Lucas 11

Nai Jesus hanorin kona ba orasaun

(Mateus 6:9-13; 7:7-11)

1Iha loron ida, Jesus halo hela orasaun iha fatin ida. Hotu tiha, Nia eskolanti ida husu ba Nia, “Nai, hanorin ami halo orasaun, hanesan João Sarani Nain hanorin ona nia eskolanti sira.”

2Entaun Jesus hatete ba sira, “Bainhira imi halo orasaun, halo hanesan tuir mai nee:

‘Ami nia Aman, tulun ema atu foti aas Ita Boot nia naran santu.

Mai ukun ema hotu-hotu baa.

3Foo ai haan natoon mai ami loro-loron.

4Foo perdaun mai ami nia sala,

hanesan ami mos foo perdaun ona ba ema nebee halo sala mai ami.

Keta husik ami monu ba tentasaun.’ ”

5Depois Jesus halo komparasaun nunee: “Se karik iha tuku sanulu resin rua kalan, imi ida baa iha kolega nia uma hodi tuku odamatan dehan, ‘Belun, empresta lai paun fuan tolu mai. 6Tanba iha kolega ida foin too mai hosi rai dook, i hau la iha buat ida atu foo ba nia haan. Loron seluk mak hau foo fali.’

7Se o nia kolega hataan, ‘Keta interompe hau! Odamatan xavi tiha ona, i hau ho hau nia oan sira mos toba tiha ona. Hau la bele hadeer hodi foo buat ruma ba o.’ 8Hau hatete ba o, maski imi nain rua kolega, maibee nia lakohi hadeer hodi foo buat ruma ba o, maibee se o la moe tuku bebeik nia odamatan, maka iha ikus nia hadeer duni hodi foo ba o, buat nebee mak o presiza.

9Nunee mos ho orasaun. Hau hatete ba imi:

Husu bebeik ba Maromak,

Nia sei foo.

Buka bebeik,

o sei hetan.

Tuku bebeik odamatan,

odamatan sei nakloke ba o.

10Tanba see mak husu bebeik ba Nai Maromak, nia sei simu. See mak buka bebeik, nia sei hetan. See mak tuku bebeik odamatan, Maromak sei loke ba nia.

11Imi nudar aman, bainhira imi nia oan husu ikan, imi foo fali samea ka? 12Se nia husu mantolun, imi foo fali sakunar ka? Nunka! 13Maski imi ema aat, maibee imi hatene foo buat diak ba imi nia oan sira. Saa tan imi nia Aman iha lalehan! Se imi husu para Nia foo Nia Espiritu Santu ba imi, Nia sei foo duni.”

Nai Jesus kura ema monok ida

(Mateus 12:22-30; Marcos 3:20-27)

14Iha loron ida, Jesus duni sai espiritu aat hosi ema monok ida. Espiritu aat sai tiha, ema nee komesa koalia kedas, halo ema barak admira. 15Maibee iha ema balu dehan, “Nia duni sai espiritu aat, tanba espiritu aat nia xefi Belzebu mak foo kbiit ba Nia.”#Mateus 9:34; 10:25

16Iha ema seluk hakarak koko Jesus. Sira husu para Nia halo tan milagre hodi hatudu katak Nia kbiit nee mai duni hosi Maromak.#Mateus 12:38; 16:1; Marcos 8:11

17Maibee Jesus hatene sira hotu nia hanoin. Nunee Nia hatete ba sira, “Se iha nasaun ida, nia povu haan malu hela deit, nasaun nee sei rahun. Se iha uma kain ida, feen ho lain istori malu hela deit, uma kain nee sei rahun. 18Nunee mos, se diabu nia reinu haan malu hela deit, diabu nia ukun sei la dura. Maski nunee, imi duun Hau dehan, hodi Belzebu nia kbiit mak Hau duni sai espiritu aat. 19Se nunee, bainhira imi nia ema sira duni sai espiritu aat sira, sira mos uza Belzebu nia kbiit ka? Lae! Imi nia ema sira rasik mak sei hatete sai katak, buat nebee imi duun Hau nee, la loos. 20Hau duni sai espiritu aat hodi Nai Maromak nia kbiit. Nee hatudu katak Nai Maromak nia Reinu too ona iha imi.

