Jonas 4
4
Jonas hirus, tanba Maromak hatudu nia domin
1Maibee Jonas hirus teb-tebes, tanba Maromak hanoin fali ema Ninive sira. I nia ruun nehan ba Maromak.#Ezodu 34:6; Joel 2:13; Neemias 9:17; Salmu sira 86:15; 103:8; 111:4; 145:8; 2 Kronikas 30:9 2I nia harohan ho murmura ba NAI Maromak dehan, “Oh Maromak! Buat sira nee hotu sai loloos kedas tuir saida mak hau koalia bainhira hau sei iha hau nia rain rasik. Nee mak halo hau hakarak halai subar ba Tarsis. Tanba hau hatene katak, Maromak nee laran diak, no gosta hatudu Nia laran luak. Maromak la hirus lalais, maibee laran nakonu ho domin ba ema hotu nebee husik sira nia sala. Maromak prontu foo perdaun ba ema nebee husu perdaun, no la foo kastigu ba ema nebee hanoin hikas ona sira nia hahalok aat sira.#Ezodu 34:5-7 3Maromak, bele oho hau agora deit. Tanba diak liu hau mate dukee hau moris.”#1 Liurai sira 19:4
4Maibee NAI Maromak hataan ba Jonas dehan, “O hirus nunee la loos!”
Jonas hein atu haree saida mak Maromak halo ba ema Ninive sira
5Nunee bainhira Jonas hatoo tiha hotu Maromak nia lia menon ba ema Ninive sira, nia mos sai tiha hosi sidade nee. Nia baa iha sidade nee iha parte loro sae, nia halo uma laleo ida hodi hamahon. Nia tuur iha nebaa hodi haree saida mak Maromak atu halo ba ema Ninive sira.
6Depois NAI Maromak halo moris ai talik ida hodi foo mahon ba Jonas. Ho nunee loro manas la duun kona Jonas, i nia haksolok haree ai huun nee. 7Maibee iha aban rai besik loron, Maromak haruka ular ida mai haan tiha ai talik nee, i ai nee namlaik tiha. 8Bainhira loro matan sae ona, Maromak haruka anin fuik nebee manas ida mai hosi loro sae. Loro manas kona iha Jonas nia ulun, too nia senti hanesan ahi haan i halo nia oin halai. Nia senti atu mate deit. I nia siak Maromak dehan, “Diak liu hau mate deit. Lalika moris tan ona!”
9Maromak hataan ba Jonas dehan, “O hanoin o bele hirus tanba ai talik nee mate tiha ona, ka? O iha direitu saida? O nee, see?”
Jonas hataan dehan, “Ho hau nia hirus nunee, husik hau mate deit. Tanba ida nee mak hau merese.”
Maromak hakarak hatudu Nia domin
10Maibee NAI Maromak foo hatene ba Jonas dehan, “Nunee! Ai nee moris iha kalan ida deit. Iha loron tuir mai, ai nee namlaik ona. Lalais deit! Afinal, o la serbisu buat ida hodi halo ai nee moris. O la serbisu ituan mos hodi halo ai nee buras. Maski nunee, o hanoin i lakohi halo ai nee namlaik. 11Agora o hanoin didiak kona ba Hau. O hanoin took, se Hau hanoin no lakohi ema Ninive sira mate, ida nee diak ka lae? Tanba iha nebaa iha ema liu 120.000, ho tan sira nia animal hotu. Saa tan ema Ninive sira la hatene saida mak diak no saida mak aat, hanesan ema nebee la hatene nebee mak liman loos no nebee mak liman karuk.”
Currently Selected:
Jonas 4: BTDT
Highlight
Share
Copy
Want to have your highlights saved across all your devices? Sign up or sign in
© 2024 Wycliffe Timor-Leste.
