Zakarya 9
9
Wətawwən aket meggeŋgiɗit Israyel
(9:1-8)
Wətawwəna gəm wəkõh net meggeŋgiɗit mə Israyelɗe
1 #
ISA 17:1-3; YER 49:23-27; AMO 1:3-5 #
ISA 23:1-18; EZE 26:1—28:26; YO' 4:4-8; AMO 1:9,10; MAT 11:21,22; LUK 10:13,14 Ətəlma.
Əpel na Yawe adek aka dələv na Hadrak
gəm a Damas təki an aziwi,
vi hara Yawe tay
aka ɗəf titir pak
gəm aket mahəlfaɗe na Israyel pakə.
2Gəm aka dələv na
Hamat meggeni,
də Tir gəm Sidon,
vi maɗɗulet tay diyɗa.
3Tir arkak zlava sən kini,
akkalanək təbəz babar ɗigit va burɗuku,
gəm meleŋge ndoɗoɗ-ndoɗoɗ
va ndərɓa aka tive,
4Ya Yawe wamohõ,
wazan arya nan van a pehe,
ndən sən kini, offo wazəma.
5 #
ISA 14:29-31; YER 47:1-7; EZE 25:15-17; YO' 4:4-8; AMO 1:6-8; SEF 2:4-7 Aza ulan kaka'ə,
Askelon wageslne'i,
Gaza wakker diyɗa,
wil wadanən Ekron vi əbbah nan tay ɓa.
Kawzani məlĩ na Gaza,
kassay də gəla a Askelon ɓa.
6Sulomɗe nassoŋ də gəla a Asdod,
vas nədawzan
wəkaɓ net mə Filistiɗe.
7Wanəzergit mbel səmani,
zəgeɗ nawmə' sə barani;
nan pak kappani
ka na Maŋgəlva namə.
Wasan va daya a Yuda,
Ekron wasan məstaka va mə Yebus.
8Wanəɗi dibirgidik naw aza gəla nawa,
kawga kawtak məzutoŋ də an dədamnda ətoŋgo;
məzusər met tay nawrəŋgit dawtoŋ əmpa ɓa,
vi kakaŋ nulak də harawa.
Əzaɓ an nabe gəm zazaya
(9:9—14:21)
Məlĩ nawki zazaya
9 #
MAT 21:5; YOH 12:15 Anneken zuk diyɗa, waŋ na Siyon!
Aɗɗəl nanneken zuko, waŋ na Yerusalem!
Məlĩ nok yaŋ tay əzzan azoko;
təstəsi yi gambaray,
avoŋgənək kini, apeŋgik aka koro,
aka wət koro.
10 #
GLƊ 72:8
Wanəzan mawta nawgay sə Efrayim,
pilseŋge sə Yerusalem,
kawzani bəle nalpa,
wapel wən zazay sit dəlveŋge.
Məlĩ nan wasil sə pehe hã gap a pehe maɓɓani,
gəm sə məlpa metiŋ gap aka dələv abaymani.
Əppet məfərsəneɗi
11 #
ƏGI 24:8
Nok pak dit mbel
na wənmiyna nok
nəgilgit məfərsəneɗ nok
sə vov məza iŋkile addəvən ɓa.
12Məmndoŋ addəv zlava mərkani,
məfərsəneɗ məs əɗɗum nawrəh zəga.
Dəpaŋ na, nənahək na:
wanəfaɗ suk wəya nok zlaɓ sula.
13Nənslinək Yuda ka bəle nawa,
Efrayim wasan herɗe.
Siyon, wanəhheɗet kirtuk
aket mə Yawanɗe;
wanəɓlok va masalam
ava məs makrani.
14Yawe disiŋ kiyit warban zəni,
har nan wawiɗ va iwiɗ na buna.
Yawe Maŋgəlva waffon gozloro,
wambat addəv barkataŋ na dohoŋ.
15Yawe Məzuɓappak wazeŋ areti,
wazimin gəm wammusin gərmeŋge na mabəŋbəŋga,
wasaŋgə gəm wagəbəɗaŋ va mbazla,
waknəhaŋ va huloŋguk nawpesle,
va mohõ gəlamatuya.
16Yawe Maŋgəlva net wakõhgit ɗiy nan dəpas
va məzutaɗa dit gilew nani.
Siɗek va gərmeŋge na sləma,
vas adawiɗeŋ aka dələv nani.
17Haya, va adannekeŋgi!
Haya va adassoŋ lelewɗe!
Haykəmari wapsit gbogboŋ sit gewleɗi,
mbazla na meketepe wasɓet gorɗeŋge.
Currently Selected:
Zakarya 9: GB
Highlight
Share
Copy
Want to have your highlights saved across all your devices? Sign up or sign in
All right reserved
