Luka 5

Yesu tay iye gewleɗ en madabəŋ

(MAT 4:18-22; MAR 1:16-20)

1 # MAT 13:1,2; MAR 3:9,10; 4:1 Adan ɗiy assoŋ ɓəsɓəs akan vi kaprəm əpel na Maŋgəlva, nan asan ziwwe ama bobok na Genesaret, 2ndən təm bəlayɗe sula a ma bobok məs mərmaŋ kilif apurkoŋ səddivit əskoɓ zəveɗe neti. 3Ndən peŋ addəv taka səret bəlayɗe veti, an na Simoŋ. Akkamanək dəzargənəgən bəlay van siɗikke səza mabuzgum. Ndən kan ɗew əyeget ɗiy səddəv bəlay vani.

4Adan appan əpele, aɓsən Simoŋ na: «Dok abe a təki kpukpumo, məzget zəveɗe nokum kərmaŋgən kilfi.» 5#YOH 21:3Simoŋ azlanka amna: «Mərbəzəga, kim məvoŋ aka əɗɗa wəza, zəga tay mərəm ɓa. Ya aka əpel nok na, wanəzget zəveɗe.»

6 # YOH 21:6 Adan aɗɗanən vaska, armaŋgək kilif diyɗa, hã zəveɗe net əŋgaraŋgə. 7Ahevetnin mekkeyeŋgiɗit naddəv bəlay maɓɓan nak dəzzoŋgən əbbahaŋ sitini. Ndəɗaŋ payə, aknihnin bəlayɗe sulegit hã ndəɗaŋ ətəpaŋ. 8Adan Simoŋ Piyer awla vaska, ndən gbəduk də takpran aba Yesu dawnəh na: Ader səzawa, vi ɗəf məs mambray nani Daya. 9Geslne armaka, ndən dit ɗiy en dəndən pak vi kilfeŋge məs armaŋ diyɗaŋka. 10Vaski yi'e mãy Yakob də Yohanna kirtin Zebede məɗɗaŋ wəza də Simoŋ. Yaŋ Yesu aɓsən Simoŋ na kədawgeslne ɓa təŋ kakaŋka wakəsok mərəm ɗiy medereti. 11Akeninik bəlayɗe net a mabuzgum, appetinik zəgeɗ pak azbanəni.

Yesu tay əbbur məskokolo

(MAT 8:1-4; MAR 1:40-45)

12Aka Yesu adawsan a walaŋgəla-metiŋ maɓɓani, məskokolo adeke. Adan awla Yesu, ndən kup də magədəvən akkaman dawnəh na: Daya, an kəŋgəlka akəɓap əbburwa, 13Yesu atələk vani, arəŋgəni, amna: Nətafəka ambələ. Yas ləŋ kokolo appani. 14#MƏS 14:1-32Yesu abayək mani: Kədawnah sən ɗəf ɓa, ya dok ərban zuk aza məsdəlva, aɗɗa əvəl sən Maŋgəlva ammba əbbur nok va Moyis aɗi wən nani, vi karban sit na kəmbəlka. 15Əpel aka wən na Yesu tay ətəray abe abe. Ɗiy diyɗa azzoŋguk azani vi kaprəm əpel nani gəm kawrəh əmbla səka gbəgba' neti. 16Yaŋ abit a kapta-muyã takərgən va ɗaɗay kakkama.

Yesu tay əmbəlgən ɗəf zən məmtəni

(MAT 9:1-8; MAR 2:1-12)

17Yaŋ pay mbərən Yesu tay əɗɗa əyaka. Farisaɗe dit mərbaŋ-mahenziŋ tahəŋ gurom gurom a maŋgavani, azzoŋ səweleŋgit gəleɗe naka dələv na Galile, sə Yude mãy sə Yerusalem. Əɓap na Daya tay də Yesu dəmbəlgitigin məs gbəgbaɗe. 18Ɗiy akinənək ɗəf zə məmtən aka zəga nawvoŋgo, akayaŋgək tive nawtoŋgən aza Yesu, vi kawvoŋgən abani. 19Ya adan ɗiy tahəŋ diyɗa na, dəsənnən dəŋga adawtoŋgənən di ɓa, ndəɗaŋ peŋ aka gəla, ahokoŋ ki gəla vani, aprikgənən dədak də zəga nawvoŋ, addak təki aba Yesu. 20Adan Yesu awla ətaf neti, amna: Ɗəfa, mambray nok avvuyko.

