Luki 22
22
Ŋununtiŋ kiri lu de-i Yesu sun
(Matiyu 26.1–5; Maraka 14.1–2; Yuhana 11.45–53)
1Yawutu kiri wuru bwuru tuutuubali ki nu-a ɲaannabyɛ wɔ̀ tɛ, kí i nwɔ̀ dɔri-ra tu Paki#22.1 Paki : Paki kɔri ki i tu Jonbikɔ. Niŋ ki ra, Paki ki tɔ bɛɛ i ji tu Jonbikɔ Ɲaannabyɛ., niŋ wuru saa ra. 2Kirinŋ tɛ sarakawɔrɔtɔnŋ kiri ŋununtiŋ kiri fa sariya kalimɔɔ kiri wuru ǹʼceeli-la, arì i Yesu kilɛn du ru, nka kí wuru kɛni-na konaŋ ki jɛŋ.
Yudasi a na Yesu de kiti kwurutɔnŋ kiri gbɛfɛ
(Matiyu 26.14–16; Maraka 14.10–11)
3Niŋ waaci ki ru, shitaanni i ɲakilila jɛ de Yudasi ru, kí wuru nwɔ̀ dɔri-ra tu Isikariyɔti. Niŋ wuru Yesu wɔ kalindaŋ bwununfuuli ki bɛɛ ɛ. 4Wú po-i, wú i ta wulubi Kirinŋ tɛ sarakawɔrɔtɔnŋ kiri ŋununtiŋ kiri fa Kirinfusinaŋ ki ɲaannasuutɔnŋ kiri tɛ. Wú wuru-ra so Yesu de-i kí gbɛfɛ ɲaan wɔ̀ tɛ, wú fa kí i fu niŋ na. 5Niŋ bimaan i di nini tɛ kusɛbɛ, kí i fu ǹʼna, tu arì ra jalinŋ wɔri wú tɛ. 6Yudasi i a tu. Niŋ na, wú i tu ɲaan shɔɔrinŋ ceeli-la, wú a so Yesu de-i kí gbɛfɛ ɲaan wɔ̀ tɛ konaŋ ki cɔru.
Yesu awɔ kalindaŋ koŋ fuuli cin-i Paki tɛ nufinŋ ki ramɔni
(Matiyu 26.17–25; Maraka 14.12–21; Yuhana 13.21–30)
7 Bwuru tuutuubali ɲaannabyɛ ki i na so, kí kakan wuru kí i saawɔrinŋ bulaaŋ ji saraka Paki nufinŋ ki wɛli ki i. 8Niŋ ɲaan ki tɛ, Yesu i Pyɛɛri fa Yuhana cin ta a jɛŋ, tu kí ta ɲaannabyɛ ki nufinŋ ki ramɔni-ni.
9Kí i ntiŋ nanɔri : « Ábɛɛ i ǹʼtɛ yi i ta nufinŋ kiri ramɔni mani danwɔ ru? »
10Ntiŋ tu kí tɛ : « Ábɛɛ ta so kili ki demantɔnŋ ki ra, ábɛɛ fa shuru bɛɛ ra ta fu. Ju duŋ i ji ntiŋ ŋununu. Á ta ǹʼpa niŋ shuru ki cɛfan. A ntiŋ ta de kaniŋ wɔ̀ sun, á i ta de niŋ mani nu. 11Á i ta ǹʼbi niŋ kanintiŋ ki tɛ, tu kalimɔɔ ki ǹʼbi, tu afinŋ fa awɔ kalindaŋ kiri ra na Jonbikɔ ɲaannabyɛ ki nufinŋ ki nu fudaŋ wɔ̀ ru, tu niŋ da? 12Niŋ kanintiŋ ki a ta fu ciiru sinaŋ namɔnimaan bɛɛ ji ábɛɛ wu sankasoŋ sun. Á á i nufinŋ ki ramɔni niŋ nu. »
13Pyɛɛri fa Yuhana i tiri, kí i ta bi kiri ja miŋ tu Yesu yìrì ɲaanbi wuru ɲaan wɔ̀ tɛ. Kí i Jonbikɔ ɲaannabyɛ ki nufinŋ kiri ramɔni nmaŋ.
