Luki 23

Kí ta-i Yesu wu Pilati tɛ

(Matiyu 27.2, 11–14; Maraka 15.1–5; Yuhana 18.28–38)

1Kitikwurutɔnŋ kwuru ki bataa i tiri Yesu wu faantiŋ Pilati tɛ. 2Kí ta-i so niŋ mani nu, kí i ntiŋ fɛkwuru niŋ tɛ tu : « Yibɛɛ koŋ ka kila-i, ntiŋ i yibɔɔ konaŋ ki ruye-ri tu kí fa ɲinisa ki wɔri Ɔrɔmu masa ki tɛ kì. Niŋ fa tu afinŋ yɛri ki Kirinŋ Ɲaannakonshimaan ki i, niŋ kɔri ki tu afinŋ masa a. »

3Pilati i Yesu ranɔri : « Minki i Yawutu kiri wɔ masa ki i wa? »

Yesu tu ntiŋ tɛ : « Minki i ǹʼbi-a kaa dɛ! »

4Pilati i ǹʼbi Kirinŋ tɛ sarakawɔrɔtɔnŋ kiri ŋununtiŋ kiri fa konaŋ ki tɛ : « Míŋ bi tɔri tenŋ kila koŋ ka ra, nwɔ̀ ǹʼpɔlimaan i kì. » 5Nka kí i ǹʼbi furu Pilati tɛ sɛbɛ : « Ka koŋ ka i konaŋ kiri ruye-a, awɔ kalinŋ ki wu Yude sɔɔta ki bataa ru, ŋì i shi Galile fɔ ŋì i na so kwumaŋ. »

Kí ta-i Yesu wu kɛnintiŋ Ɛrɔdi tɛ

6Pilati niŋ ǹʼnama-i waarinŋ wɔ̀ ru, ntiŋ i nanɔri tan : « Koŋ ka i Galiletɔnŋ i wa? » 7Pilati ǹʼtɔ-i waarinŋ wɔ̀ ru tu Yesu po-a Galile sɔɔta ki ru, kɛnintiŋ Ɛrɔdi#23.7 Ɛrɔdi : Ka Ɛrɔdi ka wuru dɔri-ra tu Ɛrɔdi Antipasi, ntiŋ i ji wuru Ɛrɔdi jɔnɔ ki daŋ i. wuru wɔ̀ ŋununu, ntiŋ tu konaŋ kiri tiri Yesu wu Ɛrɔdi tɛ. Sabu, niŋ shikaŋ, Ɛrɔdi wuru Yerusalɛmu kili ki ru nmaŋ sɛbɛ.

8Ɛrɔdi Yesu wulu ki rama wuru jibi ra ŋmani na, niŋ fa Yesu ja tɔ wuru ntiŋ nu. Niŋ ki ra, ntiŋ Yesu ja-i waarinŋ wɔ̀ ru, niŋ i di ntiŋ tɛ kusɛbɛ. Sabu ntiŋ wuru ǹʼtɛ a i Yesu ja awɔ kabakobi ki bɛɛ ma-a. 9Ntiŋ i Yesu ranɔri bi mwɔɔnna bi sun, nka Yesu ntiŋ wɔ ranɔri ki tɔri tenŋ nupwulu kì.

10Kirinŋ tɛ sarakawɔrɔtɔnŋ kiri ŋununtiŋ kiri fa sariya kalimɔɔ wɔ̀ri wuru nmaŋ, nini kɔniŋ wuru puru sinaŋ sinaŋ kiri bi-a, nwɔma arì i Yesu ŋununu bi ki furu. 11Ɛrɔdi fa awɔ surudashi kiri i Yesu rufyɛ, kí i yɛ kulinŋ tan bo ntiŋ sun, kí i masajɛrɛbi sinaŋ tɔtiŋ shɔɔrinŋ bɛɛ bo ntiŋ yɛɛra. Niŋ kɔɔtɛ, Ɛrɔdi i kí pwulu bo ta Yesu wu Pilati tɛ sɛbɛ. 12Ɲabi wuru Ɛrɔdi fa Pilati faninmwuŋ fɔlɔ, nka niŋ shikaŋ, kí i ji wɔshurutiŋ ni i.

