག) འོ་དེ་གང་ལ་ཡུ་དེ་ཡཱ་ལ་འོད་མཁན་ཀྱ་རི་ཀྱ་ཕྱོགས་ལ་འབྲོས་རེ་འགྲོ་བར་ཤོག 15ཁང་པ་ཡི་ཐོག་ལ་འོད་མཁན་ཀྱ་མ་ལ་མ་བབ་བར་ཤོག དེ་ནས་ནང་དུ་འཛུལ་རེ་ཅ་ལག་ཀྱ་བཏོན་དུ་མ་འགྲོ་བར་ཤོག 16ཞིང་ལ་འོད་མཁན་ཀྱ་རང་གི་གོས་ལེན་དུ་ལོག་སྟེ་མ་འགྲོ་བར་ཤོག 17ཡིན་ནའང་འོ་དེ་གང་ལ་ཕོ་བ་ལ་ཕྲུ་འོད་མཁན་དང་འོ་མ་སྟེར་མཁན་སྐྱེས་དམན་ཀྱ་ལ་མྱངས་བ་ལི། 18དེ་ལབ་ཀྱ་དགུན་ཁ་མ་འབྱུང་བར་ཤོག་སྨྲས་རེ་སྨོན་ལམ་རྒྱོབ། 19གི་བྱས་རེ་སྨྲ་ན་འོ་དེ་གང་ལ་དཀོན་མཆོག་གིས་བཀོད་པ་ཡི་འགོ་མ་ནས་ད་ལྟ་ཐུག་པའི་འོང་མ་མྱོང་གིན་སྡུག་པོ་ཆེ་འོང་གི་ལགས། དེ་ནས་དེ་རེ་སྡུག་པོ་ཡང་ནམ་མའང་འོང་གི་མ་ལགས། 20དེ་ནས་དཀོན་མཆོག་གིས་འོ་དེ་ཉིན་མ་ཡི་གྲངས་ཀ་ཉུང་དུ་མ་བཏང་འོད་ན། མི་གཅིག་འང་གསོན་པོ་ལུས་ཀྱི་མ་ལགས། ཡིན་ནའང་ཁོང་པ་ཡིས་བདམས་ད་མི་ཀྱ་ཡི་ཕྱིར་ལ་འོ་དེ་ཉིན་མ་ཡི་གྲངས་ཀ་ཉུང་དུ་བཏང་ང་མཛད་འོད་ད་ལགས།

21དེ་ནས་མི་རིང་འགའ་ཡིས་ཁྱེད་ཀྱ་ལ། ལྟོས། དུ་རུ་མཱ་ཤི་ཀ་འདུག ཡང་མིན་ན། ལྟོས། ཁོང་པ་འོ་རུ་འདུག་སྨྲས་རེ་སྨྲ་ན། ཁྱེད་ཀྱ་དད་པ་མ་བྱེད། 22མཱ་ཤི་ཀ་ཟོག་པོ་ཀྱ་དང་མངོན་ཤེས་མཁན་ཟོག་པོ་ཀྱ་འཐོན་གྱི་ལགས། དེ་ནས་ཧང་སང་གིན་རྟགས་དང་ལས་ཀ་ཀྱ་སྟོན་ཏེ་གི་ཐུབ་ཐུབ་དཀོན་མཆོག་གིས་བདམས་ད་ཀྱ་ལ་མགོ་སྐོར་གྱི་ལགས། 23ཡིན་ནའང་ཁྱེད་ཀྱ་སྤྱང་ཛེ་བྱེད། ངས་ཁྱེད་ཀྱ་ལ་ལབ་གི་རི་ཨེན་དུ་རུ་སྨྲས་རེ་བཞག་འོད།

24ཡིན་ནའང་འོ་དེ་སྡུག་པོ་ཆེའི་དུས་ཚོད་གཤམ་ནས་ཉི་མ་མི་ནག་འབྱུང་གི་ལགས། དེ་ནས་ཟླ་བ་ཡི་འོད་མེད་ཀྱིན་འབྱུང་གི་ལགས། 25དེ་ནས་གནམ་ནས་སྐར་མ་ཀྱ་ལྷིམ་གྱི་ལགས། དེ་ནས་གནམ་གྱི་ཤུགས་ཀྱ་འཁྲུག་གི་ལགས། 26དེ་ནས་མིའི་བུ་སྲིང་གི་ཁོག་ལ་དམི་ཅིག་ཆེ་དབང་དང་གཟི་བརྗིད་ལ་ཕེབས་ཀྱིན་གོ་མཐོང་གི་ལགས། 27དེ་ནས་ཁོང་པ་ཡིས་ཁོ་རི་བང་ཆེན་ཀྱ་བརྫངས་ཀྱི་ལགས། དེ་ནས་འཛམ་བུ་གླིང་གི་མཐའ་མ་ནས་གནམ་གྱི་མཐའ་མ་ཐུག་པའི་ཕྱོགས་བཞི་ནས་རང་གི་བདམས་ད་མི་ཀྱ་ལ་བསྡུ་ཀྱི་ལགས།

