Matiyu 15
15
Farinsiyɛnŋ kiri fa sariya kalimɔɔ kiri wɔ ladaŋ kiri bi ki
(Maraka 7.1–13)
1 Sariya kalimɔɔ bɛɛ ri fa Farinsiyɛnŋ bɛɛ ri i po Yerusalɛmu, kí i na Yesu ranɔri tu : 2« Nfɛnŋ na, mɔɔn kalindaŋ kiri yibɛɛ tiŋ cɛɛnni kiri wɔ ladaŋ kiri rasɔɔ-ra kì? Sabu kí arì gbɛ kiri rawuka shɔ-a#15.2 gbɛ kiri rawuka shɔ : Farinsiyɛnŋ kiri wuru arì gbɛ kiri rawu-a ɲaan ki bɛɛ tɛ, ŋì i kɛɲɛ ladaŋ kiri wu., kí i kila kí i nufinŋ ki nu-ni kì. »
3Yesu i kí rupwulu tu : « Ábɛɛ ji! Nfɛnŋ na, ábɛɛ i Kirinŋ wɔ cinŋ bimaan kiri li-ri awɔ ladaŋ kiri tɛ? 4Sabu, Kirinŋ tu : ‹ Nʼtiŋ ki fa nʼɲiŋ ki gbɛ ›,#Sarakawɔrɔtɔnŋ kiri 20.9; Sariya kiri 5.16. niŋ fa ǹʼtu ‹ konwɔtiŋ wulu kulinŋ bi a tiŋ walima a ɲiŋ tɛ, nintiŋ fa kilɛn kakan-i. › 5Nka ábɛɛ kalinŋ kwuru danwɔ wɔri-ra? Ábɛɛ tu, a koŋ ǹʼbi a tiŋ walima a ɲiŋ tɛ tu : ‹ Míŋ wuru-ra ye ábɛɛ tɛ finŋ wɔ̀ wu, míŋ niŋ wɔri-i saraka Kirinŋ tɛ ›, 6tu jifinŋ ki wɔ ka kɔni ji-a nintiŋ na kili kì. Niŋ ɲaan ki tɛ, ábɛɛ i Kirinŋ wɔ wulu ki bo-a áwɔ ladaŋ kiri tɛ. 7Wulufuulibitɔnŋ kiri shɛɛli! Esayi cintɔnbi wulu wɔ̀ bi-i, niŋ ábɛɛ pa-i haali! Ntiŋ tu, Kirinŋ ǹʼbi tu :
8‹ Ka konaŋ kari i míŋ gbɛ-a arì tɔnŋ na,
nka kí ciiru ki maŋ nari-i míŋ na.
9Kí i bi wɔ̀ri ma-a tu arì míŋ gbɛ-a, nini i ǹʼgbansanŋ ni i,
sabu, kí i konaŋ kiri kali-la bi wɔ̀ri ra, nini i konanmini wɔ ladaŋ sɔɔmaan ni bantenŋ ni i. ›#Esayi 29.13. »
Finŋ wɔ̀ i so-a koŋ nɔɔ-ɔ
(Maraka 7.14–23)
10Niŋ kɔɔtɛ, Yesu i konaŋ ki dɔri, ntiŋ i ǹʼbi kí tɛ : « Á á tɔɔnye ńʼtɛ, á i ńʼwɔ wulu ki ɲaantɔka shɔ. 11Finŋ wɔ̀ i de-a konanmini tɔnŋ ki ra, niŋ ntiŋ nɔɔ-ra kì, nka finŋ wɔ̀ i po-a ntiŋ tɔnŋ ki ra, ninki i ntiŋ nɔɔ-ra. »
12Niŋ ma-i, kalindaŋ kiri i arì kpari Yesu tɛ, kí i ǹʼbi ntiŋ tɛ : « Ábɛɛ ǹʼtɔ tu ábɔɔ wulu ki Farinsiyɛnŋ kiri yaa kì wa? »
13Ntiŋ i kí rupwulu tu : « Míŋ Tiŋ wɔ̀ i kirinpɔli ki ra, a niŋ jirinŋ woo jirinŋ ye kì, niŋ bataa ra cɛn fɛɛn. 14Á kí tu nmaŋ, ɲaanfwuu ri i arìmaŋ bali pa-a. A ɲaanfwuu fuuli dumiŋ amaŋ bali pa, kí koŋ fuuli ki fɔn a fɛɛn kukuta ru. »
15Pyɛɛri tu ntiŋ tɛ tu : « Á áwɔ wulusuntalinŋ jɔnɔ ki kɔri ki bi yi tɛ. »
