Yuhana 14

Saa ki, sɛli ki, niŋ fa ɲaninkulutɔnbi ki

1Yesu tu sɛbɛ : « Á fa á ciirufɔni kì, á bili Kirinŋ na, á i bili míŋ na. 2Sɔɔmaŋ mwɔɔnna i míŋ Tiŋ ki wɔ kaniŋ ki sun, a niŋ ji wuru sɛli i kì, nfɛnŋ na míŋ i ǹʼbi, tu míŋ a ta mani namɔni ábɛɛ tɛ niŋ mani ki ru? 3A míŋ ta mani ki ramɔni kɔ ábɛɛ tɛ waarinŋ wɔ̀ ru, míŋ a ńʼpwulu na ábɛɛ shi, á i ta tu ńʼfan niŋ mani ki ru nmaŋ. 4Míŋ i ta-a mani wɔ̀ ru, ábɛɛ i niŋ saa ki tɔ-a kɔ. » 5Toma tu ntiŋ tɛ : « Ŋuntiŋ, ábɛɛ i ta-a mani wɔ̀ ru, yibɛɛ niŋ tɔ-a kì, yibɛɛ ra ǹʼsaa ki tɔ dɔɔkunŋ? » 6Yesu i Toma rupwulu tu : « Mínki i saa ki fa sɛli ki niŋ fa ɲaninkulutɔnbi ki i, koŋ tɔri tenŋ so-a na-i Tiŋ ki tɛ debali míŋ fan kì. 7A ábɛɛ míŋ tɔ, ábɛɛ ra míŋ Tiŋ ki tɔ. Nka kabi dɔnsaŋ ábɛɛ Tiŋ ki tɔ-i, á i Tiŋ ki ja. » 8Filipu tu ntiŋ tɛ : « Ŋuntiŋ ki, Tiŋ ki ji yi wu, niŋ a yibɛɛ po. » 9Yesu i niŋ nupwulu : « Míŋ i waaci ka bataa ma-i ábɛɛ kanfɛ, miŋ i ji faa míŋ tɔbali wa, Filipu? Sabu konwɔtiŋ míŋ ja-i, nintiŋ i Tiŋ ki ja-i. Nfɛnŋ na, miŋ i ji faa ǹʼbi-a tu : ‹ Tiŋ ki ji yi wu? › 10Miŋ bili ǹʼna tu míŋ Tiŋ ki ru, tu Tiŋ ki i ji míŋ nu kì wa? Míŋ i wulu wɔ̀ri bi-a ábɛɛ tɛ, nini po-a míŋ yɛrima ki ru kì, nka míŋ Tiŋ ki i míŋ nu, ninki i a yɛri ki wɔ bi kiri ma-a. 11Á bili ǹʼna tu míŋ Tiŋ ki ru, Tiŋ ki i ji míŋ nu. A á ji-a bili niŋ na mɔ́ɔ́n wulu ka sun kì, á bili ǹʼna mɔ́ɔ́n bi mamaan kiri bira. 12Sɛli sɛli ki ra, míŋ a ǹʼbi-a ábɛɛ tɛ ńʼtu konwɔtiŋ bili míŋ na, míŋ i bi wɔ̀ri ma-a, ntiŋ a niŋ bishi ri ma, ntiŋ i na bi ri ma nwɔ̀ri gbɛ-i nini wu, sabu míŋ i tiri-ra Tiŋ ki tɛ. 13Ábɛɛ finŋ woo finŋ nafɛ míŋ tɔ ki wu, míŋ a niŋ wɔri ábɛɛ tɛ, nwɔma Tiŋ ki i gbɛ Danshuru ki bira. 14Ábɛɛ finŋ woo finŋ nafɛ míŋ tɔ ki wu, míŋ a niŋ ma. »

