Zakarya 10
10
Əssõh a ma Yawe, məza a met tuyeŋge ɓa
1Məssõh buwən na mawala
a ma Maŋgəlva.
Yawe yi məzuki
buwən də səmyã gəm an maŋgalaw;
gəm zəga na mabardaw sən ɗəf pakə.
2 #
MAT 9:36; MAR 6:34 Vi terafimɗe wən ɗar apeleŋgi,
məskaŋ helig tepelke awlaŋgə,
dit issineɗ ɗar adazzayanən mekreti.
Vini ɗiy adaddoŋ də met
va gilew tiŋgbirtiŋgbir
məza məzutaɗa ɓa.
Wənmiyna na əbite
3Aket məzuteɗeŋɗe gədəvu adə,
aket porsokɗe nədawsilyewa.
Vi Yawe Məzuɓappak
azgək sləma aka gazlaŋ nani,
gəla na Yuda.
Akkpeŋgetik va pələs
narban gagdak nan a ma əlpa.
4Səzan gərəm naka ədoɗ na gəla,
məpyoko nampa gizlirke,
bəle nawgaya,
səzani deyeɗe adawgilyoŋ aka mataka.
5Wassoŋ va gambereɗi,
məndapanən ndərɓa
aket tiveɗ də əlpa.
Walpaŋgə, vi Yawe tay dənɗaŋ,
ɗiy dəpeŋgeŋ aket pilseŋge warbaŋ wili.
6Wanəɓɓəlet ɗiy na Yuda,
wanəkõhgən gəla na Yosef.
Wanəzi də gəla,
vi wanula sasẽhti,
wassoŋ va nəzget ɗah ɓa,
vi Yawe Maŋgəlva net nani,
wanəzlan a meti.
7Ɗiy na Efrayim
wassoŋ va gambereɗi,
mekret wannek va asaŋ mbazla.
Kirtit wannekeŋ də uleti,
makret wagəɗ haɗak vi Yawe.
8Wanəffon sit mohõ,
wanəkkeleti, vi nəbitike,
wawanən kiyit diyɗa gba lahəŋka.
9Wanətreyet aweleŋgit ɗiy nammba dəlva,
ya sə faraɗa dayday waɗɗumowəni,
wassoŋ dit kirtiti, ya wamilyoŋgu.
10Wanəmilgit səka dələv na Eziptə
gəm wanəkkelet sə Asiri.
Wanətoŋgit aka dələv na Galad gəm a Liban,
də as pak təki wagəs siti.
11Waggaraŋ ki pehe nawzəm sahã,
Yawe warge vovolumɗe na pehe.
Kpukpum na Nil pak waŋkələ.
Wəkaɓ na Asiri wavoŋgu
gəm zleŋge na məlĩ na Eziptə wazarə.
12Wanəkkpeŋget məs mekret də iya na Yawe,
aka iya nan adawdawaŋgə,
Yawe aɗiymani.
Currently Selected:
Zakarya 10: GB
Highlight
Share
Copy
Want to have your highlights saved across all your devices? Sign up or sign in
All right reserved