21Se ema forti ida kaer kroat hodi hein nia uma, maka nia rikusoin hotu sei seguru. 22Maibee too ikus, se iha ema ida forti liu fali nia, mai ataka i manaan nia, ema nee sei hadau nia kroat hotu, i foti nia rikusoin hotu hodi fahe ba ema seluk.#11:22:Tuir matenek nain sira kona ba Biblia, ema forti nebee hein nia uma nee, diabu nia boot. Ema ida nebee forti liu tan mak Nai Jesus.

23Ema nebee la hamutuk ho Hau, nia kontra Hau. I ema nebee la serbisu hamutuk ho Hau, nia rahun namkari.”#Marcos 9:40

Espiritu aat fila ba nia hela fatin uluk

(Mateus 12:43-45)

24Jesus hatutan tan dehan, “Bainhira ita duni sai espiritu aat hosi ema ida, espiritu aat nee baa lao lemo-lemo iha rai fuik maran hodi buka fatin ba hela. Tanba nia la hetan fatin hodi hela, nia dehan, ‘Diak liu hau fila fali ba hau nia hela fatin ida uluk.’ 25Bainhira nia fila, nia haree fatin nee ema dasa moos tiha ona, i buat hotu-hotu tau tuir nia fatin. 26Depois espiritu aat nee baa bolu tan espiritu aat hitu nebee aat liu fali nia, i sira hotu baa hela iha ema nee. Nunee, ema nee nia moris aat liu fali uluk.”

See mak hetan bensaun loloos

27Jesus sei koalia hela, feto ida iha ema barak nee nia leet hatete ho lian makaas dehan, “O nia inan hetan bensaun boot! Tanba nia mak kous O, i foo susu ba O.”

28Jesus hataan, “Maibee ema nebee rona Nai Maromak nia liafuan i halo tuir, nia mak hetan bensaun boot liu.”

Ema husu Nai Jesus hatudu milagre

(Mateus 12:38-42)

29Ema barak liu tan mai hobur Jesus. Nia dehan ba sira, “Imi nee jerasaun ida nee laran aat. Imi husu bebeik mai Hau atu halo milagre hanesan sinal ba imi hodi hatudu katak Maromak mak haruka Hau mai. Afinal uluk Nai Maromak foo tiha ona sinal ba imi liu hosi Nia profeta Jonas. Nee too ona! 30Saida mak uluk akontese ba profeta Jonas, nee hanesan sinal ba ema sira iha sidade Ninive. Nunee mos ho Hau, Ema Oan, nee hanesan sinal ba jerasaun ida nee.#11:30:Jonas nee, ikan boot tolan tiha nia. Too loron tolu, ikan nee tafui fila fali nia ba iha rai maran. (Haree Jonas 1:17. 2:10.) Jesus kompara Nia Aan ho profeta Jonas, tanba Jesus mate, maibee too loron tolu Nia moris fila fali. #Mateus 16:4; Marcos 8:12; Jonas 3:4

31Aban-bainrua Maromak sei tesi ema hotu-hotu nia lia. I liurai feto hosi rai Seba sei moris fali, i hamriik hanesan sasin. Nia sei foo sala ba imi nebee moris agora, tanba uluk nia mai hosi rai dook atu rona rasik liafuan matenek nian hosi liurai Salomão. Afinal agora iha imi nia leet iha Ema ida ke boot liu fali liurai Salomão. Maibee imi lakohi rona Nia.#1 Liurai sira 10:1-10; 2 Kronikas 9:1-12 32I laos liurai feto nee deit. Ema sira iha Ninive mos sei hamriik hodi foo sala ba imi, tanba uluk, bainhira Jonas baa foo sai Maromak nia liafuan ba sira, sira husik kedas sira nia sala. Agora iha imi nia leet iha Ema ida nebee boot liu fali Jonas, maibee imi lakohi husik imi nia sala.”#Jonas 3:5

Moris iha naroman

(Mateus 5:15; 6:22-23)

33Jesus hatutan tan dehan, “La iha ema ida sunu ahi-oan, depois subar tiha ahi-oan nee, ka taka ho sanan rai. Ema nebee sunu ahi-oan, sempre tau iha fatin aas, para foo naroman ba ema nebee tama ba iha nebaa.#Mateus 5:15; Marcos 4:21; Lucas 8:16 34Ita nia matan hanesan ahi-oan nebee foo naroman ba ita nia moris tomak. Se ita nia matan haree moos, ita nia moris naroman. Maibee se ita nia matan aat, maka ita nia moris sei sai nakukun. 35Haree didiak para naroman nebee iha imi nia moris nee labele sai fali nakukun. 36Se imi moris iha naroman, i la iha nakukun ida, mak imi nia moris tomak mos sei sai naroman, hanesan ahi-oan boot leno imi nia moris.”

