Matiyu 16

Farinsiyɛnŋ kiri fa Sadusiyɛnŋ kiri wɔ taanmashɛ ceeli bi ki Yesu gbɛ

(Maraka 8.11–13; Luki 12.54–56)

1 Farinsiyɛnŋ kiri fa Sadusiyɛnŋ kiri i arì kpari Yesu tɛ, kí i arì bo ntiŋ fɛ, tu ntiŋ taanmashɛ ki bɛɛ ma, ŋì i po kirinpɔlila.

2Yesu i kí rupwulu tu : « Sunŋ fyiri ki sun, ábɛɛ i ǹʼbi-a tu : ‹ Mani ki ra shɔ po siri, sabu kirina ki kilɛn-i. › 3Niŋ fa, siira ki ru, á i bi-ri tu : ‹ Mani ki shɔ po jiŋ kì, sabu kirina ki mini-i. › Ábɛɛ so-a kirina shɛɛli-i, á i waaci ki ɲaan kiri tɔ-ri, nka yibɛɛ i waaci wɔ̀ ru, ábɛɛ waa-ri niŋ taanmashɛ kiri tɔ-i wa? 4Jiintɔnŋ koŋ jɛ kari, niŋ fa Kirinŋ wulu sɔsɔtɔnŋ kari tu taanmashɛ ma arì ɲaanna, taanmashɛ tɔri tenŋ a ma kí ɲaanna Yonasi wɔ taanmashɛ ki ciniŋ kì. » Yesu niŋ bi kɔ-i waarinŋ wɔ̀ ru, ntiŋ i a san kí kankantɛ, ntiŋ i tiri.

Farinsiyɛnŋ kiri fa Sadusiyɛnŋ kiri wɔ bwuru tuutuufinŋ ki bi ki

(Maraka 8.14–21)

5 Kalindaŋ kiri wuru po-a baa kuŋ tɔri ki tɛ waarinŋ wɔ̀ ru, kí ɲakilila bo-ri bwuru shi kì. 6Yesu tu kí tɛ : « Á á yɛri paka tɔ Farinsiyɛnŋ kiri fa Sadusiyɛnŋ kiri wɔ bwuru tuutuufinŋ ki kɛlina dɛ! »

7Kalindaŋ kiri i ǹʼbi-ri arìmaŋ tɛ tu : « Yibɛɛ bwuru shi kì, niŋ ki ra, ntiŋ i ka bi-ri. »

8Kí wuru nwɔ̀ bi-a, Yesu i niŋ tɔ, niŋ ki ra, ntiŋ tu kí tɛ : « Ábɔɔ bilinabi ki rakuru-i dɛ! Nfɛnŋ na, ábɛɛ i ǹʼmiiri-ri tu ábɛɛ bwuru shi kì, tu ninki ncin-a tu míŋ i ka bi-ri? 9Ka bataa ciiru, ábɛɛ bi kiri ɲaantɔ-i sun kì wa? Míŋ bwuru ŋuŋ taanŋ ki wɔri-i shuru waa taanŋ (5.000) ki tɛ mani wɔ̀ ru, niŋ fa ábɛɛ shɛɛrinŋ kpaa wɔ̀ faa ǹʼpyɛ ki ra, ábɛɛ ɲakililafɔni-i niŋ tɛ wa? 10Niŋ fa bwuru ŋuŋ jɔnpɔni ki lu-i shuru waa pyiiraŋ (4.000) ki tɛ, ábɛɛ shɛɛrinŋ kpaa wɔ̀ kila-i ǹʼpyɛ tumaan ki ra, ábɛɛ ɲakililafɔni-i niŋ tɛ wa? 11A míŋ ǹʼbi tu ábɛɛ á yɛri paka tɔ Farinsiyɛnŋ kiri fa Sadusiyɛnŋ kiri wɔ bwuru tuutuufinŋ kɛlina, nfɛnŋ na ábɛɛ ɲakili i ji ǹʼna tu míŋ nu bwuru wulu bi-a? »

12Niŋ ki ra, kí i kila kí i ǹʼtɔ tu Yesu wuru wulubi-a bwuru tuutuufinŋ bi sun kì, nka tu ntiŋ wuru Farinsiyɛnŋ kiri fa Sadusiyɛnŋ kiri wɔ kalinŋ ki wulu bi-a.

Pyɛɛri tu Yesu Kirisa ki i

(Maraka 8.27–30; Luki 9.18–21)

13Yesu so-i Sensare Filipi sɔɔta ki ru, ntiŋ i awɔ kalindaŋ kiri ranɔri : « Konaŋ kiri ǹʼbi-a tu Koŋ Danshuru ki nkɛnŋ? » 14Kí i ntiŋ nupwulu tu : « Ǹʼbɛɛ ri gbɛ, Wutɔnŋ Yuhana yɛ, ǹʼtɔri ri gbɛ, Eli#16.14 Eli : Ǹʼbɛɛ ri i Eli tɔ ki bi-a tu Iliya. yɛ, ǹʼtɔri ri tu Yeremi, walima tu Kirinŋ wɔ cintɔnŋ tɔri. »

15Yesu tu kí tɛ : « Ábɛɛ ji! Ábɛɛ gbɛ, míŋ nkɛnŋ? »

