João 11

Lazaro nia mate

1-2Iha ema ida naran Lazaro. Nia hela iha aldeia Betania, hamutuk ho nia biin nain rua, Maria ho Marta. (Maria nee mak fui mina morin ba Nai Jesus nia ain, i hamaran ho nia fuuk rasik.) Iha loron ida Lazaro moras todan.#Lucas 10:38-39; João 12:3 3Nia biin sira haruka foo hatene ba Jesus dehan, “Senhor, Ita Boot nia belun Lazaro moras todan.”

4Bainhira Jesus rona notisia nee, Nia dehan, “Moras nee sei la lori nia ba mate. Nai Maromak hakarak uza moras nee hodi hatudu Nia naroman-nabilan. Nunee atu ema sira foti aas Hau, Maromak nia Oan.”

5Jesus hadomi teb-tebes Marta, Maria, ho sira nia alin Lazaro. 6Bainhira Nia rona dehan Lazaro moras, Nia sei hela loron rua tan iha mota Jordaun nia sorin baa. 7Depois Nia hatete ba Nia eskolante sira dehan, “Mai ita fila fali ba Lazaro nia fatin iha provinsia Judeia.”

8Maibee Nia eskolante sira protesta dehan, “Mestri, foin dadauk nee ema Judeu nia boot sira atu tuda mate Ita Boot ho fatuk iha nebaa. Agora Ita Boot atu fila fali ba nebaa?”

9Jesus hataan, “Keta tauk! Loro-loron, loro-matan foo naroman hosi dadeer too lokraik. Nee iha oras 12. Bainhira ema lao iha naroman la sidi, tanba naroman leno mundu nee. 10Maibee se ema lao iha nakukun, nia sidi bebeik, tan nia la iha naroman.”#11:10:Tuir loloos Jesus hakarak dehan nunee, “Hau hanesan naroman ba mundu nee. Nunee bainhira Hau sei hamutuk ho imi, imi hakmatek deit.”

11Jesus koalia hotu nunee, Nia foo hatene dehan, “Ita nia belun Lazaro toba ona. Maibee Hau sei baa fanu nia.”

12Nia eskolante sira dehan, “Senhor, se nia toba deit, signifika katak nia sei diak fali, ka?”

13Sira koalia nunee, tanba sira hanoin Jesus dehan nia toba hanesan baibain. Maibee, tuir loloos Nia koalia kona ba Lazaro nia mate. 14Nunee Jesus foo sai momoos dehan, “Lazaro mate tiha ona. 15Maibee Hau kontenti tanba Hau la iha nebaa bainhira nia mate, nee para imi lalika laran susar. Saida mak sei akontese nee, sei halo imi fiar ba Hau. Mai ita baa ona nebaa!”

16Entaun Tome nebee ema bolu, “Didimo” (nebee signifika “kaduak”), foo hatene ba eskolante sira seluk dehan, “Mai ona! Diak liu ita hotu baa, para ita hotu mate hamutuk ho Nia.”

Nai Jesus baa Betania hodi foo konsola Marta ho Maria

17-19Jesus sira baa aldeia Betania.

Aldeia nee nia dook hosi Jerusalem kilometru tolu. Ema Judeu barak baa iha mate uma hodi konsola Marta ho Maria.

Bainhira Jesus sira too iha nebaa, sira foin hatene katak ema hakoi tiha ona Lazaro loron haat ona.

20Bainhira Marta rona dehan, Jesus mai ona, nia sai ba hasoru Jesus. Maibee Maria hela iha uma deit. 21Marta foo hatene ba Jesus dehan, “Senhor, se Ita Boot iha nee, hau nia alin la mate. 22Maski nunee, hau fiar Ita Boot husu saida deit ba Nai Maromak, Nia sempre foo ba Ita Boot.”

23Jesus foo hatene ba nia dehan, “Ita nia alin sei moris fila fali.”

24Marta rekonhese dehan, “Hau komprende, bainhira mundu nee remata, Maromak sei halo ema mate sira moris fila fali. Nunee, Nia mos sei halo moris fila fali hau nia alin.”

25Entaun Jesus hatete, “Ema nebee mate, Hau mak halo moris fila fali no Hau mak foo moris loloos.#11:25:Tuir ema matenek nain sira, testu ida nee hanorin Jesus mak iha kbiit hodi halo moris fila fali ema mate. Jesus hatete: “Hau mak huun hodi halo moris fila fali ema mate.” Ema nebee fiar mai Hau sei hetan moris nee, maski nia mate. 26Ema nebee hetan moris loloos nee, i fiar mai Hau, sei moris rohan laek. Ita fiar Hau Nia liafuan nee, ka?”

27Marta hataan, “Loos! Hau fiar katak Nai mak Kristu, Ema nebee Nai Maromak hatudu kedas hori uluk. I Ita Boot, Nai Maromak nia Oan, nebee Nia promete ona atu haruka mai iha mundu nee.”

Nai Jesus tanis

28Marta koalia tiha nunee, nia mos fila ona. Nia baa bolu nia alin Maria, hodi bis-bisi ba nia dehan, “Mestri mai tiha ona. Nia hakarak hasoru o.” 29-31Rona nunee, Maria hamriik kedas ba hasoru Jesus. Ema Judeu sira nebee iha mate uman ho Maria, haree nia hamriik lalais hodi sai baa. Entaun sira mos tuir hosi kotuk. Sira hanoin nia atu baa tanis iha rate.

