João 12

Maria fakar mina morin iha Nai Jesus nia ain

(Mateus 26:6-13; Marcos 14:3-9)

1Falta loron neen tama ba Paskua, Jesus sira ba iha aldeia Betania. Lazaro ho nia biin sira hela iha nebaa. Lazaro nee, ema nebee Nai Jesus halo moris fila fali hosi mate. 2Depois sira prepara hahaan para Jesus haan kalan hamutuk ho sira. Marta mak serbii iha meza. Lazaro tuur iha meza hamutuk ho Jesus. 3Entaun Maria foti mina morin nardos botir ida, nebee karun teb-tebes, fui ba iha Jesus nia ain. Nia hamaran Jesus nia ain ho nia fuuk, too uma laran tomak morin hotu.#12:3:Biblia ho lian Gregu dehan mina nee naran ‘nardos’, iha tempu uluk ema halo hosi ai abut morin. Biblia ho lian Gregu dehan botir nee, ‘litra’ ida, grama 325, ka mais-ou-menus litru sorin balu. #Lucas 7:37-38

4Maibee Jesus nia eskolante ida, naran Judas Eskariotes, nebee tuir mai sei faan Jesus, dehan, 5“Nusaa mak nia la faan deit mina morin nee, no nia osan foo ba ema kiak sira? Tanba nia folin hanesan ho badae ida nia salariu ba tinan ida nian.”#12:5:Biblia ho lian Gregu dehan mina nia folin ‘denari’ 300. Denari ida, hanesan ho badae sira nia salariu iha loron ida. 6Judas dehan ida nee laos tanba nia hadomi ema kiak sira, maibee nia nee, ema naok-teen ida. Nia mak Jesus sira nia tezoreiru, i sempre foti osan hosi kofre.

7Maibee Jesus hataan, “Husik feto nee halo nunee baa. Tanba nia rai ona mina morin nee, hodi prepara ba Hau nia mate isin para hakoi Hau. 8Ema kiak sei iha nafatin ho imi, maibee Hau sei la hamutuk tan ho imi.”#Deuteronomio 15:11

Nai lulik nia xefi sira buka dalan hodi oho Lazaro

9Ema Judeu barak hatene ona katak Jesus iha hela aldeia Betania. Entaun sira baa iha nebaa hodi haree Nia no mos Lazaro. Tanba sira rona ona ema dehan Jesus halo moris fali Lazaro hosi mate. 10Maibee nai lulik nia xefi sira futu lia hodi oho mos Lazaro. 11Tanba ema Judeu barak rona ona istoria kona ba Lazaro, i sira fiar ba Jesus. Sira nee mos lakohi rona tan ba ema Judeu nia boot sira.

Nai Jesus tama ba Jerusalem hanesan ema boot

(Mateus 21:1-11; Marcos 11:1-11; Lucas 19:28-40)

12Iha loron tuir mai, ema barak mak baa tuir festa Paskua iha sidade Jerusalem. Sira rona katak Jesus mos atu baa iha nebaa. 13Nunee sira baa taa ramus hodi simu Jesus, hanesan ema boot. Sira haklalak hamutuk dehan,

“Hosana! Ami hahii Nai Maromak!

Tanba Maromak hatudu nia laran diak ba liurai Israel,

nebee mai lori Nai nia naran.”#Salmu sira 118:26

14I Jesus hetan kuda buru salak ida, no Nia sae tiha kuda nee. Ida nee tuir buat nebee hakerek ona iha Eskritura Sagrada dehan,

15“Imi iha sidade Jerusalem, keta tauk!

Imi ema iha sidade ‘Siaun’, haree lai ba nebaa!#12:15:Sidade Siaun nee, Jerusalem nia naran seluk.

Tanba imi nia Liurai mai!

