Maraka 13

Yesu i Kirinfusinaŋ ki gwu wulu bi-a

(Matiyu 24.1–3; Luki 21.5–7)

1Yesu ji-i po san-a Kirinfusinaŋ ki ru, ntiŋ wɔ kalindaŋ ki bɛɛ tu ntiŋ tɛ tu : « Kalimɔɔ, ábɛɛ Kirinfusinaŋ ki tanka ki shɛɛli! Ǹʼtan-i kwɔ sinaŋ sinaŋ ni wu, ŋì i ji shɔ haali! »

2Yesu i ntiŋ nupwulu tu : « Miŋ ɲaniŋ i fu sinaŋ tanmaan wɔ̀ ra kaa, kwɔ a na tu kwɔ sun ka kwɔ kari ru kì, ǹʼbataa ra na warinka san amaŋ sun. »

Yesu wɔ wulu kiri juniɲa nakɔɔra ɲaanfɛkwulu bi kiri bi sun

(Maraka 13.3–13; Luki 21.7–19)

3Yesu i sɔɔ Olinfyetɔnŋ ki sun, ntiŋ i a ɲaannupwulu Kirinfusinaŋ ki tɛ. Pyɛɛri, Yakuba, Yuhana niŋ fa Andire, nini fa Yesu bantenŋ wuru-i, kí i ntiŋ nanɔri tu : 4« Bi kari ra ma waarinŋ danwɔ ru? Taanmashɛ danwɔ ra na ǹʼji tu niŋ bi kiri ma waari ki so? »

5Niŋ na, Yesu i ka bi kí tɛ tu : « Á á ɲakili tu á yɛri ra, nwɔma koŋ fa na á sunnɛɛn, ntiŋ i á bo fɔni saa sun kì. 6Koŋ mwɔɔnna a na na, kí i míŋ tɔ ye arì yɛri ra, tu arìbɛɛ Kirinŋ Ɲaannakonshimaan ki i, kí a na koŋ mwɔɔnna sunnɛɛn fɔni. 7Ábɛɛ a na kari tan wulu kiri rama-ni á tonfan niŋ fa mani narimaŋ kiri ru, á fa na á ɲakili ɲaanmi kì, sabu niŋ kakan-i niŋ i ma, nka niŋ a na ji juniɲa ki kɔ ki i sun kì. 8Shiya ki bɛɛ ra na jɔrɔkɔ ǹʼtɔri cɛfan, kí i arìmaŋ kari-ri, kɛniŋ fa kɛniŋ i bo arìmaŋ na, fwuniŋ sɛrɛsɛri ki fa bɛɛ i ji mani mwɔɔnna nu. Niŋ bi kiri ra na ji cɔɔri bi kiri tɔnpa ki i, miŋ tu mari wɔ daŋ ji ciiyaa tɔnpamaanna.

9Nwɔ̀ i ábɛɛ, á á yɛri cɔye, sabu konaŋ kiri ra na ábɛɛ pa tiri-ri kitikwurutɔnŋ kiri tɛ. Kí a na ábɛɛ bwɔ Yawutu kiri wɔ kalinfu kiri ru. Kí i tiri-ri á wu faantiŋ ni fa masa ri tɛ, míŋ tɔ ki bira. Niŋ a na saa wɔri ábɛɛ tɛ, á i míŋ wulu bi nini tɛ. 10Kirinŋ wɔ Wulujii ki kakan-i ŋì i so shiya kiri bataa sun bi ki bataa jɛŋ. 11Kí ja na ábɛɛ pa tiri kitikwurutɔnŋ kiri tɛ, á fa na á ciirufɔni niŋ jɛŋ kì, á fa ǹʼbi tu ábɛɛ ra na ta nfɛnŋ bi kì. Nka a Kirinŋ ta wulu wɔ̀ wɔri ábɛɛ tɛ, á niŋ bi, sabu niŋ a na po ábɛɛ yɛrima kiri ru kì, Ɲiniwɔlinŋ ki ra na niŋ bi de ábɛɛ daru.

