Mateus 13

Komparasaun kona ba ema nebee kari fini

(Marcos 4:1-9; Lucas 8:4-8)

1Iha loron nebaa, Jesus sai hosi uma nee i baa tuur iha tasi ibun. 2Ema barak nadodon mai haleu Nia, nunee Nia baa tuur iha bero laran, i ema sira nee hamriik deit iha tasi ibun.#Lucas 5:1-3 3Nia koalia buat barak liu hosi komparasaun, nunee: “Iha toos nain ida baa kari fini iha nia toos. 4Bainhira nia kari fini nee, balu monu iha dalan. I manu fuik mai hili tiha hotu.

5Fini balu monu iha rai fatuk laran nebee iha rai ituan deit. La kleur fini nee moris duni. 6Maibee bainhira loro matan sae, loro manas sunu fini nebee foin moris sai mai nee too namlaik tiha, tanba abut la tama iha rai okos.

7Fini balu monu iha duut tarak laran. Maibee duut tarak aumenta boot i habit fini nee too mate.

8Iha fini balu tan monu iha rai bokur, fini nee moris too foo isin barak, balu too musan dala atus ida, balu too musan dala neen-nulu i balu tan too dala tolu-nulu.

9Imi nebee iha tilun, rona didiak baa!”

Tanba saa mak Nai Jesus hanorin uza komparasaun?

(Marcos 4:10-12; Lucas 8:9-10)

10Depois Jesus nia eskolanti sira mai i husu Nia dehan, “Nusaa mak Ita Boot hanorin sira liu hosi komparasaun?”

11Jesus hataan, “Uluk ema seidauk hatene, oinsaa mak Maromak ukun nudar Liurai. Agora Hau foo sai segredu Reinu lalehan nian ba imi, maibee ba ema sira nee lae. 12Tanba ema nebee komprende ona, Maromak sei halo nia komprende liu tan. Maibee ema nebee lakohi hatene, buat ituan nebee nia komprende tiha ona mos, Maromak sei hasai tiha hosi nia hanoin.#Mateus 25:29; Marcos 4:25; Lucas 8:18; 19:26 13Hau hanorin sira liu hosi komparasaun tanba:

‘Sira haree hela,

maibee hanesan la haree.

Sira rona hela,

maibee hanesan la rona i la komprende.’

14Maromak nia Liafuan liu hosi profeta Isaías kona loos sira. Maromak dehan,

‘Imi sei rona bebeik,

maibee la komprende nafatin.

Imi sei haree bebeik,

maibee nafatin la konsidera.

15Tanba povu nee nia fuan toos tiha ona,

sira lakohi rona ho sira nia tilun,

sira nia matan taka metin.

Se lae, sira bele haree ho sira nia matan,

bele rona ho sira nia tilun,

bele komprende iha sira nia laran.

I sira fila fali mai Hau, nunee Hau sei kura sira.’#Isaías 6:9-10

16Maibee imi nee hetan bensaun tanba imi nia matan haree, imi nia tilun rona. 17Hau hatete loloos ba imi, uluk profeta barak ho ema seluk nebee moris loos, hakarak teb-tebes atu haree buat nebee mak agora imi haree, maibee sira la haree. Sira hakarak teb-tebes atu rona buat nebee agora imi rona, maibee sira la rona.”#Lucas 10:23-24

Komparasaun kona ba kari fini nia signifikadu

(Marcos 4:13-20; Lucas 8:11-15)

18“Tanba nee, rona mai signifikadu hosi komparasaun kona ba kari fini nee. 19Fini nebee monu iha dalan mak ema nebee rona Maromak nia Liafuan kona ba reinu lalehan, maibee nia la komprende. Depois Aat nain mai hadau tiha liafuan nebee iha tiha ona nia laran.

20Fini nebee monu iha rai fatuk laran mak ema nebee rona Maromak nia Liafuan, i simu kedas ho laran haksolok. 21Maibee liafuan nee la metin i aguenta lalais deit. Bainhira susar kona nia, ka ema seluk halo terus nia tanba nia simu liafuan nee, nia husik tiha kedas.