16Yesu tu : « Ábɛɛ yɛrima kiri, ábɛɛ ɲakili kila-i sun kì wa? 17Ábɛɛ ǹʼtɔ tu konanmini finŋ woo finŋ nu-a, tu niŋ de-a ntiŋ ciiru, tu niŋ kɔɔtɛ, tu ntiŋ ta-a ǹʼkee ɲiŋ nu kì wa? 18Nka, nwɔ̀ i po-a tɔnŋ ki ra, ninki i po-a cii ki ru, ninki i koŋ nɔɔ-ri. 19Sabu, ɲakilila jɛ wɔ̀ri i koŋ po bo-a koŋ kilɛn ki sun, niŋ fa nankulunbi ki sun, fa kakaalibi ki sun, niŋ fa kwunbi ki sun, niŋ fa puru bi ki fa puru yemaanna ki wu koŋ wu, niŋ fa kiilinŋ tan ki sun, nini bataa i yiri-ra koŋ cii ki ru. 20Niŋ bi kiri i koŋ nɔɔ-ra, a niŋ ji-i kì, gbɛɛra wuka shɔbalibi nuŋ tɛ, niŋ koŋ nɔɔ-ra kì. »
Shiya tɔri ru mari bili bi ki Yesu ra
(Maraka 7.24–30)
21Yesu i po san niŋ mani ki ru, ntiŋ i tiri Tiiri fa Sidɔnŋ sɔɔta ki ru. 22Kaanna mari bɛɛ sɔɔ wuru niŋ sɔɔta ki ru, niŋ i na Yesu tɛ, nmari i yaalinpo, nmari i ǹʼbi tu : « Ŋuntiŋ ki, Dawuda Danshuru#15.22 Dawuda Danshuru : Ŋì i kɛɲɛ Kirinŋ wɔ cintɔnŋ kiri wɔ wulu kiri wu, Kirinŋ Ɲaannakonshimaan ki wɔ̀ wuru-ra Isirayɛli mwu po san awɔ jonbi ki ru, niŋ koŋ ki kakan wuru-i ntiŋ i po Masa Dawuda wɔ konanbi ki ru. Niŋ ki ra, Kirinŋ wɔ wulu sɛbɛ ki i Yesu dɔri-ri tu « Dawuda Danshuru », sabu Yesu i Masa Dawuda nupo o ncinŋ (Ɔrɔmutɔnŋ kiri 1.3). Mani kiri bɛɛ ri ru Yesu i dɔri-ra tu Dawuda nupo (Timote (2) 2.8)., á míŋ sunmakwulupa, ɲinijɛ i míŋ danmari ki ru, ŋì i nmari cɔɔri-ra kusɛbɛ. »
23Yesu yɛri nmari shɛɛli nmaŋ kì. Nka ntiŋ wɔ kalindaŋ kiri i arì kpari ntiŋ tɛ, kí i ǹʼbi :
« Á saa wɔri ka mari ka tɛ, a niŋ ji-i kì, nmari yaalinpo wulu ki i yibɛɛ tɔɔnnupo-a. »
24Yesu tu : « Míŋ cin na-i Isirayɛlidaŋ kiri bantenŋ tɛ, nini wɔ̀ri i miŋ tu saa fɔnimaan ni. »
25Nka mari ki i na a kwushiri ntiŋ fɛ, nmari i ǹʼbi tu : « Ŋuntiŋ ki, á ye ńʼtɛ! »
26Ntiŋ i ǹʼnupwulu tu : « Ǹʼshɔ koŋ i tiraŋ kiri wɔ nufinŋ ki shi, ŋi i ǹʼkee bo kwulanaŋ ni tɛ kì. »
27Mari ki tu : « Ŋuntiŋ ki, niŋ i sɛli i, niŋ fa a fɔn na, nufinŋ bwulubwulu wɔ̀ i fɛɛn-na kwuutiŋ ki wɔ nuŋ numaŋ ki ru, kwulanaŋ kiri i niŋ shi nu-a. »
28Niŋ bimaan ki sun, Yesu tu nmari tɛ tu : « Mari ki, mɔɔn bilinabi ki gbɛ-i dɛ! Miŋ i nwɔ̀ tɛ, niŋ ma nʼtɛ. » Mìŋ waaci tenŋ ki ru, nmari danmari ki i kene.
