Matiye 12

Yesu gəm pay naffete

(MAR 2:23-28; LUK 6:1-5)

1 # ƏMS 23:26 Pay dəpaska, Yesu atoŋguk kəladdəv guli na haykəmari pay naffete. May armek gewleɗ nani, yaŋ aŋzlaŋ ki haya, ampərəni. 2Adan Farisaɗe awlanən vaska, anah sənən na: Awle gewleɗ nok adaɗɗaŋ an dəslə naɗɗa pay naffet ɓa. 3#1SA 21:2-7Yesu azlan sitike: Kəŋɗanən an məs Davit agəɗ gala mãy ada ndən dit ɗiy nammban ɓa sa? 4#MƏS 24:9Va atoŋ addəv gəla na Maŋgəlva, azimin peŋɗe na ma tuya, məs ndəni awaniɓa ɗiy en dəndən tahəŋ də tive nawzimit abbər məsdəlveŋge kaka' ɓa ɓa sa? 5#ƏŊƊ 28:9,10Awaniɓa kəŋɗanən ɗah addəv ɗerewel na mahenziŋ na, pay naffete, məsdəlveŋge addəv Gəla na Maŋgəlva tay əraygənən pay naffete, məza əsan sit ka mbərayən ɓa ɓa sa? 6In tat ənah sukum: An dəday ki Gəla na Maŋgəlva də gagdak tay aŋka. 7#MAT 9:13 HOS 6:6Va kəprəmənək gabba əpel dənah na: Ulasahã nəŋgələ, əzaɓ-Maŋgəlva yi ɓa, kəta kətawən na wən aket ɗiy məs dəɗɗaŋ mambray ɓaŋɓa. 8Vi Wətən Ɗəf van afən pay naffeti.

Ɗəf məs van məmtəni

(MAR 3:1-6; LUK 6:6-11)

9Yesu zar sədaka, ammbat addəv gəla nakkal net mə Yudeɗi. 10Ɗəf məs van məmtən tay adaka. Ɗiy assohõnən vi karman də wəna dawnəh na: Tive nawmbəlgən ɗəf pay naffet tay sa? 11#LUK 14:5Yaŋ azlan sit na: Ɗəf awani səwalaŋkum, an tay də time taka kaka', an abətək a vov pay naffet na, al na ərman kakdəhən ɓa di? 12Ɗəf adayək ki time də sləma, vi vaski lewi əɗɗa wəza moggon pay naffete. 13Yaŋ aɓsən sən ɗəf nak na: Appar voko. Apparək vani akkpaŋgək gboloŋgboloŋ va an maɓɓani. 14Farisaɗe agulyoŋko, aslerinik met akani vi kawrəh tive nawzani.

Gawla an Maŋgəlva aweli

15Adan Yesu asən wən neti, ambatək sədaka, yaŋ ɗiy diyɗa azbanənka. Ambəlgitik pakə. 16Ndən met tak adarbanən na ndəni ɓa. 17Vi kaknahan an məskəleŋ Isaya anah dawnəh na:

18 # ISA 42:1-4 Gawla naw an məs nəwel yaŋka,

an məs nəŋgəl nenneken zu dəndən.

Wanəɗi Əmpəs naw akani,

warban təstəs sit ɗiy-ɗarə.

19Agay na də ɗəf ɓa,

aŋgəsl na vamvəl ɓa,

ɗəf tay naprəm wəlan

aket tiveɗ ɓa,

20aŋzlu na eflere an dədoɗ ɓa.

Amtan na lalam an dədaɗɗa enene ɓa,

hã gap ndən ziwgin ətawwən əska wəla.

21Ɗiy-ɗar waɗiyənən əɗɗum net akani.

Yesu tay əzlan aka wən məhew akani

(MAR 3:20-30; LUK 11:14-23)

22Yaŋ məki sən ɗəf dit tuyeŋge akani, daŋgari gəm goryom mərma hərzlumən, Yesu ambəlgənəka, goryom mərma hərzlumən nak apelke, awəlka. 23Ɗiy pak aggətaŋka, aɓɗaŋ na: Ɗəfəŋ wətən Davit ɓa sa? 24#MAT 9:34; 10:25Adan Farisaɗe aprəmən vaska, aɓɗaŋ na: Ɗəfəŋka Belzebul məlĩ net tuyeŋɗe dəpsən gbogboŋ adarɓih tuyeŋɗe. 25Yesu asənək əɗɗum neti, aɓsit na: Məlĩ pak an ɗiy nan dəslereŋ aweleŋgit ɓa, arayka; walaŋgəla-metiŋ awaniɓa gəla na ɗəf awan di pakə, an ɗiy nan dəslereŋ ɓa, aziw na ɓa. 26An Satan tay ərɓəh Satan na, awɗakanək ki zəni, mbarmbari məlĩ nan adawziw kan di? 27Ya an naw də Belzebul nədawgilgit tuyeŋɗe na, kirtukum net də miy adawgilgitin di? Vi aski adassoŋ mətawaŋ wən akokum. 28Ya an də Əmpəs na Maŋgəlva nədawgilgit tuyeŋɗe na, vas kan na məlĩ na Maŋgəlva agapək akokum.

