Mateus 14

Erodes haruka tesi João Sarani Nain nia kakorok

(Marcos 6:14-29; Lucas 9:7-9)

1Iha tempu nebaa liurai Erodes mak ukun iha provinsia Galileia. Nia rona buat barak kona ba Jesus, 2too nia hatete ba nia funsionariu sira, “Ema nee João Sarani Nain mak moris fali ona hosi mate. Nee mak Nia iha kbiit hodi halo milagre.”

3-4João Sarani Nain ho Erodes nia istoria nunee: Uluk Erodes kaben fali nia alin Filipe nia kaben Erodias. Iha tempu nebaa, João foo sala fila-fila dehan, “Ita la bele hola fali ita nia alin nia kaben, hahalok nee kontra Maromak nia lei!” Tanba nee Erodes haruka ema kaer João i futu hodi ba hatama iha kadeia.#Lucas 3:19-20; Levitiku 18:16; 20:21

5Tuir loloos Erodes hakarak oho João, maibee nia tauk tanba povu hanoin dehan João nee Maromak nia profeta ida.

6Iha loron ida Erodes halo nia tinan, i Erodias nia oan feto mai dansa iha bainaka sira nia oin. Oan feto nia dansa nee halo Erodes nia laran kontenti teb-tebes, 7too nia jura ba oan feto nee atu foo saida deit mak nia husu.

8Rona tiha juramentu nee, oan feto nia inan hamaus nia atu baa husu João Sarani Nain nia ulun. Entaun oan feto nee husu ba Erodes, “Hau hakarak João nia ulun, tau iha bandeja ida, entrega mai hau.”

9Liurai laran susar teb-tebes. Maibee tanba nia jura tiha ona iha bainaka sira nia oin, entaun nia haruka ema baa halo tuir saida mak oan feto nee husu. 10Sira baa iha kadeia hodi tesi tiha João nia kakorok, 11i tau iha bandeja foo ba oan feto nee. Depois oan feto nee lori baa entrega ba nia inan.

12Hotu tiha João nia eskolanti sira baa lori sai João nia mate isin baa hakoi tiha. Depois sira baa foo hatene ba Jesus.

Nai Jesus foo hahaan ba ema rihun lima resin

(Marcos 6:30-44; Lucas 9:10-17; João 6:1-14)

13Bainhira Jesus rona dehan ema oho tiha ona João, Nia husik tiha fatin nee hodi sae bero ba iha rai fuik ida. Maibee ema rona katak Nia atu baa iha nebaa, nunee ema barak sai hosi aldeia-aldeia lao lalais liu hosi rai maran tuir Jesus. 14Bainhira Jesus tuun hosi bero, Nia haree ema barak hein hela Nia iha nebaa. Nia hanoin teb-tebes sira, i Nia kura sira nebee moras.

15Bainhira besik kalan ona, Jesus nia eskolanti sira mai foo hatene ba Nia dehan, “Iha nee rai fuik, rai mos besik kalan ona. Diak liu haruka ema sira nee baa iha aldeia hodi sosa hahaan ba sira rasik.”

16Maibee Jesus dehan, “Lae, sira la presiza baa sosa hahaan. Imi mak foo hahaan ba sira.”

17Nia eskolanti sira hataan, “Ami iha deit paun fuan lima ho ikan rua.”

18Jesus hataan fali, “Lori mai Hau.” 19Depois Jesus haruka ema barak nee tuur hotu iha duut leten. Nia foti paun fuan lima ho ikan rua nee, i hateke ba lalehan hodi foo agradese ba Maromak. Nia silu paun halo rohan-rohan, i foo ba Nia eskolanti sira hodi baa fahe ba ema barak nee. 20Sira hotu haan too bosu, hahaan mos resin. Nia eskolanti sira tau hamutuk hahaan resin sira nee iha bote sanulu resin rua nakonu. 21Ema nebee haan nee mais-ou-menus rihun lima, mane deit, feto ho labarik la sura.

Nai Jesus lao iha bee leten

(Marcos 6:45-52; João 6:16-21)

22Hotu tiha, Jesus haruka kedas Nia eskolanti sira sae bero hodi baa uluk iha tasi sorin. Maibee Nia sei hela iha nebaa, hodi haruka ema barak nee fila. 23Bainhira sira fila hotu ona, Jesus sae ba foho ida hodi halo orasaun mesak. Rai besik kalan ona, Nia mes-mesak iha foho leten. 24Iha momentu nebaa, bero nebee Nia eskolanti sira sae nee iha tiha ona tasi klaran. Derepenti bero nee hasoru anin boot, laloran mos baku makaas. 25Iha dadeer-saan nakukun Jesus lao iha bee leten baa hasoru Nia eskolanti sira. 26Bainhira Nia eskolanti sira haree Nia lao iha bee leten, sira tauk hodi hakilar makaas dehan, “Mate klamar!”

27Maibee Jesus hataan kedas, “Hakmatek baa! Hau mak nee. La bele tauk!”

28Pedro hataan, “Nai, se Ita Boot mak nee duni, entaun haruka hau lao iha bee leten baa hasoru Ita Boot.”

29Jesus dehan, “Mai baa!” Nunee Pedro tuun hosi bero i lao iha bee leten atu baa Jesus. 30Maibee bainhira Pedro haree anin boot, nia komesa tauk i mout dadauk iha tasi laran. Nia hakilar makaas ba Jesus dehan, “Nai, salva hau baa!”

31Jesus lolo kedas Nia liman ba Pedro hodi kaer nia dehan, “O nia fiar nee fraku! Nusaa mak o duvida hanesan nee?”

32Depois sira nain rua sae ba iha bero laran. I anin mos para kedas. 33Sira hotu nebee iha bero laran komesa adora Jesus dehan, “Loos duni. Ita Boot mak Maromak nia Oan!”

Nai Jesus kura ema moras iha Genesare

(Marcos 6:53-56)

34Bainhira too iha tasi sorin, sira tuun iha rai Genesare. 35Ema iha nebaa konhese kedas Jesus, i sira baa foo hatene ema iha rejiaun nee tomak. Nunee ema lori sira nia maluk nebee moras ba Jesus. 36Sira husu ba Jesus atu ema moras sira nee bele kona deit Nia hena rohan. I ema moras sira hotu nebee kona Nia hena rohan, sira hetan kura.

Currently Selected:

Mateus 14: BTDT

Highlight

Copy