Lucas 13

Husik ona sala, se lae mate

1Iha tempu nee, ema foo hatene ba Jesus dehan, governador Pilatus oho tiha ema Galileia balu i sira nia raan kahur ha animal nia raan nebee sira oferese hanesan sakrifisiu ba Maromak iha Uma Kreda boot. 2Rona nunee Jesus husu ba sira, “Tuir imi nia hanoin ema Galileia sira nia terus hatudu katak sira sala boot liu ema Galileia sira seluk ka oinsaa? 3Lae! Maibee se imi la husik imi nia sala, imi mos sei mate hanesan sira nee. 4I oinsaa ho ema nain sanulu resin walu nebee mate iha Siloé bainhira uma andar monu hanehan sira? Tuir imi nia hanoin, sira nia sala boot liu ema seluk iha Jerusalém ka? 5Lae! Maibee se imi la husik imi nia sala, imi mos sei mate hanesan sira nee.”

Komparasaun kona ba ai figeira nebee la foo fuan

6Depois Jesus halo komparasaun ida nunee: “Ema ida iha ai figeira huun ida iha nia toos. Loron ida nia baa haree, ai nee iha fuan ka lae, maibee la iha. 7Entaun nia hatete ba ema nebee hein nia toos nee dehan, ‘Tinan tolu ona, hau mai bebeik buka ai nee nia fuan, maibee fuan ida mos la iha. Tesi tiha deit! Ai nee estraga deit rai nia bokur.’

8Maibee ema nebee hein toos nee hataan, ‘Senhor, husik nia moris tan tinan ida nee. Husik hau kee haleu nia huun hodi tau adubu para halo buras. 9Karik tinan oin nia bele foo fuan. Se la fuan mak ita tesi.’ ”

Nai Jesus kura feto bonko ida iha loron Sabadu

10Iha loron Sabadu ida, Jesus hanorin hela iha uma kreda ida. 11Iha nebaa iha senhora ida nebee bonko durante tinan sanulu resin walu ona, tanba espiritu aat mak halo nia nunee. Nia kotuk kleuk loos, atu hamriik loos ituan mos la bele. 12Jesus haree senhora nee, i bolu nia mai hodi hatete ba nia, “Senhora, ita nia moras diak tiha ona.” 13Depois Jesus tau liman ba senhora nee, i nia kotuk loos kedas. Nia hahii Nai Maromak.

14Maibee responsavel iha uma kreda nee hirus, tanba Jesus kura fali ema iha loron Sabadu. Nia hatete ba ema hotu iha uma kreda laran nee dehan, “Semana ida iha loron neen hodi halo serbisu. Nunee, ema moras sira bele mai deit iha loron serbisu nee para bele hetan kura. La bele mai fali iha loron Sabadu.”#Ezodu 20:9-10; Deuteronomio 5:13-14

15Nai Jesus hataan, “Hei! Imi koalia oin ida, hahalok oin seluk! Iha loron Sabadu imi mos kore imi nia karau ho kuda hodi dada baa foo hemu. Nee mos halo serbisu. 16Senhora nee Abraão nia jerasaun hanesan mos ita. Satanás kesi metin nia durante tinan sanulu resin walu ona. Ohin Hau hasai nia hosi Satanás nia liman laran iha loron Sabadu, halo nusaa mak bele sala?!”

17Rona nunee, Jesus nia inimigu sira moe loos. Maibee povu kontenti teb-tebes tanba Nia halo buat didiak deit.

Komparasaun kona ba fini ho fermentu

(Mateus 13:31-32; Marcos 4:30-32)

18Depois Jesus dehan, “Maromak ukun Nia reinu, oinsaa loos? Hau atu kompara ho saida? 19Nee hanesan fini nebee ema kuda iha toos. Fini nee moris, i buras ba bebeik, too ikus sai ai huun boot. Depois manu fuik sira mai halo knuuk iha nia sanak sira.”

