Mateus 17

Nai Jesus nakfilak Aan iha foho leten

(Marcos 9:2-13; Lucas 9:28-36)

1Liu tiha loron neen, Jesus lori Pedro, Tiago ho João Tiago nia alin, sira mes-mesak baa sae foho aas ida. 2Too iha nebaa Nia eskolanti nain tolu nee haree Jesus nakfilak Aan tiha. Nia oin nabilan hanesan loromatan, i Nia hena sai mutin nabilan. 3Derepenti sira mos haree profeta Moisés ho Elias koalia hela ho Jesus. 4Depois Pedro dehan ba Jesus, “Nai, ita hamutuk iha nee, furak teb-tebes. Se Nai hakarak, hau halo tenda tolu iha nee, ida ba Ita Boot, ida ba Moisés, ho ida tan ba Elias.”

5Pedro sei koalia hela nunee, derepenti kalohan nabilan ida tuun mai falun tiha sira. I lian ida sai hosi kalohan nee dehan, “Ida nee Hau nia Oan doben. Nia halo Hau nia laran haksolok teb-tebes. Imi tenki rona Nia!”#2 Pedro 1:17-18; Jenesis 22:2; Salmu sira 2:7; Isaías 42:1; Mateus 3:17; 12:18; Marcos 1:11; Lucas 3:22; Deuteronomio 18:15

6Rona lian nee, sira nain tolu tauk teb-tebes, i sira taka rabat iha rai. 7Maibee Jesus mai kaer sira hodi dehan, “Hamriik ona! Keta tauk.” 8Bainhira sira hateke ba leten, sira la haree tan ema seluk, so Jesus mesak deit.

9Hotu tiha Jesus ho Nia eskolanti sira tuun fali hosi foho. Sira lao tuun dadauk, Jesus bandu dehan, “Saida mak ohin imi haree nee, la bele hatete ba ema ida. Bainhira Hau, Ema Oan, moris fali hosi mate mak foin imi bele foo sai ba ema.”

10Depois Nia eskolanti sira husu ba Jesus dehan, “Se nunee, nusaa mak mestri relijiaun sira dehan, Elias tenki mai uluk mak foin Kristu mai?”#Malaquias 4:5

11Jesus hataan, “Loos duni, Elias mai atu hadia buat hotu-hotu. 12Maibee Hau hatete ba imi, Elias mai tiha ona, i ema la hatene nia, too halo terus nia tuir sira nia hakarak. Nunee mos Hau, Ema Oan sira sei halo terus hanesan nee.”#Mateus 11:14

13Rona nunee, Nia eskolanti sira foin komprende katak Elias ida nebee Jesus konta nee mak João Sarani Nain.

Nai Jesus duni sai espiritu aat hosi labarik ida

(Marcos 9:14-29; Lucas 9:37-43a)

14Bainhira Jesus ho Nia eskolanti sira fila fali ba iha ema barak nee, iha mane ida mai hakneak iha Jesus nia oin 15hodi dehan, “Nai, hanoin hau nia oan baa! Nia moras bibi maten, i terus teb-tebes. Dala barak nia monu tama ba ahi laran ka bee laran. 16Hau lori ona nia ba Ita Boot nia eskolanti sira, maibee sira la bele kura nia.”

17Jesus siak sira hotu dehan, “Imi nee jerasaun nebee la fiar ba Maromak i sempre halo aat. Hau tenki hela ho imi too bainhira tan? Hau tenki pasiensia ho imi too iha nebee? Lori labarik nee mai.”

18Depois Jesus foo orden makaas ba espiritu aat nee. Entaun espiritu aat mos sai hosi labarik nee, i labarik nee diak kedas.

19Hotu tiha Jesus mesak tama ba iha fatin ida, i Nia eskolanti sira mai husu ba Nia dehan, “Nusaa mak ami ohin la bele duni sai espiritu aat nee?”

20Jesus hataan, “Tanba imi nia fiar fraku. Hau dehan loloos ba imi, se imi nia fiar kiik-oan deit hanesan ai musan kiik oan ida mos, imi bele foo orden ba foho ida dehan ‘Muda hosi nee, baa iha nebaa.’ I foho nee sei muda duni. La iha buat ida nebee imi la bele halo.#Mateus 21:21; Marcos 11:23; 1 Korintu 13:2 21Maibee atu duni sai espiritu aat hanesan ida ohin nee, imi tenki halo orasaun i halo jejun.”#17:21:Dokumentu Biblia nian hosi tempu antigu barak. Versikulu 21 nee tama iha dokumentu nee balu, maibee iha dokumentu nebee antigu liu la tama.

Nai Jesus koalia kona ba Nia mate

(Marcos 9:30-32; Lucas 9:43b-45)

22Iha loron ida, Jesus ho Nia eskolanti sira halibur hamutuk iha provinsia Galileia. Iha nebaa Jesus hatete ba sira, “La kleur tan, ema sei faan Hau, Ema Oan, ba ema aat. 23Sira sei oho Hau, maibee iha loron tolu Hau moris fali.” Rona nunee, Nia eskolanti sira tristi teb-tebes.

Nai Jesus selu impostu ba Maromak nia Uma Kreda Boot

24Jesus ho Nia eskolanti sira too iha sidade Kafarnaum. Iha nebaa kobrador impostu balu mai husu ba Pedro dehan, “O nia mestri baibain selu impostu ba iha Uma Kreda Boot ka lae?”#Ezodu 30:13; 38:26

25Pedro hataan dehan, “Nia selu.”

Bainhira Pedro tama ba uma laran, Jesus husu kedas ba nia dehan, “Simão, hanoin took. Liurai sira iha mundu nee husu impostu hosi see? Hosi sira nia povu rasik ka hosi ema seluk?”

26Pedro hataan, “Hosi ema seluk.” Jesus dehan, “Se nunee, liurai nia povu rasik la selu ida.

27Maibee atu sira la bele laran moras ba ita tanba deit ita la selu impostu nee, o baa kail ikan iha tasi. Ikan primeiru nebee o hetan, loke nia ibun, hodi foti osan mutin ida iha ikan nee nia ibun laran. Osan nee too hodi selu ita nain rua nia impostu.”

Currently Selected:

Mateus 17: BTDT

Highlight

Copy