Nai Jesus kritika ema Farizeu ho mestri relijiaun Judeu sira

(Mateus 23:1-36; Marcos 12:38-40)

37Jesus hanorin tiha hotu, ema ida hosi grupu relijiaun Farizeu konvida Nia baa haan iha nia uma. Entaun Jesus baa iha nia uma, i tama baa tuur iha meza. 38Ema Farizeu nee hakfodak, tanba nia haree Jesus haan, la fasi liman uluk tuir ema Farizeu nia lisan.

39Nai Jesus hatete ba nia, “Imi ema Farizeu sira, imi badinas hamoos kopu ho bikan nia liur. Maibee imi nia laran nakonu ho buat aat i kaan ema nia sasaan. 40Imi beik-teen! Keta haluha, Nai Maromak halo ita nia isin lolon, Nia mos halo ita nia laran. 41Dukee imi hamoos deit bikan nia liur, diak liu foo buat nebee imi iha ba ema kiak sira. Se imi halo nunee mak imi sai moos iha Nai Maromak nia futar oin.

42Imi ema Farizeu sira, imi sei susar. Bainhira imi kuu modo tahan iha toos, imi badinas foo parte ida hosi sanulu ba Maromak. Too modo tahan kiikoan-kiikoan hanesan ortelaun ho ruku mos imi foo. Maibee kona ba justisa ho hadomi Nai Maromak, imi la interese. Tuir loloos justisa ho domin nee mak importante. Maibee, keta haluha foo mos parte ida hosi sanulu ba Maromak.#Levitiku 27:30

43Imi ema Farizeu sira, imi sei susar. Tanba imi gosta loos tuur iha fatin ema boot nian iha uma kreda laran, i gosta atu ema kumprimenta imi no respeita imi iha merkadu.

44Imi ema Farizeu sira, imi sei susar. Tanba imi hanesan rate nebee la iha sinal. Ema sama tan, la hatene katak iha rai okos iha mate isin.”#11:44:Nee dehan katak, haree hosi liur, sira diak, maibee sira nia laran aat loos.

45Iha mestri relijiaun Judeu ida dehan ba Jesus, “Mestri, Ita Boot nia liafuan ohin nee, hatuun mos ami mestri sira.”

46Maibee Jesus hataan, “Imi mestri relijiaun sira, imi mos sei susar. Tanba imi foo regra todan liu ba povu, maibee imi la ajuda netik sira atu bele halo tuir.

47Imi sei susar. Tanba imi hada rate kapaas ba Maromak nia profeta sira. Afinal, imi nia bei-ala sira mak oho. 48Sira oho profeta sira, i imi mak hada sira nia rate. Nee hatudu katak, imi mos konkorda ho imi nia bei-ala sira nia hahalok nee. 49Tanba nee, Nai Maromak koalia sai Nia matenek kona ba imi dehan, ‘Hau sei haruka Hau nia profeta sira ho apostolu sira ba imi maibee imi sei halo terus balu, i oho balu.’

50Nunee, profeta sira hotu-hotu nebee imi nia bei-ala sira oho, komesa hosi Nai Maromak halo mundu too ohin loron, imi nebee moris agora nee mak tenki lori todan. 51Nee sura hosi Abel nia mate too iha Zacarias; ema oho Zacarias nee iha meza sakrifisiu ho uma kreda boot nia klaran. Hau hatete loloos ba imi katak sira nia mate hotu, imi nebee moris agora mak tenki lori todan.#Jenesis 4:8; 2 Kronikas 24:20-21

52Imi mestri relijiaun sira, imi sei susar. Tanba imi mak kaer xavi hodi loke odamatan ba ema para sira bele hatene Nai Maromak nia hakarak. Maibee imi rasik lakohi tama ba iha nebaa. Aat liu tan, imi taka dalan ba ema seluk nebee atu tama.”

53Hotu tiha, Jesus sai hosi fatin nee. Komesa hosi tempu nee, mestri relijiaun ho ema Farizeu sira kontra makaas Nia. Sira sempre husu pergunta oi-oin ba Nia 54hodi koko para nia bele koalia liafuan ruma, nunee sira bele Nia.

Currently Selected:

Lucas 11: BTDT

Highlight

Copy