Ŋuntiŋ ki wɔ fani ki bi ki
(Matiyu 26.26–30; Maraka 14.22–26; Korɛntitɔnŋ kiri (1) 11.23–25)
14Nufinŋ ki nu waari ki na-i so, Yesu fa awɔ cindaŋ koŋ bwununfuuli ki i ta sɔɔ nufinŋ nunama ki tɛ. 15Ntiŋ tu kí tɛ : « Míŋ tɔnɲaarabi wuru-i, ńʼfa ábɛɛ i so Jonbikɔ ɲaannabyɛ nufinŋ ka nu-i yimaŋ fan, sana ŋí i cɔɔri. 16Sabu, míŋ a ǹʼbi ábɛɛ tɛ, ńʼtu míŋ a ka ɲaannabyɛ nufinŋ ka tɔri nu ábɛɛ fan kili kì, fɔ ǹʼkɔri ki rafaa-a Kirinŋ wɔ Masabi ki ru. »
17Ntiŋ niŋ ǹʼbi-i, ntiŋ i dunfɛnŋ jaakilaŋ ki shi, ntiŋ i baraka bi Kirinŋ tɛ, ntiŋ i ǹʼbi : « Á ǹʼmwu, á bataa i ǹʼbɛɛ mwunu, 18sabu míŋ a ǹʼbi ábɛɛ tɛ, ńʼtu míŋ a dunfɛnŋ mwunu ábɛɛ fan kili kì, fɔ jibi wɔ̀ Kirinŋ wɔ Masabi ki na-i. »
19Niŋ kɔɔtɛ, ntiŋ i bwuru ki shi, ntiŋ i baraka bi Kirinŋ tɛ. Ntiŋ i ǹʼnucɛn cɛn wɔri kí tɛ, ntiŋ i ǹʼbi : « Ka i míŋ firi ki i, [ninwɔ̀ a na wɔri saraka ábɛɛ bira.] Á tu á i nufinŋ ka bishi ki nu-ni ámaŋ fan, nwɔma á i á ɲakili tu míŋ na. »
20Kí nufinŋ ki nu kɔ-i, Yesu i dunfɛnŋ kulu ki shi sɛbɛ, ntiŋ i baraka bi Kirinŋ tɛ. Ntiŋ i ǹʼwɔri kí tɛ tu : « Ka i míŋ cunŋ ki i, Kirinŋ a na nwɔ̀ ji awɔ tɔnwɔri ŋunaŋ ki cɛ sɔɔfinŋ ki i, a fa ábɛɛ faninmwuŋ. Míŋ cunŋ ki yɛ, [nwɔ̀ kɔnkɔli-i ábɛɛ bira.] »
Yesu a janfatɔnŋ ki ji-i
(Matiyu 26.20–25; Maraka 14.17–21)
21Yesu tu awɔ kalindaŋ kiri tɛ sɛbɛ : « Niŋ fa a fɔn na, konwɔtiŋ a na míŋ janfa, ntiŋ i míŋ de ńʼɲa kiri gbɛfɛ, niŋ gbɛ ki i míŋ fan kukulu tenŋ nu. 22Sɛli yɛ, Koŋ Danshuru ki a beeni, ŋì i kɛɲɛ Kirinŋ wɔ bi gbɛbilimaan kiri wu. Nka bɔni i koŋ tɛ, konwɔtiŋ a ntiŋ wɔri a ɲa kiri tɛ! » 23Yesu wɔ kalindaŋ kiri i arìmaŋ nanɔri-ri, tu niŋ a ji nkɛnŋ arìbɛɛ ru sa?
Jɛntɔnŋ ki kakan ntiŋ i ji nkɛnŋ sali?