Nia mai sae kuda buru salak ida.”#Zacarias 9:9

16Iha tempu nebaa, Jesus nia eskolante sira la komprende nee dehan saida. Maibee, bainhira Nia moris fali hosi mate, i Nai Maromak foti aas Nia, foin sira komprende saida mak hakerek iha Maromak nia Eskritura Sagrada kona ba Nia. Sira mos hanoin buat nebee mak ema barak nee halo ba Nia.

17Bainhira Jesus halo moris fali Lazaro hosi mate, i bolu nia sai hosi rate nee mai, ema barak haree. Agora sira konta baa-mai kona ba saida mak uluk sira haree tiha ona ho matan rasik. 18Nee mak ema barak baa simu Jesus besik iha Jerusalem, tanba sira rona ona dehan, Nia halo ona milagre nee. 19Entaun ema Farizeu koalia ba malu dehan, “Haree baa! Ema hotu iha mundu nee fadigadu hodi tuir Nia. Iha ikus mai ita mak susar. Se nunee, ita la bele halo tan buat ida ona.”

Iha ema Gresia balu hakarak hasoru Jesus

20Iha ema Gresia balu baa sidade Jerusalem hamutuk ho ema seluk, hodi tuir festa Paskua iha nebaa. Sira mos hakarak adora Nai Maromak iha nebaa. 21I sira baa koalia ho Filipe, hosi aldeia Betsaida iha provinsia Galileia. Sira husu dehan, “Senhor, ami hakarak hasoru Jesus.”

22Filipe baa foo hatene ba Andre, i sira nain rua baa koalia ho Jesus. 23-24Entaun Jesus foo hatene ba sira dehan, “Hau nia tempu too ona. Nunee Hau tenki mate uluk, foin Nai Maromak foti aas Hau. Loos duni! Ita kompara ho fini musan ida. Se ita kuda batar musan ida, nia tenki rahun uluk iha rai, foin nia moris, hodi foo batar musan barak. Se la hanesan nee, batar nee musan ida nafatin. 25Ema nebee la tuir Maromak nia hakarak, tanba nia hadomi liu nia moris iha mundu nee, aban-bainrua nia sei lakon nia moris. Maibee ema nebee foo nia moris tomak ba Maromak iha mundu nee, nia sei hetan moris rohan laek.#Mateus 10:39; 16:25; Marcos 8:35; Lucas 9:24; 17:33 26Ema nebee hakarak serbii Hau, nia tenki tuir Hau nafatin. Hau baa iha nebee deit, Hau nia atan sira mos iha nebaa. Ema nebee serbii Hau maka Hau nia Aman iha lalehan respeita nia.”

Nai Jesus foo hatene kedas kona ba Nia mate

27Jesus koalia tan dehan, “Hau senti laran susar. Maibee Hau atu dehan saida tan? Hau tenki husu dehan, ‘Hau nia Aman, hasai Hau para Hau la bele mate agora,’ ka? Lae! Hau la husu nunee, tanba Nia haruka Hau mai para Hau mate duni. 28Nunee, Hau husu hanesan nee: ‘Hau nia Aman, Hau tuir deit Aman nia hakarak, para ema hotu-hotu foti aas Aman nia naran.’ ”

Iha lian ida mai hosi lalehan dehan, “Hau foti aas ona Hau nia naran. I Hau atu foti aas fali tan.”

29Ema barak nebee hamriik iha nebaa, rona lian nee, mos dehan, “Rai tarutu.”

Iha ema balu tan dehan, “Lae! Nee Maromak nia anju ida mak koalia ho Jesus.”

30Maibee Jesus foo hatene dehan, “Lian ida ohin nee, ba imi, laos ba Hau. 31Agora ema iha mundu tenki hasoru Nai Maromak, hodi Nia tesi sira nia lia. Nia mos hakarak duni sai Aat Nain nebee kaer ukun iha mundu nee. 32Nunee, bainhira ema hedi ona Hau iha ai krus leten, Hau sei dada ema hotu para sira fiar Hau.” 33(Nia koalia nunee, hodi hatudu Nia sei mate ho maneira oinsaa.)