སེ་ཡབ་ཀྱི་རྡོང་པོ་ནས་བསླབ་བྱ།

(མད་ཐཱ། ༢༤:༣༢-༣༥; ལུ་ཀ། ༢༡:༢༩-༣༣)

28ཡེ་ཤུ་ཡིས་ཡང་གསུངས་བ་ལགས། སེ་ཡབ་ཀྱི་རྡོང་པོ་ནས་བསླབ་བྱ་ལེན། དེའི་ཡལ་ག་ཀྱ་མཉེན་པོ་བྱུང་རེ་ལོ་མ་ཀྱ་འཐོན་ལུང་མེད་ད་ལ། ད་དབྱར་ཁ་ཤར་ཡས་བྱེད་འདིག་སྨྲས་རེ་ཁྱེད་ཀྱ་ཡིས་ཧ་གོ་ར་ལགས། 29འོ་བྱས་རེ་རང་ངས་སྨྲ་གིན་ལབ་དེ་ཀྱ་འབྱུང་བའི་གང་ལ། ང་འོང་གིན་དུས་ཚོད་སླེབ་སོང་། སྒོ་རྩ་རུ་སླེབས་སོང་སྨྲས་རེ་ཧ་གོ་ར་བྱེད། 30དངོས་གནས་རང་ང་ཁྱེད་ཀྱ་ལ་སྨྲ་ཡིན། དེ་གི་རི་མ་འགྲུབ་ཀྱིན་ཐུག་པའི། དེ་མི་རབས་དེ་རྫོགས་ཀྱི་མ་ལགས། 31ནམ་མཁའི་ཞིང་ཁམས་དང་འཛམ་བུ་གླིང་ཡལ་རེ་འགྲོ་གི་ལགས། ཡིན་ནའང་ངའི་བཀའ་ནམ་མའང་ཡལ་གྱི་མ་ལགས།

སྤྱང་ཛེ་བྱས་རེ་བསྡད་དགོས་ཀྱིན།

(མད་ཐཱ། ༢༤:༣༦-༤༤; ལུ་ཀ། ༡༢:༣༨-༤༠)

32ཡིན་ནའང་འོ་དེ་ཉིན་མ་དང་དུས་ཚོད་ཀྱི་སྐོར་ལ་སུ་ལའང་ཆ་མེད་ད་ལགས། ཡབ་ལ་མ་ན་ནམ་མཁའི་ཞིང་ཁམས་དུ་འོད་མཁན་དཀོན་མཆོག་གི་བང་ཆེན་ཀྱ་དང་དཀོན་མཆོག་གི་སྲས་ལའང་ཆ་མེད་ད་ལགས། 33འོ་དེ་དུས་ཚོད་ནམ་འོང་གི་ལགས་སྨྲས་རེ་ཁྱེད་ཀྱ་ལ་ཆ་མེད་ཀྱིན་བྱས་རེ་སྤྱང་ཛེ་བྱས་རེ་གཉིད་མ་ལོག་བར་སྡོད། 34འདི་ནི་མི་གཅིག་ཁོ་རི་ནང་གཡོག་པོ་ཀྱ་ལ་རྩི་བརྒྱབ་སྟེ། ཁོ་རང་གྲུ་བརྒྱབ་ཏུ་འགྲོ་གིན་ཅོག་རེ་ལགས། བདག་པོ་ཡིས་ཁོ་རི་གཡོག་པོ་ཀྱ་ལ་མི་རེ་མི་རེ་ལས་ཀ་སྐུལ་རེ་དེ་ནས་སྒོ་སྲེ་གོ་ལ་གཉིད་མ་ལོག་བར་སྡོད་སྨྲ་གི་ལགས། 35འོ་བྱས་རེ་གཉིད་མ་ལོག་བར་སྡོད། གི་བྱས་རེ་སྨྲ་ན་ནང་གི་བདག་པོ་དགོང་མོ་མཚན་གྱི་ཏིག་ཏིག། ཡང་མིན་ན་བྱ་སྐད་བརྒྱབ་བའི་གང་ལ། ཡང་མིན་ན་སྔ་རོག་འོང་ཡས་ཡིན་གྱིན་སྨྲས་རེ་ནམ་ལོག་གིན་གོ་ཁྱོད་ལ་ཆ་མེད་ཡོང་ང་ལགས། 36དེ་ནས་ཧ་ཏག་པ་ལ་འོང་བའི་གང་ལ། ཁོས་ཁྱེད་ཀྱ་གཉིད་ལོག་སྟེ་བསྡད་ཀྱིན་མ་ཐུག་བར་ཤོག 37ཁྱེད་ཀྱ་ལ་སྨྲ་གིན་ཅོག་རེ་ང་མི་གི་རི་ལ་སྨྲ་ཡིན། གཉིད་མ་ལོག་བར་སྡོད།།

Currently Selected:

མར་ཀུ། 13: LOY

Highlight

Copy