12Tindaŋ a na a tindanshi ki wɔri, tu kí ntiŋ kilɛn, tiŋ i a daŋ wɔri, tu ŋì kilɛn, daŋ ni i jɔrɔkɔ arì jifinŋ ni cɛfan, kí i kilɛn. 13Konaŋ kiri ra na ábɛɛ bikwɔ arì sun, míŋ tɔ ki bira. Nka, a konwɔtiŋ na a sunfuru, ntiŋ i so ǹʼdaŋ ki ra, Kirinŋ a nintiŋ mwu. »

Ɲaanfɛkwulu bi sinaŋ a na konaŋ ki kila

(Matiyu 24.15–28; Luki 21.20–24)

14« Finŋ nɔɔmaan li tantɔnŋ wɔ̀ bikwɔ-i Kirinŋ sun, a ábɛɛ na niŋ sɔɔmaan ja mani nu, ǹʼkakan ŋì i sɔɔ mani wɔ̀ ru kì, (mani ka kalitɔnŋ ki a banba, ntiŋ i ǹʼɲaantɔ), niŋ waari ru, a konwɔtiŋ na ji Yude sɔɔta ki ru, tu niŋ bili tiri tɔnŋ maŋ kiri ru. 15Konwɔtiŋ na ji tanka sun, nintiŋ fa na jɛri tu a i na-a finŋ tɔri shi fu ki ciiru kili kì. 16Konwɔtiŋ na ji juunŋ, ntiŋ fa na a pwulu tu a ra na awɔ jɛrɛbi sinaŋ shi kulu kì. 17Niŋ waari ki ru, mari ciitiŋ kiri fa mari wɔ̀ri i ɲɛŋ wɔri-ra daŋ ni tɛ, nini a na cɔɔri kusɛbɛ. 18Á Kirinŋ nafɛ-ri, nwɔma niŋ bili ki fa na fu shii sinaŋ waari ki wu kì. 19Niŋ shikaŋ cɔɔri ki a na gbɛ. Ǹʼbishi cɔɔri ra na ja kì. Kabi juniɲa tɔnpa waari ki ru Kirinŋ gbɛ, fɔ ŋì i na so niŋ shikaŋ sun, ǹʼcɔɔri ki bishi ma ja-ri kì, ǹʼbishi dumiŋ a na ja kili kì. 20A Ŋuntiŋ ki ji wuru niŋ cɔɔri kiri waaci kiri rabwunu-ni kì, koŋ wuru-ra a mwu kì. Nka Kirinŋ nwɔ̀ri ɲaannashi-i, ŋì niŋ cɔɔri kiri waaci kiri rabwunu-i nini bira.

21A koŋ na ǹʼbi ábɛɛ tɛ tu : ‹ Á ǹʼshɛɛli, Kirinŋ Ɲaannakonshimaan ki i kwumaŋ walima ǹʼyɔ kaa keŋ ›, á fa na bili ntiŋ na kì. 22Sabu purubitɔnŋ ni a na jɔrɔkɔ, kí i ǹʼbi-ri tu arìbɛɛ Kirinŋ Ɲaannakonshimaan ki i, cintɔnŋ purubitiiri i na jɔrɔkɔ sɛbɛ, nini i taanmashɛ ri fa kabakobi ri ma-ni, nwɔma a ǹʼji-a so ma-i, arì i Kirinŋ ɲaannatɔnŋ kiri sunnɛɛn. 23Á na á ɲakili tu á yɛri ra, sabu míŋ niŋ bi kiri jɛnbi-i ábɛɛ tɛ kɔ. »

Koŋ danshuru ki na bi ki

(Matiyu 24.29–31; Luki 21.25–28)

24« Nka niŋ jibi kiri ra, ka cɔɔri ka fwuudemaan ki kɔɔtɛ,

sunŋ ki a na sarinŋ po kili kì,

ɲɛ ki a na sarinŋ po sɛbɛ kì.