Kí kiti ki fɛɛn-ɛ Yesu sun tu ntiŋ a kilɛn

(Matiyu 27.15–26; Maraka 15.6–15; Yuhana 18.39; 19.16)

13Pilati i Kirinŋ tɛ sarakawɔrɔtɔnŋ kiri fa Yawutu kiri ŋununtiŋ kiri fa konaŋ ki dɔri bo arìmaŋ sun, 14ntiŋ i na ǹʼbi kí tɛ : « Ábɛɛ na-i koŋ ka wu míŋ tɛ tu ntiŋ áwɔ konaŋ ki ŋununli-a. Míŋ ntiŋ nanɔri-i ábɛɛ bataa ɲaanna kaa, ábɛɛ wulu finŋ woo finŋ bi-i ntiŋ sun, míŋ kɔniŋ ntiŋ pɔlimaŋ ja niŋ tɔri tenŋ na kì. 15Kɛnintiŋ Ɛrɔdi yɛrima ki pɔlimaŋ ja ntiŋ na kì, sabu niŋ ntiŋ pwulu na-i yibɛɛ tɛ. Niŋ na, koŋ ka bijɛ tɔri tenŋ ma, nwɔ̀ a so ji-i ntiŋ kilɛn ŋuŋ i kì. 16Niŋ ki ciiru, míŋ a kí bo, kí i ntiŋ bwɔ shɛnŋ na. Niŋ kɔɔtɛ, ŋí i ntiŋ pani, ntiŋ i tiri. »

17[Jiri woo jiri, a Paki ɲaannabyɛ ki so-ri, Pilati wuru nkasudaŋ tenŋ pani-na.]

18Kí bataa i arì wulu fɛshi tu : « Á weŋ ka kilɛn, á i Barabasi pani! »

19Barabasi bo wuru nkasu ki ru, ǹʼsababu ki i ji tu wú konaŋ ni nuye-ri Yerusalɛmu kili ki ru, niŋ fa wú i ji koŋ kilɛn-ni. 20Yesu bo tɔ wuru Pilati ru, niŋ ki ra, ntiŋ i wulubi konaŋ ki tɛ sɛbɛ. 21Nka kí i fali kí i ǹʼbi : « Á wú kpinkpi suu sun! Á wú kpinkpi suu sun! »

22Pilati wulubi kaan byantɔnŋ ki tu kí tɛ : « Wú bijɛ danwɔ ma sa? Wú bi wɔ̀ ma-i, niŋ i ji-a wú kilɛn ŋuŋ po, míŋ niŋ ja kì. Niŋ ki ra, míŋ a ǹʼbi tu kí wú bwɔ shɛnŋ na, ŋí i wú pani. » 23Nka konaŋ kiri tu-i fali-la, kí i arì pwulu-li ǹʼsun, kí i ǹʼbi furu tu Pilati Yesu kpinkpi suu sun. Kí falika jɛ ki, fɔ kí i ba kí i kɛmi de Pilati ru.

24Niŋ na, niŋ tu kíbɛɛ dintɛ bi ki i nwɔ̀, a ra niŋ ma kí tɛ. 25Barabasi wɔ̀ bo wuru nkasu ki ru kpeeri ŋununlirama fa koŋ kilɛnmaan bira, ntiŋ i niŋ pani, ntiŋ i Yesu wɔri kí tɛ, nwɔma kí i arì dintɛ bi ki ma ntiŋ wu.

Kí Yesu kpinkpi-i suu sun

(Matiyu 27.32; Maraka 15.21)

26Kí tirira ki Yesu wu kpinkpimaŋ ki ru, kí i shuru bɛɛ yirira ja awɔ juunŋ. Niŋ shuru ki tɔ wuru tu Simɔŋ. Sirɛnitɔnŋ wuru-i. Kí i niŋ karaba, tu niŋ Yesu kpinkpisuu ki shi ntiŋ cɛfan.

27Konaŋ mwɔɔnna ǹʼpa wuru Yesu cɛfan. Niŋ konaŋ ki ru, mari mwɔɔnna wuru nmaŋ, nwɔ̀ri wuru arì kuŋ nubwɔ-a#23.27 kuŋ nubwɔ-a : Niŋ wuru taanmashɛ ɛ, nwɔ̀ wuru ǹʼji-a tu konwɔtiŋ ki i a kuŋ ki rubwɔ-a, tu ntiŋ ɲii awɔ bi mamaan ki ru, ntiŋ i a makwuluye-ri Kirinŋ tɛ. Niŋ fa tu ntiŋ ntɔri bi awɔ bi mamaan ki ra., kí i arì makwulu yaalinpo-ri Yesu bira. 28Yesu i a ɲaannupwulu, ntiŋ i ǹʼbi kí tɛ : « Yerusalɛmu mari ri, á fa ŋuntan míŋ bira kì, nka á ŋuntan á fa á daŋ kiri bira, 29sabu jibi bɛɛ ri yirira i nmaŋ, kí a na ǹʼbi tu : ‹ Mari daŋ jibali kiri fa mari wɔ̀ri daŋ kila-i sun kì, niŋ fa nwɔ̀ri ɲɛŋ wɔri daŋ tɛ kì, nini i koŋ fɛrɛmaan ni i. › 30Niŋ waaci ki ru, konaŋ kiri ra na ǹʼbi-ri tɔnŋ kiri tɛ : ‹ Á fɛɛn yi sun! › Kí i ǹʼbi-ri tintiŋ kiri tɛ tu : ‹ Á yi radu! › 31Míŋ i niŋ bi-a ábɛɛ tɛ, sabu a kí jirinŋ ŋuniŋ ki ma ka ɲaan ka tɛ, jirinŋ furu ki wɔ ki a na ji dɔɔkunŋ? »

