Zakarya 6
6
Ula madodopoɗoni: mawteɗ nawgay poɗo
1In həmsak le'gən harawa, in təm mawteɗ nawgay yeŋ poɗo əgilyoŋ sə weleŋgit mossorgoɗe gugriɗ sula, mossorgoɗe gugriɗ na təbəz pepreŋge. 2#HNH 6:4 HNH 6:5Mawta maddaabəŋ mətokən ammbet pilseŋge pepreŋɗe; masulan ammbet pilseŋge tuturɗe; 3#HNH 6:2mawta mahoketi, mətokən ammbet pilseŋge babarɗe, gəm mapoɗeti, ammbet pilseŋge borzlozlo də pepreŋ gbogboŋɗe. 4Yaŋ nəzlan nəssohõn maslay dədawpel də in naka: «Daya nawa, miy adarbaŋ kandi?» 5#HNH 7:1Maslay nak azlan anah suwa: «Eŋ səmyẽŋge poɗo na disiŋ dəgilyoŋ səza aziweŋ aba Afən dələv gboŋgu.» 6Wətok net pilseŋge tuturɗe ambatək dəka dələv na kəla disiŋ. Babarɗe azbetini, en borzlozlo də pepreŋ azet tam adawmbataŋ dəka dələv na kəla dohoŋ. 7En gbogboŋɗe agilyoŋko, met aka əmbat əbbalan dəlvafuŋ. Yawe aɓsit na: «Məddoŋ məbbalan dəlvafuŋ.» Abbalanənək dəlvafuŋ. 8Ndən dah iyuwa, amna: «Awle en dəgilyoŋ səka dələv na kəla disiŋ, aprikgininək Əmpəs naw aka dələv na kəla disiŋ.»
Mətərkiya na meleŋge aka Yosuwa
9Əpel na Yawe adek azaw dawnəh na: 10Ataf əvəl səvet ɗiy misimgiti, may Helday, Tobiya də Yedaya akiyaŋgə. Atoŋ is sən kiyuk dəpaŋka, atoŋ eŋgil ana Yosiya wətən Sefanya da, əgap net yaŋ kakaŋ sə Babilon adaka. 11Kəgəmgən təbəz babar də an na meleŋge, kəɗɗaŋgən mətərkiya dənditi, kəɗup səngən aka Yosuwa, wətən Yosadak, daya net məsdəlveŋge. 12#YER 23:5; 33:15; ZAK 3:8Kənah səngəni, is na: An Yawe Məzuɓappak anah yaŋka, amna:
Ɗəf yaŋ
iya nan na Maməŋkənzeŋve,
sə gəla tələn zeŋgile adawgilyeni,
warka Gəla na Yawe.
13Ndəni narka Gəla na Yawe.
Ndəni nawgul lukut na məlyã,
wasan aka mazaŋga nan kawzəm məlyã.
Məsdələv wasan aka mazaŋga nan tamə,
wəsler na zazay
wasan gərak a weleŋgit sulegiti.
14Mətərkiya wassan addəv Gəla na Yawe, kaɗɗumet may Helday, Tobiya, Yedaya gəm Hen wətən Sefanya.
15En məs faraɗa wazzoŋ karka Gəla na Yawe, wakəsənnən na, Yawe Məzuɓappak dəslənu azokum. Wagəɗə, an mənokum tat əprəm ma Yawe Maŋgəlva nokum lewlewi.
Currently Selected:
Zakarya 6: GB
Highlight
Share
Copy
Want to have your highlights saved across all your devices? Sign up or sign in
All right reserved
