Luka 4

Va məsla Yesu

(MAT 4:1-11; MAR 1:12-13)

1Yesu aknahək də Zeŋgile Salala, amə'ək sə Yurdeŋ, Əmpəs akak a kapta-muyã. 2Satan arakanək adak pay kaklaw poɗo. Payəs pak dəzəm zəga ɓa. Adan pay nan agrakə, may armaka. 3Satan aɓsən na: An Wətən Maŋgəlva kənan na, anah sən gərməŋka dəkkpaŋgən zəga nawzəma. 4#ƏMS 8:3Yesu azlan sənək na: Məverni na: Ɗəf asan na madaran vi way kaka ɓa.

5Satan akak a disiŋ, addəv hara ɗəf pilim taka ləŋ arbet sin milyeŋɗe naka dələv pakə, 6aɓsən na: Wanəpsuk gagdakəŋ pakə də arya naddivit məlyeŋge vet pakə, vi su məpsuwa, naw van tam wanəpsən ɗəf an nəŋgəl pakə. 7An kukdukuk abawa, wasan suk bayman pakə. 8#ƏMS 6:13Yesu azlani, aɓsən na: Məverni na: Yawe Maŋgəlva noki yi kədawgeslne' səni, anan kədawgəɗ sən wəza.

9Yaŋ Satan aka a Yerusalem əmpa, aɗi aka dadwar ki Gəla na Maŋgəlva, aɓsən na: An Wətən Maŋgəlva kənan na, azlah saŋ hã afuŋ; 10#GLƊ 91:11,12vi məverni na: Maŋgəlva waɗi wən nan sit maslayɗe nani vi dəgukungəni; 11gəm dəkaslkungən aka veti, vi tuluk adawtaŋgbãy aza gərəm ɓa. 12#ƏMS 6:16Yesu azlani, aɓsən na: Tay mənahən na: Kədawrakan Maŋgəlva Daya nok ɓa. 13Səza Satan agrak ərakan pakə, azarək səzani, əga pay mbərən əmpa.

Wəza na Yesu a ma heret ɗiy ta' a Galile

(4:14—9:50)

Yesu tay ətəŋ wəza nan a Galile

(MAT 4:12-17; MAR 1:14-15)

14Yaŋ Yesu amndan aka dələv na Galile, aknahək də gbogboŋ na Zeŋgile Salala. Atəŋgaŋgək əpel wən nan aka kivadələv van pakə. 15Ayagetik ɗiy addəv gəla nakkal net mə Yudeɗi, ɗiy pak agagdakanənka.

Ɗiy na Nazaret dətafnən Yesu ɓa

(MAT 13:53-58; MAR 6:1-6)

16Yaŋ Yesu ambat a Nazaret, a walaŋgəla məs aɓayə. Pay naffet na atoŋguk addəv gəla nakkal net mə Yudeɗ va an adaɗɗa ɗayɗay. Asilik vi kaŋɗan ɗerewel, 17apsənənək ɗerewel na məskəleŋ Isaya, akoluk ɗerewel, arəhək təki məs məverin vaŋka:

18 # ISA 61:1,2 Əmpəs na Daya tay akawa,

vi awelwək nəpelgən alabara nenek sit məssãhẽŋɗe,

aslənwək kawtəl ma nappet ɗiy mərmeti,

vi kawkol sit heret deŋgerɗe,

vi kawkõhgit məzuzəmaŋ sahã.

19Vi kawtəl ma aka wən na əzva an Daya adarban mbəlembəle nani.

