Yuhana 2
2
Yesu wɔ taanmashɛ jɔnɔ mamaan ki
1Niŋ bi mamaan kiri sunŋ byantɔnŋ ki, cɛn bɛɛ wuru tan-a Galile kili bɛɛ ra, nwɔ̀ tɔ i tu Kana. Yesu ɲiŋ ki wuru nmaŋ. 2Yesu fa awɔ kalindaŋ kiri fani dɔri wuru niŋ cɛn ki ru. 3Ŋì i kí tu niŋ cɛn ki ru, dunfɛnŋ ki i na waa, Yesu ɲiŋ ki i ǹʼbi ntiŋ tɛ tu : « Dunfɛnŋ kí gbɛ nmaŋ kili kì. »
4Nka Yesu i nmari rupwulu tu : « Míŋ ɲiŋ, niŋ míŋ fa ábɛɛ faninmwuŋ bi i kì. Mɔ́ɔ́n waaci ki so-i sun kì. »
5Yesu ɲiŋ ki i ǹʼbi cinŋ matɔnŋ kiri tɛ tu : « A ntiŋ finŋ woo finŋ bi á tɛ, á ǹʼbataa ma ŋì i kɛɲɛ ntiŋ wɔ bimaan ki wu. »
6Niŋ ɲaan ki tɛ, kwɔ daa sinaŋ taanmani wuru nmaŋ, Yawutu kiri wuru arɔɔ ladaŋ na wu kiri tan-a nwɔ̀ri ra. Kulu sinaŋ faa ju kaan taanŋ wuru de-a niŋ daa ki tenŋ tenŋ ki ru.
7Yesu i ǹʼbi cinŋ matɔnŋ kiri tɛ tu : « Á ka daa kari faa ju ra. » Nini i daa kiri faa fɔ arì tɔnŋ na.
8Yesu i ǹʼbi kí tɛ tu : « Á ǹʼpyaanŋ sili, á i ta niŋ wɔri nufinŋ ɲaanpotɔnŋ kiri jɛntɔnŋ ki tɛ. » Cinŋ matɔnŋ kiri i niŋ ma.
9Nufinŋ ɲaanpotɔnŋ kiri jɛntɔnŋ ki i ju ki nɛɛ, niŋ napwulu jimaan ki dunfɛnŋ i. Ntiŋ niŋ dunfɛnŋ ki pomaŋ tɔ-ri kì, nka cinŋ matɔnŋ wɔ̀ri ju ki sili bo wuru daa kiri ru, nini ǹʼpomaŋ tɔ wuru-i. Mìŋ manaanŋ tenŋ ki ru, nufinŋ ɲaanpotɔnŋ jɛntɔnŋ ki i marishinŋ ki dɔri, 10ŋi i na ǹʼbi niŋ tɛ tu : « Koŋ bataa i dali-la kí i dunfɛnŋ ki bataa ru jii ki wɔri konaŋ kiri tɛ ǹʼjɔnɔ, a kí niŋ mwɔɔnna mwunu waarinŋ wɔ̀ ru, dunfɛnŋ wɔ̀ di po kì, niŋ i kila niŋ i wɔri kí tɛ. Nka miŋ dunfɛnŋ ki bataa ru jii ki tu-i nmaŋ fɔ dɔɔ! »
11Niŋ ji-i Yesu wɔ taanmashɛ jɔnɔ mamaan ki i, ntiŋ ninwɔ̀ ma-i Kana kili ki ra Galile sɔɔta ki ru, ntiŋ i a nɔɔri ki ji. Ntiŋ wɔ kalindaŋ kiri i bili ntiŋ na.
12Niŋ mamaan ki kɔɔtɛ, ntiŋ i ta Kafarinawumu kili ki ra, ntiŋ fa a ɲiŋ ki fa a tindaŋ kiri fa awɔ kalindaŋ kiri. Kí i sunŋ dama ma niŋ mani nu.