(Matiyu 20.25–28; Maraka 10.42–45)
24Sɔsɔɔlinŋ i jɔrɔkɔ kalindaŋ kiri faninmwuŋ, tu nkɛnŋ tenŋ a ji arìbɛɛ bataa ru koŋ sinaŋ ki i? 25Yesu tu kí tɛ : « Masa kiri i arɔɔ kɛnindaŋ kiri mari-ra faan wu. Niŋ ɲaan ki tɛ, faan ki i nwɔ̀ri gbɛ, nini i arì yɛri dɔri-ra shɔɔrinŋ matiiri. 26Nka ábɔɔ ki kakan ŋì i ji ninkunŋ kì dɛ! Ábɛɛ ru, koŋ sinaŋ ki kakan-i niŋ i a yɛri ji miŋ tu ábɛɛ bataa ru daanwulu ki. Ábɛɛ ru ŋununtiŋ ki i a yɛri ji á bataa wɔ baaradaŋ i. 27Nkɛnŋ koŋ sinaŋ ki i, konwɔtiŋ i nufinŋ ki ramɔni-na daa, walima nufinŋ ki i ta-a sɔɔ nwɔ̀tiŋ tɛ? Nufinŋ ki i ta-a sɔɔ nwɔ̀tiŋ tɛ, nintiŋ i kì wa? Mìŋ ɲaan ki tɛ, míŋ i ábɛɛ faninmwuŋ miŋ tu baaradaŋ.
28Ábɛɛ kɔniŋ á banba-i, á i tu míŋ fan ńʼwɔ cɔɔri kiri waaci ki ru. 29Niŋ ki ra, míŋ Tiŋ ki masabi ki wɔri-i míŋ tɛ ɲaan wɔ̀ tɛ, míŋ i ǹʼwɔri-ra ábɛɛ tɛ mìŋ ɲaan ki tɛ, 30nwɔma, ábɛɛ so nuŋ nu-i, á i á mwunu míŋ fan ńʼwɔ masabi ki ru, á i sɔɔ masawaalinŋ ni sun, á i Isirayɛli shiya bwununfuuli ki wɔ kiti ki kwuru. »
Yesu tu Simɔŋ Pyɛɛri a ǹʼbi tu a afinŋ tɔ-a kì
(Matiyu 26.31–35; Maraka 14.27–31; Yuhana 13.36–38)
31Yesu i ǹʼbi Simɔŋ tɛ : « Simɔŋ, Simɔŋ, ǹʼshɛɛli, shitaanni ǹʼceeli-i Kirinŋ gbɛ, a i ábɛɛ yuuyuu, miŋ tu koŋ i bilaŋ yuuyuu po san-a a ɲɛɛnŋ nu ɲaan wɔ̀ tɛ.#22.31 Luki 3.17 ki fa a ɲaanbimaan ki shɛɛli sɛbɛ. 32Nka míŋ Kirinŋ nafɛ-i miŋ Simɔŋ tɛ, nwɔma nʼwɔ bilinabi ki fa na li kì. A miŋ na ntɔri bi waarinŋ wɔ̀ ru, ŋi i nʼpwulu míŋ tɛ, ŋi i nʼtindaŋ kiri cunadi. »
33Pyɛɛri tu Yesu tɛ : « Ŋuntiŋ, hali kí ji-a míŋ bo ábɛɛ fan nkasu ki ru, walima kí i yi kilɛn yimaŋ fan, míŋ a ńʼtu niŋ bataa ra. »
