Mateus 16

Ema Farizeu ho Saduseu husu Nai Jesus atu hatudu sinal

(Marcos 8:11-13; Lucas 12:54-56)

1Iha loron ida ema balu hosi grupu relijiaun Farizeu ho Saduseu mai koko Jesus. Sira husu para Nia hatudu tan sinal ida ba sira hodi hatudu katak Nia kbiit nee mai duni hosi Maromak.#Mateus 12:38; Lucas 11:16

2Maibee Jesus hataan, “Bainhira loromatan atu besik monu, imi haree kalohan sai mean, imi dehan, aban la udan. 3Iha dadeer-saan, bainhira imi haree loromatan leno kalohan nakukun, imi dehan, orsida udan. Imi hatene sinal nebee mosu iha kalohan. Maibee sinal nebee akontese iha tempu nee, imi la hatene. 4Imi agora nee mesak aat deit i la foo laran ba Maromak! Imi husu Hau hatudu sinal atu imi bele fiar. Maibee Hau sei la hatudu. Milagre nebee uluk Maromak halo liu hosi profeta Jonas too ona.” Koalia tiha hotu, Jesus lao husik tiha sira.#Mateus 12:39; Lucas 11:29

Kuidadu ho ema Farizeu ho Saduseu sira nia hanorin

(Marcos 8:14-21)

5Jesus ho Nia eskolanti sira baa iha tasi sorin. Too iha nebaa Nia eskolanti sira foin hanoin katak sira haluha lori paun. 6Depois Jesus hatete ba sira, “Matan moris neon nain! Hadook aan hosi ema Farizeu ho Saduseu sira nia fermentu.”#Lucas 12:1

7Nunee Nia eskolanti sira komesa hatete ba malu dehan, “Nia koalia hanesan nee tanba ita la lori paun.”

8Jesus hatene hela saida mak sira koalia. Entaun Nia hatete, “Imi nia fiar fraku! Nusaa mak imi diskuti malu fali kona ba la iha paun? 9Imi seidauk komprende ka? Imi haluha ona paun fuan lima nebee Hau fahe ba ema rihun lima? Iha tempu nebaa imi tau hamutuk hahaan nebee resin too bote hira?#Mateus 14:17-21 10Depois oinsaa ho paun fuan hitu nebee Hau fahe ba ema rihun haat? Imi tau hamutuk hahaan nebee resin too bote hira?#Mateus 15:34-38 11Nusaa mak imi la komprende katak Hau laos koalia kona ba paun. Maibee Hau foo hanoin ba imi atu kuidadu ho ema Farizeu ho Saduseu sira nia fermentu.”

12Nee mak foin Nia eskolanti sira komprende katak, Nia laos koalia kona ba fermentu nebee mak halo trigu sae. Maibee Nia koalia kona ba ema Farizeu ho Saduseu sira nia hanorin nebee mak lori ema lao sala dalan.

Pedro rekonhese Nai Jesus mak Kristu

(Marcos 8:27-30; Lucas 9:18-21)

13Depois Jesus too iha rejiaun Sezareia Filipi. Iha nebaa Nia husu ba Nia eskolanti sira dehan, “Tuir ema konta, Hau, Ema Oan nee see?”

14Sira hataan, “Iha balu dehan, Ita Boot João Sarani Nain. Balu tan dehan, profeta Elias. Seluk tan dehan, Jeremias ka profeta ida seluk.”#Mateus 14:1-2; Marcos 6:14-15; Lucas 9:7-8

15Jesus husu tan, “Maibee, tuir imi rasik, Hau nee see?”

16Simão Pedro hataan, “Ita Boot nee Kristu, Ida nebee Maromak promete ona hori uluk atu haruka mai. Ita Boot mak Maromak nebee Moris nia Oan.”#João 6:68-69

17Jesus dehan, “Simão, Jonas nia oan, o hetan bensaun, tanba laos ema mak foo hatene ba o kona ba buat nee. Maibee Hau nia Aman iha lalehan mak foo hatene ba o. 18Hau hatete ba o, Hau bolu o Pedro, nee dehan katak fatuk isin. Hau sei harii Hau nia igreja iha fatuk nee nia leten, i infernu mos la bele domina no manaan sira. 19Hau sei foo xavi reinu lalehan nian ba o. Saida mak o bandu iha mundu nee, iha lalehan mos bandu. I saida mak o foo lisensa atu halo iha mundu nee, iha lalehan mos foo lisensa.”#Mateus 18:18; João 20:23

20Depois Jesus bandu Nia eskolanti sira para la bele hatete sai ba see-see deit katak Nia mak Kristu.

Nai Jesus foo sai katak Nia sei mate i moris fali

(Marcos 8:31—9:1; Lucas 9:22-27)

21Komesa hosi loron nee, Jesus hatete sai ba Nia eskolanti sira katak, Nia tenki baa iha Jerusalém i tenki simu terus oi-oin. Nai ulun Judeu sira, nai-lulik nia ulun sira ho mestri relijiaun sira sei halo terus Nia. Ema sei oho tiha Nia, maibee iha loron tolu, Nia sei moris fila fali.

22Rona nunee, Pedro dada tiha Jesus ba sorin hodi siak Nia dehan, “Nai! Husu boot Maromak sei la foo lisensa atu buat nee akontese.”

23Maibee Jesus fila ba Pedro hodi siak fali nia dehan, “Satanás, sai tiha hosi nee! O atu taka dalan fali mai Hau! O nia hanoin nee laos mai hosi Maromak, maibee mai hosi ema nia hanoin.”

24Depois Jesus dehan ba Nia eskolanti sira, “See mak hakarak tuir Hau, nia tenki nega nia aan, lori nia krus i tuir Hau. Nee hanesan husik tiha nia hakarak rasik, tenki prontu simu terus, hanesan ema nebee loro-loron lori nia krus too mate. I nia tenki tuir Hau nafatin.#Mateus 10:38; Lucas 14:27 25Tanba see mak hakarak salva nia aan, nia sei lakon nia moris. I see mak lakon nia moris tanba tuir Hau, nia sei hetan moris rohan-laek.#Mateus 10:39; Lucas 17:33; João 12:25 26Folin saida se ema ida nian tiha mundu tomak maibee nia klamar lakon? La iha buat ida mak nia bele foo hodi troka nia klamar.

27Tanba aban-bainrua Hau, Ema Oan sei fila fali mai hosi lalehan ho Hau nia Aman nia naroman nabilan, hamutuk ho Nia anju sira. Iha tempu nee mak Hau sei foo ba ema ida-idak tuir saida mak sira halo.#Mateus 25:31; Salmu sira 62:12; Roma 2:6 28Hau hatete loloos ba imi, hosi imi sira nee, balu sei moris too haree Hau, Ema Oan mai ukun nudar Liurai, mak foin sira mate.”

Currently Selected:

Mateus 16: BTDT

Highlight

Copy