22Fini nebee monu iha duut tarak laran mak ema nebee rona Maromak nia Liafuan, maibee nia preokupa ho nia moris loro-loron nian, i matan naklosu ba rikusoin mundu nian. Nia preokupasaun nee la foo fatin ba Maromak nia Liafuan, nunee la halo ema nee buras.

23Maibee fini nebee monu iha rai bokur mak ema nebee rona i komprende Maromak nia Liafuan. Nunee ema nee moris tuir, hanesan fini nebee moris too foo isin, balu too musan dala atus ida, balu musan dala neen-nulu, i balu tan musan dala tolu-nulu.”

Komparasaun kona ba duut manlai iha toos laran

24Depois Jesus halo tan komparasaun dehan, “Reinu lalehan nian hanesan toos nain ida baa kari fini diak iha nia toos. 25Kalan boot ema hotu toba dukur tiha, toos nain nia inimigu ida mai kari tan duut manlai nia musan ba iha toos nee nia laran. Hotu tiha inimigu nee fila. 26Bainhira fini nee moris i fulin komesa sai mai, duut manlai mos moris buras. 27Haree nunee, atan sira nebee serbisu iha toos nee baa foo hatene toos nain dehan, ‘Patraun, uluk ita kari deit fini diak. Nusaa mak duut manlai mosu hotu?’

28Toos nain nee hataan, ‘Hau nia inimigu mak halo ida nee.’

Atan sira dehan tan, ‘Se patraun hakarak, ami baa fokit sai tiha.’

29Maibee toos nain hataan dehan, ‘La bele. Keta fokit lai, tanba se imi fokit sai duut manlai nee, imi bele fokit sai mos trigu nebee moris ona nee. 30Husik sira moris hamutuk. Bainhira too nia tempu atu koa mak hau haruka ema nebee serbisu baa fokit sai duut nee hodi futu hamutuk ba sunu tiha. Depois toos nia rezultadu tau hamutuk hodi rai iha armazen laran.’ ”

Komparasaun kona ba ai musan ho fermentu

(Marcos 4:30-32; Lucas 13:18-19)

31Jesus halo tan komparasaun dehan, “Maromak nia reinu hanesan ai musan kiik liu nebee ema kari iha nia toos. 32Maski ai musan nee kiik liu ai musan sira seluk, maibee bainhira nia moris ona, ai musan nee boot liu modo sira seluk i buras too sai ai huun boot ida. Nunee manu fuik sira mai halo knuuk iha nia sanak.”

33Jesus halo tan komparasaun seluk dehan, “Maromak nia reinu hanesan fermentu nebee senhora ida kahur ho trigu saka ida hodi halo paun. Iha ikus, fermentu ituan nee halo trigu tomak sae.”#13:33:Nunee Nai Jesus hanorin katak, maski ema ituan hakruuk ba Maromak nudar Liurai, maibee bele muda ema barak nia moris.

Nai Jesus sempre uza komparasaun hodi hanorin buat foun

(Marcos 4:33-34)

34Jesus hanorin reinu lalehan ba ema lubun boot nee ho komparasaun oi-oin. Nia sempre hanorin sira uza komparasaun. 35Nunee Nia halo tuir saida mak Maromak nia profeta hakerek tiha ona dehan,

“Hau sei hanorin uza komparasaun.

Hau sei foo sai buat nebee durante nee subar hela,

komesa hosi Maromak halo mundu too agora.”#Salmu sira 78:2

Komparasaun kona ba duut manlai nia signifikadu

36Depois Jesus sai tiha hosi ema barak nee nia leet hodi tama ba iha uma laran. Nia eskolanti sira mai tuir Nia hodi husu dehan, “Esplika mai ami komparasaun kona ba duut manlai nee.”

