Ester 7
7
Amaan nia hanoin aat fila fali ba nia
1Depois liurai ho Amaan mai festa hamutuk ho liurai feto Ester. 2Iha festa ba dala rua nee, bainhira sira hemu tua, liurai husu fali ba Ester dehan, “Liurai feto presiza saida? Ita hakarak husu saida deit mai hau, dehan deit! Hau sei foo! Maski ita hakarak husu hau nia riku-soin nasaun fahe ba rua mos, hau foo.”
3I Ester hataan dehan, “Nunee deit, amu liurai. Se amu liurai hadomi teb-tebes hau, i hakarak hatudu ita nia domin mai hau, entaun, hau husu para hau ho hau nia povu bele moris. Ida nee mak hau presiza. 4Tanba iha ema balu faan tiha ona hau ho hau nia povu, para oho mate. Se sira hakarak faan ami para halo sai atan, mane i feto, entaun, hau sei la koalia buat ida, tanba hau lakohi tenta amu ho buat kiik-oan sira nee. Maibee se hakarak oho hotu hau ho hau nia povu, nee halo amu liurai lakon boot. Nia ikus mai sei sae boot!”
5Depois liurai Ahasuweros husu ba nia kaben Ester dehan, “See mak hakarak halo ida nee? See mak brani halo nunee?”
6I Ester hataan, “Ema aat nebaa, Amaan. Tanba nia inimigu ho ami, no hakarak oho hau ho hau nia povu hotu!”
Rona Ester foo hatene nia aat ba liurai, iha nia oin nunee, Amaan mos tauk atu mate.
7Liurai hirus teb-tebes. I nia hamriik sai tiha husik hela sira. Nia lao ba iha palasiu nia jardin hodi hanoin atu halo saida.
Maibee Amaan haree katak liurai atu kastigu nia, tanba nee, nia hakarak hela nafatin iha nebaa hodi husu ba Ester para salva nia. 8Iha festa nee, Ester toba hela iha kadeira naruk, tuir sira nia kultura. Momentu nee liurai mos fila hosi jardin ba fali iha festa nee, i nia haree Amaan monu ba Ester i kaer hela Ester nia ain hodi husu ba liurai nia kaben salva nia.
Haree nunee, liurai mos hakilar dehan, “Hei! Ema ida nee demais liu ona! Nia bele brani hakarak toba ho hau nia kaben iha hau nia uma nee!”
Rona liurai koalia nunee, nia funsionariu sira taka tiha Amaan nia oin ho hena. Nee hanesan sinal katak nia tenki mate.
9Depois liurai nia ema konfiansa ida nebee serbii nia, naran Arbona, foo hanoin dehan, “Amu liurai, iha Amaan nia uma oin iha ai-riin ida, aas metru 22, hodi tara ema. Amaan harii ai-riin nee para hodi tara mate Mordekai, ema nebee uluk salva amu liurai, bainhira ema nain rua atu oho liurai.”
Rona nunee, liurai haruka dehan, “Entaun, lori ona Amaan ba tara iha nebaa!”
10Entaun sira tara Amaan iha ai-riin nebee nia rasik harii hodi tara mate Mordekai. Oho hotu tiha, liurai nia laran mos malirin.
Currently Selected:
Ester 7: BTDT
Highlight
Share
Copy
Want to have your highlights saved across all your devices? Sign up or sign in
© 2024 Wycliffe Timor-Leste.
