Luki 21

Kanimari bɛɛ wɔ Kirinŋ kafinŋ ki

(Maraka 12.41–44)

1Ŋì i kí tu Kirinfusinaŋ ki ra, Yesu i a ŋuniŋ fɛshi, ntiŋ i nafulutiŋ kiri shɛɛli arì gbɛfɛfinŋ kiri bɛɛ ri bo-a Kirinŋ kafinŋ bofinŋ ki ru. 2Ntiŋ i kanimari gbɛwɔ bɛɛ ja wari myɛɛnniŋ fuuli bo-a kafinŋ bofinŋ ki ru sɛbɛ.

3Niŋ na, Yesu i ǹʼbi : « Sɛli ki ra, míŋ i ǹʼbi-a ábɛɛ tɛ ńʼtu, kanimari gbɛwɔ ka jalinŋ wɔ̀ bo, ńʼtu ǹʼmwɔ koŋ pyɛ kiri bataa wɔ wu. 4Sabu koŋ pyɛ kiri jalinŋ bo-i, kɔ́ɔ́ nu a so nwɔ̀ sun kì, nka mìŋ mari wuru-ra finŋ wɔ̀ sɔɔ nmari i a yɛri tɔnnafɛ, nmari ninki bataa wɔri-i. »

Yesu wulubi-i Kirinfusinaŋ ki gwu bi ki sun sɛbɛ

(Matiyu 24.1–2; Maraka 13.1–2)

5Koŋ bɛɛ ri wuru Kirinfusinaŋ ki ɲɛnika ɲaan ki rakali-la. Konaŋ kiri faa shɔɔrinŋ wɔ̀ri fa finŋ shɔɔrinŋ wɔ̀ri wɔri wuru Kirinŋ tɛ, nini bataa wuru konaŋ ɲaninpontɛfinŋ ni i. Yesu i ǹʼbi kí tɛ : 6« Ábɛɛ ɲaniŋ i finŋ wɔ̀ri ra, jibi ri i yiri-ra nmaŋ, hali kwɔ kiri tɔri tenŋ a na tu arìmaŋ sun kì, kí a na yìrì bataa warinka. »

Juniɲa nakɔɔra ki taanmashɛ kiri

(Matiyu 24.3–14; Maraka 13.3–13)

7Kí i Yesu ranɔri : « Kalimɔɔ, bi kari ra na ma waarinŋ danwɔ ru? Taanmashɛ danwɔ ra na ǹʼji tu niŋ bi kiri ma waari ki so? »

8Yesu tu kí tɛ : « Á á ɲakili tu á yɛri ra, nwɔma koŋ fa na á sunnɛɛn, ntiŋ i á bo fɔni saa sun kì. Sabu, koŋ mwɔɔnna a na na, kí i míŋ tɔ ye arì yɛri ra, tu arìbɛɛ míŋ yɛrima ki i, tu juniɲa kɔ waaci ki so. Á fa bili nini na kì, á fa na ǹʼpa kí cɛfan kì. 9Ábɛɛ na kari kiri fa koŋ kaanmaan kiri wulu ki rama waarinŋ wɔ̀ ru, á fa kɛni kì. Sabu, nini kakan-i nini i ma sun, nka niŋ a na ji juniɲa ki kɔ ki i shuu kì. »

10Ntiŋ tu kí tɛ niŋ na : « Shiya ki bɛɛ ra na jɔrɔkɔ ǹʼtɔri cɛfan, kí i arìmaŋ kari-ri, kɛniŋ fa kɛniŋ i bo arìmaŋ na. 11Fwuniŋ sɛrɛsɛri ki i mwɔ pwɔkulinŋ ki sun, niŋ fa bɛɛ fa kira jɛ ri i de mani mwɔɔnna nu. Kɛmifinŋ ni fa taanmashɛ sinaŋ ni i ji kirinpɔli ki ra.

12Nka niŋ jɛŋ, kí a na ábɛɛ pa, kí i á makwulujuu kusɛbɛ. Kí i á de kitikwurutɔnŋ kiri gbɛfɛ Yawutu kiri wɔ kalinfu ki ru, kí i á bo nkasu ru, kí i kila, kí i tiri á wu masa ri fa faantiŋ ni tɛ, míŋ tɔ ki bira. 13Niŋ bataa ra na ji sababu, ábɛɛ i so míŋ wulu bi-i kí tɛ. 14Á á ɲakili tu ǹʼna, tu ábɛɛ kakan á i á ciirufɔni áwɔ wulu bi wɔ kiri bira kí ɲaanfɛ kì. 15Sabu míŋ yɛri ki a na ɲakilitinbi wulu de ábɛɛ daru, nwɔ̀ a ji sababu, koŋ a so ábɔɔ wulu ki rupwulu-i walima ntiŋ i ǹʼsɔsɔ kì. 16Hali ábɛɛ jifinŋ kiri fa ábɛɛ ɲɛnsi kiri, ŋì i ta bo á tindaŋ kiri sun, niŋ fa áwɔ wɔshuru kiri fɔn a na ábɛɛ de á ɲa kiri gbɛfɛ, kí i á kilɛn. 17Konaŋ kiri ra na ábɛɛ bikwɔ arì sun, míŋ tɔ ki bira. 18Nka niŋ fa a fɔn na, ábɛɛ ŋununshinŋ tenŋ a cɛn fɔni kì. 19Á á banba, á i ɲaanfɛkwulu ki pa á ra, nwɔma á i tu bilinabi ki sun. Niŋ ɲaan ki tɛ, ábɛɛ ɲini kiri ra arì mwu. »

Yesu Yerusalɛmu kili ki gwu wulu bi-i

(Matiyu 24.15–21; Maraka 13.14–19)

20Yesu tu : « Ábɛɛ na ǹʼja tu ɲa kiri Yerusalɛmu rakwunu waarinŋ wɔ̀ ru, á ǹʼtɔ tu ǹʼgwu waari ki so. 21Niŋ waari ru, a koŋ wɔ̀ri na ji Yude sɔɔta ki ru, tu nini bili tiri tɔnŋ maŋ kiri ru. A ǹʼna nwɔ̀tiŋ ni kila Yerusalɛmu kili ki ru, tu nini bili po. A nwɔ̀ri na ji jaŋ fan, tu nini fa ǹʼbi tu arìbɛɛ ra arì pwulu na kili ki ru kì. 22Sabu niŋ jibi kiri ra na ji shɛsan jibi i, nwɔma Kirinŋ wɔ wulu sɛbɛ ki ciiru wulu kiri i nafaa.