Yesu wɔ kiratɔnŋ mwɔɔnna kene bi ki
(Maraka 7.31)
29Yesu po san-i niŋ mani ki ru, ntiŋ i ta Galile baa ki tɔnŋ na, ntiŋ i tunpa tɔnnaanŋ bɛɛ sun, ntiŋ i sɔɔ niŋ mani nu. 30Konaŋ kiri i na arɔɔ kiratɔnŋ kiri wu ntiŋ tɛ. Niŋ kiratɔnŋ kiri wuru koŋ kanŋ tenŋ ni, fa ɲaanfwuu ri, fa mwurunku ri, fa bubu ri, ŋì i bo kiratɔnŋ kwuru mwɔɔnna tɔri ri sun. Kí i na niŋ kiratɔnŋ kiri bo Yesu ɲaanfɛ, ntiŋ i kí kene. 31Konaŋ kiri bubu kiri ja-i wulubi-a, mwurunku kiri i tiri-ri, kanŋ tenŋ kiri i tiri-ri, ɲaanfwuu kiri i maannaja-ri, niŋ i bo kí tɔnŋ sun, fɔ kí i arì bo Isirayɛli wɔ Kirinŋ ki gbɛ sun.
Yesu wɔ nufinŋ wɔri bi ki konaŋ mwɔɔnna tɔri tɛ
(Maraka 8.1–10)
32Yesu i awɔ kalindaŋ kiri dɔri, ntiŋ i ǹʼbi kí tɛ tu : « Konaŋ ki makwulu i míŋ tɛ. Ǹʼsunŋ byantɔnŋ ki i kaa, konaŋ ki i míŋ fan kwumaŋ, nufinŋ kí gbɛ, kí i ǹʼnu kì. Míŋ a kí bɛɛkɔni ki bo tiri kì, nwɔma kí pwulula ki, kí faan ki fa na ta kɔ saa ki ra kì. »
33Ntiŋ wɔ kalindaŋ kiri tu ntiŋ tɛ : « Ka jaŋ ka faninmwuŋ, yibɛɛ ra nufinŋ kila da, yi ka konaŋ ka bataa pyii? »
34Yesu tu kí tɛ : « Bwuru ŋuŋ jinŋ ábɛɛ gbɛ? » Kí tu ntiŋ tɛ : « Jɔnpɔni, niŋ fa yɛrinŋ myɛɛnniŋ daŋ dama. »
35Ntiŋ tu konaŋ ki bataa sɔɔ sɔɔ ta fwuniŋ sun. 36Ntiŋ i niŋ bwuru ŋuŋ jɔnpɔni ki fa niŋ yɛrinŋ kiri shi, ntiŋ i baraka bi Kirinŋ tɛ. Niŋ kɔɔtɛ, ntiŋ i yìrì rucɛn cɛn, ntiŋ i yìrì wɔri awɔ kalindaŋ kiri tɛ, tu kí yìrì lu konaŋ ki tɛ.
37Koŋ bataa i nuŋ nu, kí i pyii, kí i shɛɛrinŋ jɔnpɔni faa ǹʼpyɛ tumaan ki ra. 38Koŋ wɔ̀ri niŋ nufinŋ ki nu wuru-i, nini nu shuru kiri so wuru koŋ waa pyiiraŋ (4.000) sun, mari kiri fa tiraŋ kiri nini nu kì. 39Niŋ bataa kɔɔtɛ, Yesu i saa ki wɔri konaŋ ki tɛ, ntiŋ i de buŋ bɛɛ ru, ntiŋ i tiri Magadan sɔɔta ki ru.
Currently Selected:
Matiyu 15: JOB
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
