Jenesis 22

Maromak haruka Abraão entrega Isac para sai sakrifisiu

(Mateus 3:17; 17:5; Marcos 1:11; 9:7; Lucas 3:22; 9:35; 2 Pedro 1:17)

1Liu tiha nee, Maromak koko Abraão. Maromak bolu nia dehan, “Abraão!”

Nia hataan, “Nai Maromak.”

2I Maromak haruka nia dehan, “O lori o nia oan mane mesak Isac, nebee o hadomi liu nee, lori nia ba iha rai Moriá, halo nia sai sakrifisiu tunu foo mai Hau. Too ona iha nebaa, foin Hau hatudu fatin ba o, iha foho ida.”

3Aban dadeer-saan rai huun mutin, Abraão tesi ai hodi tunu sakrifisiu, i kesi ai nee tula ba kuda buru ida. Tuir mai, nia ho Isac, ho nia atan nain rua, baa iha fatin nebee Maromak foo hatene ona ba nia. 4Sira lao liu tiha loron tolu, Abraão haree fatin nee hosi dook. 5Nunee nia dehan ba nia atan nain rua, “Imi nain rua hein lai iha nee, ho kuda buru nee. Hau ho hau nia oan sei sae ba nebaa, para adora Maromak. Depois mak ami fila fali mai iha nee.”

6Entaun Abraão foti ai hodi tunu sakrifisiu, tau ba Isac nia kabaas. Nia rasik lori tudik ho kaer ahi. Sira nain rua lao tan, 7Isac husu ba nia aman, “Apaa!”

Abraão hataan, “Oan.”

Isac husu, “Ita atu tunu sakrifisiu, ai ho ahi iha ona, maibee bibi oan para halo sakrifisiu iha nebee?”

8Abraão hataan, “Oan, Nai Maromak rasik mak sei foo Nia bibi oan hodi halo sakrifisiu.”

Sira nain rua lao sae baa nafatin. 9Bainhira sira too ona iha fatin nebee Maromak hatete nee, Abraão hada fatuk hanesan altar para tunu sakrifisiu. Nia tau ai iha altar leten. Depois nia kesi tiha nia oan Isac i hatoba iha ai leten. 10I nia foti tudik atu oho nia oan. 11Maibee, derepenti deit, NAI Maromak nia anju hakilar hosi lalehan dehan, “Abraão! Abraão!”

Nia hataan, “Nai!”

12Depois anju nee dehan, “O la bele oho labarik nee! La bele halo buat ida ba nia! Agora Hau hatene ona katak o hamtauk duni i tuir Hau nia hakarak, tanba o prontu foo o nia oan mane mesak nee mai Hau.”

13Abraão foti matan, derepenti nia haree bibi malae aman ida nia dikur kait hela iha ai huun kiik ida nia sanak. I nia baa foti kedas bibi nee hodi tunu halo sakrifisiu foo ba Nai Maromak, troka nia oan. 14Nunee nia foo naran ba fatin nee, ‘NAI Maromak sei foo’.#22:14:Lian Ebreu dehan Yahova Yere, nee dehan katak ‘Maromak sei prepara saida mak ema presiza’. Nee mak too agora ema dehan, “Iha NAI Maromak nia foho leten nee, Nia sei prepara saida mak ema presiza.”

15I Maromak nia anju bolu dala ida tan hosi lalehan dehan, 16“NAI Maromak rasik hatete, ‘Hau jura hodi Hau nia naran rasik, katak: Tanba o halo nunee, i prontu foo o nia oan mesak mai Hau, 17nee mak Hau sei foo bensaun barak teb-tebes ba o, ho o nia jerasaun. Sira sei aumenta barak too ema sura la hatene, hanesan fitun iha loro leten, no rai henek iha tasi ibun. I o nia jerasaun sei manaan funu hasoru sira nia inimigu. 18Liu hosi o nia jerasaun, nasaun hotu-hotu iha mundu sei hetan bensaun, tanba o tuir ona Hau nia liafuan.’ ”

19Nee liu tiha, Abraão sira tuun fali ba nia atan nain rua. Sira fila hamutuk ba Berseba, i hela iha nebaa.

Naor nia jerasaun

20La kleur, Abraão rona dehan nia alin Naor nia kaben Milka iha ona oan mane nain walu. 21Oan mane boot naran Us. Nia alin naran Bus. Tuir mai, Kemuél (mak Aram nia aman). 22Iha mos Késede, Azo, Pildas, Jidlafe, ho Betuél. 23Betuél nee Rebeca nia aman. 24Naor hetan tan oan hosi nia kaben kiik, naran Reumá. Reumá nia oan mak Teba, Gaan, Taas, ho Maaka.

Currently Selected:

Jenesis 22: BTDT

Highlight

Copy