Momentu nee, Jesus sira seidauk tama iha aldeia. Nia sei iha hela fatin nebee Marta hasoru ho Nia. 32Bainhira Maria too iha fatin nee, nia haree Jesus. Maria baa taka rabat ba iha Jesus nia ain, hodi foo hatene dehan, “Se Ita Boot iha nee karik, hau fiar hau nia alin la mate.”

33Bainhira Jesus haree nia tanis, i ema Judeu sira nebee tuir nia nee mos tanis, entaun Jesus nia laran la hakmatek no susar teb-tebes. 34Nia husu, “Imi hakoi nia iha nebee?”

Sira hataan, “Senhor, mai haree rasik ba.”

35Jesus mos tanis. 36Ema Judeu sira nee, koalia ba malu dehan, “Haree baa, Nia hadomi teb-tebes Lazaro!”

37Maibee iha ema sira nee balu dehan, “Ema Ida nee, mak kura ema matan delek. Nusaa mak Nia la bele halo buat ruma hodi halo Lazaro la bele mate?”

Lazaro moris fila fali

38Dala ida tan, Jesus nia laran la hakmatek. Nia hakbesik aan ba fatuk kuak nebee sira hatama Lazaro ba nee. Fatuk kuak nee sira taka hela ho fatuk boot ida. 39I Jesus haruka ema sira iha nebaa dehan, “Dudu tiha fatuk boot nee!”

Maibee Marta, matebian nia biin, hakahek dehan, “Senhor, mate isin hatama loron haat tiha ona, dois ona.”

40Jesus foo hanoin ba nia dehan, “Ita sei hanoin, ka lae? Hau foo hatene ona dehan, se ita fiar teb-tebes mai Hau, ita sei haree Nai Maromak nia naroman-nabilan.”

41Entaun ema sira iha nebaa muda tiha fatuk boot nee hosi fatuk kuak. Jesus hateke ba lalehan i dehan, “Aman, Hau agradese ba Ita Boot, tanba Ita Boot rona Hau. 42Hau hatene kedas hori uluk dehan, Ita Boot sempre rona Hau. Agora Hau koalia nunee, para ema sira nebee hamriik iha nee, hatene katak, Ita Boot mak haruka Hau mai.” 43Bainhira Nia koalia tiha hotu nunee, Nia bolu ho lian makaas dehan, “Lazaro, sai ona mai!”

44Mate isin nee sai mai hosi fatuk kuak. Nia liman-ain bobar metin ho hena, nunee mos nia oin. I Jesus haruka ema sira iha nebaa dehan, “Kore tiha hena nee, para nia bele lao.”

Sira futu lia hodi oho Jesus

(Mateus 26:1-5; Marcos 14:1-2; Lucas 22:1-2)

45Haree tiha nunee, ema Judeu barak nebee baa vizita Maria, fiar ba Jesus. 46Maibee iha sira balu baa foo hatene ba ema grupu Farizeu sira kona ba saida mak Jesus halo nee.

47Entaun nai lulik nia xefi sira, ho ema Farizeu sira halibur hodi foo hanoin ba malu. Sira husu, “Ema nee halo milagre oi-oin. Ita tenki halo saida? 48Se ita husik deit Nia, maka ema hotu sei fiar ba Nia hanesan sira nia liurai. Nunee, estadu Roma nia forsa bele mai harahun tiha ita nia Uma Kreda Boot ho ita nia povu.”

49Iha tinan nee, Kaifas mak relijiaun Judeu nia ulun boot. Nia koalia dehan, “Imi la hatene buat ida! 50Diak liu, ema ida deit mak mate ba ema hotu, dukee forsa Roma sira mai harahun tiha povu Judeu tomak.” 51Tempu nee, Kaifas la koalia tuir nia hakarak rasik. Maibee Maromak mak koalia liu hosi nia ibun, tanba tinan nee, nia mak relijiaun Judeu nia ulun boot. Nee mak Kaifas foo sai kedas dehan, Jesus sei mate ba ema Judeu tomak. 52Tuir loloos, Nia la mate deit ba ema Judeu, maibee hodi halibur Nai Maromak nia oan hotu nebee namkari iha mundu nee, para sira hotu sai povu ida.

53Komesa iha tempu nee, ema Judeu nia boot sira futu lia hodi oho Jesus, tanba Kaifas nia liafuan nee.

54Nunee Jesus la lao tan iha ema Judeu nia boot sira nia oin. Nia ho Nia eskolante sira sees aan ba tiha iha sidade ida, naran Efraim, besik rai fuik maran. Sira hela lalais deit iha nebaa.#Numerus 9:10

55Iha tempu nee, ema Judeu sira nia loron boot Paskua besik ona. Hanesan baibain, ema barak mai hosi liur halibur iha sidade Jerusalem hodi tuir loron Paskua iha nee. Sira too uluk, hodi tuir serimonia hamoos aan tuir relijiaun nia regra. 56Ema barak nebee mai Jerusalem buka Jesus iha nee. Bainhira sira hamriik iha Uma Kreda Boot nia area, sira husu, “Tuir imi, oinsaa? Imi hanoin Jesus sei mai tuir festa relijiaun nian nee, ka lae?” 57Maibee nai lulik nia xefi sira, ho ema Farizeu sira foo ona orden dehan, “Se ema ruma haree Jesus, foo hatene mai ami!” Afinal sira iha planu atu kaer Jesus.

Currently Selected:

João 11: BTDT

Highlight

Copy