34Nka Yesu tu Pyɛɛri tɛ : « Pyɛɛri, míŋ a ǹʼbi miŋ tɛ, ńʼtu ɲandaŋ kiri ra so bulu sun jiŋ, ńʼtu miŋ a ǹʼbi kaan byaŋ, tu miŋ míŋ tɔ-a kì. »
Yesu tu kalindaŋ kiri arì ramɔni
35Niŋ kɔɔtɛ, Yesu tu awɔ kalindaŋ kiri tɛ : « Míŋ ábɛɛ cin-i waarinŋ wɔ̀ ru, ŋí i ǹʼbi tu ábɛɛ fa jalinŋ bofinŋ, walima wɔru tafinŋ ni, niŋ fa kari ri shi kì, finŋ bɛɛ ta wuru waa ábɛɛ ra wa? »
Kí tu : « Aayi, finŋ tɔri waa-ri yibɛɛ ra kì. »
36Ntiŋ tu kí tɛ : « Nka dɔnsaŋ, a jalinŋ bofinŋ ji nwɔ̀tiŋ gbɛ, ntiŋ ǹʼshi. Mìŋ ɲaan tenŋ ki tɛ, wɔru tafinŋ ji nwɔ̀ gbɛ, niŋ i niŋ shi, niŋ fa, a baamwuru ji nwɔ̀ gbɛ kì, ntiŋ ta awɔ shiisuujɛrɛbi ki ju, ntiŋ i ǹʼbɛɛ sa. 37Sabu, míŋ i ǹʼbi-a ábɛɛ tɛ ńʼtu Sɛbɛ ki nwɔ̀ bi-i míŋ bi ki sun tu : ‹ Kí ǹʼbo-i koŋ kilɛntɔnŋ ni fan ›, fɔ niŋ ma miŋ tu ǹʼbi-i ɲaan wɔ̀ tɛ. Niŋ ma waaci ki myɛ-ɛ. »
38Kalindaŋ kiri tu ntiŋ tɛ : « Ŋuntiŋ, baamwuru fuuli i kaa. »
Ntiŋ i kí rupwulu : « Nini a ǹʼpo. »
Yesu ta-i Kirinŋ nafɛ Olinfyetɔnŋ ki sun
(Matiyu 26.36–46; Maraka 14.32–42)
39Yesu po-i, ntiŋ i tiri Olinfyetɔnŋ ki sun, miŋ tu ntiŋ wuru dali-la ntiŋ i ǹʼma-ni ɲaan wɔ̀ tɛ. Ntiŋ wɔ kalindaŋ kiri i ǹʼpa ntiŋ cɛfan. 40Ntiŋ ta-i so niŋ mani nu, ntiŋ i ǹʼbi kí tɛ : « Á tu Kirinŋ nafɛ ki ra, nwɔma shitaanni wɔ faan ki fa so á fɛ kì. »
41Niŋ kɔɔtɛ, ntiŋ i a san kí ra pyaanniŋ, ntiŋ i a kwushiri, ntiŋ i Kirinŋ nafɛ-ri. 42Ntiŋ tu : « Míŋ Tiŋ, ǹʼji di ábɛɛ tɛ, á ka cɔɔri ka maŋ nari míŋ na. Nka míŋ dintɛ bi fa ma kì, duu ábɛɛ dintɛ wɔ ki. »
43[Niŋ mani ki ru, mɛlɛkɛn bɛɛ i po kirinpɔli ki ra, ŋì i na ntiŋ tɔnnafuru. 44Sabu, niŋ waaci ki furu wuru ntiŋ sun haali. Ntiŋ i ǹʼbɛɛ bo Kirinŋ nafɛ ki sun. Ntiŋ i mankwulucɔ. Ntiŋ mankwulucɔmaan ki ju ki wuru miŋ tu cunŋ, ŋì i tɔli-li fwuniŋ ki sun.]