21Mərbaŋ-mahenziŋ dit Farisaɗe atəŋgaŋgək əɗɗum a mekret dawnəh na: Ɗəf naŋgay aŋ məpel mbərayən aka Maŋgəlva əŋ di? Naway məvvuyon mambray an Maŋgəlva yi ɓa di? 22Yesu asənək əɗɗum neti, azlani, aɓsit na: Vimi kədaɗɗumoŋ vas a mokrokum di? 23Mi məza tuwãhi ɓa day di? Ənah sən ɗəf na mambrayɗe nok avvuyoŋko sa awaniɓa ənah sən na: Asili doko? 24Ya vi kəsənəngən na Wətən Ɗəf tay də gagdak navvuyon mambray aka dəlva na, yaŋ anah sən ɗəf zə məmtən nak na: Anok nədawnah suko, asili, agəm zəga nawvoŋ noko dok eŋgil anokda. 25Yaŋ ləŋ asili keret ɗiy pakə, agəm zəga məs avoŋ akan naka, ndən mbat eŋgil ananda də əgagdakan Maŋgəlva. 26Ɗiy pak assoŋgək gərəŋgə, agagdakanənək Maŋgəlva, geslne adeke, aɓɗaŋ na: Dəpaŋ zəgeɗ naggət aketi.

Yesu tay əya Levi

(MAT 9:9-13; MAR 2:13-17)

27Ya dərɓaga aska, Yesu agilke, awlak məkkal nzalaka, iya nan na Levi, tuŋngo addəv gəla nawfaɗ nzalaka. Aɓsən na: Azbawa. 28Levi appetik zəgeɗ pakə, asil azbani.

29Levi adə sənək waynabaya sən Yesu ananda. Məkkalaŋ nzalaka diyɗa dit ɗiy meɓɓet assoŋguk əzəm dənɗaŋ. 30#LUK 15:1,2Farisaɗe dit mərbaŋ-mahenziŋ net aɗɗaŋgək wərwər, aɓsitin gewleɗ nan na: Vimi kədawzəmaŋ mãy kədawsaŋ dit məkkalaŋ nzalaka gəm dit məs mambrayɗe di? 31Yesu aɓsit na: Ɗiyen də zay na gəɓa zitiŋ də wəray na zloktor an məs gbəgbaɗeŋ ɓa ɓa. 32Nəde vi kawye ɗiy en salala ɓa, abbər ɗiy mbəreyit dəɗiyaŋgən marava ɓa.

Yesu gəm əɗɗa meme

(MAT 9:14-17; MAR 2:18-22)

33Yaŋ aɓsənən na: Gewleɗ na Yohanna tay əɗɗaŋ meme gəm əkkam ɗayɗayə dit gewleɗ net Farisaɗe pakə, ya en nok na, ndəɗaŋ əzəmaŋgə, əsaŋgə. 34Yesu aɓsit na: Akəɓapnən ənah sit ɗiy miyet a təki əɓel dəɗɗaŋgən meme aka afən əɓel van tay dənɗaŋ sa? 35Ya pay wade, Kawgəmni afən əɓel sə waleŋti, asna pay nan waɗɗaŋ meme. 36Yesu anah sitik wənməkkpaŋga əmpa, amna: Ɗəf tay nawŋgar səza lukut meleketen kawɗisən lukut məzvan dəndən ɓa, vasna məŋgarni an meleketeni, ya an məŋgar səza meleketen van asap na də an məzvan ɓa. 37Ɗəf tay nawzi mbazla na meketepe addivit kenekeneɗ məzvet ɓa, vasna mbazla na meketepe waɓih kenekeneɗ veti, wambat afuŋ, kenekeneɗ vet warayaŋgə. 38Ya aslək əzi mbazla na meketepe addivit kenekeneɗ meleketeni. 39Ɗəf dəsə mbazla məzvani, aŋgla an na meketepe ɓa, ndən ənah na, an məzvan nenek day.

Currently Selected:

Luka 5: GB

Highlight

Copy