Matiye 11

Maslənɗe na Yohanna məgəɗ baptem

(LUK 7:18-35)

1Adan Yesu agrak əɗi wən nan sit gewleɗ nan kəlaw kiyit sula, ambatək sədaka, vi kaɗɗa əyaka gəm kawpel wən na Maŋgəlva addivit walaŋgəla gugriɗ neti.

2Yaŋ Yohanna səddəv fərsəna aprəmək alabara na wəza na Kristu, aslən gewleɗ nani, 3vi kawnah sən na: Istə məs nazzokuŋ sa? Awaniɓa məga ɗəf maɓɓan sa? 4Yesu azlan anah sit na: Məddoŋ mənah an kədaprəmaŋ də an kədawlaŋ sən Yohanna: 5#ISA 35:5,6 ISA 61:1Deŋgerɗe tay ulaŋgə, vədalɗe tay ədawaŋgə, məskokoleɗ abburoŋko, goryomɗe mərma hərzlumit tay əprəmaŋgə, ɗiy mimtit asilyoŋko, məs sahẽŋɗe tamə tay əprəmnən Wən Neneke. 6Əzaɓ aka ɗəf an məs nəsaw sən ka zəga nazbərgən ɓa.

7Aka gewleɗ na Yohanna adaddoŋgu, Yesu təŋ əpel wən na Yohanna sit ɗiyi, amna: Mi kəddoŋ ula a kapta-muyã di? Eflere an səmyã adaɓlan sa? 8Ya mi kəddoŋ ula kandi? Ɗəf dəgul lukutɗe na sləma sa? Ya məguloŋ lukutɗe na sləma a net milyẽŋge da adassoŋgu. 9Ya mi kəddoŋ ula kandi? Məskəleŋ sa? In tat ənah sukum: Gesiŋ məday ki məskəleŋgi. 10#MAL 3:1Ndəni an məs məverin apel akani: In tat əslən maslən naw aboko, an dədawzaɓan tive nok səboko. 11Gesiŋ nədawnah sukum: Səwalaŋ uwa net gil pak tay an məs dəday ki Yohanna məgəɗ baptem ɓa, ya an muzliya naddəv məlĩ na disiŋ, adayək kini. 12#LUK 16:16Təŋ səza pay na Yohanna məgəɗ baptem hã gap kəkaŋka, gagay tay əteh aka məlĩ na disiŋ, məsgagayɗe dədawkayaŋ əmõhən. 13Vi məskəleŋ baymet gəm mahenziŋ aɗɗaŋgək kəleŋ hã gap aza Yohanna. 14#MAL 3:23; MAT 17:10-13; MAR 9:11-13An kətafənka, ndəni Eliya an məs nazzani. 15Ɗəf an məs də sləman pak dəprəma:

16Də mi nədawsla sayit ɗiyəŋ di? Agilik va kirin dəssoŋ a təki nakkala, məzutələn met sit meɓɓeti. 17Ənahaŋ na: Məffon sukumək pozloro, kəskəlaŋ ɓa, məyə sukumək gəlya na gəlabaya, kəskaŋ morkoyo ɓa. 18Vi Yohanna adeke, awzəm ɓa, awsa ɓa, aɓɗaŋ na: Tuya tay akani. 19Wətən Ɗəf adeke tay əzəma tay əsa, tay ənahaŋ na: Ɗəf məs golvoŋ yaŋka, məsə mbazla, baynet məkkalaŋ nzalaka gəm məɗɗaŋ mambraya. Ya maɗula arbək təstəs dit wəzeɗe nani.

Walaŋgəlaɗe gugriɗ məs dədawɓoŋgoŋ dawtafa

(LUK 10:13-15)

20Yaŋ Yesu atəŋ əheyẽt walaŋgəleɗe gugriɗ məs agəɗ sekeneɗ adak diyɗa sawɓaŋka vi dəɗiyaŋ marava ɓa. 21#ISA 23:1-18; EZE 26:1—28:26; YO' 4:4-8; AMO 1:9,10; ZAK 9:2-4Əray azoko Korazin, əray azoko Betsayda. Va sekeneɗiŋ a Tir gəm a Sidon məɗɗet na, kəta farfar aguloŋguk lukut na gəlabaya, aggbo'oŋguk moŋglo aketi, aɗiyaŋgək marava. 22Vini nədawnah sukum: Pay nawtawwən na, tatwãh na Tir də an na Sidon wasan ɗəɗah ki an nokum. 23#ISA 14:13-15 VAA 19:24-28Ya is Kafarnahum, wakəɓaygən zuk hã a disiŋ sa? Hã a təki nanziya net mimtit kədawpurkoko. Vi va a Sodom məɗɗe sekeneɗ dəɗɗaŋ anokdaŋka, kəta wasan hã dəpaŋka. 24#MAT 10:15; LUK 10:12Vini nədawnah sukum: Pay nawtawwən na, tatwãh na dələv na Sodom wasan ɗəɗah ki an noko.

Məde azawa kərahaŋgən əffete

(LUK 10:21-22)

25Pay nan dəpaska, Yesu agəmək əpele, yaŋ amna: Intat əgagdokoko Əbba, Daya na disiŋ də dəlvafuŋ, vi kəɗemetik zəgeɗis səma heret məs maɗɗulet dit məs əsəna, kərbet sit kirin muzliyeɗi. 26Ha'aw, Əbba, vi vaski kəŋglu dəgəɗgən ama horoko.

27 # YOH 3:35 YOH 1:18; 10:15 Zəga pak Əbba apsuka. Ɗəf tay dəsən Wətən an Afəni ɓa ɓa, ɗəf tay dəsən Afən an Wətəni ɓa ɓa, gəm ɗəf an Wətən aŋgəl narban səni.

28Mide azawa munokum pak məyokum də zəga gədak akokuməŋka, ya naw wanəpsukum effete. 29#YER 6:16Məslan zuk naw akokum, məyak azawa, vi zay nani, makraw barə, wakərahaŋ əffet na zeŋgilokum. 30Vi zuk naw moggoni, an məs nədawɗi sukum nawsla kafat-kafati.

Currently Selected:

Matiye 11: GB

Highlight

Copy