45Yesu kɔ-i Kirinŋ nafɛ ki ra waarinŋ wɔ̀ ru, ntiŋ i a pwulu kalindaŋ kiri maŋ ki ru. Ntiŋ i ta fa kí bataa ɲinintan-i, tɔnfɔɔ ki yɛlinŋ ki gbɛɛra. 46Ntiŋ tu kí tɛ : « Hɛɛn! Ábɛɛ i ɲinintan-a wa? Á jɔrɔkɔ, á i Kirinŋ nafɛ, nwɔma shitaanni wɔ faan ki fa so á fɛ kì. »
Yesu pa bi ki
(Matiyu 26.47–56; Maraka 14.43–50; Yuhana 18.3–11)
47Yesu tu-i niŋ wulu ki bi-a awɔ kalindaŋ kiri tɛ, konaŋ kwuru bɛɛ i po. Kí wuru kalindaŋ wɔ̀ dɔri-ra tu Yudasi, Yesu wɔ kalindaŋ bwununfuuli ki ru, niŋ i ǹʼpa kí jɛŋ. Kí na-i so Yesu ri maŋ ki ru, Yudasi i a kpari ntiŋ tɛ, tu a ra ntiŋ co arɔɔ bidintɛbi coolinŋ tanka ɲaan ki ra. 48Niŋ mani nu, Yesu tu wú tɛ : « Yudasi, miŋ i Koŋ Danshuru ki de-a a ɲa kiri gbɛfɛ bidintɛbi coolinŋ wu wa? »
49Koŋ wɔ̀ri wuru Yesu fan, nini na-i konaŋ ki na ŋuŋ ki tɔ, kí i ntiŋ nanɔri : « Ŋuntiŋ, yi baamwuru kiri shi kí cɛfan wa? » 50Kí ru koŋ tenŋ i jɔrɔkɔ awɔ baamwuru ki wu, niŋ i ta Kirinŋ tɛ sarakawɔrɔtɔnŋ kiri ŋununtiŋ ki wɔ joŋ ki pantɛ tɔɔn ki tɛri san nmaŋ. 51Nka Yesu tu awɔ kalindaŋ kiri tɛ : « Á ǹʼtu ka sun. » Ntiŋ i a gbɛ pa weŋ ki tɔɔn tɛri sanmaan ki ra, ntiŋ i niŋ kene.
52Niŋ kɔɔtɛ, Kirinŋ tɛ sarakawɔrɔtɔnŋ ŋununtiŋ wɔ̀ri fa Kirinfusinaŋ ki ɲaannasuutɔnŋ ŋununtiŋ wɔ̀ri fa cɛɛnni wɔ̀ri na wuru ntiŋ pamaŋ ki ru, ntiŋ i ǹʼbi nini tɛ : « Ǹʼso-i ábɛɛ i na míŋ cɛfan baamwuru ri fa bali li wu, miŋ tu míŋ a ji koŋ kaanmaan wa? 53Míŋ wuru ábɛɛ fan jibi woo jibi Kirinfusinaŋ ki ra nmaŋ, ábɛɛ jɛɛn á i míŋ pa kì. Nka á bili ǹʼna tu ábɔɔ waaci ki fa shitaanni wɔ sotinbi ki waari ki kaa. »
Pyɛɛri tu afinŋ Yesu tɔ-a kì
(Matiyu 26.57–58, 69–75; Maraka 14.53–54, 66–72; Yuhana 18.12–18, 25–27)
54Kí i Yesu pa tiri Kirinŋ tɛ sarakawɔrɔtɔnŋ kiri ŋununtiŋ sinaŋ ki wɔ mani nu. Pyɛɛri i tu gbiila, ntiŋ i a da tiri-ri kí cɛfan. 55Kí i ta tuu rakili kaniŋ ki faninmwuŋ, kí i sɔɔ niŋ na. Pyɛɛri yɛri ki i ta sɔɔ konaŋ ki kanfɛ.