32Kí wuru ta-a bi kulinŋ matɔnŋ fuuli wu kpinkpimaŋ ki ru sɛbɛ. Kí wuru ta-a nini fa Yesu kilɛn arìmaŋ fan.

Yesu kpinkpimaan ki suu ki sun

(Matiyu 27.33–44; Maraka 15.22–32)

33Kí i ta so Yesu wu mani nu, nwɔ̀ tɔ i tu Ŋununwɔmaŋ.#23.33 Ŋununwɔmaŋ ki i Iburuwulu ki ru tu « Gologota. » Kí i Yesu kpinkpi suu sun niŋ mani nu. Kí i bi kulinŋ matɔnŋ fuuli kari kpinkpi suu tɔri ri sun ntiŋ kɛlina sɛbɛ. Tenŋ wuru ntiŋ pantɛ, tenŋ i ji ntiŋ nɔrintɛ. 34Yesu wuru ǹʼbi-a tu : « Míŋ Tiŋ, á kɔ́ɔ́ bijɛ kiri tu kí tɛ, sabu kí i nwɔ̀ ma-a, kí niŋ tɔ-a kì. »

Ntiŋ wɔ juulinŋ kiri lurama ki, kí i ǹʼbaalinŋ bili arìmaŋ tɛ. 35Konaŋ kiri ta wuru tu, kí i maannashɛɛli-li. Yawutu kiri ŋununtiŋ kiri kɔniŋ wuru yɛ ki tan bo-a Yesu sun, kí i ǹʼbi-ri tu : « Wú ǹʼbɛɛ ri mwu-i, wú a yɛri ki mwu kɛ! A wúfinŋ ji Mwutɔnŋ ki i, Kirinŋ Ɲaannakonshimaan ki i, wú a yɛri mwu ni! » 36Surudashi kiri yɛri ki wuru yɛ kulinŋ tan bo-a ntiŋ sun. Kí i arì kpari ntiŋ tɛ, kí i dunfɛnŋ lɔmaan ji-ri ntiŋ wu. 37Kí i ǹʼbi-ri tu : « A miŋ ji Yawutu kiri wɔ masa ki i, miŋ nʼyɛri mwu sunu! » 38Sɛbɛ tanmaan kpinkpi wuru Yesu kpinkpisuu ki ŋununu, nwɔ̀ wuru ǹʼbi-a tu : « Ka i Yawutu kiri wɔ masa ki i. »

39Bikulinŋ matɔnŋ fuuli wɔ̀ri kpinkpi wuru Yesu tɔntɛ, nini nu tenŋ wuru ntiŋ ki-a tu : « Miŋ Mwutɔnŋ ki i kili kì wa? Nʼyɛri mwu, ŋi i yibɛɛ mwu sɛbɛ kɛ! »

40Nka bi kulinŋ matɔnŋ ki tenŋ ki i tu nmaŋ : « Miŋ ji kɛni-na Kirinŋ jɛŋ wa? Ǹʼshɛɛli, miŋ mìŋ cɔɔri tenŋ ki ru kì wa? 41Nwɔ̀ i yibɛɛ, ka cɔɔri ka kɛɲɛ-i yibɛɛ sun, sabu yibɛɛ bijɛ ma-i. Nka katiŋ kɔniŋ bi kulinŋ tɔri tenŋ ma kì. » 42Niŋ kɔɔtɛ, ntiŋ i ǹʼbi : « Yesu, a ábɛɛ na sɔɔ áwɔ masabi ki sun waarinŋ wɔ̀ ru, á i á ɲakili tu míŋ na. »

43Yesu tu ntiŋ tɛ : « Sɛli ki ra, míŋ i ǹʼbi-a miŋ tɛ, ńʼtu miŋ a de míŋ fan alijina#23.43 alijina : Niŋ i mani i, Kirinŋ dintɛtɔnŋ kiri i ta-a mani wɔ̀ ru, kí i ta sɔɔ ǹʼɲaanfɛ. ki ru mìŋ jiŋ. »

