Luki 2

Yesu ji bi ki

(Matiyu 1.18–25)

1Niŋ waari ki ru, Ɔrɔmu kɛniŋ ki masa sinaŋ ki, Ogusiti sariya sɛbɛ po wuru-i, tu awɔ konanbi ki bataa tɔ sɛbɛ, kí tɔnŋ i tɔ. 2Niŋ tɔ sɛbɛrama jɔnɔ ki ma-i waarinŋ wɔ̀ ru, Kiriniyusi wuru Siri sɔɔta ki ŋununtiŋ ki i. 3Niŋ ki ra, koŋ bataa i tiri-ri a tɔ sɛbɛ a tinkili la.

4-5Niŋ ɲaan ki tɛ, Yusufu fani fa awɔ mari sunpa Mariyamu i po Nansarɛti, Galile sɔɔta ki ru. Kí i tunpa ta masa Dawuda wɔ kili ki ra, nwɔ̀ tɔ i tu Bɛtilɛhɛmu, Yude sɔɔta ki ru, sabu Yusufu wuru masa Dawuda nupo o. Kí i ta arì tɔ kiri sɛbɛ niŋ mani nu. Mariyamu ciitiŋ ki wuru-i.

6Ŋì i kí tu Bɛtilɛhɛmu, Mariyamu jɛri jibi ki i na so, 7nmari i a daŋ jɔnɔ ki ji danshuru. Nmari i juulinŋ bo daŋ ki sun, nmari i ǹʼbili nafulufinŋ ni wɔ nuŋ nu buŋ nu, sabu kí bilimaŋ kila-ri jɛ ri sanfu ki ru kì.

Mɛlɛkɛn bɛɛ Yesu ji wulu ki bi-i saa faa ri tɛ

8Niŋ shikaŋ cii ki ru, saa faa bɛɛ ri wuru Bɛtilɛhɛmu jaŋ gbɛ ki ru, kí i san-ni arì ɲaanna, kí i arɔɔ saa kwuru ki ɲaannasuu-ri. 9Ŋuntiŋ Kirinŋ wɔ mɛlɛkɛn bɛɛ i a yɛri ji kí wu. Mìŋ manaanŋ tenŋ ki ru, Ŋuntiŋ Kirinŋ nɔɔri ki sarinŋ ki i po, ŋì i kí rakwunu, kɛmi sinaŋ i de kí ru. 10Nka mɛlɛkɛn ki tu kí tɛ : « Á fa kɛni kì, míŋ i na-a Wulujii bi ábɛɛ tɛ. Ŋì a na ji yoori ábɔɔ konaŋ ki bataa gbɛ. 11A ǹʼshɛɛli, Mwutɔnŋ ji-i ábɛɛ tɛ jiŋ masa Dawuda wɔ kili ki ra, ninki i Kirinŋ Ɲaannakonshimaan ki i. Yibɛɛ Ŋuntiŋ yɛ. 12Ábɛɛ ra ǹʼtɔ finŋ wɔ̀ ra, niŋ i kaa : Ábɛɛ ra ta fa danjeelinŋ ki wu, juulinŋ i bo ǹʼsun, ŋì i bili nafulufinŋ ni wɔ nuŋ nu buŋ nu. »

13Mìŋ manaanŋ tenŋ ki ru, mɛlɛkɛn kpaa tɔbali tɔri ri i na bo ǹʼjɔnɔ ki sun, yìrì i baraka bi-ri Kirinŋ tɛ tu :

14« Sobataatiŋ Kirinŋ gbɛ cuunŋ kirinpɔlila mani narimaŋ kiri ru,

ɲaanfɛfili i ji pwɔkulinŋ sun ǹʼdintɛtɔnŋ kiri faninmwuŋ. »

Saa faa kiri ta-i Yesu jeelaaŋ ki shɛɛli Bɛtilɛhɛmu

15Mɛlɛkɛn kiri tunpa-i kirinpɔli ki ra waarinŋ wɔ̀ ru, saa faa kiri i ǹʼbi arìmaŋ tɛ : « Yi tiri fɔ Bɛtilɛhɛmu, mɛlɛkɛn ki bi wɔ̀ ma wulu bi-i, ŋì i po Ŋuntiŋ Kirinŋ gbɛ, yi i ta niŋ ja. »