Yesu ta bi ki Kirinfusinaŋ ki ra
(Matiyu 21.12–13; Maraka 11.15–17; Luki 19.45–46)
13Yawutu kiri wɔ Jonbikɔ ɲaannabyɛ ki na-i myɛ, Yesu i ta Yerusalɛmu kili ki ra. 14Koŋ wɔ̀ri wuru naan kiri fa saa kiri fa kilaaŋ kiri ju-a Kirinfusinaŋ ki kaniŋ ki#2.14 Kirinfusinaŋ ki kaniŋ ki : Niŋ mani ki wuru Kirinfusinaŋ ki mani ki bɛɛ ɛ, shiya tɔri kiri wuru arɔɔ Kirinŋ gbɛ ki tan-a ninwɔ̀ ru. sun, nini fa jalinŋ nucinitɔnŋ kiri sɔɔ wuru arɔɔ ku jumaŋ kiri ru. 15Ntiŋ i yaaraŋ tɔni ji shɛnŋ i, ntiŋ i kí fa arɔɔ saa kiri fa arɔɔ naan kiri bataa kalikali po san Kirinfusinaŋ ki kaniŋ ki ru. Ntiŋ i jalinŋ nucinitɔnŋ kiri wɔ jalinŋ ki jeɲe bo fwuniŋ sun, ntiŋ i kɔ́ɔ́ tabali kiri cibi. 16Niŋ kɔɔtɛ, ntiŋ i ǹʼbi kilaaŋ jutɔnŋ kiri tɛ tu : « Á po san finŋ kari wu kwumaŋ! Á fa míŋ Tiŋ ki wɔ fu ki ji jɔɔ tanmaŋ i kì! » 17Niŋ i ntiŋ wɔ kalindaŋ kiri ɲakilila bo Kirinŋ wɔ wulu ki tɛ, ninwɔ̀ sɛbɛ-i tu : « Mɔɔn fu ki bidi-i míŋ tɛ haali, niŋ bidintɛbi ki a pyɛ tu míŋ na kì. » 18Niŋ na, Yawutu kiri ŋununtiŋ kiri i ntiŋ nanɔri tu : « Miŋ a so taanmashɛ danwɔ ji-i yibɛɛ wu, nwɔ̀ a ǹʼji tu miŋ kakan ŋi i bi kari ma? »
19Yesu tu kí tɛ : « Á ka Kirinfusinaŋ ka gwu, míŋ a ǹʼtan jɔrɔkɔ ǹʼŋunaŋ i sunŋ byaŋ ciiru. »
20Yawutu kiri tu : « Jiri yaafuuli fa jiri taanmani ma-i Kirinfusinaŋ wɔ̀ tanmaanna ki ra, miŋ niŋ tan jɔrɔkɔ wulu bi-ri sunŋ byaŋ ciiru wa? » 21Nka Yesu wuru Kirinfusinaŋ wɔ̀ wulu bi-a, niŋ wuru ntiŋ firi ki i. 22Kɔɔtɛ, Yesu na-i ŋmɛni po san konkwuu kiri kanfɛ waarinŋ wɔ̀ ru, ntiŋ wɔ kalindaŋ kiri ɲakilila i bo tu ntiŋ ǹʼbi-ri ninkunŋ. Kí i bili Kirinŋ wɔ wulu bimaan kiri ra Sɛbɛ ki ru. Yesu wulu wɔ̀ bi wuru kí tɛ, kí i bili niŋ na sɛbɛ.
23Waarinŋ wɔ̀ ru Yesu wuru Yerusalɛmu Jonbikɔ ɲaannabyɛ ki tɛ, koŋ mwɔɔnna i bili ntiŋ na awɔ taanmashɛ mamaan kiri bira. 24Nka, Yesu bili-li kí ra kì, sabu ntiŋ wuru kí bataa ciiru kiri tɔ-a. 25Ǹʼfani so-ri koŋ i na a kaashi ɲaanbi ntiŋ tɛ kì, sabu ntiŋ i konanmini kiri ciiru bi kiri tɔ-a.
Currently Selected:
Yuhana 2: JOB
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