25Sɔrɔniŋ kiri ra na saa yiri-ri kirina, yìrì i na fɛɛn fɛɛn-ni,

kirinpɔlila sotinbi kiri i sɛrɛsɛri.#Esayi 13.10; 34.4.

26Niŋ waaci ki ru, konaŋ ki ra na Koŋ Danshuru ki yirira ja loŋ kiri faninmwuŋ, sotinbi fa nɔɔri wu. 27Ŋì a na mɛlɛkɛn kiri cin tiri juniɲa nɔnkɔnŋ pyiiraŋ ki bataa ra, ŋì i ta a ɲaannatɔnŋ kiri bataa bo arìmaŋ sun, ŋì i shi pwɔkulinŋ ki daŋ ki ra, ŋì i ta bo kirinpɔli ki daŋ ki ra. »

Shɔ jirinŋ ki sun kalinŋ ki

(Matiyu 24.32–35; Luki 21.29–33)

28« Á bi kiri shɛɛli shɔ jirinŋ ki bi sun, a ǹʼji cɔ-a waarinŋ wɔ̀ ru, ŋì i da ŋunaŋ ni po-ri a ra, ábɛɛ i ǹʼtɔ-a niŋ na tu yili ki myɛ. 29Mìŋ ɲaan tenŋ ki tɛ, a ábɛɛ na niŋ bi kiri ja juu ma-a waarinŋ wɔ̀ ru, á ǹʼtɔ tu Koŋ Danshuru ki na ki myɛ kɔ, tu ntiŋ demantɔnŋ ki ra. 30Sɛli ki ra, míŋ a ǹʼbi ábɛɛ tɛ ńʼtu jiintɔnŋ ki bataa ra beeni kɔ ka bi kari mabali yìrì i ǹʼnafaa kì. 31Kirinpɔli ki fa pwɔkulinŋ kiri ra na fwuude, nka nwɔ̀ i mɔ́ɔ́n wulu ki i, niŋ a fwuude fɛsɛfɛsɛ kì. »

Koŋ niŋ jibi ki fa niŋ waaci ki tɔ-a ki

(Matiyu 24.36–44)

32Yesu tu sɛbɛ : « Nwɔ̀ i niŋ jibi, walima niŋ ma waari ki bi ki i, hali kirinpɔlila mɛlɛkɛn kiri fa Koŋ Danshuru ki niŋ tɔ-a kì, duu Tiŋ Kirinŋ tenŋ pe. 33Á á ɲakili tu á yɛri ra, á i tu á ɲaanna, sabu ábɛɛ ǹʼwaaci ki tɔ-a kì.

34Ŋì a na ji miŋ tu shuru bɛɛ, ntiŋ i ji-a tiri wɔru, ntiŋ i awɔ kaniŋ ki sun finŋ kiri biye awɔ joŋ kiri sun, ntiŋ i koŋ fɔn bataa ma baara wɔri ntiŋ tɛ. Ntiŋ i ǹʼbi faatɔnŋ ki ɲaannasuutɔnŋ ki tɛ, tu niŋ mani ki ɲaannasuuka shɔ. 35Niŋ ki ra, á tu a ɲaanna, sabu ábɛɛ futiŋ ki na waaci ki tɔ-a kì. Ntiŋ a so na-i bilana, walima cii wɔkila ru, walima ɲandanbulu sun, walima siira. 36A ntiŋ na ji bali na finŋ i, ntiŋ fa na fa ábɛɛ wu ɲinintan-a kì. 37Míŋ i nwɔ̀ bi-a ábɛɛ tɛ kaa, míŋ i ǹʼbi-a koŋ bataa tɛ. Á tu á ɲaanna. »

Currently Selected:

Maraka 13: JOB

Highlight

Copy