Matiye 2

Məsənaŋ zəga tahəŋ əzza ula Yesu

1Muwani Yesu a Bet-Lehem aka dələv na Yude, gala Herodə asan aka məlyã. Dərɓaga muwani, məsənaŋ zəga azzoŋguk səmmba pay nampum a Yerusalem. 2Assohoŋ na: Aŋgay wiyən muwan nawsan məlĩ net mə Yudeɗiŋ di? Mulak ngərzla nan ambra pay nampum vini məde kawgagdakani.

3Adan məlĩ Herodə aprəm vaska, attapək dit ɗiy na Yerusalem pakə. 4Yaŋ akkelet deyeɗe net məsdəlveŋge dit mərbaŋ-mahenziŋ pakə, attokonək met na, aŋgay adawanən Kristu di? 5Azlan sənən na: A Bet-Lehem a Yude. Vaski məskəleŋ avere.

6 # MIK 5:1 Is Bet-Lehem dələv na Yuda

məgəsuk kənan a walaŋgit walagəleɗe gugriɗ mbrit na Yuda ɓa:

Vi səzoki məlĩ adawgilyeni

məs nawtaɗ ɗiy naw mə Israyel.

7Yaŋ Herodə aye məsənaŋ zəga mahaɗama yaŋ aprəman sənən pay məs ngərzla arbə təstəsə. 8Aslinik a Bet-Lehem, aɓsit na, mədoŋ məkayan gəla wiyən van lewlewi, an kərəhnənka, Kənah suwəngən ndawgən əgagdakan tamə.

9Səza aprəmən an məlĩ anahə, ambataŋka. Yaŋ ngərzla məs awlaŋ ammba pay nampum nak adaw abeti, ade iziw aka təki məs wiyən asani. 10Səza awlanən ngərzla, annekenənək zit də ənnek diyɗa. 11Atoŋgoŋguk eŋgili, awlanənək wiyna dət man, Miryam. Agdukoŋguk afuŋ agagdakanənka. Yaŋ apələn ma gabal net apsənənək zəga, meleŋge də gaŋgəlnya, gəm tursan nani. 12Yaŋ Maŋgəlva anah sit də wisine adawmilyoŋ kəlaza Herodə ɓa, amndoŋguk aka dələv net dəka tive mbərən.

Əsmaɗ əmbat a Eziptə

13Səza məsənaŋ zəga ambataŋgə, maslay na Daya arbanək zən aza Yosef addəv əssine aɓsən na: Asili, aslan wiyən dət mani dok a Eziptə, asok adak hã gap nənah sukgəni. Vi Herodə wakayan wiyən kawbayən.

14Yosef afɗahka aslanək wiyən dət mani də dəfɗa ambataŋgək a Eziptə. 15#HOS 11:1Asanək adak hã gap Herodə zamə. Vasna vi kaknahan an Daya anah də ma məskəleŋ nani, sə Eziptə nəya wətuwa.

Wəbay kirin məmeɗeŋɗe

16Adan Herodə awla na məsənaŋ zəga asmayanənka, gədəvən adək diyɗa, yaŋ aslən əzet kirin mezeŋleket sə Bet-Lehem pak gəm səket meŋge nan pakə, təŋ səka wəzva sula hã məs dəgapaŋ ɓa pakə, va an məs aprəm səmet məsənaŋ zəga va pay awlanən ngərzla nan egili. 17Vaski zəga an məskəleŋ Yeremiya apel akan aknahə.

18 # YER 31:15 Məprəmni vamvəl a Rama,

əhəma də əɓuhma tay diyɗa,

Rakel tat əhəm ammbet kirtita,

təɓoŋguk dawɓətgət aka wən net kirtita vi tahəŋ ɓa.

Əmilyẽ sə Eziptə

19Adan Herodə amtə, maslay na Daya arbanək zən aza Yosef addəv əssine a Eziptə. 20Aɓsən na: Asili, aslan wiyən dət mani, amndok aka dələv na Israyel vi məzukayanən wiyən kawbayən amtaŋka.

21Asilke agəmək wiyən dət mani amilyoŋguk aka dələv na Israyel. 22Adan aprəm na Arkelawus dəsan məlĩ a Yude agəla Herodə afəni, geslne armak dawsan adaka, yaŋ Daya anah sən addəv əssine, ammbat aka dələv na Galile. 23#MAR 1:24; LUK 2:39; YOH 1:45Ambatka, asanək a walaŋgəla məs adawyaŋ na Nazaret. Vi kaknahan an məskəleŋɗe anahaŋ na: Kawyani na mə Nazaret.

Currently Selected:

Matiye 2: GBD

Highlight

Copy