16Niŋ na, kí i arì rukwulu tiri danjeelinŋ ki ceeli Bɛtilɛhɛmu. Kí so-i niŋ mani nu, kí i Mariyamu fa Yusufu fa danjeelinŋ ki ja, ǹʼbili wuru nafulufinŋ ni wɔ nuŋ nu buŋ nu. 17Kí daŋ ki ja-i waarinŋ wɔ̀ ru, wulu finŋ woo finŋ bi wuru kí tɛ ǹʼbi ki ru, kí i niŋ bataa rakali. 18Saa faa kiri wɔ wulu ki i bo a ramatɔnŋ kiri bataa tɔnŋ sun. 19Nwɔ̀ i Mariyamu, niŋ i niŋ bi kiri bataa tu a ɲakili la, nmari i tu a miiri-ra yìrì sun. 20Niŋ kɔɔtɛ, saa faa kiri i arì pwulu tiri arɔɔ mani nu. Kí i ngban baraka bi fan Kirinŋ tɛ, niŋ fa kí i ǹʼgbɛ-ri arɔɔ bi jamaan kiri fa arɔɔ bi ramamaan kiri bira. Niŋ fa, mɛlɛkɛn ki yìrì ɲaanbi wuru kí tɛ ɲaan wɔ̀ tɛ, kí ta wuru yìrì ja mìŋ ɲaan ki tɛ.

Kí ta-i Yesu wu Kirinfusinaŋ ki ra

21Daŋ ki ji ki sunŋ fulupɔnɔtɔnŋ ki so-i, kí i ǹʼsɔɔpeefɛ#2.21 sɔɔpeefɛ : Niŋ wuru ladaŋ i, Kirinŋ ǹʼbi wuru tu Aburahamu fa a nupo kiri ninwɔ̀ ma-ni, niŋ i ji awɔ tɔnwɔri ki taanmashɛ ɛ, a fa kí faninmwuŋ, nwɔ̀ i ǹʼji-a tu kí afɔɔn konanbi i. Niŋ ladaŋ ki i shurufinŋ ki tɔnŋ na pɔli ki tɛrimaanna a. Tɔnwɔri Bwuumaan ki ru, Yawutu kiri wuru dɔri-ra tu « sɔɔpeefɛmaan kiri ». Nka Ɔrɔmutɔnŋ kiri wɔ sɛbɛ ki sɔɔta 2.29 ki i sɔɔpeefɛmaanna sɛlɛsɛli wulu bi-a, ninwɔ̀ i ciiru ki fɔɔ-ra.. Kí i ǹʼtɔ ki ye tu Yesu, miŋ tu mɛlɛkɛn ki ǹʼbi wuru ɲaan wɔ̀ tɛ, ǹʼciishi ki jɛŋ Mariyamu tɛ.

22Mariyamu na-i po daŋ ji fu ki ru, ŋì i kɛɲɛ Kirinŋ wɔ cintɔnŋ Musa wɔ sariya ki wu, Yusufu fa Mariyamu i ta Yerusalɛmu. Kí i ta danjeelinŋ ki wɔri Ŋuntiŋ Kirinŋ tɛ, ŋì i bo ǹʼwɔ bo ru, 23sabu ǹʼbi-i Ŋuntiŋ Kirinŋ wɔ Sariya sɛbɛ ki ru tu : « Daŋ jɔnɔ woo daŋ jɔnɔ ji shuru, tu niŋ kakan niŋ i bo Ŋuntiŋ Kirinŋ wɔ bo ru.#Pobi ki 13.2. »

24Niŋ fa, daŋ ki jifinŋ kiri kakan wuru kí i saraka wɔri Ŋuntiŋ Kirinŋ tɛ, nwɔ̀ wuru kilaaŋ fuuli i, walima konfɔankilaaŋ pyaanŋ fuuli i, miŋ tu ǹʼsɛbɛ-i Ŋuntiŋ Kirinŋ wɔ sariya sɛbɛ ki ru ɲaan wɔ̀ tɛ.#Sarakawɔrɔtɔnŋ kiri 12.8.