29Mbarmbar ɗəf adawɓap ətoŋ ana ɗəf gurom da kawnda arya nan an dəɓruk ɗəf gurom van ɓa di? As kan na waklomon gəla nani.

30 # MAR 9:40 Ɗəf an tay də in ɓa, məzuzel nawi. Ɗəf an dəbbah su əkkalan ɓa, watərayani. 31Vi vaski nədawnah sukum: Mambraya gəm əpel mbərayən aka Maŋgəlva pak kavvuyon siti ɗiyi. Ya əpel mbərayən aka Zeŋgile Salala kavvuyoni ɓa. 32#LUK 12:10Məs dəpel mbərayən aka Wətən Ɗəfa kavvuyon səni, ya məs dəpel mbərayən aka Zeŋgile Salala, kavvuyon səni ɓa. Kavvuyoni aka pay an kakaŋka ɓa, aka pay an dədazan ɓa.

Wəlaŋga gəm uwa nani

(LUK 6:43-45)

33 # MAT 7:20; LUK 6:44 An wəlaŋga moggoni, uwa nan wasan moggoni. An wəlaŋga moggoni ɓa, uwa nan zlaŋ wasan moggoni ɓa. Aza uwa nan adawsənən wəlaŋga. 34#MAT 3:7; 23:33; LUK 3:7 MAT 15:18; LUK 6:45Zeŋvit barwayɗe, mbar kədawɓap əpeleŋ aket zəgeɗ moggeti ya mbara mbəraykum kənanaŋ di? Vi an ma ɗəf adawpele sə makra ɗəf adawpislkiwe. 35Ɗəf moggoni wagilgit zəgeɗ mogget sə təki əzaɓ nan moggoni, ɗəf mbərayən wagilgit zəgeɗ mbəreyit sə təki əzaɓ nan mbərayən. 36In tat ənah sukum: Pay wəgrak dəlva, ɗiy wazlanən aba ətawwən aka əpel ɗar dəgil sə metəŋ pakə. 37Vi aza əpel noki adawɗikun ka ɗəf təstəsə, aza əpel noki wən adarmuko.

Əssoh sekene

(MAR 8:11-12; LUK 11:29-32)

38 # MAT 16:1; MAR 8:11; LUK 11:16 Ɗiy sə waleŋgit Mərbaŋ-mahenziŋ dit Farisaɗe anah sənənək Yesu na: Mərbəzəga mam aka ula sekene an dəde səzoko. 39#MAT 16:4; MAR 8:12Yaŋ Yesu azlani, aɓsit na: Sayit ɗiy mbəreyti, məs məluvuluvuɗe. Tay əŋglaŋ Sekene ya arahaŋ na sekene maɓɓan abbər sekene na məskəleŋ Yonas ɓa. 40#YON 2:1Va Yonas agəɗ pay hoku dəfəɗ hoku addəv kilfi, vaski Wətən Ɗəf tam adaɗɗa, pay hoku dəfəɗ hoku ammba dəlvafuŋ. 41#YON 3:5Ɗiy na walaŋgəla-metiŋ na Niniwe wasilyoŋ pay əgrak dələv aka sayit ɗiyiŋki, watawən wən aketi, vi aɗiyaŋgək marava aka aprəmənən əpel na Maŋgəlva sə ma Yonas. Yaŋ an dəday ki Yonas tay aŋka. 42#1MI 10:1-10; 2AL 9:1-12Pay əgrak dələv na, məlyaŋgək na dohoŋ watəsil aka sayit ɗiyiŋki, watətaw wən aketi, vi tədek hã sə meteɓ ma dələv vi kaprəm əpel na Salmoŋ də wəsən nani. Ya an dəday ki Salmoŋ tay aŋka.

Əmilye na tuya

(LUK 11:24-26)

43An tuya agilik səka ɗəfa, wabbal awra wakay təki naffete, an dərah ɓa, 44asna wanah na: Wanəmil addəv gəla naw məs nəgil səddəvən naka. An amilik addəvən, warəh də mani, məfaɗani gəm məzaɓani. 45Asna wambatə, waki əmpəsɗe mbəreyit meɓɓet buhul sap azani, mbəreyit day kiyən anani, watoŋgoŋ wassoŋ adaka. Əsuwa na ɗəfəs wasan tuwãh day ki an daabəŋ. Vaski adawsan sən sayit ɗiy mbəreytiŋki.

Ma Yesu dit milmiŋgiɗni

(MAR 3:31-35; LUK 8:19-21)

46Aka Yesu adawpel sit ɗiy tagay, mãy man dit milmiŋgiɗin tahəŋ ziwziw appaka, met aka əpel səni. 47Yaŋ ɗəf aɓsən Yesu na: Mok dit milmiŋgiɗuk yeŋ ziwziw appaka, met aka əpel suko. 48Yaŋ Yesu azlani, aɓsən ɗəf dədawpel sən nak na: Nawattə əmma di? Mədəŋgaŋ milmiŋgiɗu di? 49Yaŋ atəl van azet gewleɗ nani, amna: Akəŋtə əmma dit milmiŋgiɗwa. 50Vi ɗəf məgəɗ əŋgla na Afu na disiŋ pak, ndəni məlmuwa, ndəni məlmu məguluŋguta gəm əmma.

Currently Selected:

Matiye 12: GB

Highlight

Copy