20Yaŋ ampan ɗerewel naka, apsən məzəbbaha, asani. Ɗiy naddəv gəla nakkal net Yudeɗ pak heret azan yõ'. 21Yaŋ atəŋ ənah sit na: Dəpaŋ na an məverniŋ məs kəprəmaŋgəŋ na aknahka. 22Ndəɗaŋ pak tay əpeleŋ moggon akani, aggətaŋgək aka əpel nan moggon dədawgilyen sə mani, aɓɗaŋ na: Ndəni wətən Yosef ɓa sa? 23Yesu aɓsit na: Gesiŋ, wakənahaŋ suwən wənməkkpaŋgaŋka: Zloktor, anzaɗ kizuko. An kəgəɗ a Kafarnahum məprəm pakə, aɗɗa aŋ aka dələv nokuŋ tamə. 24#YOH 4:44Yaŋ amna: Gesiŋ nədawnah sukum, məskəleŋ tay tətaka adawtafaŋ aka dələv nan də moggon ɓa. 25#1MI 17:1Gesiŋ nədawnah sukum, gil net gəbayɗe tahəŋ a Israyel diyɗa aka pay na məskəleŋ Eliya, aka buwən dəzi ɓa addəv əzva hoku də təla sləre, may metiŋgin agəɗ ammba dələv pakə; 26#1MI 17:8-16ya məsləni Eliya azat tətaka neret ɓa, abbər azat gagəbay taka a Sarepta aka dələv na Sidon. 27#2MI 5:1-14Məskokoleɗ tahəŋ diyɗa a Israyel aka pay na məskəleŋ Elisa. Ya tətaka naret tay dəmbəl ɓa, abbər Na'aman mə Siri ɓa ɓa.

28Səza aprəmənən wənəska, pakgit səddəv gəla nakkal net mə Yudeɗ gədivit adəka. 29Ndəɗaŋ hir, arɓahanən sə walaŋgəla-metiŋ, akanən hã aka təki sərohho na mossorgo metiŋ məs mərka walaŋgəla net akani, vi kawslaŋgən afuŋ. 30Ya ndən vit də waleŋti, tive nan gəmə.

Ɗəf məs wətem adawzəmgən sahã

(MAR 1:21-28)

31Yaŋ aprik a Kafarnahum, walaŋgəla-metiŋ na Galile, agəɗ sit əyak pay naffete. 32#MAT 7:28,29Aggətaŋgək aka əyak nani, vi əpel nan tay də gagdaka. 33Ɗəf tay addəv gəla nakkal net mə Yudeɗ van də əmpəs na ziwir, aŋgəzlək vaŋvəl dayadaya na: 34Aw! Yesu mə Nazaret miyi nok də mənam di? Vi kawzam kəde sa? Nəsənkuko, istə: Salala na Maŋgəlva. 35Yaŋ Yesu ahayãn dawnəh na: Aɓətə, agil səka dəfəŋka. Yaŋ ziwir van azlba ɗəf nak mək afuŋ aweleŋgit ɗiyi, agil səkan məza əgəɗ sən mbərayən ɓa. 36Ɗiy pak geslne armeke, apeleŋgik a walaŋ zit dawnəh na: Wən mi aŋ di? Tay əhẽyet ziwirɗe də gagdaka gəm də wəɓapa, ndəɗaŋ əgulyoŋgu. 37Sləman atrayək təki pak aka kivadəlva.

Yesu tay əmbəlgit məs gbəgbaɗe diyɗa

(MAT 9:14-17; MAR 1:29-34)

38Ndən vit səddəv gəla nakkal net mə Yudeɗi, ndən mbat ana Simoŋ da. Gamba mbərayən agəmtək tatən mat goni, akkamanənək aka wən nata. 39Ndən akat ɓe', ahãyãn gamba naka yaŋ gamba van appata. Ndət ləŋ le' təŋ əpsit əzəma.

40Moskoy təki zayə, ɗiy en dit məsgbəgba'ɗe net gbəgba'ɗe temtem akisəninke; yaŋ aɗi van aket takataka ambəlgiti. 41Ziwirɗe pak agulyoŋguk səket ɗiy diyɗa daŋzla vaŋvəl dawnəh na: «Wətən Maŋgəlva kənani.» Yaŋ ahayẽti, atekik dawpele, vi asənnənək na ndəni Kristu.

Yesu tay əpel addivit gəleɗe nakkal net mə Yudeɗi

(MAR 1:35-39)

42Adan təki addaŋgə, ndən vit ambat a kapta-muyã, vandayɗe net ɗiy atəŋgənək əkayani, azzoŋ hã azani; met aka dəsangəni, adawzar səzet ɓa. 43Yaŋ aɓsit na: Aslək nəpelgən alabara nenek na məlĩ na Maŋgəlva a walaŋgəleɗe gugriɗ meɓɓeti; vi sən aski məslənwa. 44Apelik wən na Maŋgəlva addivit gəlaɗe nakkal net mə Yudeɗ na Yude.

Currently Selected:

Luka 4: GB

Highlight

Copy