Jonas 3
3
Jonas halo tuir Maromak nia orden
1Liu tiha nee, NAI Maromak koalia tan ho Jonas. Nia haruka dehan, 2“Agora o sai hosi nee hodi baa iha nasaun Asiria nia sidade boot, mak Ninive. Baa foo hatene ba sira Hau nia lia menon hotu nebee Hau foo hatene ona ba o.”#Jonas 1:2 3I Jonas hamriik kedas, hodi baa iha sidade Ninive, tuir NAI Maromak nia orden ba nia.
(Sidade Ninive nee, boot teb-tebes. Se ema lao ain hosi sorin ba sorin, nee haan tempu loron tolu.) 4Bainhira Jonas too ona iha nebaa, nia hahuu lao haleu sidade laran. Nia lao loron tomak ida. I nia koalia ho lian makaas hodi hatete ba ema Ninive sira, dehan, “Imi ema Ninive sira, rona didiak mai! Loron 40 tan, Nai Maromak sei harahun imi no sidade Ninive nee.”
5Bainhira sira rona nunee, ema sira iha sidade Ninive fiar ba Maromak nia lia menon nebee Jonas hatoo ba sira nee. I sira hakarak duni i dehan, “Ita susar ona! Mai ita hotu jejun no harohan.” Nunee ema hotu-hotu, kiik-boot, hatais hena hanesan karoon nudar sinal katak sira hanoin hikas no husik sira nia hahalok aat sira nee.#Mateus 12:41; Lucas 11:32
6Bainhira liurai Ninive rona buat sira nee, nia tuun hosi nia kadeira ukun, i nia hasai tiha nia hena liurai, hodi hatais fali hena hosi karoon. I nia ba tuur iha akudesan hodi hatudu katak nia hanoin hikas nia sala. 7Liu tiha nee, liurai haruka ema ba iha sidade Ninive tomak hodi haruka nia povu mai halibur. I liurai hatete ba sira hotu dehan, “Haree baa! Ita nia hahalok aat halo ita hetan susar. Nunee, hau, imi nia liurai nee, ho funsionariu boot sira desidi ona katak: ema hotu-hotu tenki jejun para ita bele harohan hodi husu perdaun. La bele haan, la bele hemu. Animal sira mos nunee. 8Ema hotu tenki hatais hena hosi karoon. Animal sira mos nunee. Ho nunee ita hotu hatudu katak ita hanoin hikas ona. Ema hotu tenki bolu ho lian makaas hodi husu tulun ba Maromak ho laran tomak nebee moos. Ema hotu tenki husik sira nia hahalok aat sira nee. Ema hotu tenki hapara halo aat ba ema, no hapara halo terus ema seluk. 9Se ita hotu halo nunee, keta halo be Maromak haree no rona ita, i nia laran nakali nee bele malirin, hodi hatudu Nia domin mai ita i la harahun ita.”
10Bainhira Maromak haree sira hanoin hikas ona no husik sira nia moris aat nee, Nia mos hanoin, i nia laran nakali nee sai malirin ona. I Nia la halo rahun sira.
Currently Selected:
Jonas 3: BTDT
Highlight
Share
Copy
Want to have your highlights saved across all your devices? Sign up or sign in
© 2024 Wycliffe Timor-Leste.