37Jesus hataan dehan, “Ema nebee mak kari fini diak mak Hau, Ema Oan. 38Toos mak mundu nee. Fini diak mak Maromak nia reinu, i duut manlai mak ema nebee tuir Aat nain nia oan sira. 39Inimigu nebee kari duut manlai nee mak diabu. Tempu kolheita mak bainhira mundu remata. I ema nebee halo kolheita mak Maromak nia anju sira. 40Hanesan duut manlai nebee fokit tiha hodi sunu iha ahi laran, nunee mos bainhira mundu nee remata. 41Hau, Ema Oan sei haruka Hau nia anju sira baa iha Hau nia povu nia leet hodi halibur see deit mak halo sala no mos ema nebee mak halo ema seluk monu ba sala. 42Hau nia anju sira sei soe ema aat sira nee ba iha ahi lakan laran, iha nebaa sira sei tanis hakilar i ruun nehan. 43Maibee ema nebee moris loos, sira sei tama ba lalehan hodi hela hamutuk ho Aman Maromak. Iha nebaa sira sei nabilan hanesan loromatan. See mak iha tilun, rona didiak baa!”

Maromak nia reinu folin boot liu rikusoin hotu-hotu

44“Maromak nia reinu, bele kompara ho rikusoin ida karun teb-tebes nebee subar hela iha rai okos. Iha ema ida hetan rikusoin nee. Nia kontenti loos, entaun nia hakoi fila fali, i baa faan tiha nia sasaan hotu-hotu hodi sosa rai nee, para rikusoin nee bele sai ninian.

45Maromak nia reinu, bele mos kompara hanesan nee: Iha kontratu nain ida buka hela buat murak-mean nebee furak teb-tebes atu sosa. 46Bainhira nia hetan buat murak-mean nebee folin karun teb-tebes, nia baa faan tiha nia sasaan hotu-hotu hodi sosa buat murak-mean nee.”

Komparasaun kona ba redi

47“Maromak nia reinu bele mos kompara ho redi nebee peskador sira hatuun ba iha tasi laran hodi kaer ikan oi-oin. 48Bainhira redi nee nakonu ona ho ikan, sira dada sai ba iha tasi ibun. Depois sira tuur hodi halibur ikan nebee diak i tau ba nia fatin, i ikan nebee aat, sira soe tiha.

49Nunee mos bainhira mundu nee remata, anju sira sei mai haketak tiha ema aat hosi ema nebee mak moris loos. 50Ema aat, sei soe ba iha ahi lakan laran, iha nebaa sira sei tanis hakilar i ruun nehan.”

51Depois Jesus husu Nia eskolanti sira dehan, “Buat nebee ohin Hau hanorin nee imi komprende hotu ka lae?”

Nia eskolanti sira hataan, “Ami komprende.”

52Jesus dehan, “Tanba nee, mestri relijiaun ida-idak nebee simu hanorin kona ba reinu lalehan nian, hanesan uma nain nebee hasai rikusoin foun no rikusoin tuan hosi sira nia kofre.”

Ema la simu Nai Jesus iha Nazaré

(Marcos 6:1-6; Lucas 4:16-30)

53Bainhira Jesus hanorin liu hosi komparasaun hirak nee hotu, Nia husik tiha fatin nee 54hodi baa fali iha Nia aldeia rasik. Iha nebaa Nia tama iha uma kreda hodi hanorin. Ema nebee rona Nia admira hodi husu ba malu, “Ema nee hetan matenek hosi nebee? Nia hetan kbiit hosi nebee mak bele halo milagre sira hanesan nee? 55Ita hatene hela Nia. Nia aman badaen ai ida. Nia inan mak Maria, i nia alin sira mak Tiago, José, Simão ho Judas. 56Nia alin feto sira mos hela iha nee hotu. Entaun Nia hetan buat sira nee hosi nebee?” 57Nunee sira hirus i lakohi simu Nia.

Maibee Jesus hatete ba sira, “Maromak nia profeta ema respeita iha nebee-nebee deit. So iha nia aldeia rasik no nia familia mak la respeita nia.”#João 4:44 58Tanba sira la fiar ba Nia maka Jesus halo milagre ituan deit iha nebaa.

Currently Selected:

Mateus 13: BTDT

Highlight

Copy