16Simɔŋ wɔ̀ i dɔri-ra tu Pyɛɛri, niŋ tu ntiŋ tɛ : « Ábɛɛ i Kirisa ki i, Kirinŋ ɲaninkulutɔnŋ ki Danshuru ki. »

17Yesu tu ntiŋ tɛ : « Yonasi danshuru Simɔŋ, mɔɔn shɔ-i, sabu nwɔ̀ ka sɛli ka ji-i miŋ wu, niŋ konanmini ki, duu míŋ Tiŋ wɔ̀ i kirinpɔli ki ra. 18Míŋ a nwɔ̀ bi miŋ tɛ, niŋ i kaa : Miŋ i Pyɛɛri#16.18 Pyɛɛri : tɔ ki kɔri ki i tu faa walima kwɔ. i, míŋ a ńʼwɔ bilinatɔnŋ kwuru ki sɔɔ faa wɔ̀ sun. Beŋ ki wɔ so ki a na so finŋ tɔri ma-i nwɔ̀ wu kì. 19Míŋ a na kirinpɔlila Masabi ki bunaŋ ki wɔri miŋ tɛ, a miŋ finŋ woo finŋ kɔli pwɔkulinŋ ki sun, niŋ a kɔli kirinpɔli ki ra, a miŋ finŋ woo finŋ pili pwɔkulinŋ ki sun, niŋ a pili kirinpɔli ki ra. »

20Niŋ kɔɔtɛ, Yesu i ǹʼbi furu awɔ kalindaŋ kiri tɛ, tu kí fa ǹʼbi koŋ tɔri tenŋ tɛ, tu afinŋ Kirinŋ Ɲaannakonshimaan ki i kì.

Yesu wɔ wulu ki a beŋ ki fa a ŋmɛni bi ki bi sun

(Maraka 8.31 ŋì i ta bo 9.1; Luki 9.22)

21Ŋì i shi niŋ waaci ki ru, Yesu i ǹʼfɔɔ bi-ri awɔ kalindaŋ tɛ, tu sii ǹʼna ǹʼnu kì, tu afinŋ kakan a i tiri Yerusalɛmu, a i ta cɔɔri cɛɛnni kiri fa sarakawɔrɔtɔnŋ kiri ŋununtiŋ kiri fa sariya kalimɔɔ kiri gbɛ. Kí i a kilɛn, a i ŋmɛni ǹʼsunŋ byantɔnŋ ki i.

22Pyɛɛri i ntiŋ dɔri po kɛlinsun, niŋ i ta jɛbi-ri ntiŋ gbɛ tu : « Ŋuntiŋ ki, Kirinŋ á mwu niŋ bi kiri wu, nini fa ábɛɛ kila kì. »

23Yesu i a ɲaannupwulu, ntiŋ i jɛbi Pyɛɛri gbɛ tu : « Miŋ shitaanni kaa, nʼsan ńʼtɔntɛ, miŋ i míŋ ŋununlitɔnŋ i, sabu mɔɔn bi jaka ɲaan ki fa Kirinŋ wɔ ki tenŋ i kì, miŋ i nʼwɔ bi kiri ja-a konanmini wɔ jaka ɲaan na. »

Koŋ ǹʼpa-a Yesu cɛfan dɔɔkunŋ?

(Maraka 8.34 ŋì i ta bo 9.1; Luki 9.23–27)

24Yesu i ǹʼbi awɔ kalindaŋ kiri tɛ tu : « Konwɔtiŋ ji ǹʼtɛ a i ǹʼpa míŋ cɛfan, ntiŋ fa a miiri a yɛri ki bira kì. Ntiŋ a kpinkpisuu#16.24 kpinkpisuu ki shi : Niŋ kɔri ki i tu kalindaŋ kiri kakan kí i arì tu kí i yɛlinŋ mwɔɔnna pa arì ra Yesu cɛfan tiri ki ru, hali fɔ ŋì i ta so beŋ ki sun. ki shi jibi woo jibi, ntiŋ i ǹʼpa míŋ cɛfan. 25Sabu konwɔtiŋ i ǹʼtɛ a i a ɲinita ki mwu, nintiŋ a bɔni a ɲinita ki ru, nka konwɔtiŋ bɔni a ɲinita ki ru míŋ bira, nintiŋ a a ɲinita ki kila. 26Juniɲa ki ru finŋ bataa kilamaan na nfɛnŋ shɔ konanmini sun, a ntiŋ bɔni a ɲinita ki ru? Konanmini na so nfɛnŋ wɔri-i Kirinŋ tɛ, nwɔ̀ a ntiŋ ɲini ki sa po? 27A Koŋ Danshuru ki na na Tiŋ ki nɔɔri ki ru, niŋ fa awɔ mɛlɛkɛn kiri wu, ntiŋ a na koŋ fɔn tenŋ tenŋ sali, ŋì i kɛɲɛ a mabi wu. 28Sɛli ki ra, míŋ a ǹʼbi ábɛɛ tɛ, ńʼtu nwɔ̀ri fɔn i kwumaŋ, ńʼtu nini bɛɛ ri ra beeni Koŋ Danshuru ki naanna ki jabali awɔ Masabi ki ru kì. »

Currently Selected:

Matiyu 16: JOB

Highlight

Copy