20Jesus dehan tan, “Maromak ukun Nia reinu, Hau atu kompara ho saida tan? 21Nee hanesan fermentu nebee senhora ida kahur ho trigu saka ida hodi halo paun. Too ikus, fermentu ituan nee halo trigu tomak sae.”

See mak bele hetan salvasaun?

(Mateus 7:13-14; 7:21-23)

22Jesus lao dadaun ba Jerusalém, Nia tama tutuir aldeia-aldeia no sidade-sidade hodi hanorin. 23Iha ema ida husu ba Nia, “Nai, ema ituan deit mak sei hetan salvasaun ka?”

24Jesus hataan, “Odamatan tama ba lalehan nee, kloot. Nunee, hakaas aan para imi bele tama liu hosi odamatan nee. Hau hatete ba imi, ema barak hakaas aan atu tama baa, maibee sei la konsege. 25Bainhira uma nain hamriik taka ona odamatan nee, imi sei hamriik iha liur i sei tuku odamatan hodi husu, ‘Senhor, loke lai odamatan mai ami.’

Maibee nia hataan, ‘Hau la konhese imi, i hau la hatene imi mai hosi nebee.’

26Depois imi protesta, ‘Uluk ami haan-hemu hamutuk ho ita boot, i Ita Boot hanorin tuir dalan-dalan iha ami nia aldeia.’

27Maibee uma nain hataan fali, ‘Hau la konhese imi, i hau la hatene imi mai hosi nebee. Sai hosi nee, imi hotu nebee halo buat aat!’#Salmu sira 6:9

28Depois imi sei tanis hakilar i ruun nehan. Tanba imi sei haree Abraão, Isac, Jacó ho profeta sira hotu tama iha Maromak nia reinu, maibee imi rasik, Maromak soe sai ba liur.#Mateus 22:13; 25:30 29Ema sei mai hosi lorosae no loro-monu, tasi feto no tasi mane, i sira sei tuur hamutuk ho Maromak nia reinu hotu-hotu hodi haan iha Maromak nia festa boot.#Mateus 8:11-12 30Hanoin didiak ba, bainhira Maromak tesi ema hotu nia lia, ema nebee uluk dehan nia ema kiik, sei hetan respeitu boot. I ema nebee uluk ema dehan nia ema boot, Nai Maromak sei konsidera nia ema kiik.”#Mateus 19:30; 20:16; Marcos 10:31

Nai Jesus tenki mate iha Jerusalém

(Mateus 23:37-39)

31Depois ema balu hosi grupu relijiaun Farizeu mai hasoru Jesus hodi foo hatene, “Diak liu sees tiha hosi fatin nee, tanba liurai Erodes atu oho Ita Boot.”

32Jesus hataan, “Imi ba hatete ba asu fuik nee katak, ohin ho aban Hau duni sai espiritu aat i kura ema moras sira. Iha loron tolu mak Hau nia serbisu foin hotu. 33Bele halo nusaa mos, Hau tenki halao nafatin Hau nia serbisu ohin loron, aban no bainrua. Too iha Jerusalém mak foin ema bele oho Hau. Tanba ema sempre oho Maromak nia profeta sira iha Jerusalém.

34Aii, imi ema Jerusalém sira! Imi oho Maromak nia profeta sira, i tuda ho fatuk too mate ema nebee Maromak haruka ba imi. Dala barak Hau hakarak halibur imi hanesan manu inan halibur nia oan sira para luut, maibee imi lakohi. 35Agora, Maromak husik tiha ona imi nia hela fatin i sai fuik. Maibee Hau hatete ba imi, imi sei la haree tan Hau too imi foo sai dehan,

‘Nai Maromak foo bensaun ba Ema ida nebee mai lori Nai Maromak nia naran.’ ”#Salmu sira 118:26

Currently Selected:

Lucas 13: BTDT

Highlight

Copy