Simeyɔnŋ Yesu ja-i

25Koŋ bɛɛ wuru Yerusalɛmu, nwɔ̀ tɔ wuru tu Simeyɔnŋ. Koŋ telimaan niŋ fa koŋ kulumaan wuru-i Kirinŋ saa ki bataa fan. Ntiŋ wuru Isirayɛli Mwutɔnŋ ki na jibi ki saarashɛɛli-la, niŋ fa Ɲiniwɔlinŋ ki wuru ntiŋ sun. 26Ɲiniwɔlinŋ ki ǹʼbi wuru ntiŋ tɛ, tu mìntiŋ ɲaniŋ a beŋ ki ja, Ŋuntiŋ Kirinŋ Ɲaannakonshimaan ki jabali a gbɛ kì.

27Waarinŋ wɔ̀ ru, Mariyamu fa Yusufu de-i Yesu pyaanŋ ki wu Kirinfusinaŋ ki kaniŋ ki ru, tu arì ra ladannabi kiri ma Kirinŋ tɛ, daŋ ki wɔ saa ki fan, ŋì i kɛɲɛ Kirinŋ wɔ cintɔnŋ Musa wɔ sariya ki wu, Ɲiniwɔlinŋ ki i Simeyɔnŋ jɛnpa ta nmaŋ. 28Ntiŋ i daŋ ki mwu, ntiŋ i baraka bi Kirinŋ tɛ, ntiŋ i ǹʼbi kɔɔn :

29« Ŋuntiŋ Kirinŋ, dɔnsaŋ, ncusun nʼtɛ baara matɔnŋ ki ta a rufaan ɲaanfɛfili sun,

mɔɔn wulu bimaan ki rafaa-a.

30Míŋ ɲaniŋ ki Mwutɔnŋ ki ja-i,

31miŋ ninwɔ̀ ramɔni-i pwɔkulinŋ sun konaŋ bataa tɛ.

32Mɔɔn konanbi ki, Isirayɛlitɔnŋ kiri wɔ ŋununfɛshi yɛ, #Esayi 49.6.

niŋ fa ǹʼyɔ manisarinŋ i, nwɔ̀ a na miŋ ji shiya pyɛ kiri bataa wu, kí i nʼtɔ. »

33Simeyɔnŋ wulu wɔ̀ri bi-i Yesu bi ki sun, nini i Mariyamu fa Yusufu ciirudi, fɔ ŋì i bo kí tɔnŋ sun. 34Simeyɔnŋ i juba san kí tɛ. Niŋ kɔɔtɛ, ntiŋ i ǹʼbi Yesu ɲiŋ Mariyamu tɛ :

« Ǹʼshɛɛli, ka daŋ ka a na ji Isirayɛlidaŋ kiri mwɔɔnna fɛɛn ŋuŋ u, niŋ fa kí mwɔɔnna jɔrɔkɔ ŋuŋ u. Ŋì a na ji Kirinŋ wɔ taanmashɛ ɛ, konaŋ kiri a na nwɔ̀ sɔsɔ.

35Niŋ ɲaan ki tɛ, ŋì a na mwɔɔnna ciiru bi radumaan kiri po taanna. Nwɔ̀ i miŋ, Mariyamu, miŋ a na cɔɔri nʼtɔnŋ na, miŋ tu kí nʼbu tama na. »

Cintɔnŋ Anɛ bi ki

36Kirinŋ wɔ cintɔnŋ bɛɛ wuru nmaŋ sɛbɛ, nwɔ̀ wuru mari i. Ǹʼtɔ ki wuru tu Anɛ. Anɛ wuru Fanuwɛli danmari, niŋ fa Asɛri nupo o. Nmari bwuubi so wuru kusɛbɛ. Nmari maannaankɔni ki cɛn wɔri wuru shuru wɔ̀ tɛ, nmari fa niŋ jiri jɔnpɔni ma wuru arìmaŋ fan. Niŋ kɔɔtɛ, shuru ki i kɔ. 37Nmari i tu shuru shibali, fɔ nmari shi ki i na so jiri yaapyiiraŋ fa pyiiraŋ (84) sun. Nmari wuru cin-a Kirinfusinaŋ ki ra kì. Nmari wuru Kirinŋ gbɛ-a cii fa sunŋ, nmari i sunŋ de-ri, nmari i Kirinŋ nafɛ-ri.

38Ŋì i Mariyamu fa Yusufu tu Kirinfusinaŋ ki ra, niŋ mari ki fani i a kpari kí tɛ. Nmari i a bo Kirinŋ co sun. Koŋ finŋ woo finŋ wuru Yerusalɛmu mwunama ki saarashɛɛli-la, nmari i daŋ ki ɲaanbi-ri nini fɔn tɛ.

