Yuhana 10

Wulusuntalinŋ wɔ̀ bi-i saa kiri fa arì faa ki bi sun

1Yesu i ǹʼbi kí tɛ tu : « Sɛli ki ra, míŋ a ǹʼbi ábɛɛ tɛ, ńʼtu konwɔtiŋ i de-a saa fu ki tɔnŋ ki ra kì, fɔ ntiŋ i tunpa-ri ǹʼkwɔ ki sun, ńʼtu nintiŋ i kwunŋ i, niŋ fa fɛɛn ǹʼsuntɔnŋ i. 2Nka nwɔ̀ i de-a saa fu ki tɔnŋ ki ra, ninki i saa faa ki i.

3Faatɔnŋ ki ɲaannasuutɔnŋ ki i saa fu ki tɔnŋ ki rawwulu-la nintiŋ tɛ. Saa kiri i ntiŋ wulu ki tɔ-ri. Ntiŋ i awɔ saa kiri dɔri po-a tanŋ ki ra arì tɔ ki sun tenŋ tenŋ sun. 4A ntiŋ awɔ saa kiri po, ntiŋ i ǹʼpa-a yìrì jɛŋ, yìrì i ǹʼpa ntiŋ cɛfan, sabu yìrì i ntiŋ wulu ki tɔ-a. 5Saa kiri ǹʼpa-a koŋ tɔri cɛfan fyewu kì, nka yìrì i bili-la ntiŋ jɛŋ, sabu yìrì ntiŋ wulu ki tɔ-a kì. »

6Yesu niŋ wulusuntalinŋ ki bi-i, nka kí ǹʼkɔri ki tɔ-ri kì. 7Yesu i ǹʼbi kí tɛ sɛbɛ : « Sɛli sɛli ki ra, míŋ a ǹʼbi ábɛɛ tɛ, ńʼtu mínki saa fu ki tɔnŋ ki i. 8Koŋ wɔ̀ri fɔn bataa na-i míŋ jɛŋ, nini bataa i kwunŋ ni fa fɛɛn ǹʼsuntɔnŋ ni i. Nka saa kiri arì tɔɔnye kí wulu tɛ kì. 9Mínki ki i demantɔnŋ ki i, konwɔtiŋ de míŋ na, nintiŋ a a mwu. Nintiŋ a de-ri, ntiŋ i po-ri, ntiŋ i ji-a a tɔnnafɛ nufinŋ ki kila. 10Kwunŋ ki na-a finŋ tɔri tenŋ cɛfan, kwunbi fa kilɛnmaanna niŋ fa li tanmaanna ciniŋ kì. Nka míŋ na-i, nwɔma konaŋ kiri i ɲaninkulutɔnbi ki kila, kí i ǹʼjiisan.

11Mínki i saa faa shɔɔrinŋ ki i. Saa faa shɔɔrinŋ ki i a ɲini ki wɔri-ra awɔ saa kiri bira. 12Nka konwɔtiŋ saa faa i kì, saa kiri tiŋ dumiŋ i kì, ntiŋ i saa kiri nee-ri sali la, niŋ saa faa sɔbɛ kì. A niŋ kpalinŋ ki naanna ja, ntiŋ i bili-la, ntiŋ i saa kiri tu nmaŋ. Kpalinŋ ki i na-a saa kiri bɛɛ ri pa, ǹʼpyɛ kiri i jeɲe. 13Niŋ sali ceelitɔnŋ ki miiri-ra saa kiri bira kì, sabu wari ceelitɔnŋ bantenŋ yɛ.

14Mínki i saa faa shɔɔrinŋ ki i, míŋ i ńʼwɔ saa kiri tɔ-a, yìrì i míŋ tɔ-ri. 15Tiŋ Kirinŋ i míŋ tɔ-a, míŋ yɛrima ki i Tiŋ Kirinŋ tɔ-ri. Míŋ i ńʼwɔ saa kiri tɔ-a mìŋ ɲaan ki tɛ, ŋí i ńʼɲini ki wɔri-ri yìrì bira. 16Saa tɔri ri i míŋ gbɛ, nini ka saa fu ka ru kì. Míŋ kakan-i ŋí i nini nakɔli na sɛbɛ. Yìrì ra na míŋ wulu lama, yìrì i ji saa kwuru tenŋ i, faa tenŋ i ji yìrì ra. 17Míŋ bidi-i ńʼTiŋ ki tɛ, sabu míŋ i ńʼɲini ki wɔri-ra, ŋí i ńʼpwulu, ŋí i na ǹʼmwu sɛbɛ.

18Koŋ tɔri tenŋ so-a míŋ ɲini ki mwu-i kì, nka mínki yɛrima ki i ǹʼwɔri-ra, sabu so i míŋ gbɛ, ŋí i ńʼɲini ki wɔri, niŋ fa ŋí i ńʼpwulu, ŋí i ǹʼmwu. Míŋ nwɔ̀ kila-i Tiŋ ki gbɛ, niŋ i niŋ i. »

19Yesu wɔ wulu kiri i Yawutu kiri bo arìmaŋ na sɛbɛ. 20Kí mwɔɔnna i ǹʼbi-ri tu : « Ɲinijɛ ri i wú ru, julu bo-i wú ru, nfɛnŋ na ábɛɛ i á tɔɔnye-ri wú tɛ? »

21Ǹʼtɔri ri i ǹʼbi-ri tu : « Ɲinijɛtiŋ wulubi-a ka ɲaan ka tɛ kì dɛ! Ɲinijɛ a so ɲaanfwuu ri ɲaninaŋ ni nawwulu-i wa? »