56Pyɛɛri sɔɔmaan ki tu-i tuu ki maŋ ki ru, jonmari bɛɛ i ntiŋ ja. Niŋ jonmari ki i a ɲaniŋ da Pyɛɛri ra, nmari i ǹʼbi : « Koŋ ka yɛri ki wuru Yesu fan. »
57Pyɛɛri i nmari sɔsɔ, ntiŋ i ǹʼbi : « Mari ki, míŋ nintiŋ tɔ-a kì. »
58Ǹʼcin kì, koŋ tɔri i na Pyɛɛri sɔɔ ja sɛbɛ, nintiŋ tu ntiŋ tɛ : « Miŋ yɛrima ki i kí bɛɛ ɛ. »
Pyɛɛri i nintiŋ nupwulu : « Koŋ ki, míŋ kí tɔri kì dɛ! »
59Lɛɛri tenŋ bishi fwuudemaan kɔɔtɛ, shuru tɔri i na tu a wulu sun sɛbɛ tu : « Sii ǹʼna ǹʼnu kì, weŋ ka wuru Yesu fan, sabu Galiletɔnŋ yɛ. »
60Niŋ fa a fɔn na, Pyɛɛri tu : « Koŋ ki, míŋ ábɔɔ wulu ki tamaŋ tɔ-a kì. »
Pyɛɛri niŋ wulu ki bi kɔ-i, mìŋ manaanŋ tenŋ ki ru, ɲandaŋ kiri i bulu. 61Ŋuntiŋ ki i a ŋuniŋ fɛshi, ntiŋ i a ɲaniŋ da Pyɛɛri ra. Pyɛɛri ɲakili i bo ntiŋ wɔ wulu bimaan ki ra a tɛ tu : « Ɲandaŋ kiri a so bulu sun jiŋ, miŋ a ǹʼbi kaan byaŋ, nʼtu miŋ míŋ tɔ-a kì. » 62Niŋ ma-i, Pyɛɛri i po taanna, ntiŋ i ta ŋuntan kusɛbɛ.
Konaŋ kiri Yesu ki-i, kí i ntiŋ bwɔ
(Matiyu 26.67–68; Maraka 14.65)
63Yesu ɲaannasuutɔnŋ kiri wuru yɛtan bo-a ntiŋ sun, kí i ntiŋ bwɔ-ri. 64Kí i ntiŋ ɲaanna kɔli, kí i ntiŋ bwɔ-ri, kí i ntiŋ nanɔri-ri : « Nkɛnŋ miŋ bwɔ? Ǹʼbi yi tɛ. »
65Niŋ fa kí i kiilinŋ jɛ mwɔɔnna tɔri ri de ntiŋ nu sɛbɛ.
Kí ta-i Yesu wu Yawutu kiri wɔ kitikwurumaŋ ki ru
(Matiyu 26.59–66; Maraka 14.55–64; Yuhana 18.19–24)
66Si ki sari-i waarinŋ wɔ̀ ru, kili ki ra cɛɛnni kiri fa sariya kalimɔɔ kiri niŋ fa Kirinŋ tɛ sarakawɔrɔtɔnŋ kiri ŋununtiŋ kiri i arɔɔ kitikwurutoŋ ki bo arìmaŋ sun. Kí i ta Yesu wu nini ɲaanfɛ. 67Nini tu Yesu tɛ : « A minki ji Kirinŋ Ɲaannakonshimaan ki i, ǹʼbi yi tɛ. »
Yesu tu kí tɛ : « A míŋ ǹʼbi ábɛɛ tɛ, ábɛɛ ra bili míŋ na kì. 68A míŋ ábɛɛ ranɔri sɛbɛ, ábɛɛ ra míŋ nupwulu kì. 69Nka, ŋì i shi jiŋ sun, Koŋ Danshuru ki a ta sɔɔ Sobataatiŋ Kirinŋ pantɛ. »
70Kí bataa i ǹʼbi fu : « Niŋ na, minki i Kirinŋ Danshuru ki i wa? »
Ntiŋ i kí rupwulu : « Ábɛɛ ǹʼbi-i ɲaan wɔ̀ tɛ, mìnki yɛ. »
71Niŋ na, kí tu arìmaŋ tɛ : « Yibɛɛ maku faa shɛɛri danwɔ wɔ wulu la kili, yibɛɛ wulu ki ramamaan juu a tiŋ ki yɛri ki tɔnŋ na kɔ? »
Currently Selected:
Luki 22: JOB
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