23Niŋ waari ki ru, mari ciitiŋ kiri fa mari wɔ̀ri i ɲɛŋ wɔri-ra daŋ ni tɛ, nini a na cɔɔri kusɛbɛ, sabu cɔɔri sinaŋ a na ji pwɔkulinŋ ki sun, niŋ fa Kirinŋ a na awɔ tɔnkwulu ki ji ǹʼnu konaŋ ki wu. 24Kí a na ǹʼbɛɛ ri kilɛn baamwuru ra, kí i ǹʼtɔri ri pa, kí i nini jeɲe ji joŋ ni i, kɛniŋ tɔri ri ru. Shiya tɔri ri a na Yerusalɛmu ciriki arì kanŋ fɛ faratata, fɔ niŋ shiya kiri wɔ waaci ki i ta rafaa. »

Koŋ Danshuru ki na bi ki

(Matiyu 24.29–31; Maraka 13.24–27)

25« Taanmashɛ ri a na ja sunŋ ki fa ɲɛ ki niŋ fa sɔriniŋ kiri ra kirinpɔli ki ra. Pwɔkulinŋ ki sun, jukwululuŋ ni a na jɔrɔkɔ wɛɛlufinju ki sun yìrì i sɔnkɔ-ri, fɔ ŋì i shiya kiri ciirufɔni, ŋì i daŋ kɔ kí sun. 26Bi wɔ̀ri a na ma pwɔkulinŋ ki sun, niŋ ciirufɔni ki a na koŋ mwɔɔnna kilɛn, sabu kirinpɔlila sotinbi kiri ra na sɛrɛsɛri. 27A niŋ ma, kí a na Koŋ Danshuru ki yirira ki ja loŋ kiri faninmwuŋ sotinbi fa nɔɔri sinaŋ wu.

28A niŋ bi kiri na tɔnpa waarinŋ wɔ̀ ru, á á ŋuniŋ kiri fɛshi, á i kirina shɛɛli, sabu ábɛɛ mwu jibi ki myɛ-ɛ. »

Yesu tu afɔɔn wulu ki a kɔ fɛsɛfɛsɛ kì

(Matiyu 24.32–35; Maraka 13.28–31)

29Yesu wulusuntalinŋ bɛɛ bi-i kí tɛ, ntiŋ tu : « Ábɛɛ shɔ jirinŋ ki fa jirinŋ pyɛ kiri shɛɛli. 30Ábɛɛ ǹʼja, ŋì i da ki cɔ-ri waarinŋ wɔ̀ ru, ábɛɛ i ǹʼtɔ-a tu yili ki myɛ. 31Mìŋ ɲaan tenŋ ki tɛ, a ábɛɛ na niŋ bi kiri ja juu ma-a waarinŋ wɔ̀ ru, á ǹʼtɔ tu Kirinŋ wɔ Masabi ki myɛ. 32Sɛli ki ra, míŋ i ǹʼbi-a ábɛɛ tɛ, ńʼtu jiintɔnŋ ki bataa ra beeni kɔ niŋ bi kiri bataa mabali, yìrì i ǹʼnafaa kì. 33Kirinpɔli ki fa pwɔkulinŋ ki a fwuude, nka nwɔ̀ i mɔ́ɔ́n wulu ki i, niŋ a fwuude kì. »

Á tu á ɲaanna waarinŋ bataa ru

34Yesu tu : « Á á yɛri kɔrɔshi, á fa ncusun fyikatinbi, lɔmwunubi niŋ fa juniɲa ciiru koŋ ciirufɔnɔbi kiri i á ɲakili li, míŋ na jibi ki i na bali á ra kì. 35Sabu miŋ tu jɔ i bali-la yɛrinŋ na ɲaan wɔ̀ tɛ, niŋ jibi ki a na bali pwɔkulinŋ sun konaŋ ki bataa ra niŋ ɲaan ki tɛ. 36Niŋ ki ra, á tu á ɲaanna, á i Kirinŋ nafɛ-ri waarinŋ bataa ru, nwɔma á i cunadibi kila. A niŋ ma, bi wɔ̀ri yirira i nmaŋ, ábɛɛ ra á mwu nini wu, niŋ fa ábɛɛ ra na so tu-i Koŋ Danshuru ki ɲaanfɛ. »

37Jibi woo jibi, Yesu wuru sunŋ ki ma-a konaŋ kiri kali ki ra Kirinŋ wɔ wulu ki ra Kirinfusinaŋ ki ra, a cii ki so-ri, ntiŋ wuru ta-a san-ni Olinfyetɔnŋ ki ru. 38Sisarimantɔnŋ ki sun, konaŋ ki bataa wuru ta-a ntiŋ ŋununafu-ri Kirinfusinaŋ ki ra. Kí i arì tɔɔnye-ri ntiŋ wɔ wulu kiri tɛ.

Currently Selected:

Luki 21: JOB

Highlight

Copy