Yawutu kiri kaan bi ki Yesu tɛ

22Yawutu kiri wuru Kirinfusinaŋ ki ɲaannabyɛ bɛɛ tan-a jiri woo jiri Yerusalɛmu, kí i ǹʼdɔri-ri tu Dedikasi. Niŋ fu wuru shii waari ki wu. 23Kirinfusinaŋ ki demantɔnŋ wɔ̀ wuru dɔri-ra tu masa Solomani wɔ Tɔntɔɔ, Yesu wuru a maanni maanni de-a niŋ mani ki ru. 24Yawutu kiri i na Yesu rakwunu, kí i ntiŋ nanɔri tu : « Fɔ waaci danwɔ ru, miŋ a yibɛɛ po san sii ǹʼna ki ru? Á minki ji Mwutɔnŋ ki i, ǹʼfɔɔ bi yi tɛ. »

25Yesu i kí rupwulu tu : « Míŋ ǹʼbi-i ábɛɛ tɛ kɔ, nka ábɛɛ bili ǹʼna kì. Míŋ i mabi wɔ̀ri ma-a ńʼTiŋ ki tɔ ra, niŋ mabi kiri i míŋ wulu bi-a. 26Nka ábɛɛ bili-la ǹʼna kì, sabu ábɛɛ mɔ́ɔ́n saa kiri tɔri ri kì. 27Mɔ́ɔ́n saa kiri i arì tɔɔnye-a míŋ wulu ki tɛ, míŋ i yìrì tɔ-ri, niŋ fa yìrì i ǹʼpa-ri míŋ cɛfan. 28Niŋ ɲaan ki tɛ, míŋ i ɲaninkulutɔnbi kɔbali ki wɔri-ra yìrì tɛ. Yìrì ra haliki fɛsɛfɛsɛ kì, koŋ tɔri ra so yìrì mwu san-i míŋ wu kì. 29Míŋ Tiŋ Kirinŋ wɔ̀ yìrì wɔri-i míŋ tɛ, kíbɛɛ gbɛ-i finŋ bataa wu. Koŋ i nmaŋ, nwɔ̀tiŋ a so yìrì mwu san-i míŋ Tiŋ ki gbɛfɛ kì. 30Míŋ fa ńʼTiŋ ki i koŋ tenŋ i. »

31Niŋ wulu ki bimaan ki sun, Yawutu kiri i kwɔ ri shi, tu arì ra Yesu jɛri, arì i ntiŋ kilɛn niŋ mani nu sɛbɛ.

32Niŋ ki ra, Yesu tu kí tɛ sɛbɛ : « Míŋ mabi shɔɔrinŋ wɔ̀ri ma ji-i ábɛɛ wu, ŋì i po ńʼTiŋ Kirinŋ gbɛ, niŋ mabi ki danwɔ tenŋ ábɛɛ po bo-a míŋ jɛri ki sun, á i ńʼkilɛnmaŋ ceeli-li? »

33Yawutu kiri i Yesu rupwulu tu : « Mabi shɔɔrinŋ bi yibɛɛ po bo-a miŋ kilɛn sun kì duu Kirinŋ tɔ li bi, miŋ koŋ gbansanŋ ki, miŋ i nʼyɛri ji-ri Kirinŋ i wa? »

34Yesu tu kí tɛ : « Ǹʼsɛbɛ ábɔɔ Sariya#10.34 Yawutu kiri wuru Kirinŋ wɔ wulu ki bataa dɔri-ra tu Sariya. sɛbɛ ki mani ki bɛɛ ru tu, Kirinŋ ǹʼbi tu ábɛɛ kirinŋ ni i kì wa? 35Kirinŋ wɔ wulu ki so-a rapwulu-i kì, niŋ ɲaan ki tɛ, Kirinŋ wɔ wulu ki wɔri-i nwɔ̀ri tɛ, ŋì nini dɔri-i tu ‹ kirinŋ ni. › 36A ǹʼji niŋ ɲaan ki tɛ, Kirinŋ mínwɔ̀ ɲaannashi-i, ŋì i ńʼcin na juniɲa nu, ábɛɛ tu míŋ Kirinŋ tɔ li, sabu tu míŋ ǹʼbi tu míŋ Kirinŋ Danshuru wa? 37A míŋ ji ńʼTiŋ ki mabi kiri ma-a kì, ábɛɛ bili ŋuŋ kɔ míŋ na kì. 38Nka a míŋ ji kí mabi kiri ma-a, hali ábɛɛ bili míŋ na kì, á bili niŋ mabi kiri ra, tu nini po Kirinŋ nu, nwɔma á i so ǹʼtɔ fɔɔ, tu míŋ Tiŋ ki míŋ nu, míŋ i ji ńʼTiŋ ki ru. »

39Niŋ ki ra, kí i Yesu pamaŋ ceeli-li sɛbɛ, nka ntiŋ i a mwu kí wu, ntiŋ i tiri. 40Niŋ kɔɔtɛ, Yesu i fwuu po Yurudɛn baa ki kɔɔtɛ. Yuhana wuru konaŋ ki wu-a mani wɔ̀ ru fɔlɔfɔlɔ, ntiŋ i ta niŋ mani nu, ntiŋ i waaci pyaanŋ ma nmaŋ. 41Koŋ mwɔɔnna i na ntiŋ cɛfan niŋ mani ki ru. Kí wuru ǹʼbi-a tu : « Yuhana botɔnsunbi ri ma kì, nka ntiŋ wuru finŋ woo finŋ bi-a koŋ ka bi ki sun, niŋ bataa wuru sɛli i. » 42Niŋ mani ki ru, koŋ mwɔɔnna i bili Yesu ra.

Currently Selected:

Yuhana 10: JOB

Highlight

Copy