Ester 8

Ester buka dalan hodi salva nia ema Judeu sira

1Iha tempu nee, liurai Ahasuweros entrega Amaan nia riku-soin hotu ba nia kaben Ester, tanba Amaan nee inimigu ho Ester nia povu Judeu. Iha loron nee, Mordekai mos mai hasoru liurai, i Ester konta ba liurai katak Mordekai nee nia maluk. 2Entaun liurai hasai nia kadeli karimbu hosi nia liman fuan rasik nebee nia hetan fila fali hosi Amaan, i foo ba Mordekai. I Ester foti Mordekai hodi toma konta Amaan nia riku-soin hotu.

3Iha loron ida, Ester tama ba iha liurai nia fatin ukun hodi koalia ho liurai. Nia hakneak iha liurai nia ain, ho tanis husu para liurai taka tiha Amaan, ema Agage, nia planu aat nee.

4Haree nunee, liurai lolo nia rota osan mean nebee iha hela nia liman hodi hatudu katak nia hakarak simu Ester ho diak.

I Ester hamriik iha liurai nia oin, 5hodi dehan, “Amu liurai, se amu hadomi hau, i buat nebee hau atu husu nee haan malu ho amu liurai nia hakarak, entaun, hau husu nunee: favor hakerek surat dekretu ida hodi dada fali surat sira nebee Amaan, Amedata nia oan, hakerek tiha ona nee. Surat nebee haruka ema oho hotu povu Judeu iha amu liurai nia provinsia 127 nee. 6Tanba hau la aguenta haree hau nia ema sira rahun hotu. Saa tan hau nia familia rasik.”

7-8I liurai Ahasuweros foo hatene ba Ester ho Mordekai dehan, “Nee loos, maibee nia susar mak nee: se iha ona surat dekretu nebee sai ona uza liurai nia naran no tau marka hosi liurai nia kadeli karimbu, entaun, orden nee la bele muda no dada fila fali. Maibee ema hatene ona katak hau haruka ema tara mate tiha ona Amaan. I hau mos entrega tiha ona Amaan nia riku-soin hotu iha Ester nia liman, tanba Amaan inimigu ho povu Judeu i halo planu para halo rahun sira hotu. I hau mos entrega tiha ona liurai nia kadeli karimbu ba Mordekai. Nunee imi bele hakerek saida deit, tuir imi nia hakarak kona ba problema ho ema Judeu sira. Para imi hatene, bainhira imi hakerek surat ruma uza liurai nia kadeli karimbu, entaun, ema la bele dada fila fali. Tanba ida nee, ho hau nia orden mos hanesan.”

9Iha loron nee mos, loron 25 fulan Junhu,#8:9:Biblia ho lian Ebreu hakerek dehan, “loron ba-23 iha fulan ba-3, nee mak fulan Siwan.” Tuir ita nia kalendariu agora, loron nee monu iha loron 25 fulan Junhu, tinan 474 MK (Molok Kristu). Lian Ebreu mos hakerek dehan “Kus”, mak agora nasaun Sudaun ho Etiopia du Norte. Mordekai haruka liurai nia sekretariu sira hotu halibur, i foo orden ba sira hakerek surat dekretu tuir loloos saida mak Mordekai hatete ba sira. Surat sira nee, sira foo ba ema hotu-hotu, hanesan: ema Judeu, funsionariu, governador, ema boot sira iha provinsia 127 nebee namkari hosi India too Etiopia. Sira hakerek tuir povu iha provinsia ida-idak nia lian no sira nia hakerek rasik. Sira hakerek ba ema Judeu sira uza sira nia lian Ebreu no hakerek mos Ebreu. 10Mordekai tau surat sira nee hanesan ke liurai Ahasuweros rasik mak tau. Surat nebee atu haruka ba fahe tau liurai nia naran, no tau karimbu hosi liurai nia kadeli karimbu rasik nebee nia entrega ona ba Mordekai. Depois nia foo ba ema sira nebee lori lia tatoli, lori surat sira nee ba iha provinsia sira ho sae kuda nebee halai lalais, nebee sira hakiak foo ba liurai hodi halo ida nee. 11-13Iha surat sira nee hakerek nunee:

“Amu liurai foo hatene ba ema hotu nunee:

Iha tinan oin, loron 7 fulan Marsu,#8:11-13:Biblia ho lian Ebreu hakerek dehan, loron ba-13 hosi fulan 12, mak fulan Ada. Tuir ita nia kalendariu agora, loron nee monu iha loron 7 fulan Marsu. Haree ba Ester 3.7.

Ema Judeu hotu-hotu iha sidade ida-idak iha provinsia sira hotu,

bele halibur, no bele defende aan.

Se tropas mai ataka imi, entaun,

ema Judeu bele hasoru no halo rahun sira.

Se inimigu mai hosi povu nebee deit, ka provinsia nebee deit mai ataka sira, entaun,

ema Judeu bele kontra sira no halo rahun sira fali.

Maski mane ka feto.

Maski ema kiik ka boot.

Laos deit sira bele ataka fali sira,

maibee ema Judeu sira mos bele hadau sira nia inimigu nia riku-soin ho sira nia rai hotu.

Surat dekretu nee tenki taka iha provinsia ida-idak,

para ema hotu bele lee mesak ho sira nia lian rasik.

Ho nunee ema Judeu sira hotu bele prepara aan.

Hau nia surat dekretu nunee deit!”

14I liurai haruka ema sira nebee lori lia tatoli nee ba lalais. Nee mak sira sae liurai nia kuda nebee halai lalais, hodi halai ba iha fatin hotu-hotu, hahuu hosi muru forti iha sidade Suzan.

15I bainhira Mordekai sai hosi liurai nia palasiu, nia hatais ropa azul ho mutin, hanesan bai-bain liurai sira hatais. Nia tau koroa osan mean iha nia ulun, ho faru naruk hosi hena kabas hosi Ejitu nebee enfeita ho koor uvas. Bainhira ema iha sidade Suzan rona novidade nee, i sira haree Mordekai nia ropa kabas finu, sira haksolok no hakilar rame-rame.

16Bainhira ema Judeu sira rona novidade diak nunee, entaun sira kontenti teb-tebes, tanba sira bele moris, i ema sira seluk hatudu respeitu ba sira. 17Nee mak iha sidade ida-idak iha provinsia hotu-hotu, bainhira liurai nia surat dekretu too ona, i lee ba povu, entaun, ema Judeu hotu-hotu haksolok, kontenti no halo festa rame-rame. Iha ema balu mos husu para foti sira sai ema Judeu, tanba sira tauk keta halo be ema Judeu halo buat ruma ba sira.

Currently Selected:

Ester 8: BTDT

Highlight

Copy