Yusufu fa Mariyamu arì pwulu-i Yesu wu Nansarɛti

39Waarinŋ wɔ̀ ru, ladannabi kiri bataa ma kɔ-i, ŋì i kɛɲɛ Ŋuntiŋ Kirinŋ wɔ sariya ki wu, Yusufu fa Mariyamu i arì pwulu tiri arɔɔ kili ki ra, Nansarɛti, Galile sɔɔta ki ru.

40Daŋ ki wuru gbɛ-a baraka wu. Ǹʼbɛɛ i bo-ri ǹʼwɔ ɲakilitinbi ki sun, niŋ fa Kirinŋ wɔ shɔɔrinŋ ki wuru ǹʼtɛ.

Yesu fa a jifinŋ kiri ta-i Paki ki ru, Yerusalɛmu

41Jiri woo jiri, Yesu jifinŋ kiri wuru ta-a Jonbikɔ ɲaannabyɛ ki ru Yerusalɛmu, ninwɔ̀ i dɔri-ra sɛbɛ tu Paki. 42Yesu jiri bwununfuluntɔnŋ ki, ǹʼfa a jifinŋ kiri i tunpa tiri Yerusalɛmu, ŋì i kɛɲɛ niŋ ɲaannabyɛ ki ladaŋ kiri wu. 43Ɲaannabyɛ ki kɔmaan ki, konaŋ kiri bataa i arɔɔ kili la saa ri pa, nka Yesu i tu konaŋ ki kɔɔtɛ Yerusalɛmu nmaŋ, a jifinŋ kiri rutɔbali.

44Yesu jifinŋ kiri cirasun, tu ŋì saa ki sun arìbɛɛ tirishi kiri kanfɛ. Niŋ ki ra, kí i sunŋ tenŋ tiri tan Yesu jabali, kí i kila, kí i ǹʼceeli ki tɔnpa arì koŋ kiri fa arì tɔtɔnŋ kiri fan, 45nka kí ǹʼja kì. Niŋ ki ciiru, kí i arì pwulu ǹʼceeli fan Yerusalɛmu.

46Sunŋ byaŋ kɔɔtɛ, kí i ta fa Yesu fa sariya kalimɔɔ kiri sɔɔmaan wu Kirinfusinaŋ ki kaniŋ ki sun, ŋì i a tɔɔnye-ri kí tɛ, niŋ fa ŋì i kí ranɔri-ri bi kiri bɛɛ ri sun. 47Daŋ ki wɔ ɲakilitinbi ki, fa ǹʼwɔ wulu lupwuluka ɲaan ki botɔnsun i ji a ramatɔnŋ kiri tɛ.

48Yesu jifinŋ kiri ǹʼja-i waarinŋ wɔ̀ ru, ŋì i boka jitan kí tɔnŋ sun, ǹʼɲiŋ ki i ǹʼbi : « Ńʼdanshuru, miŋ ka ma yibɛɛ wu nfɛnŋ na? Míŋ fa miŋ tiŋ ki gbɛɛratɛɛmaan wuru miŋ ceeli de-a. »

49Yesu i ǹʼbi kí tɛ : « Ábɛɛ wuru míŋ ceeli-la nfɛnŋ na? Ábɛɛ ǹʼtɔ tu míŋ kakan-ni, ŋí i kila ńʼTiŋ ki wɔ fu ki ru kì wa? » 50Nka Yesu jifinŋ kiri ǹʼwɔ wulu ki kɔri ki tɔ-ri kì.

51Niŋ kɔɔtɛ, Yesu i jɛri ta a jifinŋ kiri fan Nansarɛti. Ǹʼwuru a jifinŋ kiri wulu lama-a waarinŋ bataa ru. Ǹʼɲiŋ ki i niŋ bi kiri bataa tu-ri a ɲakili la.

52Niŋ ɲaan ki tɛ, Yesu wuru gbɛ-a, ǹʼbɛɛ i bo ta-ri ǹʼɲakili ki sun, ǹʼbi i di Kirinŋ fa konaŋ kiri tɛ.

Currently Selected:

Luki 2: JOB

Highlight

Copy