Mateus 2

Matenek nain sira hosi lorosae mai adora Jesus

1Jesus moris iha aldeia Belém iha provinsia Judeia. Iha tempu nebaa liurai Erodes mak ukun rai nee. Iha loron ida matenek nain balu nebee hatene siik sinal iha fitun, sira mai hosi rai dook, hosi parte lorosae. Too iha sidade Jerusalém, 2sira husu, “Ema Judeu sira nia liurai nebee foin moris nee iha nebee? Ami haree fitun ida iha parte lorosae nebee foo sinal dehan Nia moris ona. Tanba nee mak ami mai adora Nia.” 3Bainhira liurai Erodes rona sira nia liafuan nunee, nia komesa hanoin barak, no mos povu iha Jerusalém tomak.

4Depois Erodes halibur nai-lulik nia ulun sira ho mestri relijiaun sira hotu hodi husu, “Kristu nebee Maromak promete hori uluk ona atu haruka mai nee, sei moris iha nebee?”

5Sira hataan, “Iha aldeia Belém iha provinsia Judeia. Tanba hori uluk kedas Maromak nia profeta hakerek dehan,

6‘Imi ema Belém, iha provinsia Judeia,

keta hanoin dehan imi nia aldeia mak kiik liu iha rai Judeia nee.

Tanba ukun nain ida sei mai hosi imi nia rain,

Nia mak sei sai bibi atan ba Hau nia povu Israel.’ ”#Miquéias 5:1; 2 Samuel 5:2

7Rona nunee, Erodes bolu nonook matenek nain sira nee hodi husu ba sira, hori-bainhira loos mak fitun nee mosu. I sira mos esplika ba nia. 8Depois nia haruka sira baa Belém. Nia hameno dehan, “Senhor sira baa buka didiak Labarik nee. Bainhira hetan ona Nia, imi fila fali mai foo hatene ba hau, para hau mos bele baa adora Nia.”

9-10Rona tiha liurai nia liafuan, matenek nain sira nee komesa lao baa dadauk. Derepenti fitun nebee sira uluk haree iha lorosae nee, mosu fila fali iha sira nia oin. I sira lao tuir fitun nee too fitun nee para iha fatin nebee Labarik nee iha ba. Haree nunee, sira kontenti teb-tebes.

11Too iha nebaa, sira tama iha uma laran haree Labarik nee ho Nia inan Maria, i sira hakneak hodi adora Nia. Depois sira hasai sira nia prezenti karun teb-tebes, sira foo ba Labarik nee osan mean, ai been morin ho mina morin diak nian.

12Liu tiha nee Maromak foo hanoin ba sira liu hosi mehi katak sira la bele fila fali ba Erodes. Entaun sira fila ba sira nia rain liu hosi dalan seluk.

José lori Jesus ho Maria halai ba rai Ejitu

13Bainhira matenek nain sira fila tiha, Nai Maromak nia anju mai hatudu aan ba José liu hosi mehi. Anju nee foo hatene dehan, “Hadeer ona! Lori Labarik nee ho Nia inan halai ba iha rai Ejitu, tanba Erodes buka hela Labarik nee atu oho Nia. Hela iha nebaa too hau foo hatene fali ba o katak imi bele fila.”

14Iha kalan nee kedas, José hadeer lori Labarik nee ho Nia inan halai ba Ejitu, 15i sira hela iha nebaa too Erodes mate. Uluk kedas Nai Maromak koalia liu hosi Nia profeta dehan, “Hau bolu Hau nia Oan sai hosi Ejitu”.#Oséias 11:1

Erodes oho labarik kiik-oan sira iha Belém

16Bainhira liurai Erodes hatene katak, matenek nain sira halo beik tiha nia hodi fila liu hosi dalan seluk, nia hirus teb-tebes. I nia foo orden ba soldadu sira baa Belém ho rai nebee besik hodi oho hotu labarik mane kiik-oan nebee tinan rua mai kraik. Nia foo orden nunee tuir informasaun hosi matenek nain sira kona ba tempu nebee mak sira haree fitun nee mosu.

17Buat nee akontese tuir saida mak Maromak nia profeta Jeremias foo sai uluk kedas dehan,

18“Ema rona lian hakilar iha Rama.#2:18 Rama nee, sidade ida besik sidade Jerusalem.

Ema tanis halerik ho laran susar teb-tebes.

Raquel tanis halerik,

tanba nia oan sira mate hotu ona.

Ema hamaus nia, maibee nia lakohi rona,

tanba nia oan sira la iha tiha ona.”#Jeremias 31:15

José lori Jesus ho Maria fila hosi Ejitu

19Ikus mai liurai Erodes mate. Iha tempu nebaa Nai Maromak nia anju hatudu aan ba José liu hosi mehi iha rai Ejitu. 20Anju nee dehan, “Hadeer ona! Lori Labarik nee ho Nia inan fila fali ba rai Israel, tanba ema nebee hakarak oho Labarik nee mate tiha ona.” 21Entaun José hadeer i lori Labarik nee ho Nia inan fila fali ba Israel.

22Maibee too iha nebaa, José rona katak liurai Erodes nia oan Arquelau mak ukun fali iha provinsia Judeia, nunee nia tauk atu fila ba nebaa. Maromak mos foo hanoin ba nia liu hosi mehi. Entaun sira baa hela fali iha provinsia Galileia, 23iha aldeia ida naran Nazaré. Nunee buat nebee profeta sira uluk koalia akontese duni. Sira dehan, “Ema sei bolu Nia ema Nazaré.”#Marcos 1:24; Lucas 2:39; João 1:45

Currently Selected:

Mateus 2: BTDT

Highlight

Copy