Jenesis 23
23
Sara mate i Abraão hakoi nia
1-2Sara mate ho tinan 127. Tempu nia mate, Abraão sira hela iha aldeia Kiriate-Arba (mak Hebron), iha rai Kanaán. Abraão tanis lelir ho hadeer hein nia kaben mate nee.
3I nia baa hasoru ema Ete sira, hodi dehan, 4“Hau ema lao rai iha imi nia leet. Hau la iha rai ida iha nee. Nunee favor ida, foo rai rohan ida mai hau hola, hodi hakoi hau nia kaben.”
5Sira hataan, 6“Senhor! Ami respeita teb-tebes ita hanesan ema boot ida. Nee duni, senhor hili deit rai nebee mak diak liu para hakoi ita nia kaben. Hili tuir senhor nia hakarak. Ami simu deit, la iha ema ida ke lakohi.”
7Depois Abraão hakruuk hodi foo respeitu ba ema rai nain, ema Ete sira. 8Nia hatete, “Se imi simu hau nia koalia ohin nee, hau husu tulun, imi baa koalia ho senhor Zoar nia oan mane Efron. 9Husu took, se bele, nia faan mai hau, nia fatuk kuak Makpela, nebee iha nia toos sorin nee. Nia husu folin hira deit, hau sosa. Hau hakarak selu iha imi nia oin, para rai nee sai ona hau nian. Hau hakarak sosa fatin nee para sai ami nia rate fatin.”
10Momentu nee, Efron tuur hela ho ema Ete sira nee iha portaun sidade nian, nia rona Abraão nia koalia. I nia hataan ba Abraão iha ema katuas sira hotu nia oin, dehan, 11“Keta halo nunee, senhor! Toos nee ho fatuk kuak Makpela, hau foo deit. Lalikan sosa. Senhor hakoi deit ita nia kaben iha nebaa. Hau entrega rai nee ba senhor iha hau nia ema sira nia oin, para sira hotu sai sasin.”
12Depois Abraão hakruuk tan iha ema Ete sira nia oin, 13i dehan ba Efron, “Imi hotu rona hau lai. Hau hakarak sosa kotu rai nee, para hau hakoi ami nia mate.”
14-15I Efron hataan, “Rai nee nia folin osan mutin moeda atus haat deit! Ita nain rua kontratu osan ituan nee hodi halo saida? Senhor baa hakoi ita nia kaben iha nebaa ona.”
16Abraão mos konkorda. Nunee nia sura osan mutin moeda atus haat, i selu ba Efron iha ema Ete hotu nia oin, para sira sai sasin.
17-19Nunee Efron nia rai nee sai ona Abraão nian rasik. Nee mak rai iha Makpela besik Manre (mak Hebron). Nia sosa kotu rai nee ho nia toos, nia fatuk kuak, ho nia ai huun sira hotu. Ema katuas Ete sira hotu mak sai sasin katak rai nee ho buat hotu iha laran, Abraão nian ona.
Liu tiha nee, Abraão baa hakoi nia kaben Sara nia mate isin iha fatuk kuak nee, iha rai Kanaán. 20Ho nunee ema Ete sira faan toos ho fatuk kuak nee ba Abraão, hodi halo rate.
Currently Selected:
Jenesis 23: BTDT
Highlight
Share
Copy
Want to have your highlights saved across all your devices? Sign up or sign in
© 2024 Wycliffe Timor-Leste.