Yentɛtɔnŋ ki na bi ki

15Yesu tu : « A míŋ ji bidi ábɛɛ tɛ, ábɛɛ ra mɔ́ɔ́n cinŋ bimaan kiri ma. 16Míŋ a Tiŋ ki rafɛ tu Kí yentɛtɔnŋ tɔri wɔri na á tɛ, nwɔma niŋ i tu ábɛɛ fan waarinŋ bataa ru. 17Niŋ i ɲini sɛlitiŋ ki i. Juniɲa nu konaŋ kiri ra so nwɔ̀ kila-i kì, sabu kí ǹʼja-a kì, niŋ fa kí ǹʼtɔ-a kì. Ábɛɛ kɔniŋ i ǹʼtɔ-a, sabu ŋì i ábɛɛ fan, ŋì i ji-a na ji á ciiru tɔnŋ kiri ra. 18Míŋ a na ábɛɛ tu a cinancinŋ kanidaŋ ni sali kì, míŋ a ńʼpwulu na ábɛɛ tɛ. 19Pyaanniŋ, juniɲa nu konaŋ kiri ra míŋ ja kili kì, nka ábɛɛ ra míŋ ja-ri, sabu míŋ ɲaninkulutɔnŋ yɛ, ábɛɛ yɛrima kiri ɲaninkulutɔnŋ ni a na ji-i. 20Niŋ shikaŋ, ábɛɛ ra ǹʼtɔ tu míŋ Tiŋ ki ru, ábɛɛ i ji míŋ nu, míŋ i ji ábɛɛ ru. » 21Yesu tu sɛbɛ : « Míŋ bidi-i konwɔtiŋ tɛ, nintiŋ ki i mɔ́ɔ́n cinŋ bimaan kiri tu-a a ciiru, ntiŋ i yìrì ma-ni. Míŋ bidi-i konwɔtiŋ tɛ, nintiŋ bidi-i míŋ Tiŋ ki tɛ, míŋ yɛrima ki ra nintiŋ bidi ńʼtɛ, ŋí i ńʼyɛri ji ntiŋ wu. »

22Yudasi tɔ tɔri wuru nmaŋ, nwɔ̀ wuru Yudasi Isikariyɔti i kì, niŋ tu Yesu tɛ : « Ŋuntiŋ ki, nfɛnŋ na ábɛɛ ra á yɛri ji yibɛɛ bantenŋ wu, á ra á yɛri ji juniɲa wu kì? »

23Yesu i ntiŋ nupwulu tu : « Míŋ bidi-i konwɔtiŋ tɛ, nintiŋ a a kulu mɔ́ɔ́n wulu kiri tɛ, míŋ Tiŋ ki i ji-a ntiŋ bidi a tɛ sɛbɛ, niŋ ɲaan ki tɛ, yibɛɛ ra na ntiŋ tɛ, míŋ fa ńʼTiŋ ki, yi i na tu ntiŋ fan. 24Míŋ bidi konwɔtiŋ tɛ kì, nintiŋ a a kulu mɔ́ɔ́n wulu kiri tɛ kì. Ábɛɛ i wulu wɔ̀ri rama-a míŋ tɔnŋ na, mɔ́ɔ́n wulu li i kì, míŋ Tiŋ ki wɔ ri yɛ, ninwɔ̀ míŋ cin-i. 25Míŋ i bi kari bataa bi-a ábɛɛ tɛ, ŋì i míŋ tu ábɛɛ kanfɛ. 26Nka, míŋ Tiŋ ki a na yentɛtɔnŋ wɔ̀ bo na ábɛɛ tɛ míŋ tɔ ra, ninwɔ̀ i Ɲiniwɔlinŋ ki i, ninki a na ábɛɛ kali finŋ ki bataa ra, ŋì i á ɲakilila bo mɔ́ɔ́n wulu bimaan kiri bataa tɛ á tɛ. 27Á fa á gbɛɛratɛɛ kì, á fa kɛni kì, sabu míŋ i ɲaanfɛfili tu-a ábɛɛ tɛ, míŋ i ńʼwɔ ɲaanfɛfili ki wɔri-ra ábɛɛ tɛ, míŋ ǹʼwɔri-ra juniɲa wɔ wɔrika ɲaan tɛ kì. 28Ábɛɛ ǹʼnama-i míŋ tɔnŋ na tu : ‹ Míŋ a tiri, nka míŋ a ńʼpwulu na ábɛɛ tɛ sɛbɛ. › A míŋ bi ji wuru di-ri ábɛɛ tɛ, ábɛɛ wuru-ra á ciirudi tu míŋ ta-a Tiŋ ki tɛ, sabu Tiŋ ki gbɛ-i míŋ wu. 29Míŋ i bi kari bi-a ábɛɛ tɛ dɔnsaŋ, nwɔma a yìrì na ma waarinŋ wɔ̀ ru, ábɛɛ i bili mɔ́ɔ́n wulu kiri ra. 30Míŋ a cin wulubi ki ra ábɛɛ tɛ kili kì, sabu ka juniɲa ka ŋununtiŋ ki yirira i nmaŋ. So dantenŋ ǹʼgbɛ míŋ sun kì, 31nka juniɲa kakan-i ŋì i ǹʼtɔ, tu Tiŋ ki bidi míŋ tɛ, niŋ ki ra, Kí nwɔ̀ bi-i míŋ tɛ, míŋ i ninki ma-a. Á jɔrɔkɔ, yi po san kwumaŋ! »

Currently Selected:

Yuhana 14: JOB

Highlight

Copy