Yesu beŋ ki

(Matiyu 27.45–56; Maraka 15.33–41; Yuhana 19.28–30)

44-45Sunŋ ki wuru juu ta-a ŋununu kɔ, niŋ waaci ki ru, sunŋ sarinŋ ja kili kì, mancinŋ i bo kɛniŋ ki bataa ru, fɔ ŋì i ta so bilana lɛɛri byantɔnŋ ki sun. Kirinfusinaŋ ki faninmwuŋ juulinŋ ki i gbɛri san amaŋ na ǹʼfaninmwuŋ fuuli.#23.44–45 juulinŋ ki i gbɛri san amaŋ na ǹʼfaninmwuŋ fuuli : Niŋ kɔri ki i tu bilinatɔnŋ kiri bataa ra so de-i kí i saraka wɔri Kirinŋ tɛ. Tu Yesu beŋ ki saa wɔri a ra bilinatɔnŋ kiri bataa tɛ tu kí i so Kirinŋ sun. 46Yesu i fali faanna, ntiŋ i ǹʼbi : « Míŋ Tiŋ, míŋ a ɲini ki pwulu ábɛɛ sun! »#Shu kiri 31.6.

Ntiŋ niŋ bi-i, ntiŋ i ɲinisan.

47Surudashi kiri ŋununtiŋ ki niŋ bi kiri bataa ja-i waarinŋ wɔ̀ ru, niŋ i baraka bi Kirinŋ tɛ, niŋ i ǹʼbi tu : « Sɔsɔɔlinŋ ǹʼnu kì, koŋ ka wuru koŋ telimaan a. »

48Maannashɛɛlitɔnŋ wɔ̀ri rakɔli wuru nmaŋ, nini i bi kiri maka ɲaan ki ja, kí i pwulula ki arɔɔ mani ni nu, kí i ta arì kuŋ nubwɔ fan tɔnɲaa ki ra. 49Yesu bidi wuru nwɔ̀ri tɛ, niŋ fa mari wɔ̀ri po wuru ntiŋ fan Galile sɔɔta ki ru, nini tu wuru mani narimwuŋ, kí i maannashɛɛli-li.

Yesu kwuu ye bi ki

(Matiyu 27.57–61; Maraka 15.42–47; Yuhana 19.38–42)

50-51Koŋ bɛɛ wuru nmaŋ, nwɔ̀ tɔ wuru tu Yusufu. Ntiŋ wuru po-a Yawutu kiri wɔ kili bɛɛ ra, nwɔ̀ tɔ i tu Arimate. Yawutu kiri wɔ kitikwurutoŋ ki ru koŋ sɔbɛ ki bɛɛ wuru-i. Ntiŋ wuru koŋ shɔɔrinŋ i, nwɔ̀ wuru a tu-a daalinŋ na kì. Ntiŋ wuru Kirinŋ wɔ Masabi ki na ki saarashɛɛli-la. Ntiŋ kaashi kitikwurutɔnŋ kiri wuru wulu wɔ̀ri bi-a, niŋ fa kí mabi kiri fu-ri ntiŋ sun kì. 52Niŋ koŋ ki i ta Yesu kwuu ki rafɛ Pilati gbɛ, nwɔma a i ta ǹʼye. 53Pilati i a tu. Yusufu i ta Yesu kwuu ki jɛri san kpinkpisuu ki sun, ntiŋ i ǹʼsunye, ntiŋ ta ǹʼye saali lu, nwɔ̀ wuru faayɛli i. Koŋ ye-ri niŋ saali ki ru sun kì. 54Niŋ sisarifuluntɔnŋ ki wuru-ra ji Nufaan jibi ki i. Ǹʼɲaannabyɛ ki tɔnpa wuru kɔ.

55Mari wɔ̀ri po wuru Yesu fan fɔ Galile sɔɔta ki ru, nini i ǹʼpa Yusufu cɛfan, fɔ saali ki tɔnŋ ki ra. Kí i ta Yesu kwuu ki yeka ɲaan ki shɛɛli. 56Niŋ kɔɔtɛ, kí i arì pwulu ta kulu, kí i ta ŋuŋ ni fa kinidifinŋ ni namɔni konkwuu ki tɛ.

Kí i Nufaan jibi ki rasɔɔ, miŋ tu ǹʼbi-i ɲaan wɔ̀ tɛ Kirinŋ wɔ sariya sɛbɛ ki ru.

Currently Selected:

Luki 23: JOB

Highlight

Copy