34I ema sira iha nebaa nee husu, “Ami rona hosi Maromak nia lei dehan, Kristu moris nafatin. Entaun Kristu ho Ema Oan nee, hanesan, ka? Se nunee, tanba saa mak Ita Boot dehan, ‘La kleur sira sei hedi Ema Oan iha ai krus leten?’ Se nunee, Ema Oan nee, see?”#Salmu sira 110:4; Isaías 9:6; Ezequiel 37:25; Daniel 7:14

35Jesus hataan, “La kleur tan, Hau nia naroman la foo tan naroman ba imi. Nunee bainhira Hau sei iha nee, imi tenki moris loos, para nakukun la bele taka naroman nebee iha imi nia laran. Tanba ema nebee lao iha nakukun, nia la hatene atu baa nebee. 36Bainhira imi sei iha naroman, imi tenki fiar mai Hau, nunee imi bele sai ema nebee moris iha naroman, para imi hatene atu baa nebee.”

Jesus koalia tiha nunee, Nia mos dada aan hosi ema barak nia leet, para Nia bele mesak.

Ema Judeu balu lakohi fiar ba Jesus

37Maski ema barak haree ona Jesus halo milagre oi-oin, maibee sira lakohi fiar ba Nia. 38Nee tuir Maromak nia profeta Isaias nebee hatete tiha ona dehan,

“Nai, la iha ema ida fiar ba Ita Boot nia mensajen.

Maski Nai hatudu ona Nai nia kbiit,

maibee ema la haree buat ida!”#Isaías 53:1

39Nee mak ema Judeu balu agora la fiar ba Maromak, tuir Isaias hakerek tan dehan,

40“Nai Maromak taka ona sira nia laran,

para sira la bele haree tan.

Nia halo sira nia fuan toos,

para sira la komprende didiak.

Husik sira nunee,

para sira lalika fila mai buka Hau,

i Hau lalika halo diak sira.”#Isaías 6:10

41Isaias koalia nunee, tanba nia haree ona Jesus nia naroman-nabilan, i nia konta kedas kona ba Jesus.

42Maski nunee, ema barak fiar ba Jesus. Laos ema baibain deit, maibee iha mos ema Judeu nia boot sira balu fiar ba Nia. Sira la deklara sira nia fiar ba Jesus iha ema barak nia oin, tanba sira tauk katak ema Farizeu sira bele duni sai sira hosi uma kreda. 43Lider sira nee gosta liu ema mak gaba sira, dukee Maromak mak gaba sira.

Nai Jesus nia Liafuan hatudu ema nia laran

44Jesus koalia ho lian makaas dehan, “Ema nebee mak fiar mai Hau, nia laos fiar deit ba Hau, maibee nia fiar mos ba Ida nebee haruka Hau mai. 45Ema nebee haree Hau, nia mos haree Ida nebee haruka Hau mai. 46Hau mai atu sai hanesan naroman ba mundu nee, para ema hotu nebee fiar ba Hau la moris iha nakukun laran. 47Se ema ruma rona Hau nia Liafuan, maibee la halo tuir, Hau la foo kastigu ba nia. Tanba Hau mai iha mundu nee, laos hodi kastigu ema, maibee Hau mai hodi salva ema hosi sira nia sala. 48Maibee ema nebee la simu Hau no la simu Hau nia Liafuan, iha ona juiz ba nia. Bainhira mundu nee remata, Liafuan nebee Hau foo sai ona nee, mak sai hanesan juiz hodi tesi nia lia. 49Tanba Hau la koalia lori Hau nia naran rasik. Maibee Hau koalia lori Hau nia Aman iha lalehan nia naran. Tan Nia mak haruka Hau mai, i Nia mak foo orden ba Hau, nunee Hau tenki koalia. 50Hau hatene katak Nia ukun-fuan nee mak lori moris loloos nebee rohan laek. Nee mak Hau koalia tuir loloos saida mak Hau nia Aman haruka Hau koalia.”

Currently Selected:

João 12: BTDT

Highlight

Copy